LONGESO 28
Sakwilila ha Yeswe Yize Yehova ni Yesu Alingile Hali Yena
Kuchi muwivwa nyi sepa lie makwaha chimwe chawana chipema chinji? Kota muwahilila chinji ni kuzanga kusolola kuli sepa lie ngwe wazanga chinji chawana chacho. Yehova ni Yesu katuhele chimwe chawana chilemu chinji. Chawana chika chenacho? Kuchi muhasa kusolola usakwililo we ha chawana chacho?
1. Jila yimwe yika yize mutuhasa kusolwelamo usakwililo wetu ha yize Zambi ni Kristu atulingilile?
Mbimbiliya yinalakenya ngwo: “Mweswawo mamufuliela [Yesu]” mahasa kutwama ku miaka ya mutolo. (Yoano 3:16) Kufuliela muli Yesu yika chinalumbunuka? Kuchalumbunukine kutayiza wika ngwetu Yesu kwatwama, alioze, chinalumbunuka kusolola ufulielo wetu ha yiyulo yize twakukwata ni yuma yize twakulinga. (Tiangu 2:17) Muze twakusolola ufulielo wetu mu maliji ni mu yitanga, twakukolesa usepa wetu ni Yesu hamwe ni Tato, Yehova.—Tanga Yoano 14:21.
2. Chiwanyino chika chize chakutwaha uhashi wa kusolola usakwililo wetu ha yize Yehova ni Yesu alingile?
Ha ufuku muze te kanda achifwa, Yesu yalweza tumbaji twenyi jila yikwo yakusolwelamo usakwililo ha chitapo chenyi. Iye yaalweza apwe ni kulikungulula ha chimwe chiwanyino avuluka ngwo, “Chiwanyino cha Mwene cha Ufuku,” hanji ngwetu, Chiwanyino cha Kwiwuluka Kufwa cha Yesu. (1 A-Korindu 11:20) Yesu katumine apostolo jenyi ni akwa-Kristu eswe amwenemwene hanga anunge ni kwiwuluka yize iye alingile hali yetu. Yesu yamba hakutwala ku chiwanyino chacho ngwenyi: “Chino chilingenu nukangwiwuluke.” (Luka 22:19) Muze wakuya ha Chiwanyino cha Kwiwuluka Kufwa cha Yesu, wakusolola usakwililo we ha yize Yehova ni Yesu atulingilile.
NYINGIKA NAWA
Nyingika nawa majila akwo akusolwelamo usakwililo wetu kuli Yehova ni Yesu ha zango lize asolwele. Nyingika nawa mumu liaka Chiwanyino cha Kwiwuluka Kufwa cha Yesu chili chilemu.
3. Yika mutuhasa kulinga hanga tusolole usakwililo wetu?
Achinyonga ngwe unatoko mu lwiji, mba mutu umwe makulamwina. Shina muvulama yize mutu wacho akulingila? Nyi mulinga yimwe hanga usolole ngwe unasakwilila?
Twatamba kusakwilila Yehova. Tanga 1 Yoano 4:8-10, mba nushimutwine yihula yino:
Mumu liaka chitapo cha Yesu chili chawana chalipwila?
Kuchi wakwivwa ha yize Yehova ni Yesu alingile hali yena?
Kuchi mutuhasa kusolola usakwililo wetu ha yize Yehova ni Yesu atulingilile? Tanga 2 A-Korindu 5:15 ni 1 Yoano 4:11; 5:3. Muze munutanga yisoneko, shimutwinenu chihula chino:
Kulita ni yisoneko yino, yika twatamba kulinga hanga tusolole usakwililo wetu?
4. Imbulula Yesu
Jila yikwo yize muhasa kusolwelamo usakwililo we, yili kwimbulula Yesu. Tanga 1 Petulu 2:21, mba nushimutwine chihula chino:
Kuchi muhasa kwimbulula Yesu?
Yesu kapwile ni kuzanga Liji lia Zambi, kwambujola sango lipema ni kukwasa akwo
5. Pwako ha Chiwanyino cha Kwiwuluka Kufwa cha Yesu
Nyi unazange kunyingika yuma yize yalingiwile ha ufuku utangu wa Chiwanyino cha Mwene cha Ufuku, tanga Luka 22:14, 19, 20, mba nushimutwine yihula yino:
Yuma yika yalingiwile ha Chiwanyino cha Mwene cha Ufuku?
Yika mbolo ni vinyu yinalumbunuka?—Tala versu 19 ni 20.
Yesu kazangile hanga tumbaji twenyi apwe ni kwiwuluka Chiwanyino cha Mwene cha Ufuku, kamuwika ha mwaka kulita ni tangwa lize iye afwile. Kashika, hita mwaka Yela ja Yehova kakulikungulula hanga ewuluke kufwa cha Kristu ngwe chize iye mwene atumine. Nyi unazange kunyingika nawa hakutwala ku kukunguluka chino, tala CHINEMA, mba nushimutwine chihula chinahateho.
Yika yakulingiwa ha Chiwanyino cha Kwiwuluka Kufwa cha Yesu?
Mbolo ni vinyu yili yilayi. Mbolo yinalumbunuka mujimba ungunu wa Yesu uze ahanyine hali yetu. Vinyu yinalumbunuka manyinga jenyi
ATU AMWE KAKWAMBA NGWO: “Nyi unazange hanga akakulamwine, watamba wika kufuliela muli Yesu.”
Kuchi muhasa kuzachisa mukanda wa Yoano 3:16 ni Tiangu 2:17, hanga usolole yuma yize yahiana ulemu?
YIZE WALILONGESA
Twakusolola usakwililo wetu ha yize Yesu alingile hali yetu, ha kufuliela muli iye ni kuya ha Chiwanyino cha Kwiwuluka Kufwa cha Yesu.
Kuhitulula
Kufuliela muli Yesu yika chinalumbunuka?
Shina unazange kusolola usakwililo we ha yize Yehova ni Yesu alingile hali yena?
Mumu liaka chili chilemu kuya ha Chiwanyino cha Kwiwuluka Kufwa cha Yesu?
HENGWOLA NAWA
Yika kufwa cha Yesu chinakukolweza kulinga?
Nyingika chize muhasa kupwa ni ufulielo ni chize muhasa kusolola ufulielo wacho.
“Nunga ni Kufuliela ha Yilakenyo ya Yehova” (Kaposhi wa Kutalila Outubro 2016)
Ha lusango wakwamba ngwo, “Haliapwila Hinapwa Walinanga, Nguli ni Mwono Upema ni Uwahililo,” tala chize mwono wa umwe pwo walumukine muze anyingikine ulumbunwiso wa chitapo cha Kristu.
“Umwenemwene Wakwalumuna Mwono wa Atu” (Kaposhi wa Kutalila 1 wa Agosto, 2011)
Nyingika mumu liaka chili chilemu kuya ha Chiwanyino cha Kwiwuluka Kufwa cha Yesu.