Lilulieke Hakutwala ku Tangwa lia Yehova

1. Yika twatamba kulinga mba tukalilamwine ha tangwa lia Yehova?

MALIJI tangwa lia Yehova mu Mbimbiliya, kanatale ha mashimbu waze Yehova akupatwila akwa-kole jenyi, ni kuneha yiwape hali tuvumbi twenyi. Yino yalingiwile ku mashimbu a kunyima. (Iza. 13:1, 6; Eze. 13:5; Zefa. 1:8) Ha mashimbu jetu, tangwa lia Yehova mulikaputuka muze manguvulu makalukukila Babilonia Yinene; mulikahwa ku songo lia jita ya Armagedone. Mba tukalilamwine ha tangwa liacho, tunafupiwa kulilulieka haliapwila. Yesu kalongesele ngwenyi, twatamba kulilulieka hakutwala ku “luyinda munene.” Maliji wano kanasolola ngwo, twatamba ‘kununga ni kulilulieka.’—Mateu 24:21; Luka 12:40.

2. Mumu liaka 1 A-Tesalonika uli ni ulemu kuli yetu?

² Ha mukanda utangu uze asonekenene A-Tesalonika, Paulu kazachishile yilweza yeka ni yeka, ha kukwasa Akwa-Kristu hanga alilulieke hakutwala ku tangwa linene lia Yehova. Paulu kanyingikine ngwenyi, tangwa lia Yehova te kulichi kwiza ha mashimbu jacho. (2 Tesa. 2:1-3) Chipwe chocho, yakwasa mandumbu jenyi hanga alilulieke hakutwala ku tangwa liacho, ngwe lize te hiliakundama. Ni yetu mutuhasa kukaula chiyulo chino. Mutumona yize Paulu alumbunwine hakutwala: (1) chize tangwa lia Yehova mulikeza, (2) aya waze kechi kalilamwina ha tangwa lia Yehova, ni (3) chize mutuhasa kulilulieka mba tukalilamwine ha tangwa liacho.

KUCHI TANGWA LIA YEHOVA MULIKEZA?

3. Mu mutapu uka tangwa lia Yehova mulikeza ngwe mwiji ha ufuku? (Tala nawa chizulie.)

³ “Ngwe mwiji ha ufuku.” (1 Tesa. 5:2) Chino chili chilweza chitangu ha yilweza yitatu yize Paulu azachishile, hanga alumbunune chize tangwa lia Yehova mulikeza. Kanji-kanji, eji kakwiya chinji yuma ha ufuku ha maola waze atu keshi ni kunyonga hali ayo. Ni tangwa lia Yehova nelio mulikeza susumuku, ha maola waze atu keshi ni kulishimbwila. Yuma muyikalingiwa kafuji-fuji yize kota muyikakomwesa chipwe Akwa-Kristu amwenemwene. Alioze kulisa ni atu api; yetu kechi katunongesa.

4. Kuchi tangwa lia Yehova linalite ni pwo yoze unambe kusema?

⁴ “Ngwe kufumbajala cha pwo yoze uli ni ufumba.” (1 Tesa. 5:3) Pwo yoze uli ni ufumba, kanyingikine pundu ola yize masema. Alioze iye kakupwa ni shindakenyo ngwenyi, masema. Susumuku, maheta ha ola yize anambe kushita, chocho yikola muyiliwezela chinji. Chizechene nawa, kutwanyingikine mashimbu ni ola yize tangwa lia Yehova mulikaputuka. Alioze tunanyingika ngwetu, kumulikeza pundu. Upatwilo wa Yehova muukeza kafuji-kuji, chocho atu api kechi kahasa kulilamwina.

5. Kuchi luyinda munene analite ni kuvumbuka cha tangwa?

⁵ Ngwe kuvumbuka cha tangwa. Ha chilweza chamuchitatu, Paulu yahanjika nawa hakutwala kuli eji waze akwiya yuma ufuku. Alioze ha chisuho chino, iye yatesa tangwa lia Yehova ni kuvumbuka cha tangwa. (1 Tesa. 5:4) Eji mahasa kulihana chinji mu kwiya yuma chakuhona kunyonga ha chize tangwa linapalika. Kwilu mukuhasa kucha muze ayo keshi ni kushimbwila, chocho atu maamona. Luyinda munene makasolola atu apwa ngwe eji waze ananungu mu milima ha kulinga yuma yize Zambi keshi kuzanga. Kulisa ni atu jacho, yetu twatamba kwecha yuma yeswe yize Yehova keshi kuzanga ni ‘kusolola utu mu yuma yeswe, kupwa akwa-ululi ni kutwama kulita ni umwenemwene.’ (Efwe. 5:8-12) Kusulaho, Paulu yazachisa yilweza yaali hanga asolole atu waze kechi kalilamwina ha tangwa lia Yehova.

