Yehova Kakuwahisa Waze Akumufupa ni Ululi

1, 2. (a) Kuchi zango ni ufulielo yalinunga? (b) Yihula yika mutushimutwina?

TATA yetu, Yehova, kanalakenya kuwahisa tuvumbi twenyi ashishika. Yino ye jila yize Yehova akusolwelamo zango lienyi hali yetu, nawa twakumuzanga “mumu iye waliangile kutuzanga.” (1 Yoano 4:19) Muze zango lietu kuli Yehova mulikola, ufulielo wetu kuli iye muukola, nawa twakupwa ni ushindakenyo ngwetu Yehova kakuwahisa waze akumuzanga.—Tanga A-Hepreu 11:6.

² Yehova kali mukwa-kuwahisa! Chino chinasolola ulemu wa chize apwa ni yize akulinga. Kashika nyi kutushi ushindakenyo ngwetu Zambi kakuwahisa waze akumufupa ni mbunge yeswe, ufulielo wetu muupwa wangwaza. Mumu liaka tunambe chocho? Mumu “ufulielo che kulisela chinyingi cha yuma yize anayitalatala.” (A-Hepreu 11:1) Ufulielo unalumbunuka kupwa ni ushindakenyo ungunu ngwo Zambi makawahisa atu jenyi ashishika. Kuchi kutalatala chino chakutuyukisa? Kuchi Yehova awahishile tuvumbi twenyi ku mashimbu akunyima ni ha matangwa wano? Tutalenu.

YEHOVA KANALAKENYA KUWAHISA TUVUMBI TWENYI

3. Chilakenyo chika tunawane mu mukanda wa Malakia 3:10?

³ Yehova Zambi kanalakenya kuwahisa tuvumbi twenyi ashishika. Iye kanatulweza hanga tumulingile ni mbunge yeswe ni kufuliela kuli iye ngwetu makatuwahisa. Yehova ngwenyi: “Nukangweseke.” Yamba nawa ngwenyi: “Nyi chanwazulwilile tupenda a mwilu nikunuzukwila yiwape ya kulumbama.” (Malakia 3:10) Twakusolola uwahililo wetu ha chawana chino muze twakutayiza chilakenyo cha Yehova chakwamba ngwo, nukangweseke.

4. Kuchi mutuhasa kufuliela chilakenyo cha Yesu chili ha Mateu 6:33?

⁴ Yesu yalakenya tumbaji twenyi ngwenyi, nyi masa Wanangana wa Zambi kulutwe ku mwono wo, Zambi maakwasa. (Tanga Mateu 6:33.) Yesu kambile chocho, mumu te kananyingika ngwenyi yilakenyo ya Zambi kuyakumanunuka mashimbu eswe. (Izaia 55:11) Kashika, ni yetu mutuhasa kupwa ni shindakenyo ngwetu, nyi mutufuliela pundu muli Yehova, iye mamanununa chilakenyo chenyi chakwamba ngwo: ‘Chichi kukuhichika, chipwe kukwehuka, ka.’ (A-Hepreu 13:5) Chilakenyo chino cha Yehova chakutukwasa kufuliela maliji a Yesu waze ali mu mukanda wa Mateu 6:33.

5. Mumu liaka kumbululo lize Yesu ahanyine kuli Petulu linakolweza yetweswe?

⁵ Postolo Petulu kahulile Yesu ngwenyi: “Hitwahichika yuma yeswe, hitwanukaula; yika mutukatambula?” (Mateu 19:27) Yesu kakakumikine Petulu mumu liakumuhula. Hachino, Yesu yalweza tumbaji twenyi ngwenyi, te maawahisa hamukunda wa yitapo yize malinga ku mwono wo. Apostolo ni akwa-Kristu akwo ashishika, makayula hamwe ni Yesu mu malilu. Alioze Yesu kambile nawa ngwenyi, chipwe haliapwila mutuyuka, hakwamba ngwenyi: “Mweswe hanahichika mazuwo, hanji ana-akwo, hanji mandumbu, hanji tato, hanji naye, hanji mukwo-pwo, hanji ana, hanji minda, mumu ha jina liami, kumakatambula kulakaji lia yisuho, mba makahinga mwono wa mutolo.” (Mateu 19:29) Musono, tumbaji twa Yesu eswe mahasa kuwana atata, amama, mandumbu, mapangi, ni ana mu chikungulwila. Yino yinahiane chuma cheswacho mutuhasa kutokesa mumu lia Wanangana wa Zambi.

