Kuchi Mbimbiliya Muyihasa Kukukwasa?

Tulieswe twakulihula hakutwala ku mwono, lamba, kufwa ni yuma ya kulutwe lia matangwa. Twakufupa nawa ukwaso wa chize mutuhasa kuhwisa kapinda, kuzuka mbongo ni kupwa ni uwahililo mu usoko. Atu anji keshi kuwana wika makumbululo a yihula yo, alioze kakuzuka nawa yiyulo yipema ya chize atamba kutwama kanawa ku mwono wo matangwa eswe. Ku nyonga lie, shina Mbimbiliya muyihasa kukwasa mutu mweswawo yoze unanyingika?

1. Yihula yika yize Mbimbiliya yakukumbulula?

Mbimbiliya yakukumbulula yihula yino yilemu: Kuchi mwono waputukile? Mumu liaka atutangile? Mumu liaka atu apema akumona lamba? Yika yakulingiwa kuli mutu nyi hafwa? Mumu liaka kwakulingiwa jita se atu eswe kakufupa sambukila? Yuma yika muyikalingiwa hano hashi? Mbimbiliya yinatukolweza hanga tufupe makumbululo a yihula yino. Tununu a tununu ja atu kakuwahilila ni makumbululo waze akuwana.

2. Kuchi Mbimbiliya muyihasa kutukwasa kuwahilila ku mwono wetu?

Mbimbiliya yakutwaha yiyulo yipema. Chakutalilaho, yakulongesa chize asoko mahasa kupwa ni uwahililo wamwenemwene. Yakutukwasa nawa kunyingika yize twatamba kulinga muze tunasakalala ni chize mutuhasa kulilongesa kuzanga mulimo wetu. Munyingika yize Mbimbiliya yakulongesa hakutwala ku yikuma ayi ni yuma yikwo nawa muze mutununga ni kulilongesa. Ni yena mwene mutayiza ngwe “Yisoneko yeswe [yuma yeswe yili mu Mbimbiliya] . . . kuyafumbuka.”—2 Timoteu 3:16.

NYINGIKA NAWA

Tala chize Mbimbiliya yakukwasa atu, chize muwahilila ha kuyitanga, ni mumu liaka chili chilemu kutambula ukwaso hanga unyingike yize Mbimbiliya yakulongesa.

3. Mbimbiliya muyihasa kutusongwela

Mbimbiliya yapwa ngwe ndeya. Muyihasa kutukwasa kukwata yiyulo yipema ni kutukwasa nawa kunyingika yize muyikalingiwa kulutwe lia matangwa.

Tanga Samu 119:105, mba nushimutwine yihula yino:

• Yika mukwa-kusoneka maliji wano te akunyonga hakutwala ku Mbimbiliya?

• Yika wakunyonga hakutwala ku Mbimbiliya?

4. Mbimbiliya muyihasa kukumbulula yihula yino

CHINEMA: Kanda Tuhonga Kutalatala!—Doris Eldred (1:48)

• Kulita ni chinema, yihula yika pwo twamonaho apwile nayo?

• Kuchi kulilongesa Mbimbiliya chamukwashile?

Mbimbiliya yinatukolweza tulieswe hanga tupwe ni kuhula. Tanga Mateu 7:7, mba nushimutwine chihula chino:

• Yihula yika yakukupinjisa yize Mbimbiliya muyihasa kukumbulula?

5. Muhasa kuwahilila ha kutanga Mbimbiliya

CHINEMA: Kutanga Mbimbiliya (2:05)

• Kulita ni chinema, kuchi akweze anji akwivwa ha kutanga Mbimbiliya?

• Mba mumu liaka nyonga lio lialumuka hakutwala ku kutanga Mbimbiliya?

Mbimbiliya yinambe ngwo muyihasa kutwaha usongwelo uze muututakamisa ni kutwaha kutalatala. Tanga A-Roma 15:4, mba nushimutwine chihula chino:

• Shina wakuzanga yilakenyo ya mu Mbimbiliya yize yakutwaha utakamiso ni kutalatala chipema?

6. Akwetu mahasa kutukwasa kunyingika Mbimbiliya

Atu waze akutanga Mbimbiliya ukawo, kakumona ngwo, kushimutwina Mbimbiliya ni akwo chakukwasa chinji. Tanga Yilinga 8:26-31, mba nushimutwine chihula chino:

• Kuchi mutuhasa kunyingika kanawa Mbimbiliya?—Tala versu 30 ni 31.

YIZE WALILONGESA

Mbimbiliya yakutwaha yiyulo yipema ya chize twatamba kutwama ku mwono wetu matangwa eswe. Yakukumbulula yihula yilemu ni kutwaha usongwelo uze muututakamisa ni kutwaha kutalatala.

Kuhitulula

• Yiyulo yika mutuhasa kuwana mu Mbimbiliya?

• Yihula yika yize Mbimbiliya yakukumbulula?

• Yika unazange kulilongesa mu Mbimbiliya?

HENGWOLA NAWA

Tala chize yiyulo ya Mbimbiliya yakutukwasa musono.

“Malongeso a Mbimbiliya—Kakwete Mana Waze Keshi Kuhwa” (Kaposhi wa Kutalila No. 1 2018)

Tala chize Mbimbiliya yakwashile umwe lunga te wakupinda ni manyonga api chize mu ukweze wenyi.

Kanda Tuhonga Kutalatala! (2:53)

Hengwola yiyulo yipema yize Mbimbiliya yakuhana kuli asoko

“Yikuma 12 Yize Yakuneha Uwahililo mu Usoko” (Laulenu! No. 2 2018)

Nyingika chize Mbimbiliya yakusolola manyonga alisa ja atu anji hakutwala kuli yoze unayulu hano hashi.

Mumu Liaka Twatamba Kulilongesa Mbimbiliya?—Chinema Cheswe (3:14)

1. Nyi atu e asonekene Mbimbiliya, mba mumu liaka akuyivuluka ngwo Liji lia Zambi?

Mbimbiliya kayisonekene kuli malunga 40 ha unji wa miaka 1.600. Mukanda utangu wa mu Mbimbiliya kausonekene ha mwaka 1513 K.M.J., wakasula wapwile kusoneka ha mwaka 98 M.J. Atu waze asonekene Mbimbiliya kapwile alisa, mumu amwe kapwile tufunga-mapanga, akwa-kuta yishi ni mianangana. Chipwe ngwe waze ayisonekene kapwile ni kulinga milimo yeka-ni-yeka, nihindu Mbimbiliya yalita chize ku uputukilo ndo ku songo. Kuchi chino chalingiwile? Chalingiwile mumu Zambi mwe mwenya Mbimbiliya. (Tanga 1 A-Tesalonika 2:13.) Akwa-kusoneka Mbimbiliya kakasonekene manyonga jo ene. Alioze ‘atu ahanjikile cha kuli Zambi, nikuhungumuka cha spiritu yisandu.’a (2 Petulu 1:21) Zambi yazachisa spiritu yisandu hanga akwase malunga jacho kusoneka manyonga jenyi.—2 Timoteu 3:16.