AYA WAZE KECHI KALILAMWINA HA TANGWA LIA YEHOVA?

6. Atu anji kanayi tulo mu mutapu uka? (1 A-Tesalonika 5:6, 7)

⁶ ‘Waze anayi tulo.’ (Tanga 1 A-Tesalonika 5:6, 7.) Paulu kanatese atu waze kechi kalilamwina ha tangwa lia Yehova ni waze anayi tulo. Atu jacho kanyingikine chize tangwa linapalika ni yize yinalingiwa haze anapombo. Kashika, akununga chakuhona kulinga nichimwe mumu keshi kuhasa kunyingika yuma yilemu yize yalingiwako. Atu anji musono kanayi tulo a ku ufulielo. (Roma 11:8) O keshi kutayiza ngwo, tuli “ha matangwa a kusula” nawa ngwo, hikwasala hakehe hanga luyinda munene aputuke. Muze hano hashi hakulingiwa yuma yipi, ngwe jita ni misongo, ayo kakuhinduka ni kuputuka kuzanga sango jipema. Alioze shimbu anunge ni kulawola, kakufuna nawa ni kupomba. Chipwe waze akutayiza ngwo, tangwa lia Yehova muliza, nihindu kakunyonga ngwo mulishimbula kulichi kwiza haliapwila. (2 Petu. 3:3, 4) Alioze, yetu tunanyingika ngwetu chili chilemu kununga ni kulawola.

7. Mu mutapu uka atu waze makanongesa ha tangwa lia Yehova ali ngwe yizengi?

⁷ “Waze akuzengewa.” Paulu katesele atu waze Zambi makanongesa ni yizengi. Mutu yoze wazengewa, keshi kuhasa kunyingika kanawa yize yinalingiwa haze ali, kashika kakukwata yiyulo yipi. Chizechene nawa, atu api keshi kukaula utowezo wa Yehova. Ayo kakusakula mwono uze mukaatwala ku kwonwona. Alioze Akwa-Kristu, kakusa tachi hanga anunge ni kulawola hanji ngwetu kukanyama ha kukwata yiyulo yipema. (1 Tesa. 5:6) Umwe yoze wa kuhengwola sango ja mu Mbimbiliya kanalumbununa ngwenyi: “Mutu yoze wakununga ni kulawola kakuhwima mbunge nawa keshi kwivwa woma; kakuhasa kunyonga kanawa ni kukwata yiyulo yipema.” Mumu liaka chino chili chilemu? Chili chilemu, mumu muchitukwasa hanga tuhone kulinjisa mu yuma ya mafwefwe ni mu yuma yikwo ya hano hashi. Amu tunayi ni kukundama ku tangwa lia Yehova, chino muchitwala akwa-hashi hanga atushinjile kulinga yuma yacho. Alioze, kutwatambile kulihulumba ha chikuma chacho. Spiritu ya Yehova muyitukwasa kuhwima mbunge ni kukwata yiyulo yipema.—Luka 12:11, 12.

KUCHI MUTUHASA KULILULIEKA HAKUTWALA KU TANGWA LIA YEHOVA?

8. Kulita ni 1 A-Tesalonika 5:8, kuchi mutuhasa kulilulieka hakutwala ku tangwa lia Yehova? (Tala nawa chizulie.)

⁸ ‘Tuzalenu chipwiko cha utale . . . ni tepa lia utale.’ Paulu kanatutese ni maswalale waze halilulieka hanga aye ni kwasa jita. (Tanga 1 A-Tesalonika 5:8.) Atu kakushimbwila ngwo, swalale katamba kulilulieka hanga ase jita ha shimbu lieswalio. Yino ye yakulingiwa ni kuli yetu. Mba tulilulieke hakutwala ku tangwa lia Yehova, tunafupiwa kuzala chipwiko cha ufulielo ni cha zango ni tepa lia kutalatala. Yitanga yino muyihasa kutukwasa chinji.