‘ANKORA HANJI KWACHILIJI YA MBUNGE’

6. Mumu liaka Yehova analakenya kuwahisa tuvumbi twenyi?

⁶ Kuchizako yiwape yize tunawahilila nayo haliapwila, tunashimbwila yiwape yinene kulutwe lia matangwa. (1 Timoteu 4:8) Yehova kanalakenya kuwahisa tuvumbi twenyi ashishika, kashika kunyingika maliji wano chakutukwasa kukumba yipikalo. Nyi twapwa ni ushindakenyo ungunu ngwetu, Yehova ‘iye mukwa kuwahisa waze akumufupa,’ mutuhasa kununga ni kushishika ku mwono wetu.—A-Hepreu 11:6.

7. Kuchi ufulielo wetu walifwa ngwe ankora?

⁷ Ha Longeso lia ha Mulundu, Yesu yamba ngwenyi: “Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangile.” (Mateu 5:12) Tuvumbi twa Zambi amwe makatambula chiwape cho cha kuya mu malilu. Alioze akwo makatambula chiwape cha mwono wa mutolo mu paraisu hano hashi. Kashika, yino muyihasa kutulingisa hanga ‘tuwahilile ni kulikwiza.’ (Samu 37:11; Luka 18:30) Chipwe chocho, yetweswe kutalatala chetu muchihasa kupwa “ngwe ankora ya mbunge, kuyajikiza, kuyakola.” (A-Hepreu 6:17-20) Ngwe chize ankora yakufunga ulungu ha mashimbu a kangonga, kutalatala chetu chikolo muchihasa kutukwasa hanga tununge ni kujikiza mu ufulielo. Chino muchitwaha tachi hanga tunyongonone ha matangwa a yipikalo.

8. Kuchi kutalatala chetu chakutepulula yipikalo?

⁸ Kutalatala chetu muchihasa kutukwasa hanga tutepulule yipikalo yetu. Chizechene ngwe maji akululieka mujimba wetu, yilakenyo ya Zambi muyihasa kutepulula yipikalo yetu ya ku mbunge. Chili utakamiso kunyingika ngwetu Yehova matukwasa nyi mutumbila yipikalo yetu hali iye. (Samu 55:22) Mutuhasa kupwa ni ushindakenyo ungunu ngwetu, Zambi mahasa kulinga “kuhiana chikolo chize cheswe mutwita.” (A-Efwesu 3:20) Hachino, Yehova matukwasa, hi chikolo wika ko, alioze “kuhiana chikolo!”

9. Kuchi mutuhasa kupwa ni ushindakenyo ngwetu mututambula yiwape ya Yehova?

⁹ Mba tutambule yiwape ya Yehova, twatamba kufuliela chinji muli iye ni kwononokena usongwelo wenyi. Mose yalweza vungu lia Izalele ngwenyi: ‘Yehova makanuwahisa mu chifuchi ananwehe kuli Yehova Zambi yenu, chikapwe chihinga, nukachizuke, nyi munupanjika kanawa ku liji lia Yehova Zambi yenu, ni kukanyama kulinga liji lino lieswe lia shimbi ngunanwambe musono. Mumu Yehova Zambi yenu kumakanuwahisa, ngwe chize anulakenyene.’ (Shimbi Yamuchiali 15:4-6) Shina uli ni ushindakenyo ngwe, Yehova makuwahisa nyi wanunga ni kumulingile ni ushishiko weswe? Uli ni chitela chipema cha kupwa ni ushindakenyo wacho.

YEHOVA KAPWILE MUKWA-KWAAWAHISA

10, 11. Kuchi Yehova awahishile Yosefwe?

¹⁰ Mbimbiliya kayisonekene hanga yituyukise. Kashika twakuwanamo yilweza yinji ya chize Zambi awahishile tuvumbi twenyi ashishika ku mashimbu akunyima. (A-Roma 15:4) Yosefwe kapwile chilweza chipema ha chikuma chino. Chitangu, mandumbu jenyi yamulanjisa mu undungo. Kulutwe lia matangwa, pwo lia mwata wenyi yamuliongela yuma yasaki, chocho yamusa mu zuwo lia ususu mu Engitu. Shina muze Yosefwe apwile mu zuwo lia ususu, iye kalihandunwine ni Yehova? Ka, hi chocho ko! Mumu Mbimbiliya yinambe ngwo: “Yehova wapwile hamwe nenyi. Wamuwahishile nikumwaha vumbi.” Nawa ngwo: “Yehova wapwile hamwe nenyi, cheswacho alingile, Yehova wachiwahishile.” (Uputukilo 39:21, 23) Chipwe ha mashimbu jacho alamba, nihindu Yosefwe yashimbwila kuli Zambi ni uhumikizo weswe.

