Mutwe ulemu wa Mbimbiliya unatale ha Wanangana wa Zambi. Yehova makazachisa Wanangana wacho hanga akapwise hashi heswe Paraisu. Wanangana wa Zambi yika? Kuchi tunanyingika ngwetu, Wanangana wacho unayulu musono? Yuma yika yize Wanangana wacho hiwalinga? Yika muukalinga kulutwe lia matangwa? Ha longeso lino ni lize mulihataho, mutumona makumbululo a yihula yino.

1. Wanangana wa Zambi yika nawa Mwanangana wa Wanangana wacho iya?

Wanangana au uli unguvulu wa Yehova Zambi. Yesu Kristu, mwe Mwanangana wa Wanangana wacho yoze unayulu kukatuka mu malilu. (Mateu 4:17; Yoano 18:36) Mbimbiliya yinahanjika hakutwala kuli Yesu ngwo: “Iye kumakayula . . . ndo ku miaka ya mutolo.” (Luka 1:32, 33) Ngwe Mwanangana wa Wanangana wa Zambi, Yesu makayula hashi.

2. Aya waze makayula hamwe ni Yesu?

Yesu kechi kayula ukawenyi. Kashika atu “a ku mavungu eswe, ni ku malimi eswe, ni kuli atu eswe, ni ku minyachi yeswe, . . . kumakayula hashi.” (Usolwelo 5:9, 10) Atu angahi waze makayula ni Yesu? Chize haze Yesu ejile hashi, tununu a tununu twa atu kakupwa tumbaji twenyi. Alioze atu 144,000 e wika makaya mu malilu hanga akayule hamwe ni Yesu. (Tanga Usolwelo 14:1-4.) Akwa-Kristu akwo eswe makatwama hano hashi mushi lia Wanangana wacho.—Samu 37:29.

3. Mumu liaka Wanangana wa Zambi wahiana wa atu?

Chipwe ngwe manguvulu amwe musono kakweseka kulinga yuma yipema, nihindu o keshi ni ndundo ja kulinga yuma yeswe yize akuzanga. Kanji-kanji, manguvulu kakulisalakana chinji. Chipwe chocho, waze akusalakana akwo, keshi kukwasa atu. Alioze, Mwanangana wa mu Wanangana wa Zambi, Yesu, niumwe kechi keza kamusalakana. Zambi “makakolesa umwe wanangana uze kuuchi kanonga.” (Daniele 2:44) Yesu makayula hashi heswe. Kechi kasolola katonde. Yesu kali mukwa-zango, kakwete utu ni ululi. Chikwo nawa, makalongesa atu hanga akalimone ngwe chize iye akwamona—ni zango, utu ni ululi.—Tanga Izaia 11:9.

4. Nguvulu wa ndundo makayula hashi heswe

Yesu kakwete ndundo jinji jize mujihasa kumukwasa kuyula hashi kuhiana nguvulu mweswawo wa atu. Tanga Mateu 28:18, mba nushimutwine chihula chino:

• Kuchi wata wa Yesu walisa ni wa manguvulu akwo a hashi?

Unguvulu wa atu kanji-kanji wakwalumuka. Chikwo nawa, hita nguvulu kakuyula wika mu chifuchi chimuwika. Mba yika mutwamba hakutwala ku Wanangana wa Zambi? Tanga Daniele 7:14, mba nushimutwine yihula yino:

• Mumu liaka chili chipema kunyingika ngwo, Wanangana wa Zambi “kuuchi kanonga”?

• Mumu liaka chili chipema Wanangana wacho kuyula hashi heswe?

5. Wanangana wa atu katamba kuuchizaho ni kusalakanyisaho weka

Mumu liaka Wanangana wa Zambi watamba kusalakana wanangana wa atu? Tala CHINEMA, mba nushimutwine chihula chinahateho.

CHINEMA: Wanangana wa Zambi Yika?—Chihanda Chikehe (1:41)

• Muze atu akuyula yika yakulingiwa?

Tanga Chilumbununyi 8:9, mba nushimutwine chihula chino:

• Ku nyonga lie, shina Wanangana wa Zambi watamba kusalakana wanangana wa atu? Mumu liaka?

6. Wanangana wa Zambi muukapwa ni akwa-kuyula waze anatunyingika kanawa

Amu Mwanangana wetu Yesu apwile hano hashi ngwe mutu wa musunya, makahasa “kwivwa keke ha kukokoloka chetu.” (A-Hepreu 4:15) Malunga ni mapwo 144,000 waze makayula hamwe ni Yesu, Yehova kakwasakula “ku mavungu eswe, ni ku malimi eswe, ni kuli atu eswe, ni ku minyachi yeswe.”—Usolwelo 5:9.

