Shina “Unanguzange Kuhiana Wano Nyi?”

1, 2. Muze te hanongama ni kutela yishi ufuku weswe, longeso lika Petulu alilongesele?

TUMBAJI twa Yesu shimbiali kanongamine ni kutela yishi mu Kalunga-Lwiji wa Ngalileya. Chipwe chocho, kakakwachile yishi niumwe. Muze hi kwacha, Yesu yoze te hamuhindwisa ku ufwe, yamana kusesa lia kalunga-lwiji ni kwaatala. Chocho, yamba kuli ayo ngwenyi, “Telenu wanda ha sali lia chindume lia ulungu mba kumunuwana. Yatela, mba kahashile kuukoka nawa, mumu ha chizavu cha yishi.”—Yoano 21:1-6.

² Yesu yahana kuli tumbaji twenyi mbolo ni yishi waze ochele hanga alie. Hachino, yatala kuli Semone Petulu ni kumuhula ngwenyi: “Semone mwana Yona, unanguzange kuhiana wano, nyi?” Yesu kanyingikine ngwenyi, Petulu te kakuzanga chinji kutela yishi. Hano kota Yesu te kanahula Petulu nyi kakuzanga Yesu ni yuma yize te akumulongesa kuhiana kutela yishi. Petulu yakumbulula Yesu ngwenyi: ‘Mwene; yena unanyingika, nakukuzanga.’ (Yoano 21:15) Kukatuka ha shimbu liacho, Petulu yasolola ngwo, te kakulinga yuma yize ambile. Iye kasolwele zango lienyi kuli Kristu ha kuhondangana mulimo wa kwambujola, ni kupwa mutu mulemu mu chikungulwila cha akwa-Kristu.

3. Ha yika akwa-Kristu atamba kukanyama?

³ Yika mutuhasa kulilongesa ha maliji a Yesu kuli Petulu? Twatamba kukanyama hanga zango lietu kuli Kristu lihone kutepuluka. Yesu kanyingikine ngwenyi, mwono ha mashimbu wano te muukaliwa chinji, nawa te mukusoloka yipikalo ni lamba linji. Mu chishima chenyi cha njimi, Yesu yamba ngwenyi, atu amwe te matayiza “liji lia Wanangana” nawa kuuputukilo te masolola zango linji. Alioze kulutwe “yipikalo ya miaka yino, ni kwonga cha upite” te “muyikeketesa lie liji” nawa atu jacho te matokesa zango lio. (Mateu 13:19-22; Marku 4:19) Nyi kutwakanyamine, yipikalo ya ku mwono wa hita tangwa muyihasa kupihisa mulimo wetu kuli Yehova. Kashika, Yesu atowezele tumbaji twenyi ngwenyi: “Keyelenu hali yenwene kuchina hanji mbunge jenu mujilema ni upulutu, ni kuzengewa, ni yipikalo ya mwono uno.”—Luka 21:34.

4. Yika muyitukwasa kunyingika nyi zango lietu kuli Kristu linakolo? (Tala chizulie ha uputukilo.)

⁴ Ngwe Petulu, ni yetu mutuhasa kusolola ngwetu, twakuzanga Kristu ha kusa mulimo wa kwambujola kulutwe ku mwono wetu. Kuchi mutuhasa kupwa ni shindakenyo ngwetu, mutuchinunga ni kuchilinga? Mutuhasa kulihula ngwetu: ‘Yika nakuzanga chinji ku mwono wami? Shina chiseke chami chakwiza ha kulinga mulimo wa Yehova nyi chakwiza ku yuma yikwo?’ Mba tukumbulule yihula yino, tutalenu yuma yitatu ya ku mwono yize muyihasa kutepulula zango lietu kuli Kristu. Yuma yacho yili, (1) mulimo wetu waku musunya, (2) kuheha hanji yiheho, nawa (3) kupwa ni zango lia kupwa ni upite unji.