9. Kuchi ufulielo wetu wakutufunga?

⁹ Chipwiko te chakufunga mbunge ya swalale. Ufulielo ni zango; yakufunga mbunge yetu ya muchima. Yitanga yino, muyitukwasa kununga ni kulingila Yehova ni kukaula Yesu. Ufulielo wakutukwasa kupwa ni shindakenyo ngwetu, Yehova makawahisa waze eswe akumulingila ni mbunge yeswe. (Hepre. 11:6) Wakutukolweza nawa kununga ni kushishika kuli Kasongo ketu, Yesu, chipwe ngwe mutupalika mu yipikalo. Mba tukolese ufulielo wetu ni kunyongonona, mutuhasa kulilongesa ha yilweza ya mandumbu jetu waze akununga ni kushishika chipwe ngwe kakupalika mu yihungumiona ni mu yipikalo. Chikwo nawa, mutuhasa kwehuka muheto wa kuzanga yikumba ha kwimbulula mandumbu jetu waze anakashiwisa mwono hanga ase Wanangana wa Zambi ha chihela chitangu.b

10. Kuchi kuzanga Zambi ni enyembo jetu chakutukwasa kunyongonona?

¹⁰ Mba tununge ni kulawola, tunafupiwa kupwa ni zango. (Mateu 22:37-39) Kuzanga Zambi, chakutukwasa kunyongonona mu mulimo wa kwambujola chipwe ngwe chino muchitunehena lamba lieswalio. (2 Timo. 1:7, 8) Yetu nawa twakusolola zango kuli atu waze keshi kulingila Yehova. Kashika, twakununga ni kwambujola mu njiza yetu ha kuzachisa matelefone ni kusoneka mikanda. Twakufuliela ngwetu, tangwa limwe atu jacho mahasa kwalumuna yitanga yo ni kulinga yize yalita.—Eze. 18:27, 28.

11. Kuchi zango hali mandumbu jetu liakutukwasa? (1 A-Tesalonika 5:11)

¹¹ Kuzanga mwenyembo chinachingi nawa kuzanga mandumbu jetu. Mutuhasa kuchilinga, ha ‘kulikolweza ni kulitakamisa umwe ni mukwo.’ (Tanga 1 A-Tesalonika 5:11.) Ngwe chizechene maswalale akukalakala hamuwika hanga ase jita, ni yetu twakukalakala hamuwika ha kulikolweza umwe ni mukwo. Mu jita, swalale mahasa kuloza mukwo chakuhona kunyingika, alioze iye kechi kuhasa kuchilinga ku tachi. Chizechene nawa, kutwazangile kulemeka mandumbu jetu ku tachi hanji kwafunyishina upi ha upi. (1 Tesa. 5:13, 15) Twakusolola nawa zango ha kuvumbika mandumbu waze akusongwela chikungulwila. (1 Tesa. 5:12) Muze Paulu asonekenene Akwa-Tesalonika mukanda, chikungulwila chacho te hichalinga mwaka umuwika chize haze achiputukile. Mandumbu waze akusongwela kota te kanda achipwa ni yinyingi yinji, chikwo nawa kota te kakuhengesa-hengesa yuma. Chipwe chocho, mandumbu katambile kwavumbika. Muze tunayi ni kukundama ku luyinda munene, muchifupiwa kujikijila chinji muli makulwana ni kukaula usongwele wo. Muchihasa kupwa ngwe ha mashimbu amwe, mutuhona kutambula usongwelo kukatuka ku chishina chinene ni ku mutango. Kashika, chili chilemu kulilongesa kuzanga ni kuvumbika makulwana a mu chikungulwila chetu kukatuka haliapwila. Chipwe ngwe mukulingiwa yuma yeswayo, tunafupiwa kununga ni kulawola chakuhona kulihulikila ha uhenge wa mandumbu jetu, alioze kulihulikila ha ulemu wa kunyingika ngwo, Yehova ni Kristu kanasongwela malunga wano ashishika.

12. Kuchi kutalatala chakufunga manyonga jetu?

¹² Ngwe chizechene tepa te liakufunga mutwe wa swalale, kutalatala chetu cha ulamwino chakufunga manyonga jetu. Kutalatala chetu chingunu, chakutukwasa kunyingika ngwetu, yuma yize yili hano hashi kuyishi ni ulemu niumwe. (Fwili. 3:8) Kutalatala chetu chakutukwasa kununga ni kuhwima mbunge ni kumana ngu. Yino ye yalingiwile kuli Wallace ni Laurinda, waze akukalakala mu África. Hita umwe wa kuli ayo, kafwishile chisemi mukachi ka poso jitatu. Chikwo nawa, mumu lia musongo wa COVID-19, o kakahashile kufuna ku chifuchi cho hanga ameneke asoko. Wallace yamba ngwenyi: “Kutalatala cha uhindukilo, chakungukwasa kunyonga hali yisemi jetu waze afwile, hi ko ngwe chize apwile shimbu te kanda achifwa, alioze ngwe chize makapwa muze makaahindwisa mu chifuchi chaha. Kutalatala chino chakunguhwimisa mbunge muze ngunanenganyana ha kwiwuluka yuma yize yalingiwile ku mwono wetu.”