• Ku nyonga lie, shina chili chipema kunyingika ngwe, Yesu ni atu waze makayula hamwe nenyi, no kapwile hano hashi ngwe atu a musunya? Mumu liaka?

7. Wanangana wa Zambi ukwete shimbi jipema chinji

Manguvulu musono kakusa shimbi jize jakufunga atu jo. Wanangana wa Zambi newo ukwete shimbi jize atu jawo atamba kukaula. Tanga 1 A-Korindu 6:9-11, mba nushimutwine yihula yino:

• Ku nyonga lie, kuchi hashi muhakapwa muze atu eswe makakaula shimbi ja Zambi?a

• Ku nyonga lie, shina chinalite lume Yehova kushimbwila hanga atu akononokene shimbi jacho? Mumu liaka?

• Yika yinasolola ngwo, atu waze keshi kwononokena shimbi jacho mahasa kwalumuka?—Tala versu 11.

YIZE WALILONGESA

Wanangana wa Zambi uli umwe unguvulu wamwenemwene mu malilu uze muukayula hashi heswe.

Kuhitulula

• Aya makayula mu Wanangana wa Zambi?

• Kuchi Wanangana wa Zambi wahiana wa atu?

• Yuma yika yize Yehova akushimbwila hanga atu waze ali mushi lia chiyulo cha Wanangana wenyi alinge?

HENGWOLA NAWA

Nyingika yize Yesu alongesele hakutwala ku kuze Wanangana wa Zambi watwama.

“Shina Wanangana wa Zambi Uli Chuma Chize Chatwama mu Mbunge ya Mutu?” (Lusango wa ha internet)

Mumu liaka Yela ja Yehova akusakula kushishika ku Wanangana wa Zambi ni kwehuka mawanangana a hano hashi?

Kushishika ku Wanangana wa Zambi (1:43)

Hengwola hanga unyingike yize Mbimbiliya yakwamba hakutwala kuli atu 144,000 waze Yehova akusakula hanga akayule ni Yesu.

“Iya Makaya mu Malilu?” (Lusango wa ha internet)

Yika yakwashile umwe pwo mu zuwo lia ususu kupwa ni shindakenyo ngwenyi, Zambi wika mwe makaneha chifuchi cha ululi?

“Nazangile Chinji Chifuchi Chize Chikwete Ululi” (Despertai!, wa Novembro 2011)

Yesu kalongesele ngwenyi, tumbaji twenyi katambile kulinga chihanda cha hano “hashi.” (Yoano 15:19) Chino chinakwata nawa ha kwehuka yuma ya mafwefwe ni kulinjisa mu jita. Kwamba umwenemwene, ha mashimbu amwe hi chashi ko kwehuka yuma yacho. Hanji mahasa kutuhepwisa mumu lia kwehuka yuma yacho. Mba kuchi mutuhasa kwehuka yuma ya mafwefwe aku tunanungu ni kushishika kuli Yehova Zambi?

1. Kuchi akwa-Kristu akumona manguvulu a hano hashi?

Akwa-Kristu kakuvumbika manguvulu. Twakulinga yize Yesu atwambile hanga tulinge, ha ‘kuhana kuli Sesare yuma ya Sesare’ hanji ngwetu, kwononokena shimbi ja manguvulu ngwe kufweta lijimu. (Marku 12:17) Mbimbiliya yakulongesa ngwo, manguvulu kakuyula mumu Yehova kakwecha hanga chilingiwe. (A-Roma 13:1) Kashika tunanyingika ngwetu, kuyula cha akwa-hashi chili ni haze chasulila. Twakufuliela ngwetu Zambi mwe wika makalulieka yuma yeswe hano hashi kupalikila mu Wanangana wenyi.

2. Kuchi mutuhasa kusolola ngwetu, twakwehuka yuma ya mafwefwe?

Twakwehuka kulinjisa mu yuma ya mafwefwe ngwe chize Yesu alingile. Muze atu amwene chikomokeso chize Yesu alingile, yaazanga kumupwisa mwanangana, alioze iye yalituna. (Yoano 6:15) Mba mumu liaka alitunyine? Kulutwe mwene yamba ngwenyi: “Wanangana wami hi wa hashi ko.” (Yoano 18:36) Ngwe tumbaji twa Yesu, twakusolola ushishiko wetu mu majila alisa. Chakutalilaho, kutushi kuya ku jita. (Tanga Mika 4:3.) Twakuvumbika yilayi ya mu chifuchi ngwe pandela, alioze kutushi kuhalisa yuma yacho ngwe chize twakuhalisa Yehova. (1 Yoano 5:21) Chikwo nawa, kutushi kuhakwila nichimwe chizavu cha mafwefwe hanji mutu yoze masakula hanga ayule. Ha yikuma ngwe yino, twakusolola ngwetu twashishika ku chiyulo cha Zambi ni Wanangana wenyi.