SAKO MULIMO WE WAKU MUSUNYA MU CHIHELA CHAWO

5. Chiteli chika akwete miata amu usoko?

⁵ Kuli Petulu kutela yishi kuchakapwile chuma cha ngwanza. Wapwile mulimo uze te akulinga hanga akwase asoko jenyi. Ni musono nawa, Yehova hanahane kuli miata amu usoko chiteli cha kukwasa asoko jo. (1 Timoteu 5:8) Mba achilinge kanawa, ayo katamba kuhondangana. Alioze, ha mashimbu wano akusula, mulimo waku musunya muhasa kutunehena yipikalo yinji ku mwono.

6. Mumu liaka milimo yaku musunya yinapikalisa chinji atu?

⁶ Kuli atu anji waze anafupu milimo, alioze kukushi milimo yakumbana. Mumu lia yino, atu kakulitalika mba apwe ni mulimo. Kashika atu anji kakuzanga kukalakala maola anji, chipwe ngwe kakwaafweta mbonge jikehe. Miata a milimo kanazange kulinga milimo yinji ni akwa-kukalakala akehe wika. Hachino, akwa-kukalakala mahasa kuzakalala, kuhonga chipwe kuyiza. Atu anji kakulipikala chinji ngwo matokesa milimo yo, kashika akulinga yuma yeswe yize miata jo maatuma.

7, 8. (a) Kuli iya twakushishika chinji? (b) Longeso lika lilemu umwe ndumbu mu Tailândia alilongesele hakutwala ku mulimo wenyi?

⁷ Amu tuli akwa-Kristu, twakushishika kuli Yehova kuhiana kuli mutu mweswawo, kuchingako mwata wetu wa mulimo. (Luka 10:27) Milimo yetu yaku musunya yakutukwasa hanga tupwe ni yuma yize tunafupu ku mwono ni kukwasa mulimo wetu wa kwambujola. Alioze nyi kutwakeyele, yiteli yetu yaku mulimo muyihasa kupihisa uwayilo wetu. Mutuhasa kulilongesa ha chilweza cha umwe ndumbu wamu Tailândia. Iye yamba ngwenyi: “Mulimo wami wakululieka computador te upema chinji, alioze te wakungumbata maola anji. Hachino, te kuchishi kupwa nawa ni shimbu lia kuhengwola yuma yaku ufulielo. Chocho, yingunyingika ngwami mba nguse Wanangana kulutwe, natamba kufupa mulimo weka.” Ndumbu wacho yika alingile?

⁸ Yamba ngwenyi: “Muze te hinalilulieka ha mwaka umuwika, yingukwata chiyulo cha kulanjisa jelado ku tapalo. Kuuputukilo, ngunakapinda chinji hakupwa ni mbongo, chocho yingufupa kuwecha. Muze te nakulitakana ni akwetu waze te nakalakala no, ayo te kakunguseha ni kungwamba ngwo, shina kulanjisa jelado ku tapalo chinahiane kululieka computador mu chihela muze munakekema. Chocho, yingulemba kuli Yehova angukwase kulinga yuma yize hingunatesa ku mwono wami, hanga ngupwe ni mashimbu anji akulinga mulimo wenyi. Ha shimbu likehe, yuma yiyiputuka kuwaha. Yingunyingika kanawa jelado yize akuzanga atu waze te akungulanda yo, chocho yinguputuka kuyilinga kanawa. Ha shimbu likehe, jelado yami te kuyishi kushimbula chinji. Chocho, yingupwa ni mbongo kuhiana muze napwile ni kululieka computador. Mulimo uno wakunguvwisa kuwaha mumu kungushi ni kuzakalala hanji kulipikala ngwe chize napwile mu mulimo wa computador. Nawa yahiana ulemu, haliapwila ngunalivu ngwami nguli ni usepa upema ni Yehova.”—Tanga Mateu 5:3, 6.