¹¹ Hakupalika cha miaka, Falau yatuhwisa Yosefwe mu zuwo lia ususu, hachino mutu yoze wapwile ndungo yapwa mwanangana wamuchiali mu Engitu. (Uputukilo 41:1, 37-43) Muze Yosefwe ni mukwo-pwo asemene ana aali, Yosefwe yaluka mwana-mutangu jina lia, “Manase, mumu Zambi hananguvulamisa kuhondangana chami cheswe, ni akwa zuwo lia tata. Jina lia mukwo wamuchiali ngwenyi, Eframe, mumu ngwenyi Zambi hangwaha ana mu chifuchi cha lamba liami.” (Uputukilo 41:51, 52) Yehova kawahishile Yosefwe mumu lia ushishiko wenyi, kashika ahashile kufunga A-Izalele ni A-Engitu muze mu chifuchi mwapwile zala. Nawa Yosefwe kanyingikine ngwenyi, Yehova mwe wamuwahishile.—Uputukilo 45:5-9.

12. Kuchi Yesu ahashile kununga ni kushishika muze apwile mu yeseko?

¹² Yesu Kristu neye kanungine ni kwononokena Zambi chipwe mushi lia yeseko, chocho Yehova yamuwahisa. Yika yakwashile Yesu mba anunge ni kushishika? Liji lia Zambi linambe ngwo: ‘Ha uwahililo uze asele kumeso jenyi, wanyongonwene ha mutondo wa lamba, nikulelesa je sonyi.’ (A-Hepreu 12:2) Yesu kanakapwa ni uwahililo mumu lia kuhalisa jina lia Zambi. Nawa Yesu kanakapwa ni utayizo wa Tato hamwe ni yiteli yinji yilemu. Mbimbiliya yakwamba ngwo: “Hanatwama ku kwoko lia chindume lia ngunja ya Zambi.” Twakutanga nawa ngwetu: “Zambi hanamunangamisa chikolo, hanamwehe jina lize lili helu lia majina eswe.”—A-Fwilipu 2:9.

YEHOVA KESHI KUVULAMA YUMA YIZE TWAKULINGA

13, 14. Kuchi Yehova akwivwa hakutwala ku yuma yize twakumulingila?

¹³ Mutuhasa kupwa ni ushindakenyo ngwetu, Yehova kakulemesa yuma yeswe yize twakumulingila. Iye kananyingika kanawa muze tunayambashana hali yetwene ni ha uhashi wetu. Kakutufunga muze mutulipikala hakutwala ku mulimo hanji kulela asoko jetu. Nawa kanatunyingika muze twakusa tachi hanga tulinge mulimo wenyi chipwe ngwe tunayiji hanji kulema ku mbunge. Mutuhasa kupwa ni ushindakenyo ngwetu, Yehova kakulemesa ushishiko wetu chipwe ngwe tukwete tupalia.—Tanga A-Hepreu 6:10, 11.

¹⁴ Tunyingikenu nawa ngwetu Yehova ‘kakwivwa kulemba’ chetu. Mutuhasa kupwa ni ushindkenyo ngwetu, muze mutulemba kuli iye, kumatwivwa pundu. (Samu 65:2) “Tato ya keke, kanda Zambi ya kulembejeka cheswe” makatwaha yuma yeswe yize tunafupu nyi mutukundama kuli iye. Ha mashimbu amwe iye mahasa kuzachisa mandumbu ni mapangi jetu hanga achilinge. (2 A-Korindu 1:3) Yehova kakuwahilila chinji muze twakuvwila akwetu keke. “Mukwa kwivwila keke yiswale kakuhana kuli Yehova; chitanga chenyi chipema mamukundululacho.” (Yishima 19:17; Mateu 6:3, 4) Kashika, nyi mutupwa yihanyi ni kukwasa mandumbu jetu, Yehova mamona upeme wacho ngwe tunaulingila iye. Nawa iye kanalakenya kutuwahisa hamukunda wa yitanga yino yipema.

YIWAPE YA HALIAPWILA NI YA KULUTWE LIA MATANGWA

15. Chiwape chika yena unashimbwila kulutwe lia matangwa? (Tala chizulie ha uputukilo.)

¹⁵ Akwa-Kristu akuwayisa kali ni kutalatala chakutambula “chipangula cha ululi,” chiwape chize Yesu makaaha. (2 Timoteu 4:7, 8) Chino, chishi kulumbunuka ngwo yena kuushi ulemu kumeso ja Zambi mumu uli ni kutalatala chalisa. Tununu twa “mapanga akwo” a Yesu kanashimbwila ni zango lieswe chiwape cha mwono wa mutolo mu paraisu hano hashi. Haze muhakapwa ‘kuwahilila mu kulumbama cha sambukila.’—Yoano 10:16; Samu 37:11.

