Kuchi Sango Lipema Analiambujola?

Kwasala hakehe, Yehova mahwisa lamba lieswe hano hashi kupalikila mu Wanangana wenyi. Au kali lusango mupema, kashika atu eswe katamba kumwivwa. Yesu kazangile hanga tumbaji twenyi ambujole lusango wacho kuli atu eswe! (Mateu 28:19, 20) Kuchi Yela ja Yehova akwononokena shimbi yino ya Yesu?

1. Kuchi maliji ali ha Mateu 24:14 anamanunuka musono?

Yesu kambile ngwenyi: “Sango lino lipema lia Wanangana kumakaliambujola mu yifuchi yeswe ya hashi.” (Mateu 24:14) Yela ja Yehova kakuwahilila chinji ha kulinga mulimo uno ulemu. Twakwambujola sango lino hashi heswe mu unji wa malimi kuhiana 1.000. Mulimo uno unene wakufupiwa tachi jinji ni kulilulieka kanawa. Nyi kutushi ni ukwaso wa Yehova, kachi kutushi kuuhasa.

2. Tachi jika twakusa hanga twambulwile atu sango lipema?

Twakwambujola ku yihela yeswayo kuze twakuwana atu. Twakwambujola ku “zuwo ni zuwo” chizechene ngwe akwa-Kristu atangu apwile ni kulinga. (Yilinga 5:42) Mulali au wa kwambulwilamo, wakutukwasa kuwana tununu twa atu hita mwaka. Amu mashimbu amwe atu keshi kupwa ku mazuwo, kashika twakwambujola nawa ha mbunga. Twakufupa-fupa majila a kulwezelamo atu hakutwala kuli Yehova ni upale wenyi.

3. Iya yoze uli ni chiteli cha kwambujola sango lipema?

Akwa-Kristu eswe amwenemwene kali ni chiteli chakwambulwila akwo sango lipema. Twakulemesa chinji mulimo wacho. Twakusa tachi hanga twambujole chinji mumu tunanyingika ngwetu, mwono wa atu anji mu ponde uli. (Tanga 1 Timoteu 4:16.) Keshi kutufweta ha mulimo wacho, mumu Mbimbiliya yinambe ngwo: “Hinunatambula wana, hanenu wana.” (Mateu 10:7, 8) Hi atu eswe ko akuzanga kupanjika sango jetu. Chipwe chocho, twakununga ni kwambujola mumu twakwononokena Yehova ni kumuvwisa kuwaha.

NYINGIKA NAWA

4. Twakusa tachi hanga twambulwile atu eswe

CHINEMA: Kwambujola ndo “ku Masongo a Hashi” (7:33)

• Yika yakukukomwesa ha tachi jize Yela ja Yehova akusa hanga ambujole?

Tanga Mateu 22:39 ni A-Roma 10:13-15, mba nushimutwine yihula yino:

• Kuchi mulimo wetu wa kwambujola wakusolola zango lietu hali enyembo jetu?

• Kuchi Yehova akumona atu waze akwambujola sango lipema?—Tala versu 15.

5. Tuli akwa-milimo-ni-akwo a Zambi

Kuli yuma yinji yinasolola ngwo, Yehova kanasongwela mulimo uno. Chakutalilaho, mu chifuchi cha Nova Zelândia, umwe ndumbu avuluka ngwo Paulu yanyingika umwe pwo ha kwambujola ku zuwo ni zuwo. Ha tangwa liacho chimene, pwo wacho kalembele kuli Zambi, ni kuzachisa jina lienyi, Yehova. Chocho yeta hanga umwe mutu eze kama ni kumumeneka. Paulu yamba ngwenyi: “Hakupalika cha maola atatu yinguheta ku zuwo lienyi.”

Tanga 1 A-Korindu 3:9, mba nushimutwine chihula chino:

• Kuchi yuma yize yinakalingiwa mu Nova Zelândia, yinasolola ngwo Yehova kanasongwela mulimo wa kwambujola?

