Lilongese ha Liji lia Zambi
Yika Muyikalingiwa ha Tangwa lia Upatwilo?
Mutwe uno muuhanjika hakutwala ku yimwe yihula yize hanji yena wakulihula ni kusolola chize muhasa kuwana makumbululo jacho mu Mbimbiliya ye. Yela ja Yehova mawahilila chinji ha kukukwasa kuwana makumbululo.
1. Tangwa Lia Upatwilo Yika Linalumbunuka?
Ngwe chize tunamono ha chizulie, atu anji kakunyonga ngwe ha Tangwa lia Upatwilo tununu a tununu twa atu makaatwala kulutwe lia ngunja ya Zambi ni kwasopesa kulita ni yitanga yo yize alingile kunyima. Atu amwe hanga akazuke fweto ya kutwama mu malilu, eka hanga akaambile mu chitende cha kahia. Alioze Mbimbiliya yakusolola ngwo, Tangwa lia Upatwilo mulikapwa tangwa liakulamwina atu ku uhenge. (Samu 96:13) Zambi hanahana chiteli kuli Yesu hanga akasopese atu ni kuneha ululi hashi.—Tanga Izaia 11:1-5; Yilinga 17:31.
2. Kuchi Tangwa lia Upatwilo mulikaneha ululi?
Muze lunga mutangu, Alama ku zango lienyi mwene ehukile Zambi, yakokela ana jenyi eswe shili, lamba ni kufwa. (A-Roma 5:12) Yesu makahindwisa tununu a tununu twa atu ni kuhwisa uhenge wacho weswe. Mukanda wa Usolwelo, wakusolola ngwo, yuma yacho muyikalingiwa ha kanunu ka miaka cha kuyula cha Yesu Kristu.—Tanga Usolwelo 20:4, 11, 12.
Atu waze makahinduka, kechi kaasopesa kulita ni yuma yize alingile shimbu te kanda achifwa, alioze kulita ni yuma makalinga hanyima lia kwazulula ‘mikanda’ yaha yize twakuwana ha Usolwelo kapitulu 20. (A-Roma 6:7) Hakachi ka waze makahinduka ni kupwa ni uhashi wa kulilongesa hakutwala kuli Zambi, muhakapwa ‘akwa ululi ni yihenge’ ngwe chize postolo Paulu ambile.—Tanga Yilinga 24:15.
3. Yuma yika muyikamanunuka ha Tangwa lia Upatwilo?
Atu waze afwile chakuhona kunyingika ni kulingila Yehova Zambi, makapwa ni uhashi wa kwalumuna mwono wo ni kulinga yuma yalita. Nyi makalinga chocho, uhindukilo wo muukapwa “uhindukilo wa mwono.” Alioze, atu amwe waze makahinduka kechi katayiza kukaula shimbi ja Yehova. Kuli wano, uhindukilo wo muukapwa “wa upatwilo.”—Tanga Yoano 5:28, 29; Izaia 26:10; 65:20.
Ku songo lia kanunu ka miaka lia Tangwa lia Upatwilo, Yehova makapwisa atu eswe angunu ngwe chize chapwile ku uputukilo. (1 A-Korindu 15:24-28) Chino muchikapwa chuma chipema chinji kuli waze eswe akwononoka! Zambi makatusa mu cheseko chakasula ha kuchiza Satana Ndiapu mu “zuwo lienyi lia ususu,” muze apwile wakukasa ha kanunu ka miaka. Satana makeseka nawa kupiangula atu, alioze yoze makanunga sali lia Yehova makapwa ni mwono wa mutolo.—Tanga Izaia 25:8; Usolwelo 20:7-9.
4. Tangwa likwo lika lia upatwilo lize mulikayukisa atu?
Mbimbiliya yakuzachisa maliji “Tangwa lia Upatwilo” hanga yihanjike ha mashimbu waze makanongesa chifuchi chino cha Satana. Tangwa liacho lia upatwilo mulikeza susumuku ngwe chize chapwile ha matangwa a Noa muze sanga lia meya liejile ni kwononona atu eswe api. Chili chipema kunyingika ngwetu, kwasala hakehe “yitanganyanyi” eswe maanongesa. Chino muchikazulula jila hanga atu eswe hano hashi akatwame mu chifuchi chize chikwete “ululi.”—Tanga 2 Petulu 3:6, 7, 13.