9. Kuchi mutuhasa kupwa ni nyonga lialita hakutwala ku mulimo wetu waku musunya?

⁹ Yehova kakuwahilila chinji muze twakuhondangana. Kuhondangana chapwa chiwape. (Yishima 12:14) Alioze twatamba kusa shindakenyo ngwetu mulimo wetu waku musunya kuushi ni ulemu unji kuhiana mulimo wetu kuli Yehova. Hakutwala ku yuma yize yakufupiwa ku mwono wetu, Yesu yamba ngwenyi: “Liangenu kufupa Wanangana wenyi ni ululi wenyi mba kumanuwezela yino yuma yeswe.” (Mateu 6:33) Mba kuchi mutuhasa kunyingika ngwetu, tuli ni nyonga lialita hakutwala ku mulimo wetu waku musunya? Mutuhasa kulihula ngwetu: ‘Shina nakumona ngwami mulimo wami waku musunya ukwete ulemu nawa upema, alioze mulimo wami kuli Zambi uli wangwaza hanji kuushi ni ulemu?’ Kunyonga ha chihula chino, muchitukwasa hanga tunyingike kanawa yize twakuzanga chinji ku mwono wetu.

10. Longeso lika lilemu Yesu alongesele?

¹⁰ Yesu hanatulongesa yuma yize twatamba kusa kulutwe ku mwono wetu. Limwe tangwa, yaya ni kumeneka, Maria ni Marta ku zuwo lio. Chocho, Marta yaputuka kululiekela Yesu kulia, alioze Maria yatwama hakamwihi ni Yesu ni kupanjika yize apwile ni kulongesa. Marta yalinyenyeta ngwenyi Maria te keshi kumukwasa. Yesu yalweza Marta ngwenyi: ‘Maria hatongola chihanda chipema, chize kechi kahasa kumutambulacho.’ (Luka 10:38-42) Hano, Yesu yahana longeso lilemu. Mba twehuke kulalwoka ha yuma yize yinafupiwa ku mwono wetu ni kusolola zango lietu kuli Kristu, twatamba kutongola “chihanda chipema.” Chino chinalumbunuka ngwo, usepa wetu ni Yehova watamba kupwa ni ulemu mashimbu eswe ku mwono wetu.

KUPWA NI NYONGA LIALITA HAKUTWALA KU KUHEHA NI YIHEHO

11. Yika Mbimbiliya yinambe hakutwala ku kuhwima ni kulenga?

¹¹ Mwono wetu musono uli ukalu chinji, kashika ha mashimbu amwe twakufupiwa kuhwima ni kulenga. Mu Mbimbiliya twakutangamo ngwo: “Kukushi nichimwe chuma chipema kuli mutu kuhiana kulia, kunwa, ni kuwahilila ni milimo yenyi.” (Chilumbununyi 2:24 NM) Yesu kanyingikine ngwenyi, chili chilemu tumbaji twenyi kuhwima. Chakutalilaho, muze te hahondangana mulimo wa kwambujola, Yesu yalweza tumbaji twenyi ngwenyi: “Tweyenu ukawenu ku puya, nukahwime hakepe.”—Marku 6:31, 32.

12. Mumu liaka twatamba kukanyama hakutwala ku kuheha ni yiheho? Hana chilweza.

¹² Kuheha ni yiheho muyihasa kutukwasa hanga tuhwime ni kulenga. Alioze twatamba kukanyama hanga kuheha chihone kupwa chuma chilemu chinji ku mwono wetu. Ku sekulu yitangu, atu anji kapwile ni nyonga liacho liakwamba ngwo: “Tulienu, tunwenu, mumu hamene mutufwa.” (A-Korindu 15:32) Ni musono nawa atu anji kali ni nyonga lioliene. Chakutalilaho, mukweze umwe ku Europa ya kuchitokelo kaputukile kuya ku kukunguluka cha Yela ja Yehova. Alioze te kakuzanga chinji yiheho, chocho yecha kulikungulula ni Yela ja Yehova. Kulutwe, mba yanyingika ngwenyi, nyonga lienyi hakutwala ku yiheho linakamunehena yipikalo yinji. Chocho yaputuka nawa kulilongesa Mbimbiliya, hakupalika cha mashimbu, yaputuka kwambujola sango lipema. Muze amupapachishile, yamba ngwenyi: “Nakunenganyana wika mumu liakutokesa mashimbu anji, shimbu te kanda ngunyingika ngwami kuwayila Yehova chakuneha chiseke chinji kuhiana kukaula yiheho ya hano hashi.”

