LONGESO 02
Mbimbiliya Yakutwaha Kutalatala
Atu anji kakupinda ni yuma yize yakwevwisa yinyengo, yikola ni kwasakalalisa. Shina hiwunapalika kama mu yuma yacho? Hanji unamono lamba hamukunda wa umwe musongo hanji mumu lia kufwisa mutu yoze wazanga chinji. Kashika muhasa kulihula ngwe, ‘Shina mwono muwiza kapema?’ Mbimbiliya yakututakamisa ha kukumbulula yihula yino.
1. Kutalatala chika Mbimbiliya yakutwaha?
Mbimbiliya yakulumbununa mumu liaka twakumona lamba linji. Yakutwaha sango lipema ngwo lamba lieswe kumulikahwa. Yilakenyo ya mu Mbimbiliya muyihasa kutwaha ‘kutalatala cha yuma ya kulutwe.’ (Tanga Jeremia 29:11, 12.) Kutalatala chacho muchihasa kutukwasa kukumba yipikalo ya ku mwono ni kuwahilila haliapwila. Muchitukwasa nawa kupwa ni nyonga lialita ni kunyingika ngwetu mutukawahilila ndo ku miaka ya mutolo.
2. Kutalatala chika Mbimbiliya yinalakenya?
Mbimbiliya yakuhanjika ha limwe shimbu muze ‘kufwa kuchichi kapwako nawa; kukuchi kapwa nawa kunenganyana, chipwe miteto, chipwe yikola, ka.’ (Tanga Usolwelo 21:4.) Yipikalo ngwe, uswale, uhenge, yikola ni kufwa yize yakunyongesa atu ngwe mwono kuushi ni kutalatala, kuyichi kapwako nawa. Mbimbiliya yinalakenya ngwo, atu kumakawahilila ku mwono mu paraisu hano hashi.
3. Kuchi muhasa kupwa ni shindakenyo ngwe yilakenyo ya mu Mbimbiliya muyikamanunuka?
Atu anji kakushimbwila yuma yipema, chipwe ngwe keshi ni shindakenyo nyi chamwenemwene lume yuma yacho muyikalingiwa. Alioze twatamba kupwa ni shindakenyo ngwetu yuma yize alakenya mu Mbimbiliya muyikalingiwa. Mutuhasa kufuliela yilakenyo yacho ha ‘kuhengula Yisoneko.’ (Yilinga 17:11) Kulilongesa Mbimbiliya muchikukwasa kumona mumu liaka watamba kufuliela ha yize Mbimbiliya yakwamba hakutwala ku yuma ya kulutwe lia matangwa.
NYINGIKA NAWA
Tala yuma yikwo yize Mbimbiliya yinalakenya. Tala chize yilakenyo yacho yinakwase atu musono.
4. Mbimbiliya yinalakenya ngwo, mutuhasa kutwama kanawa ndo ku miaka ya mutolo
Tala unji wa yilakenyo yize muhasa kuwana mu Mbimbiliya. Chilakenyo chika chize wazanga chinji? Mumu liaka?
Tanga yisoneko yize anatongola mushi ni kushimutwina yihula yino:
Ku nyonga lie, shina yisoneko ayi muyihasa kukuyukisa? Shina asoko ni masepa je no mahasa kuyuka ha yisoneko yacho?
Achinyonga kutwama mu chifuchi muze
NIUMWE KECHI . . . |
TULIESWE MUTUKAWAHILILA HA . . . |
|---|---|
|
|
|
|
|
|
|
|
|
|
5. Yilakenyo ya mu Mbimbiliya muyihasa kukukwasa
Atu anji kakuhonga hanji kupihilila ha kumona yuma yipi yize yakulingiwa. Amwe kakweseka kusa tachi hanga alulieke yuma yacho. Tala chize yilakenyo ya mu Mbimbiliya yakwamba ngwo yuma muyikapema, yinakwasa atu anji musono. Tala CHINEMA, mba nushimutwine yihula yinahateho.
Kulita ni chinema, yuma yika yapinjishile Rafika?
Chipwe ngwe upi uze amwene kuwakahwile, kuchi Mbimbiliya yamukwashile?
Nyi twafuliela mu yilakenyo ya mu Mbimbiliya, mutuhasa kuwahilila chipwe ngwe tunapalika mu yipikalo. Tanga Yishima 17:22 ni A-Roma 12:12, mba nushimutwine yihula yino:
Shina kufuliela ha yilakenyo ya mu Mbimbiliya muchihasa kupemesa mwono we haliapwila? Mumu liaka?
ATU AMWE KAKWAMBA NGWO: “Yilakenyo ya mu Mbimbiliya kuyichi kamanunuka, mumu hi yamwenemwene ko.”
Mumu liaka chili chilemu kuhengwola yena mwene umwenemwene wacho?
YIZE WALILONGESA
Mu Mbimbiliya muli yilakenyo yinji yipema ya kulutwe lia matangwa. Yilakenyo yacho yakutwaha kutalatala ni kupwa ni uwahililo ku mwono haliapwila.
Kuhitulula
Mumu liaka atu anafupiwa kunyingika yilakenyo ya Zambi?
Yika Mbimbiliya yakwamba hakutwala ku yuma ya kulutwe lia matangwa?
Kuchi kupwa ni kutalatala cha kulutwe lia matangwa muchihasa kukukwasa haliapwila?
HENGWOLA NAWA
Nyingika nawa chize kutalatala muchihasa kukukwasa muze unamono lamba.
“Kutalatala—Kulihi Mutuhasa Kuchiwana?” (Laulenu! 22 ya Abril, 2004)
Nyingika chize kutalatala cha kulutwe lia matangwa, muchihasa kukwasa waze akwete musongo uze kuushi kuya.
“Nyi Ukwete Musongo Uze Kuushi Kuya—Shina Mbimbiliya Muyihasa Kukukwasa?” (Lusango wa ha internet)
Muze mutala chinema cha mwaso, nyonga ha chize mukawahilila hamwe ni asoko je mu Paraisu yize Mbimbiliya yinalakenya.
Tala chize kutalatala cha kulutwe lia matangwa chalumwine mwono wa umwe lunga te wazanga chinji kukalila atu.