Mumu Liaka Kwakulingiwa Yuma Yipi ni Lamba?

Muze kwakulingiwa yuma yipi, kanji-kanji atu kakulihula ngwo: “Mumu liaka chino chalingiwa?” Chili kuyuka chinene kunyingika kumbululo lia Mbimbiliya hakutwala ku chikuma chino!

1. Yika Satana alingile mba yuma yipi yiputuke kulingiwa hano hashi?

Satana Ndiapu kehukile Zambi. Satana kazangile kuyula akwo, chocho yapiangula Alama ni Eva hanga apwe sali lienyi. Satana kalingile chino ha kwonga Eva. (Uputukilo 3:1-5) Iye yalingisa Eva hanga anyonge ngwe, Yehova kanakaaswekela chimwe chuma chipema. Satana yasolola ngwe atu mawahilila nyi mecha kwononokena Zambi. Satana kahanjikile mahuza atangu muze alwezele Eva ngwenyi kechi kufwa. Kashika Mbimbiliya yakuvuluka Satana ngwo, “mukwa mahuza ni mwe tato ya mahuza.”—Yoano 8:44.

2. Yika Alama ni Eva asakwile kulinga?

Yehova kahanyine yuma yinji kuli Alama ni Eva. Iye kaalwezele ngwenyi, ku mitondo yeswe ya mu munda wa Endene mahasa kulia, kuchizako mutondo umuwika. (Uputukilo 2:15-17) Alioze o yasakula kulia ku mutondo wacho. Eva ‘yahelako muhuko, yalia’ mba Alama “neye yalia.” (Uputukilo 3:6) O eswe yehuka Yehova. Amu Alama ni Eva apwile angunu, o katambile kulinga yuma yalita. Alioze muze ehukile Zambi, kavulumwine kuli iye ni kulituna chiyulo chenyi. Chiyulo chize akwachile chaanehenene lamba linji.—Uputukilo 3:16-19.

3. Kuchi chiyulo cha Alama ni Eva chakwachile hali yetu?

Muze Alama ni Eva avulumwine, yapwa yihenge. Hachino, ana jo eswe yahinga uhenge wacho. Kashika Mbimbiliya yakuhanjika hali Alama ngwo: “Chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe.”—A-Roma 5:12.

Kuli yuma yinji yize yakutukokela lamba. Mashimbu amwe twakumona lamba mumu lia chimwe chiyulo chipi chize twakwata. Ha mashimbu eka twakumona lamba mumu lia yiyulo yipi yize akwetu akukwata. Ha mashimbu akwo nawa twakumona lamba mumu lia kupwa ha chihela chipi ni ola yipi.—Tanga Chilumbununyi 9:11.

NYINGIKA NAWA

4. Yoze wakutukokela lamba

Atu anji kakunyonga ngwe Zambi mwe unayulu hashi. Shina au uli umwenemwene? Tala CHINEMA.

CHINEMA: Iya Unayulu Hashi? (1:24)

Tanga Tiangu 1:13 ni 1 Yoano 5:19, mba nushimutwine chihula chino:

• Shina lamba lize twakumona Zambi mwe wakutukokelalio?

5. Yuma yize yakulingiwa chize haze Satana aputukile kuyula

CHINEMA: Mumu Liaka Zambi Akwecha Kupwe Lamba?—Chihanda chikehe (3:07)

Tanga Uputukilo 3:1-6, mba nushimutwine yihula yino:

• Mahuza aka Satana ahanjikile?—Tala versu 4 ni 5.

• Kuchi Satana alingishile hanga Alama ni Eva anyonge ngwe Yehova kanakaaswekela chimwe chuma chipema?

• Kulita ni maliji a Satana, shina atu kanafupiwa ukwaso wa Yehova mba awahilile?

Tanga Chilumbununyi 8:9, mba nushimutwine chihula chino:

• Ha shimbu lieswali Yehova keshi ni kuyula hashi, yuma yika yakulingiwaho?