13. Yika mutuhasa kulinga mba tutambule spiritu yisandu?

¹³ ‘Kanda nujima kahia ka spiritu.’ (1 Tesa. 5:19) Paulu katesele spiritu yisandu ni kahia kaze kali muchima lietu. Muze tuli ni spiritu ya Zambi, twakupwa ni zango linji lia kulinga yuma yize yalita, ni tachi ja kulingila Yehova. (Roma 12:11) Mba yika twatamba kulinga hanga tutambule spiritu yisandu? Mutuhasa kulemba hanga twite spiritu yisandu, kulilongesa Liji lia Zambi ni kulinga chihanda mu ululikiso wenyi. Kulinga chino, muchitukwasa kwima ‘muhuko wa spiritu.’—Ngala. 5:22, 23.

14. Nyi tunazange kununga ni kutambula spiritu ya Zambi, yika twatamba kwehuka? (Tala nawa chizulie.)

¹⁴ Muze Yehova matwaha spiritu yisandu, twatamba kukeya hanga tuhone ‘kujima kahia ka spiritu.’ Yehova kakuhana spiritu yenyi yisandu, kuli waze akulinanga mu manyonga ni ku yitanga. Iye kechi kutwaha spiritu yisandu nyi mutununga ni kunyonga ha yuma yipi, hanji kulinga chuma chize keshi kuzanga. (1 Tesa. 4:7, 8) Chikwo nawa, mba tununge ni kutambula spiritu yisandu, kutwatambile ‘kulelesa uprofeto.’ (1 Tesa. 5:20) “Uprofeto” uno, unachingi sango jize Yehova akutwaha kupalikila mu spiritu yenyi hakutwala ku upatwilo wenyi ni yize twatamba kulinga haliapwila. Yetu kutushi kunyonga ngwetu jita ya Armagedone kuyichi kwiza ni kawashi. Shimbu tunyonge chocho, twakuyishimbwila hanga yize kawashi. Twakuchilinga ha kupwa ni yitanga yipema ni kulihana mu milimo ya Zambi matangwa eswe.—2 Petu. 3:11, 12.

‘SENU SHINDAKENYO HA YUMA YESWE’

15. Yika twatamba kulinga mba ahone kutupiangula ku milolo ya mahuza ya andemoniu? (1 A-Tesalonika 5:21)

¹⁵ Kwasala hakehe, akwa-kole ja Zambi matwa mutambi wa ‘sambukila ni kutwama kawape!’ (1 Tesa. 5:3) Andemoniu makamwanga milolo ya mahuza hashi eswe yize muyikapiangula atu anji. (Uso. 16:13, 14) Mba yika mutwamba hali yetu? Yetu kechi katwonga nyi ‘mutusa shindakenyo ha yuma yeswe.’ (Tanga 1 A-Tesalonika 5:21.) Liji lia Ngregu analumbununa hano ngwo ‘kusa shindakenyo,’ kakulizachisa hanga eseke oru ni prata atale nyi yili lume yamwenemwene. Kashika, twatamba kusa shindakenyo nyi yize twakutanga ni kwivwa yili lume yamwenemwene. Yino yapwile ni ulemu kuli Akwa-Tesalonika; yili nawa ni ulemu unji kuli yetu muze songo lia hano hashi linayi ni kukundama. Shimbu tutayize yuma yeswe yize atu akwamba, twatamba kuzachisa uhashi wetu wa kunyonga hanga tutese yize twakwivwa hanji twakutanga ni yize Mbimbiliya ni ululikiso wa Yehova yakulongesa. Nyi twachilinga, kechi katupiangula ku milolo ya mahuza ya andemoniu.—Yishi. 14:15; 1 Timo. 4:1.

16. Shindakenyo yika tuli nayo hakutwala kulutwe lia matangwa, mba yika tunazange kulinga?

¹⁶ Tunanyingika ngwetu ngwe chizavu, tuvumbi twa Yehova makalilamwina ku luyinda munene. Alioze, kutwanyingikine yize muyikalingiwa kuli hita umwe wa kuli yetu. (Tia. 4:14) Chipwe ngwe mutukapwa ni mwono ha luyinda munene, hanji makatuwana hitwafwa, nyi mutununga ni kushishika Yehova makatuwahisa ni mwono wa mutolo. Akwa-Kristu akuwayisa makatwama ni Yesu mu malilu. Mapanga akwo, makatwama mu paraisu hano hashi. Kashika, twatamba kulihulikila ha kutalatala chetu chipema, ni kulilulieka hakutwala ku tangwa lia Yehova.