Chawana Chilemu Cha Zambi Mumu Liaka Chili Chilemu?

IYA WACHIHANYINE?

Yawana yimwe yili yilemu chinji mumu katweheleyo kuli mutu yoze uli ni ulemu unji ku mwono wetu. Yawana yikwo, chipwe ngwe kuyishi ya ndando yinji nihindu twakuyilemesa mumu kakutwahayo kuli umwe usoko wa zango hanji kuli umwe sepa lietu wa ushindakenyo. Chino che chalingiwile ni chawana chize Russell ahanyine kuli Jordão. Kuchi chino chinatale ha ukuule?

Chitangu, Mbimbiliya yinambe ngwo, “Zambi hanatumu Mwanenyi wa wika hano hashi, hanga tukapwe a mwono muli iye.” (1 Yoano 4:⁠9) Chino che chakupwisa chawana chino chilemu chinji. Niumwe uli ni ndundo jinji kuhiana Zambi wakuhi. Ha chino, mukwa-masamu yasoneka ngwenyi: “Yena wika uli ni jina lia Yehova, uli mwe Chitunda Helu lia hashi heswe.” (Samu 83:18) Yetu twatambula chawana chilemu chinji kuli Mukwa-Ndundo-Jeswe.

Chamuchiali, Zambi kali “Tata.” (Izaia 63:16) Kuchi chenacho? Iye mwe watwehele mwono. Chikwo nawa iye kakutufunga ni ushishiko weswe ngwe chize chisemi akulinga hali ana jenyi. Ha kuhanjika ni atu a Eframe a ku shakulu, Zambi yahula ngweny: “Eframe iye mwanami wa lunga mulemu nyi? Kashika mbunge yami yakumuvwila usona. Pundu, mungumuvwila keke.” (Jeremia 31:20) Zambi nawa che akwivwa hakutala kuli tuvumbi twenyi musono. Iye keshi wika Sakatanga wetu Mukwa-Ndundo-Jeswe, alioze kali nawa Tata yetu washishika wa zango nawa kali Sepa lietu. Shina chino kuchishi kupwisa chawana chenyi chilemu?

MUMU LIAKA ACHIHANYINE?

Yawana yikwo yakupwa yilemu ha mukunda wa mutu yoze unayihana, mumu keshi kumushinjila hanga ayihane, alioze ha zango lingunu lize alinalio. Chihanyi wa zango keshi kushimbwila kutambula chimwe chuma ha mukunda wa yize ahana.

Zambi kahanyine Mwane hali yetu, mumu kakutuzanga. Mbimbiliya yinambe ngwo: “Muno hanasolola zango lia Zambi hakutwala kuli yetu, se Zambi hanatumu Mwanenyi wa wika.” Mumu liaka Zambi atumine mwanenyi? “Hanga tukapwe a mwono muli iye.” (1 Yoano 4:9) Shina Zambi kamushinjilile kuchilinga? Ka, kakamushinjilile! “Ukuule uze uli muli Kristu Yesu” uli yimwe jila yize Zambi akusolwelamo ‘chawana cha vumbi lienyi.’​—A-Roma 3:24.

Mumu liaka ukuule uli ‘chawana cha vumbi’ lia Zambi? Mbimbiliya yinambe ngwo: “Zambi hanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.” (A-Roma 5:8) Zango lingunu lie liatwalile Zambi kukalila waze analela, waze keshi ukwaso nawa yivulumwinyi. Yetu kutushi kuhasa kumufuta ha yuma yeswe yize iye akulinga hali yetu. Chino chili chimwe chawana cha zango liahiana chize kanda chipwako kama.

TACHI JIKA ALINGILE HANGA AHANE CHAWANA CHACHO?

Yawana yimwe yili yilemu chinji mumu mutu yoze wayihana kasa tachi jinji hanga ayihane. Muze mutu akusa tachi jinji hanga atwehe chimwe chawana chilemu, yetu twakulemesa chawana chacho ha mukunda wa chitapo.

Zambi kahanyine “Mwanenyi wa wika.” (Yoano 3:16) Iye mahasa te kuhana mutu mweswao akuzanga. Chize ku miakulwila, muze Zambi aputukile kutanga yuma yeswe, Yesu te kakukalakala hamwe nenyi nawa Zambi te ‘kakuwahilila nenyi.’ (Yishima 8:30) Yesu kali “Mwana wa zango” ni “kulifwa cha Zambi.” (A-Kolosu 1:​13-15) Zambi ni Yesu kalizanga chikolo.

Chipwe chocho, Zambi “kavwilile keke Mwanenyi mwene.” (A-Roma 8:32) Yahana mwanenyi mupema chinji hali yetu. Chawana chino chapwile chikalu chinji kuli iye.

HAKUKWASA HA YIZE YINAHONO

Yimwe yawana yakukwasa ha yize twakuhona, chipi-chipi muze tunafupiwa ukwaso. Chakutalilaho, kuchi muwivwa nyi umwe mutu ku mbunge yenyi mwene makulanjila yitumbo yize unafupu alioze mbongo ja kulanda kuushi najo hanga uliuke? Chawana chacho muchipwa ni ulemu unji ni ngwami?

“Chizechene ngwe muli Alama eswe kakufwa, chocho nawa muli Kristu maapwisa eswe ni mwono.” (1 A-Korindu 15:22) Yetweswe ‘twakufwa’ mumu tuli ana ja Alama, kutushi ni ndundo ja kulilamwina ku lamba lia yikola ni kufwa hanji kulivwashana yetwene ni Zambi chipwe kulitusula ku mulonga kumeso jenyi. Yetwe kutushi ni ndundo ja kulipwisa yetwene hanji akwetu ni “mwono.” Mbimbiliya yinambe ngwo: ‘Niumwe hakachi ko mahasa kukuula mwanakwo wakuhi, chipwe kuhana kuli Zambi upite wa kumukuula nawo. Mumu ukuule wa mwono wo ukalu.’ (Masamu 49:​7, 8) Tunafupu ukwaso mumu kutuchi kuhasa kulifwetela yetwene ndando ya ukuule. Nyi hanatwombeka, kachi te hitunalitokela.

Ha mukunda wa zango lienyi, Yehova yatuma chilamwina ngwe “uukiso” uze tunafupu, hanga muli Yesu “atu eswe akapwe ni mwono.” Kuchi ukuule wakukwasa kuchilinga? “Manyinga a Yesu Mwanenyi kakututomesa ku shili yeswe.” Chochene, kufuliela ku manyinga a Yesu waze amwanganyine kakwazulula jila hanga atukonekene ku shili yetu ni kuhinga mwono wa mutolo. (1 Yoano 1:7; 5:13) Nawa yika ukuule muukalinga hali asoko ni masepa jetu waze hanafu? “Mumu se kuli mutu kufwa chejilile, kuli mutu [Yesu] nawa uhindukilo wa afu wejilile.”​—⁠1 A-Korindu 15:21.a

Kukushi chawana nichimwe chize mutu mulemu hanji wa zango ahanyine kuhiana chawana cha ukuule wa Yesu. Niumwe mutu yoze hanahana chawana chilemu ngwe chize Yehova Zambi ahanyine wakuhi. Nawa kukushi chawana chize chakukwasa chinji kuhiana chitapo cha ukuule wa shili ni kufwa. Chochene, nichimwe chawana muchihasa kupwa ni ulemu unji kuhiana ukuule.