Yehova Kuchi Apwa?

Ku nyonga lie, Yehova kuchi apwa? Wakunyonga ngwe iye kali mukwa-ndundo yoze watwama kusuku ni yena ngwe tutongonoshi mwilu? Nyi wakunyonga ngwe hi mutu ko, alioze kapwa wika ngwe fuji? Mba Yehova kuchi apwa? Mbimbiliya yakusolola utu wa Zambi. Chikwo nawa yinambe ngwo iye kakulihulumba hali yena.

1. Mumu liaka kutushi kuhasa kumona Zambi?

Ha mukanda wa Yoano 4:24, Mbimbiliya yinambe ngwo, “Zambi iye Spiritu.” Yehova katwamine ni mujimba wa musunya. Zambi iye Spiritu, katwama mu malilu muma muze kutuchi kuhasa kumona.

2. Yitanga yika Yehova akwete?

Tunanyingika ngwetu kutushi kumona Yehova. Nyi twamunyingika kanawa, mutumona ngwetu kali mutu wamwenemwene yoze ukwete yitanga yipema. Mbimbiliya yinambe ngwo: “Yehova kakuzanga [umwenemwene]; keshi kwehuka asandu jenyi.” (Samu 37:28) Kapwa nawa “wa too ni vumbi ni keke,” hanji ngwetu kakuvwila atu keke chipi-chipi waze anamono lamba. (Tiangu 5:11) Yehova katwama hehi ni waze amakuka mbunge, “kakulamwina waze ali ni spiritu ya kupihilila.” (Samu 34:18) Yitanga yetu muyihasa kuvwisa Yehova kuwaha hanji chinyengo. Nyi mutu masakula kulinga yuma yipi, Yehova kakwivwa kupiha chinji. (Samu 78:40, 41) Alioze Yehova kakuwahilila nyi mutu malinga yuma yalita.—Tanga Yishima 27:11.

3. Kuchi Yehova akusolola ngwenyi kakutuzanga?

Zango che chitanga chilemu cha Zambi. Mbimbiliya yinambe ngwo, “Zambi iye zango.” (1 Yoano 4:8) Hi Mbimbiliya wika ko muyihasa kutulongesa zango lia Zambi, alioze ni yitangiwa neyo muyihasa kutukwasa. (Tanga Yilinga 14:17.) Chakutalilaho, achinyonga ha chize atutangile. Iye katuhele uhashi wa kumona ulombo upema, kupanjika miaso yipema ni kulia kulia chiyema. Iye kanazange hanga tuwahilile.

NYINGIKA NAWA

4. Spiritu yisandu yili tachi ja Zambi

Twakukalakala ni moko muze tunalingi umwe mulimo. Alioze, Yehova kakuzachisa spiritu yenyi yisandu. Mbimbiliya yakusolola ngwo, spiritu yisandu hi mutu ko, alioze yili tachi jize Yehova akuzachisa hanga alinge najo yuma. Tanga Luka 11:13 ni Yilinga 2:17, mba nushimutwine yihula yino:

• Zambi ‘kumakazukwila’ spiritu yisandu kuli waze mamwitayo. Ku nyonga lie, shina spiritu yisandu yili mutu nyi tachi jize Zambi akuzachisa? Mumu liaka wakumbulula chocho?

Yehova kakuzachisa spiritu yenyi yisandu hanga alinge yuma yakukomwesa. Tanga Samu 33:6 ni 2 Petulu 1:20, 21, mba nushimutwine chihula chino:

• Kuchi Yehova azachishile spiritu yenyi yisandu?

5. Yehova kakwete yitanga yipema chinji

Mose kapwile kavumbi washishika wa Zambi. Chipwe chocho, kazangile kulilongesa yuma yinji hali Sakatanga. Kashika echile kuli Yehova ngwenyi: “Ngulweze kama majila je, ngukunyingike.” (Kutuhuka 33:13) Chocho, Yehova yasolwela Mose yitanga yimwe yize iye akwete. Tanga Kutuhuka 34:4-6, mba nushimutwine yihula yino:

• Yitanga yimwe yika yize Yehova asolwele kuli Mose?

• Chitanga chika cha Yehova chize wakuzanga chinji?

6. Yehova kakulihulumba hali atu

Ku mashimbu a kunyima, A-Hepreu kapwile atu ja Zambi mba yapwa mu undungo ku Engitu. Kuchi Yehova apwile ni kwivwa muze te akumona atu jenyi mamona lamba? Panjika MALIJI AKUKOPA hanji, tanga Kutuhuka 3:1-10. Mba nushimutwine yihula yino:

MALIJI AKUKOPA: Yehova Kalihulumbile ha Lamba lio (2:45)

• Kuchi Yehova akwivwa muze atu akumona lamba?—Tala versu 7 ni 8.

• Ku nyonga lie, shina Yehova kanazange kukwasa atu? Shina kali ni ndundo ja kuchilinga? Mumu liaka wakumbulula chocho?

7. Yitangiwa yakusolola yitanga ya Yehova

Mutuhasa kunyingika yitanga ya Yehova ha kuzeula yuma yize atangile. Tala CHINEMA. Hanyima, tanga A-Roma 1:20, mba nushimutwine chihula chino:

CHINEMA: Yitangiwa Yakusolola Zango lia Yehova—Mujimba wa Mutu (1:57)

• Yitanga yika ya Yehova yize wakumona ha yitangiwa yenyi?

YIZE WALILONGESA

Kutushi kuhasa kumona Yehova mumu iye Spiritu. Kakwete yitanga yinji yipema, alioze chitanga chenyi chilemu chinji chili zango.

Kuhitulula

• Mumu liaka kutushi kuhasa kumona Yehova?

• Spiritu yisandu yika yinalumbunuka?

• Yitanga yimwe yika Yehova akwete?

HENGWOLA NAWA

Yehova kakwete yitanga yiwana yilemu. Nyingika kanawa yitanga yacho ha longeso lino.

“Zambi Kuchi Apwa?” (Kaposhi wa Kutalila No. 1 2019)

Tala yize yinasolola ngwo, Yehova katwamine ku yihela yeswe.

“Shina Zambi Katwama ku Yihela Yeswe ha Shimbu Limuwika?” (Lusango wa ha internet)

Tala mumu liaka Mbimbiliya yakwamba ngwo spiritu yisandu yapwa ngwe moko ja Zambi.

“Spiritu Yisandu Yika Yinalumbunuka?” (Lusango wa ha internet)

Umwe kapuputa kasele tachi jinji mba anyingike ngwenyi Zambi kakulihulumba hali iye. Tala yuma yize yalumwine manyonga jenyi.

“Haliapwila Hinanyingika Ngwami Munguhasa Kukwasa Akwetu” (Kaposhi wa Kutalila 1 wa Outubro 2015)