Mwakufungila Mbongo

Tulieswe twatamba kupwa ni mbongo jakukwasa najo asoko jetu. (Yishima 30:8) Kanji-kanji “mbongo kujakutufunga.” (Chilumbununyi 7:12) Amu nwalimbata, muchihasa kupwa chikalu kuhanjika ha mbongo, alioze kanda nwecha mbongo jinehe kavundavunda mu ulo wenu. (A-Efwesu 4:32) Yenu nwatamba kulifuliela umwe ni mukwo ni kulivwashana ha yize munulinga ni mbongo.

1 NYONGENU KANAWA

YIZE MBIMBILIYA YINAMBE: “Mumu iya wa kuli yenu, mazanga kutunga kaposhi, kechi kulianga kutwama alule ndando, atale nyi kali ni mbongo ja kumumanununa?” (Luka 14:28) Chili chilemu kunyonga hamuwika ha chize munuzachisa mbongo jenu. (Amose 3:3) Nyongenu yize nwatamba kulanda ni mbongo jize muyihasa kufwika. (Yishima 31:16) Kunwatambile kulanda chamulanjila mumu ngwo nuli mbongo, ka. Kanda nutambwola mikulu. Zachisenu wika mbongo jize nuli najo.​—Yishima 21:5; 22:7.

YIZE MUHASA KULINGA:

• Nyi nwasala ni mbongo jikwo kusongo lia kakweji, litesenu hamuwika yize munulinga najo

• Nyi nunahono mbongo lingenu katalilo hanga nutepulule yakulanda. Chakutalilaho, munuhasa kululieka kulia chenu yenwene kuhiana kuya ni kuchilanda

2 HANJIKENU UMWENEMWENE

YIZE MBIMBLIYA YINAMBE: “Mumu twakufupa kusolola kululama mu yuma yeswe, hi kumeso ja Mwene wika ko, alioze kumeso ja atu nawa.” (2 A-Korindu 8:21) Hanjika pundu ha mbongo wakutambula ku mulimo ni chize wakujizachisa.

Mashimbu eswe, watamba kuhanjika ni yoze walimbata nenyi ni fupa kulanda chimwe chuma chinene. (Yishima 13:10) Kuhanjika ha mbongo muchinukwasa kupwa ni sambukila mu ulo wenu. Mbongo wakuzuka hi ja yena wika ko, alioze ja usoko.​—1 Timoteu 5:8.

YIZE MUHASA KULINGA:

• Nwatamba kulivwashana ha mbongo jize munupwa ni kuzachisa chakuhona kulweka mukwenu

• Kanda ushimbwila muze mukutuhuka kapinda mba nuhanjike ha mbongo