15. Mumu liaka Yesu amuvulukile ngwo “muhuko utangu”?

¹⁵ Uhindukilo wa Yesu ngwe mutu wa spiritu mu malilu, uli utangu ha uhindukilo wacho, nawa ulemu chinji. (Yilinga 26:23) Alioze, te hi iye ko wika ahindwishile ni kuya mu malilu. Yesu kalakenyene ngwenyi apostolo jenyi ashishika te makayula hamwe nenyi mu malilu. (Luka 22:28-30) Alioze te ayo matambula wika fweto lio muze mafwa. Hachino, ngwe Yesu, ni ayo te maahindwisa ni mijimba ya spiritu. Paulu yasoneka ngwenyi, “Kristu hanahinduka hakachi ka afu, muhuko utangu wa kuli waze hanayi tulo.” Hachino, Paulu yamba ngwenyi, te mukupwa atu akwo waze maahindwisa ni kuya mu malilu hakwamba ngwenyi: “Mutu mweswe mu ngango yenyi: Kristu we muhuko utangu; mba kulutwe akwa Kristu ha kwiza chenyi.”—1 A-Korindu 15:20, 23.

16. Yika yinatukwase kunyingika shimbu lize uhindukilo wakuya mu malilu te muulingiwa?

¹⁶ Maliji a Paulu kanatukwase kunyingika shimbu lize uhindukilo wakuya mu malilu te muulingiwa. Te muulingiwa ha kwiza cha Kristu. Ha miaka yinji, Yela ja Yehova kakusolola ngwo, kulita ni Mbimbiliya “kwiza” cha Kristu chaputukile ha mwaka 1914. Ni haliapwila tuchili ha “kwiza” cha Yesu, nawa songo lia yuma ya mwakono hiliakundama.

17, 18. Yika muyikalingwa kuli akwa-Kristu amwe akuwayisa ha kwiza cha Kristu?

¹⁷ Mbimbiliya yakulumbununa kanawa uhindukilo mu malilu, ngwo: ‘Kutwazangile nukalajale ha kutwala kuli waze hanayi tulo twa kufwa . . . Mumu nyi tunafuliela ngwetu, Yesu yafwa, yahinduka, chocho waze nawa hanayi tulo twa kufwa, Zambi kumakaaneha hamwe nenyi . . . Yetu tuli ni mwono, twasala ndo ku kuheta cha Mwene, kutuchi katetekela nichimwe waze hanayi tulo twa kufwa. Mumu Mwene, iye mwene, kumakahulumuka mwilu, ni liji lia mutambi, . . . mba afu muli Kristu kumakalianga kuhinduka. Mba kulutwe, yetu tuli ni mwono, twasala, kumakatupindumuna hamwe no mu malelwa, mukutakana ni Mwene mu tetela.”—1 A-Tesalonika 4:13-17.

¹⁸ Uhindukilo utangu te muuputuka ha amwe mashimbu akwiza cha Kristu. Akwa-Kristu akuwayisa waze makatwama ha mashimbu a luyinda munene, ‘kumakaapindumuna hamwe no mu malelwa.’ (Mateu 24:31) Yika maliji wano analumbunuka? Kanalumbunuka ngwo, waze ‘makapindumuna’ kechi kaya ‘tulo twa kufwa,’ chekwamba kechi kashimbula chinji mu ufwe. Hachino, muze mafwa, ayo ‘makaalumuna, susumuku, ha kukamuna cha liso, ha chitavwi cha kusula.”—1 A-Korindu 15:51, 52.

20. Mumu liaka mutuhasa kufuliela ngwetu uhindukilo muukapwa wakululieka kanawa?

²⁰ Mbimbiliya yinambe ngwo waze makahindwisa ni kuya mu malilu “mutu mweswe mu ngango yenyi.” (1 A-Korindu 15:23) Kashika mutuhasa kufuliela ngwetu uhindukilo wa hano hashi ni wayo muukapwa wa kululieka kanawa. Hachino, mutuhasa kulihula ngwetu: Shina atu waze anafu haliapwila makaahindwisa ku uputukilo wa Kuyula cha Kanunu Umuwika wa Kristu nawa makaatambwisa kuli waze anaanyingika? Kutala malunga ashishika aku shakulu waze te tusongo a mana makalianga kwaahindwisa hanga akakwase kululieka atu ja Zambi mu paraisu? Yika muyikalingiwa kuli atu waze te keshi kuwayila Yehova? Ha mashimbu aka, nawa kulihi makaahindwishila? Kuli yihula yinji yize mutuhasa kulihula. Alioze kutwatambile kulipikala haliapwila hakutwala ku yuma yacho. Muchilita tushimbwile wika tukamone ni meso jetu. Mutuhasa kufuliela ngwetu muchikawaha chinji kumona chize Yehova makalinga yuma yacho.