1. Alama ni Eva kapwile atu angunu waze te atwama mu Paraisu. Alioze yapanjika kuli Satana ni kwehuka Yehova

2. Muze Alama ni Eva ehukile Zambi, shili, lamba ni kufwa yiyinjila hashi

3. Yehova makahwisa shili, lamba ni kufwa. Atu makapwa nawa angunu ni kutwama mu Paraisu

6. Yehova kakulihulumba ha lamba lietu

Shina Yehova kakulihulumba ha lamba lize twakumona? Tala yize Mwanangana Ndawichi ni postolo Petulu asonekene. Tanga Samu 31:7 ni 1 Petulu 5:7, mba nushimutwine chihula chino:

• Kuchi wakwivwa ha kunyingika ngwe Yehova kakumona ni kulihulumba ha lamba lietu?

YIZE WALILONGESA

Satana Ndiapu, Alama ni Eva e akokele lamba lieswe lize twakumona hano hashi. Yehova kakulihulumba ha lamba lietu, kashika kwasala hakehe mahwisa lamba lieswe hano hashi.

Kuhitulula

• Mahuza aka Satana ahanjikile kuli Eva?

• Kuchi uhulia wa Alama ni Eva unakwate hali yetu musono?

• Kuchi tunanyingika ngwetu, Yehova kakulihulumba ha lamba lietu?

HENGWOLA NAWA

Nyingika ulumbunwiso wa mu Mbimbiliya hakutwala ku shili.

“Shili Yika Yinalumbunuka?” (Lusango wa ha internet)

Nyingika nawa hakutwala ku chikuma chize Satana Ndiapu ahanjikile mu munda wa Endene.

“Mumu Liaka Zambi Akwecha Kupwe Lamba?” (Kaposhi wa Kutalila 1 wa Janeiro, 2014)

Tala kumbululo lia utakamiso lia chimwe chihula chikalu chinji.

“Mumu liaka Zambi Kakanjishile Holocausto?” (Lusango wa ha internet)

Tala yuma yize umwe lunga alilongesele hakutwala ku lamba lize apwile ni kumona.

Yehova Kangwaha Mwono Upema (5:09)

Tulieswe twakuvulumuna, twakumona lamba ni kufwa, mumu Alama ni Eva kehukile Zambi.a Alioze tuli ni kutalatala. Yehova yahana Mwanenyi Yesu Kristu hanga atutusule ku shili ni kufwa. Mbimbiliya yakulongesa ngwo, kufwa cha Yesu chinalumbunuka ukuule kuli yetu. Ukuule unalumbunuka ndando yize akufweta hanga atusule umwe mutu. Ndando yize Yesu afwetele yapwile mwono ungunu. (Tanga Mateu 20:28.) Muze Yesu ahanyine mwono wenyi, yazulula jila hanga tupwe nawa ni yuma yize Alama ni Eva atokesele. Yesu kasolwele chize iye ni Yehova akutuzanga. Longeso lino mulikukwasa kusolola usakwililo ha yize Yesu alingile.

1. Kuchi mutuhasa kuyuka ha kufwa cha Yesu?

Mumu lia kupwa yihenge, twakulinga yuma yipi yize Yehova keshi kuzanga. Alioze nyi tweta ukonekeno kuli Yehova kupalikila muli Yesu Kristu ni kusa tachi hanga twalumune yitanga yetu, mutuhasa kupwa ni usepa upema ni Zambi. (1 Yoano 2:1) Mbimbiliya kuyinambe ngwo: “Kristu nawa wafwile kamuwika ha milonga, mukwa ululi hali yihenge, hanga akatunehe kuli Zambi.”—1 Petulu 3:18.