Tanga Yilinga 1:8, mba nushimutwine chihula chino:

• Mumu liaka twakufupiwa ukwaso wa Yehova mu mulimo wetu wa kwambujola?

Unachinyingika nyi?

Hita poso, ha kukunguluka chetu cha mukachi ka poso twakutambula fumbo lize liakutukwasa kwambujola. Nyi hiunayi kama ha kukunguluka chacho, kuchi unakevwa hakumona fumbo liacho?

6. Muze twakwambujola twakwononokena Zambi

Ku sekulu yitangu, akwa-kole kazangile kukanjisa tumbaji twa Yesu hanga alitwamine kwambujola. Akwa-Kristu atangu kakalilile ulite wo wa kwambujola ha “kufunga ni kukolesa sango lipema.” (A-Fwilipu 1:7) Musono, Yela ja Yehova no che akulinga.a

CHINEMA: Kukalila Sango Lipema (2:28)

Tanga Yilinga 5:27-42, mba nushimutwine chihula chino:

• Mumu liaka kutuchi kulitwamina kwambujola?—Tala versu 29, 38, ni 39.

YIZE WALILONGESA

Yesu katumine tumbaji twenyi hanga aye ni kwambujola ku yifuchi yeswe ya hashi. Musono, Yehova kanakwasa tuvumbi twenyi kulinga mulimo wacho.

Kuhitulula

• Kuchi sango lipema analiambujola hashi heswe?

• Kuchi mulimo wa kwambujola wakusolola ngwo twakuzanga enyembo jetu?

• Ku nyonga lie, shina mulimo wa kwambujola muuhasa kukuvwisa kuwaha? Mumu liaka?

HENGWOLA NAWA

Tala chize Yela ja Yehova akwambujola kuli atu mu mambonge anene-anene.

Kwambujola Chalipwila mu Mbonge ya Paris (5:11)

Yuma yika akulinga Yela ja Yehova hanga akwase yilambala?

Kukwasa Yilambala ku Ufulielo (5:59)

Livwile yena mwene chize umwe ndumbu yoze uli mu mulimo wa shimbu lieswe, malumbununa uwahililo uze akwete ha mulimo uze akulinga.

Nakuwahilila ni Mulimo Nasakwile (6:29)

Nyingika nawa hakutwala ku chize twakumbile mu yota yimwe hanga tununge ni kwambujola.

“Akwa-Kwambujola Wanangana wa Zambi Kakwatwala ku Chota” (Wanangana wa Zambi Unayulu!, Kapitulu 13)

5. Hashi halumuka chinji chize ha mwaka 1914

Tala CHINEMA.

CHINEMA: Chize ha Mwaka 1914 Hashi Halumuka Chinji (1:10)

Yesu kasolwele yuma yize te muyilingiwa muze mapwa Mwanangana. Tanga Luka 21:9-11, mba nushimutwine chihula chino:

• Yuma yika yize wakumona hanji wakwivwa musono?

Postolo Paulu kasolwele chize atu te mapwa ha matangwa a kusula a kuyula cha atu. Tanga 2 Timoteu 3:1-5, mba nushimutwine chihula chino:

• Yitanga yika yize wakumona kuli atu musono?

6. Kuyula cha Wanangana wa Zambi chatamba kututakamisa

Tanga Mateu 24:3, 14, mba nushimutwine yihula yino:

• Mulimo uka ulemu uze unasolola musono ngwo, Wanangana wa Zambi unayulu?

• Kuchi muhasa kukwasa mulimo wacho?

Wanangana wa Zambi hiunaputuka kuyula, kashika kwasala hakehe hanga uputuke kuyula hashi heswe. Tanga A-Hepreu 10:24, 25, mba nushimutwine chihula chino:

• Yika mutu ni mutu atamba kulinga amu “lie tangwa linakundama”?