NYINGIKA NAWA

3. Akwa-Kristu amwenemwene keshi kulinjisa mu yuma ya mafwefwe

Yesu ni tumbaji twenyi kali yilweza yipema kuli yetu. Tanga A-Roma 13:1, 5-7 ni 1 Petulu 2:13, 14. Chikwo nawa, tala CHINEMA mba nushimutwine yihula yinahateho.

CHINEMA: Akwa-Kristu Amwenemwene Keshi Kulinjisa mu Yuma ya Mafwefwe—Chihanda 1 (4:28)

• Mumu liaka twatamba kuvumbika manguvulu?

• Majila aka mutuhasa kusolwelamo ngwetu twakwazeyela?

Ha mashimbu a jita, yifuchi yimwe yakwamba ngwo kuyishi kulinjisa mu yuma ya jita, chipwe chocho, yakukwasa yizavu yize yinase jita. Yika chinalumbunuka kwehuka yuma ya mafwefwe? Tanga Yoano 17:16. Chikwo nawa, tala CHINEMA mba nushimutwine chihula chinahateho.

CHINEMA: Akwa-Kristu Amwenemwene Keshi Kulinjisa mu Yuma ya Mafwefwe—Chihanda 2 (3:11)

• Yika chinalumbunuka kwehuka yuma ya mafwefwe?

Yika mutulinga nyi manguvulu matwita hanga tulinge chuma chize chakulimika ni shimbi ja Zambi? Tanga Yilinga 5:28, 29. Chikwo nawa, tala CHINEMA mba nushimutwine yihula yinahateho.

CHINEMA: Akwa-Kristu Amwenemwene Keshi Kulinjisa mu Yuma ya Mafwefwe—Chihanda 3 (1:18)

• Nyi ngwe shimbi ja atu mujilimika ni shimbi ja Zambi, shimbi jaya twatamba kwononokena?

• Shina muhasa kunyonga ha chikuma chimwe chize akwa-Kristu katambile kwononokena manguvulu a hashi?

4. Ehuka yuma ya mafwefwe mu manyonga ni mu yitanga

Tanga 1 Yoano 5:21, chikwo nawa, tala CHINEMA mba nushimutwine yihula yinahateho.

CHINEMA: Mumu Liaka Akwa-Kristu Amwenemwene Atamba Kupwa ni Hamu—Ha Kulihandununa ku Yuma ya Hano Hashi? (2:49)

• Kulita ni chinema, mumu liaka Ayenge alitunyine kukwasa chizavu cha mafwefwe hanji kuhalisa pandela?

• Ku nyonga lie, shina iye kakwachile chiyulo chipema?

Yuma yikwo yika yize muyihasa kutunjisa mu yuma ya mafwefwe? Tala CHINEMA, mba nushimutwine yihula yinahateho.

CHINEMA: Malongeso a Kaposhi wa Kutalila—Kwehuka Yuma ya Mafwefwe mu Chifuchi Chino Chaliteta (5:16)

• Kuchi mutuhasa kwehuka yuma ya mafwefwe muze tunatale akwa-kwasa konda a mu yifuchi yalisa?

• Kuchi mutuhasa kwehuka yuma ya mafwefwe chipwe ngwe yuma yacho muyituyukisa hanji muyitunehena lamba?

• Kuchi yuma yize twakupanjika kuli akwa-sango ni kuli masepa jetu muyihasa kutunjisa mu yuma ya mafwefwe?

YIZE WALILONGESA

Akwa-Kristu kakusa tachi jinji hanga ehuke yuma ya mafwefwe mu manyonga, mu maliji ni mu yitanga.

Kuhitulula

• Yitanga yika twatamba kusolola hali manguvulu?

• Mumu liaka twakwehuka yuma ya mafwefwe?

• Yuma yika yize muyihasa kutunjisa mu yuma ya mafwefwe?

HENGWOLA NAWA

Yuma yika mutuhasa kulinga hanga tuhase kwehuka yuma ya mafwefwe?

Yehova Kakutufunga (3:14)

Yika asoko mahasa kulinga hanga alilulieke hakutwala ku yuma yize muyihasa kwanjisa mu yuma ya mafwefwe?

Kwehuka Yuma ya Mafwefwe ha Mbunga (4:25)

Mumu liaka kukalila yuma ya mu chifuchi kuchishi kuneha uwahililo kuli mutu yoze wakuchilinga?

“Kuli Zambi Yuma Yeswe Yinahase Kupwa” (5:19)

Tala chize muhasa kwehuka yuma ya mafwefwe ha kusakula mulimo uze mulinga.

“Mutu Mweswe Kumambata Chiteli Chenyi Mwene” (Kaposhi wa Kutalila 15 wa Março, 2006)