16. Utakamiso uka twawana mu mukanda 1 Yoano 3:19, 20?

¹⁶ Ha mashimbu amwe mutuhasa kwivwa ngwe kutushi kukalalaka chinji mu mulimo wa Yehova hanji kulihula nyi Yehova kakuwahilila ni yize twakumulingila. Hanji kwivwa ngwetu kutwatelele kutambula chiwape nichimwe. Alioze kanda tuvulama ngwo, “Zambi iye munene wahiana mbunge jetu, kananyingika yuma yeswe.” (Tanga 1 Yoano 3:19, 20.) Nyi mutulingila Yehova hamukunda wa ufulielo ni zango lietu kuli iye, mutuhasa kupwa ni ushindakenyo ngwetu iye matuwahisa, chipwe ngwe mutumona ngwetu yize twakumulingila kuyishi ulemu.—Marku 12:41-44.

17. Yiwape yika twakutambula haliapwila?

¹⁷ Chipwe ngwe tuli ha matangwa akasula akuyula cha Satana, nihindu Yehova kanawahisa tuvumbi twenyi. Iye kakusa shindakenyo ngwenyi, tunatambula chinyingi chingunu nawa tuli ni sambukila hakupwa mu kachi ka ululikiso walinunga wa hashi heswe. (Izaia 54:13) Chochene, ngwe chize Yesu alakenyene, Yehova kakutuwahisa haliapwila ni asoko azango, mandumbu ni mapangi jetu a hashi heswe. (Marku 10:29, 30) Chikwo nawa, waze akufupa Zambi ni ululi, kakupwa ni sambukila ya ku mbunge, chiseke hamwe ni uwahililo.—A-Fwilipu 4:4-7.

18, 19. Kuchi tuvumbi twa Yehova akwivwa ha yiwape yize akutambula?

¹⁸ Tuvumbi twa Yehova hashi heswe kakutambula yiwape yacho yilemu yakatuka kuli Tata yetu wa mu malilu. Chakutalilaho, Bianca wa mu Alemanha yamba ngwenyi: “Kungushi ni yize mungwamba ha chize Yehova akungukwasa ha yipikalo yami ni kupwa sali liami matangwa eswe. Hano hashi hanapiha chinji. Alioze hakukalakala hamwe ni Yehova, chakungukwasa kwivwa ngwe nguli mu moko jenyi. Muze nakulikolweza hanga ngumulingile ni mbunge yeswe, iye kakunguhilwishila kulakaji a yiwape.”

¹⁹ Tutalenu Paula wa miaka 70, watwama mu Canada, yoze ukwete musongo avuluka ngwo espinha bífida, musongo wacho upi chinji wakukwachila kumutanda. Aye yamba ngwenyi, chipwe ngwe yikola yenyi yakumukwika kwenda, chino kuchishi kukwika mulimo wenyi wa kwambujola. Yawezela nawa ngwenyi: “Ami nakuzachisa mutapu walisa wakwambujola, ngwe telefone ni kwambujola cha susumuku. Mba ngulitakamise, ngukwete umwe mukanda muze nakusonekamo yimwe yisoneko ni yiyulo yize nakuwana mu mikanda yetu yize munguhasa kutanga ha shimbu ni shimbu. Nakuuvuluka ngwo, ‘Mukanda Wami wa Mwono.’ Yipikalo yize twakumona haliapwila yili ya mashimbu akehe, nyi mutulihulikila ha yilakenyo ya Yehova. Chipwe ngwe mutumona lamba lieswalio, nihindu Yehova matukwasa mashimbu eswe.” Yipikalo yetu muyihasa kulisa chinji ni ya Bianca hanji ni ya Paula. Chipwe chocho, mutuhasa kuwana utakamiso ha kunyonga ha chize Yehova akutuwahisa ni chize akuwahisa mandumbu jetu. Cho kuwaha ha kunyingika chize Yehova akutuwahisa haliapwila, ni chize makatuwahisa kulutwe lia matangwa!

20. Yika mutuhasa kuzuka nyi twanunga ni kulingila Yehova ni ushishiko weswe?

²⁰ Kanda uvulama ngwo yilemba ye ya ku mbunge, “muyikakunehena yiwape yinji kuhiana.” Muhasa kupwa ni ushindakenyo ngwo, nyi walinga ‘upale wa Zambi, mukatambula che chilakenyo.’ (A-Hepreu 10:35, 36) Kashika, tunungenu ni kukolesa ufulielo wetu ni kulinga yuma yeswe yize mutuhasa hanga tuwayile Yehova. Nyi twalinga chocho, mutupwa ni ushindakenyo ngwetu, Yehova makatuwahisa chinji!—Tanga A-Kolosu 3:23, 24.