13. (a) Hana chilweza chize chinasolola ngwo kupalikisa maola anji ku kuheha ni yeheho hi chipema ko. (b) Yika muyihasa kutukwasa hanga tupwe ni nyonga lialita hakutwala ku kuheha ni yiheho?

¹³ Kuheha chatamba kutukwasa hanga tuhwime ni kupwa ni tachi. Mba mashimbu angahi twatamba kupalikisa ha kuheha? Mba tuwane kumbululo, twatamba kunyonga hachino. Atu anji kakuzanga kulia bolu ni yuma yize yayekemena. Alioze tunanyingika ngwetu, nyi mutulia yuma yacho mashimbu eswe, muyihasa kutunehena misongo. Nyi mutuzanga kupwa ni mwono upema, twatamba kulia yuma yipema yize muyitukwasa. Chizechene nawa, nyi mutupalikisa mashimbu anji ha kuheha ni yiheho, chino muchihasa kupihisa usepa wetu ni Yehova. Yika muyitukwasa kunyingika nyi tuli ni nyonga lialita hakutwala ku kuheha nyi ka? Chuma muchitukwasa chili kusakula yimwe poso ni kwalula maola waze twakupalikisa mu mulimo wetu kuli Yehova, ngwe, kuya ku kukunguluka, kwambujola ni kulilongesa Mbimbiliya. Mba himutwalula nawa maola waze twapalikisa ha poso yoyene ha kuheha, ngwe, kutala televizau, kuheha video game, kwasa konda hanji yiheho yikwo nawa. Muze mututesa maola jacho, yika mutulilongesa? Shina mutufupiwa kwalumunako yimwe?—Tanga A-Efwesu 5:15, 16.

14. Yika muyihasa kutukwasa kusakula kuheha ni yiheho yipema?

¹⁴ Yehova kakutwecha hanga tusakule kuheha chetu, nawa miata amu usoko mahasa kusakwila asoko jo kuheha hanji yiheho. Mu Mbimbiliya, Yehova kanatwehe shimbi jize jakusolola chize iye akunyonga. Shimbi jacho jakutukwasa hanga tukwate yiyulo yipema.a (Tala maliji mushi lia lifwo.) Kuheha chipema chapwa “chawana cha kuli Zambi.” (Chilumbununyi 3:12, 13) Tunanyingika ngwetu, hita mutu kakwete kuheha ni yiheho yize azanga. (A-Ngalashia 6:4, 5) Alioze, kuheha hanji yiheho yeswayo mutusakula, nihindu twatamba kukanyama. Yesu yamba ngwenyi: ‘Kweswako kwatwama upite we, kuzekwene nawa mukupwa mbunge ye.’ (Mateu 6:21) Zango lietu hali Mwanangana wetu Yesu, liakutukwasa kunyonga, kuhanjika ni kulinga yuma yize muyisolola ngwo, Wanangana wa Zambi ukwete ulemu unji ku mwono wetu kuhiana chuma cheswacho.—A-Fwilipu 1:9, 10.

EHUKA ZANGO LIA KUPWA NI UPITE UNJI

15, 16. (a) Kuchi zango lia kupwa ni upite unji mulihasa kupwa kambwila kuli yetu? (b) Chiyulo chika cha mana chize Yesu hanatwehe hakutwala ku zango lia kupwa ni upite unji?

