Lijimu—Shina Watamba Kufweta?

ATU akehe akuzanga kufweta lijimu. Atu anji kakunyonga ngwo mbongo ja lijimu kakujikisa mumu keshi kujizachisa kanawa, kakujihana kuli waze katelele hanji kujiya. Amwe keshi kutayiza kuhana lijimu mumu lia yize akunyonga. Ha kulumbununa chiyulo cho cha mumu liaka keshi kufweta lijimu, atu a ku Oriente Médio kambile ngwo: “Twazangile kuhana mbongo hanga alande mata waze akushiha ana jetu.”

Atu anji no che akunyonga. Mohandas Gandhi yoze wapwile kasongo wa A-hindu kasolwele nyonga lienyi ha chikuma chino ha kwamba ngwenyi: “Mutu yoze wakukwasa nguvulu uli ni maswalale, kwamba pundu kanakwase ku shili yo. Mutu mweswawo mukweze hanji kashinakaji kakukwasa ku shili ya nguvulu ha kufweta lijimu.”

Chizechene nawa, mukwa-mana Henry David Thoreau wa ku sekulu 19, kulita ni chize apwile ni kunyonga, kechele kufweta lijimu mumu te kakulizachisa hanga akwase ku jita. Iye kahulile ngwenyi: “Shina mutu mweswe katamba kulengulula shimbi yenyi ya mbunge chipwe ha shimbu likepe wika ni kwononokena mutu yoze wakusa shimbi? Mumu liaka mba hita mutu amuhele shimbi ya mbunge?”

Chikuma chino, chinatale nawa hali Akwa-Kristu mumu Mbimbiliya yakwamba ngwo ayo katamba kupwa ni mbunge yitoma ha yuma yeswe. (2 Timoteu 1:3) Sali likwo nawa, manguvulu kali ni chiyulo cha kwita lijimu. Mbimbiliya yakwamba ngwo: “Mutu mweswe akazeye kuli waze ali ni poko ya kuyula. Mumu mukwa kuyula wakuhi niumwe shina wa kuli Zambi. Akwa kuyula aze aliko hanaaselacho kuli Zambi. Kashika chanutamba kuzeya, hi mumu ha utenu wenyi wika ko, alioze mumu ha shimbi ya mbunge jenu. Mumu ha chikuma chino nwakufweta lijimu nawa, mumu o akwa kulingila Zambi, kakuhondangana matangwa eswe ha chuma chino. Kashika hanenu kuli eswe yize chanutamba kuhana kuli ayo; milambu kuli akwa kutela milambu; lijimu kuli akwa kutela lijimu.”—A-Roma 13:1, 5-7.

Mumu lia chino, Akwa-Kristu a ku sekulu yitangu te kaanyingika ha chako cho cha kufweta lijimu chipwe ngwe chihanda cha mbongo jacho te kakuchizachisa ku jita. Ni Yela ja Yehova no chenacho anaanyingika musono.a Kuchi mutuhasa kulumbununa kulimika chino: Shina Mukwa-Kristu katamba kulengulula shimbi yenyi ya mbunge ni kufweta lijimu?

Lijimu ni Shimbi ya Mbunge

Chili chilemu kunyingika ngwo, chihanda cha mbongo ja lijimu jize Akwa-Kristu a ku sekulu yitangu apwile ni kufweta, kapwile ni kujizachisa ku jita. Chikuma chino, che chatwalile Gandhi ni Thoreau kulituna kufweta lijimu.

Akwa-Kristu kapwile ni kwononokena shimbi yili ha A-Roma kapitulu 13 hi wika ko mumu hanga ahone kwamwesa lamba, alioze mumu lia ‘shimbi yo ya mbunge.’ (A-Roma 13:5) Shimbi ya mbunge ya Mukwa-Kristu yakumutwala afwete lijimu chipwe ngwe malizachisa mu yuma yize kuli iye kuyalitelele. Mba tunyingike kanawa chikuma chino, twatamba kuhengwola chimwe chikuma chilemu hakutwala ku shimbi yetu ya mbunge, liji lize liakutulweza nyi yize tunalingi yili yipema hanji yipi.

