Sango Jipema Jika Hakutwala ku Yikungulwila?

1. Shina yikungulwila yeswe yili ya umwenemwene nyi?

Alioze mu mangeleja anji muli atu apema. Zambi kakumona atu jacho kashika kakwanyonga. Alioze anji kanase mangeleja kulutwe hanga alinge upi. (2 A-Korindu 4:3, 4; 11:13-15) Nyikulita ni akwa sango ja yisaji, mangeleja anji kakukwasa kulinga upupilo, utoji, jita nawa ni utanji kuli twanuke. Yino yuma yinanehe chinyengo chinji kuli waze anafuliela Zambi ni umwenemwene!​—Tanga Mateu 24:3-5, 11, 12.

Chikungulwila cha umwenemwene chinalemesa Zambi, alioze chikungulwila cha mahuza chinamuvwisa yinyengo. Chikungulwila cha mahuza chinalongesa maliji waze keshi mu Mbimbiliya, nawa chinalongesa mahuza hakutwala kuli Zambi ni ufwe. Alioze Yehova kanazange atu hanga anyingike umwenemwene wenyi.​—Tanga Ezekiele 18:4; 1 Timoteu 2:3-5.

2. Sango jipema jika hakutwala ku yikungulwila?

Zambi keshi kuwahilila yikungulwila yize yakwamba ngwo twakulingila Zambi, alioze yinalingi upale wa Satana. (Tiangu 4:4) Liji lia Zambi linambe ngwo yikungulwila yeswe ya mahuza yili ngwe “Babilonia Yinene”. Babilonia yapwile mbonge yikulu kulutwe lia matangwa ja Noe, mwenamo mwaputukile chikungulwila cha mahuza. Kwasala hakehe Zambi ahwise yikungulwila yeswe ya mahuza ize yinapinjisa ni kwonga atu.​—Tanga Usolwelo 17:1, 2, 5, 16, 17; 18:8.

Kuli nawa sango jikwo jipema. Yehova keshi kuvulama atu a umwenemwene waze anamwangashana mu yikungulwila yeswe ya mahuza. Iye kanakungu atu jacho hanga aalongese umwenemwene.​—Tanga Mika 4:2, 5.

3. Atu apema yika chaatamba kulinga?

Yehova kakunyonga atu waze akuzanga umwenemwene ni upeme. Iye kanalweze atu jacho hanga afambuke kawashi mu yikungulwila ya mahuza. Atu waze akuzanga Zambi kakusa tachi hanga alumune yitanga yo hanga amuwahilile.​—Tanga Usolwelo 18:4.

Ku sekulu yitangu, muze atu a umwenemwene evwile sango lipema kuli apostolo ayo yalitambula ni cheseke. Ayo yalilongesa jila yaha ya mwono ya Yehova, jila ya mwono ya uwahililo, ni upale ni kutalatala. Ayo kali chilweza chipema hali yetwe ha mashimbu wano, mumu kanakatambula sango jipema hakusa Yehova kulutwe mu mwono wo.​—Tanga 1 A-Tesalonika 1:8, 9; 2:13.

Yehova kakutambula atu waze anatuhuka mu yikungulwila ya mahuza hanga anjile mu uwayilo wa umwenemwene. Nyi yena watayiza mutambi wa Yehova, mupwa sepa lienyi, nawa mulikata ni asoko a zango waze akumuwayila, mukapwa nawa ni mwono wa mutolo.​—Tanga Marku 10:29, 30; 2 A-Korindu 6:17, 18.

4. Kuchi Zambi makaneha chiseke hashi heswe?

Kwiza cha upatwilo wa yikungulwila ya mahuza je sango jipema. Mumu upatwilo wacho muukaneha ukwaso hashi heswe kuli waze anapinji. Yikungulwila ya mahuza yichi kwonga nawa atu chipwe kwahandununa. Eswoo makapwa ni mwono wa mutolo, maakakungulula mu uwayilo wa Zambi wamwenemwene umuwika.​—Tanga Usolwelo 18:20, 21; 21:3, 4.