2. Kuchi kufwa cha Yesu muchikatuyukisa kulutwe lia matangwa?

Yehova katumine Yesu ahane mwono wenyi ungunu “hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Mumu lia yize Yesu alingile, kwasala hakehe Yehova mahwisa yuma yeswe yipi yakwiza mumu lia uhulia wa Alama. Chino chinalumbunuka ngwo, nyi twafuliela ha chitapo cha Yesu, mutukawahilila ku mwono mu paraisu hano hashi!—Izaia 65:21-23.

NYINGIKA NAWA

3. Kufwa cha Yesu chakututusula ku shili ni kufwa

CHINEMA: Mumu Liaka Yesu Afwile?—Chihanda 1 (2:01)

• Yuma yika Alama atokesele muze ehukile Zambi?

Tanga A-Roma 5:12, mba nushimutwine chihula chino:

• Kuchi shili ya Alama yinakwata hali yena?

Tanga Yoano 3:16, mba nushimutwine chihula chino:

• Mumu liaka Yehova atumine Mwanenyi hano hashi?

1. Alama kapwile mutu mungunu, alioze yehuka Zambi. Hachino, atu eswe yahinga shili ni kufwa

2. Yesu kapwile mutu mungunu yoze wononokene kuli Zambi. Chino chakuhana uhashi kuli atu hanga apwe ni kutalatala cha mwono wa mutolo

4. Kufwa cha Yesu muchihasa kuyukisa atu eswe

CHINEMA: Mumu Liaka Yesu Afwile?—Chihanda 2 (2:00)

• Kuchi kufwa cha mutu umuwika muchihasa kuyukisa atu eswe?

Tanga 1 Timoteu 2:5, 6, mba nushimutwine chihula chino:

• Alama kapwile mungunu, alioze muze avulumwine atu eswe yahinga shili yacho ni kufwa. Yesu neye kapwile mungunu. Mba yika iye ahashile kulinga?

5. Ukuule uli chawana cha Yehova kuli yetu

Masepa ja Yehova kakumona ngwo, ukuule uli chawana cha Yehova kuli ayo. Chakutalilaho, tanga A-Ngalashia 2:20, mba nushimutwine chihula chino:

• Kuchi postolo Paulu asolwele ngwenyi ukuule wapwile chawana cha Zambi kuli iye?

Muze Alama avulumwine, iye ni ana jenyi eswe yashingiwa ku kufwa. Alioze Yehova yatuma Mwanenyi atufwile hanga tupwe ni kutalatala cha mwono wa mutolo.

Muze mutanga versu jino, nyonga ha chize Yehova evwile ha kumona lamba lia Mwanenyi. Tanga Yoano 19:1-7, 16-18, mba nushimutwine chihula chino:

• Kuchi wakwivwa ha yuma yize Yehova ni Yesu alingile hali yena?

YIZE WALILONGESA

Yehova kakukonekena shili yetu mumu Yesu katufwilile. Chikwo nawa, chino chakutwaha kutalatala cha mwono wa mutolo.

Kuhitulula

• Mumu liaka Yesu afwile?

• Kuchi mwono ungunu wa Yesu muuhasa kukuula atu eswe?

• Kuchi kufwa cha Yesu muchihasa kukuyukisa?

HENGWOLA NAWA

Nyingika mumu liaka mwono ungunu wa Yesu akuuvuluka ngwo ukuule.

“Kuchi Chitapo cha Yesu Muchihasa Kupwa ‘Ukuule kuli Eswe’?” (Lusango wa ha internet)

Nyingika yize twatamba kulinga mba akatulamwine.

“Kuchi Yesu Akulamwina?” (Lusango wa ha internet)

Shina Yehova mahasa kukonekena yeswayo shili?

“Kumbululo lia Yihula ya Mbimbiliya” (Kaposhi wa Kutalila 1 wa Maio, 2013)

Tala chize kulilongesa hakutwala ku chitapo cha Kristu, chakwashile umwe ndumbu kwalumuna kupwa chenyi.

“Haliapwila Chishi Kuzanga Nawa Upupilo” (Lusango wa ha internet)