Atu eswe kali ni shimbi ya mbunge ngwe chize Thoreau ambile, alioze kutwafupiwile kuyijikijila chinji. Mba tuvwise Zambi kuwaha, shimbi yetu ya mbunge yatamba kulita ni yize iye akwamba ngwenyi yili yipema hanji yipi. Kanji-kanji tunafupiwa kululieka kunyonga chetu chilite ni kunyonga cha Zambi, mumu kunyonga chenyi chahiana kunyonga chetu. (Samu 19:7) Hachino, twatamba kusa tachi hanga tunyingike chize Zambi akumona manguvulu. Kuchi iye akwamona?

Tunyingikenu ngwetu, postolo Paulu kavulukile manguvulu a hashi ngwo “akwa kulingila Zambi.” (A-Roma 13:6) Yika chino chinalumbunuka? Chino chinalumbunuka ngwo, ayo kakululieka yuma ni kulinga mulimo upema kuli atu jenyi. Chipwe manguvulu waze akwete kalimbalimba, no kakutunga mashikola, kusakula chizavu cha maswalale waze akujima kahia ni kutwaha atu akwo akwa-shimbi. Chipwe ngwe Zambi kananyingika kanawa uhenge wa manguvulu jacho, nihindu iye kaneche hanga ayo ayule, chikwo nawa, kanazange hanga tufwete lijimu mumu lia vumbi lize tukwete ha chize iye asele ululikiso wacho, chekwamba ha chize iye atayijile manguvulu ayule hashi.

Zambi kaneche hanga manguvulu ayule ha mashimbu akehe wika. Iye makachiza manguvulu eswe kupalikila mu Wanangana wenyi wa mu malilu, mba hi kusongo makachiza upi weswe uze manguvulu akuneha kuli atu ha miaka yinji. (Daniele 2:44; Mateu 6:10) Amu tangwa liacho kanda lichiheta, Zambi kazangile hanga Akwa-Kristu eche kwononokena manguvulu ha kwecha kufweta lijimu hanji ha yuma yikwo nawa.

Mba yika mutwamba nyi chizechene ngwe Gandhi ni yena wakunyonga ngwo, kufweta lijimu lize akuzachisa hanga akwase ku jita chili shili? Achinyonga ha chino: Nyi wanyina ku umwe mulundu usuku muhasa kumona kanawa yuma yeswe yili mushi, chizechene nawa, mutuhasa kululieka kunyonga chetu hanga chilite ni kunyonga cha Zambi ha kupukuna ha chize kunyonga chenyi chinahiana kunyonga chetu. Kupalikila muli profeta Izaia, Zambi kambile ngwenyi: “Chizechene ngwe malilu kanasuha helu lia hashi, chocho ndako jami jakusuha helu lia ndako jenu, ni manyonga jami kakusuha helu lia manyonga jenu.”—Izaia 55:8, 9.

Chiyulo Chahiana?

Chipwe ngwe Mbimbiliya yinambe ngwo twatamba kufweta lijimu, chino kuchalumbunukine ngwo manguvulu kali ni chiyulo chahiana hali atu jo. Yesu kalongesele ngwenyi, chiyulo chize Zambi ahanyine kuli manguvulu chili ni haze chasulila. Muze Yesu amuhulile nyi kumeso ja Zambi muchilita kufweta lijimu kuli nguvulu wa A-Roma wa ha mashimbu jenyi, kumbululo lize iye ahanyine mulihasa kutukwasa hanga tunyonge, iye yamba ngwenyi: “Hanenu kuli Sesare yuma ya Sesare, ni kuli Zambi yuma ya Zambi.”—Marku 12:13-17.

“Sesare” kanalumbunuka manguvulu eswe, o kakulinga mbongo ni kutesa ndando jajo. Kashika, o kali ni ulite wakutambula cheka mbongo jacho ngwe lijimu. Alioze Yesu yasolola ngwenyi, “yuma ya Zambi” mwono wetu ni uwayilo wetu, kutwatambile kuyihana ku ululikiso niumwe wa atu. Muze shimbi ja atu jakulimika ni shimbi ja Zambi, Akwa-Kristu ‘kakwononokena kuli Zambi, hi kuli atu ko.’—Yilinga 5:29.