¹⁵ Atu anji musono kakunyonga ngwo katamba kupwa ni mazalo, telefone, computador ya ndando yinji. Ayo kakwete zango lia kupwa ni upite unji, chino chinalumbunuka kuzanga yikumba ni mbongo kuhiana chuma cheswacho. Amu tuli akwa-Kristu, yuma yika yikwete ulemu ku mwono wetu? Lihule ngwe: ‘Shina nakupalikisa maola anji ni kunyonga mashinyi aha hanji mazalo a ndando yinji chakuhona kululieka malongeso akukunguluka? Kutala nakukalakala chinji hita shimbu chakuhona kulemba ni kutanga Mbimbiliya?’ Nyi kutwakeyele, zango lia kupwa ni upite unji mulihasa kupwa ni ulemu ku mwono wetu, kuhiana zango lietu kuli Kristu. Kashika, twatamba kupukuna ha maliji a Yesu akwamba ngwo: “Lifungenu ku kuzo yeswe.” (Luka 12:15) Mumu liaka ambile chocho?

¹⁶ Yesu kambile ngwenyi, “niumwe mahasa kulingila miata aali” wakuhi. Yawezela nawa ngwenyi: ‘Kunuchi kuhasa kulingila Zambi ni kulingila Upite hamuwika.’ Chili chikalu kulingila Yehova ni mbunge yeswe nawa ha shimbu lioliene kulihulikila ku yuma ya musunya. Yesu yalumbununa ngwenyi, hanji ‘mutuvwila kole umwe ni kuzanga mukwo’ chipwe ‘kukakaminya kuli umwe ni kulelesa mukwo.’ (Mateu 6:24) Amu tuli yihenge, twatamba kusa tachi hanga twehuke “usolo wa musunya,” kuchingako zango lia kupwa ni yuma hanji upite unji.—A-Efwesu 2:3.

17. (a) Mumu liaka chapwa chikalu kuli atu amwe kupwa ni nyonga lialita hakutwala ku upite? (b) Yika muyitukwasa hanga twehuke zango lia kupwa ni upite unji?

¹⁷ Atu anji kakulihulikila ha usolo wo ni ha yuma yize akuzanga chinji. Mumu lia yuma yino, chakupwa chikalu kuli ayo kupwa ni nyonga lialita hakutwala ku upite. (Tanga 1 A-Korindu 2:14.) Amu keshi ni nyonga lialita, muchihasa kupwa chikalu kuli ayo kunyingika kulisa cha upi ni upeme. (A-Hepreu 5:11-14) Usolo wo hakutwala ku upite wakwoka chinji. Nawa chipwe muze akupwa ni upite wacho, nihindu kakununga ni kuufupa. (Chilumbununyi 5:10) Alioze kuli chimwe chuma chize mutuhasa kulinga mba twehuke nyonga liacho. Kutanga Liji lia Zambi matangwa eswe, muchitukwasa hanga twehuke zango lia kupwa ni upite unji. (1 Petulu 2:2) Yesu kanakapukuna ha mana a Yehova, chino chamukwashile kukumba yeseko ya Ndiapu. (Mateu 4:8-10) Ni musono nawa, nyi mutufupa kukumba zango lia kupwa ni upite unji, twatamba kukaula mana a Yehova ku mwono wetu. Chino muchisolola kuli Yesu ngwo, twamuzanga chinji kuhiana yikumba hanji upite.

18. Yika watamba kulinga ku mwono we?

¹⁸ Muze Yesu ahulile Petulu ngwenyi, Shina “unanguzange kuhiana wano, nyi?” iye te kanalongesa Petulu ngwo kuwayila Yehova chatamba kupwa chuma chilemu ku mwono wenyi. Chili chipema ha kunyingika ngwo jina lia Petulu linalumbunuka “Chihanda cha Liwe.” Yitanga yipema ya Petulu muyihasa kupwa ngwe liwe. (Yilinga 4:5-20) Ni musono nawa, tunazange kukolesa zango lietu kuli Kristu. Nyi twachilinga, mba mutupwa ni shindakenyo ngwetu, milimo yetu yaku musunya, kuheha ni zango lia kupwa ni upite unji kuyili ha chihela chalita ku mwono wetu. Hachino, mutupwa ngwe Petulu wambile ngwenyi: ‘Mwene; yena unanyingika, nakukuzanga.’