MWONO WA AKWA-KRISTU

Chikuma Chaha Chakuzachisa ha Kukunguluka Hakachi ka Poso

Kuputuka ha kakweji wa Janeiro wa 2018, katalilo wa kunguluka chetu meza nawa ni yikuma yikwo yakulilongesa ni yizulie ya yinema, mayichiza mu Mbimbiliya yaha yakulilongesa, ya Tradução Do Novo Mundo Da Bíblia Sagrada (nwt), yili ha site, chipwe ngwe Mbimbiliya yacho mu limi lie kuyishimo. Kwamba pundu chikuma chino muchitukwasa kululieka kanawa kukunguluka chetu. Yikuma yacho, muyitukwasa chinji kukundama kuli Tata wetu wa zango, Yehova!

YIKUMA YA KULILONGESA

Yikuma ya kulilongesa muyilumbununa ndako, yifuchi, ni malimi anji waze anasolola mu versu ja Mbimbiliya.

Mateu 12:20

Muya wa ndeya uze wakuneha mwishi: Mienda te akuzachisa chinji mu ma zuwo yapwile ya chikashi cha uma nawa te kakusamo maji olevwe. Kapwile ni kusamo muya ni kuukwachisa kahia. Liji lia Ngregu “muya wa ndeya uze wakuneha mwishi” mulihasa kulumbunuka muya uze unafwinda mwishi mumu kahia kako kanayi ni kujima. Uprofeto uli mu Izaia 42:3, wahanjikile hakutwala ku keke ya Yesu; iye kakajimine kutalatala cha atu waze te akulikehesa nawa te akunyenganyana.

Mateu 26:13

Pundu: Liji lia Ngregu, a·men, analumbununa mu Hepreu ngwo ʼa·menʹ linalumbunuka “ewa” hanji “chochene.” Yesu te kakuzachisa chinji liji lino hanga atu apwe ni ushindakenyo ngwo, chilakenyo hanji uprofeto muukamanunuka pundu nawa ngwo, katamba kuufuliela. Yesu nawa te kakuzachisa chinji liji “pundu” hanji amene, kashika liji lino lili wika mu yisoneko yisandu. Yesu kapwile ni kuhilukila chinji liji lino (amene, amene), ngwe chize alilumbununa mu Evanjelu ya Yoano, ngwo, “Pundu pundu.”—Yo 1:51.

CHINEMA

Foto, yizulie, yinema, ni yilweza ya yiheho yikwo anasoneka mu Mbimbiliya.

Mbetefweje, Mulundu wa Olevwe, ni Yerusaleme

Chinema chino chikehe chinasolola yimwe mbonge yili hakamwihi ni Yerusaleme, mbonge yacho haliapwila kakuyivuluka ngwo, et-Tur—kota hehapwile Mbetefweje yize anavuluka mu Mbimbiliya—ha Mulundu usuku wa Olevwe. Mbetaniya yili hakamwihi ni Mbetefweje ku chivumbuko cha Mulundu wa Olevwe. Muze Yesu ni tumbaji jenyi apwile mu Yerusaleme, te ha ufuku kakuyaya mu Mbetaniya, ye anavuluka musono ngwo, mbonge ya el-ʽAzariyeh (El ʽEizariya), jina lia Arabia linalumbunuka “Chihela cha Lazaru.” Yesu te kakutulila ku zuwo lia Marta, Maria ni Lazaru. (Mat 21:17; Mar 11:11; Lu 21:37; Yo 11:1) Muze te akulinga wenyi wa kukatuka ku zuwo lio ndo ku Yerusaleme, Yesu te kota kakwenda mu jila ngwe yino anasolola ha chinema. Ha tangwa 9 lia Nisane, 33 M.J., muze Yesu anyiyine ha chimbulu ha Mulundu wa Olevwe hanga anjile mu Yerusaleme, iye kota kapalikile mu Mbetefweje ni kununga ndo ku Yerusaleme.

Jila yinakatuka ku Mbetaniya ndo Mbetefweje
Mbetefweje
Mulundu wa Olevwe
Chitwetwe Kendrone
Mulundu wa ku Tembele

Lumbambo wakuhata ha chifwaha cha kashijino

Chizulie chino chili cha chifwaha cha kashijino wa mutu chakuhata ni lumbambo musuku wa 11.5 cm (4.5 in.). Chifwaha chitangu kachiwanyine ha mwaka 1968, ha mashimbu waze ashikulwile yuma ku sango ya Yerusaleme, nawa cha ha mashimbu ja A-Roma. Chino chinahana ushindakenyo kuli akwa-kushikulula ngwo mbambo kapwile ni kujizachisa hanga ahate najo atu ha mutondo wa lamba. Chifwaha chino kachiwanyine mu muxete wa liwe, lize te akuvuluka ngwo utulikilo wa yifwa, mu liwe liacho mwe apwile ni kusa yifwaha ya atu waze apwile ni kushiha.