Musono, Akwa-Kristu mahasa kulihulumba ha chize mbongo jize akufweta ngwe lijimu akujizachisa, chipwe chocho o keshi kulinjisa mu yuma yacho, kulimika ni manguvulu hanji kulituna kufweta lijimu. Chino te muchisolola kuhona ujikijilo ha yize Zambi ambile ha chize atu mahasa kululieka yuma hano hashi. O kanashimbwila ni uhomboloji shimbu lize Zambi makalulieka yuma hano hashi kupalikila mu unguvulu wa Mwanenyi Yesu, yoze wambile ngwenyi: “Wanangana wami hi wa hano ko.”—Yoano 18:36.

Yiwape Yakwiza ha Kukaula Yize Mbimbiliya Yakwamba

Yena muhasa kuyuka chinji ha kukaula yize Mbimbiliya yakwamba ha chikuma cha kufweta lijimu. Muhasa kwehuka lamba lize liakwiza kuli waze akwehuka ni kulimika ni shimbi ya nguvulu ni woma wa kukukwata. (A-Roma 13:3-5) Chahiana ulemu, mupwa ni mbunge yitoma kumeso ja Zambi nawa mumufumanyisa ha kwononokena shimbi ya nguvulu. Chipwe ngwe mutokesa mbongo jimwe mumu lia kufweta lijimu, kwesekesa ni waze keshi kufweta lijimu, yena muhasa kujikijila ha chilakenyo cha Zambi cha kufunga tuvumbi twenyi. Ndawichi yamba ngwenyi: “Napwile mukweze, haliapwila nguli mukulwana, hindu chamwene mukwa ululi kanamwehuka, hanji munyachi wenyi muufupafupa ya kulia.”—Samu 37:25.

Kashika, kukaula shimbi ya mu Mbimbiliya hakutwala ku kufweta lijimu muchikunehena sambukila ku manyonga. Zambi keshi kukuhisa mumu lia mulali uze manguvulu akuzachishilamo mbongo ja lijimu, chizechene ngwe shimbi jishi kuhisa mukwa-kufweta lukeza ha mutapu uze mwenya-zuwo akuzachishilamo mbongo. Muze te kanda achinyingika umwenemwene wa mu Mbimbiliya, umwe lunga avuluka ngwo Stelvio, wa ku Sul ya Europa, kasele tachi ha miaka yinji hanga alumune yuma ya mafwefwe. Ha kulumbununa mumu liaka echele kulinga chino, iye yamba ngwenyi: “Nafupiwile kutayiza ngwami, atu kechi kuhasa kuneha ululi, sambukila ni kulinunga hano hashi. Wanangana wa Zambi we wika muuhasa kululieka yuma hano hashi.”

Chizechene ngwe Stelvio nyi ‘muhana kuli Zambi yuma ya Zambi,’ ni yena muhasa kupwa ni shindakenyo yino. Mukamona mashimbu waze iye makaneha Wanangana wenyi wa ululi hano hashi ni kuhwisa uhenge weswe ni kululieka yuma yeswe yize manguvulu a hashi anapihisa.

[Maliji ali mushi]

[Chikuma chilemu]

Tunafupiwa kululieka kunyonga chetu chilite ni kunyonga cha Zambi, mumu kunyonga chenyi chahiana kunyonga chetu

[Chikuma chilemu]

Ha kwononokena shimbi ya kufweta lijimu, Akwa-Kristu kakupwa ni mbunge yitoma kumeso ja Zambi chikwo nawa, kakusolola ngwo kakujikijila muli iye ngwo maakwasa ha yeswayo mafupiwa

[Yizulie]

“Hanenu kuli Sesare yuma ya Sesare, ni kuli Zambi yuma ya Zambi”

[Chakutwaha]

Copyright British Museum