CHIHANDA 5
Kupwa ni Sambukila Kuli Asoko Jenu
“Zalenu mbunge ja keke, . . . ni ja kulikehesa ni kushimbika, ni uhomboloji.”—A-Kolosu 3:12
Ulo wakuputuka usoko waha. Chipwe ngwe watamba kuzanga ni kuvumbika yisemi je, alioze yoze walimbata nenyi mwe mutu mulemu chinji hano hashi. Chino muchihasa kupwa chikalu kuchitayiza kuli amwe asoko jenu. Alioze shimbi ja Mbimbiliya mujihasa kunukwasa kutesa kanawa yuma, hanga nuhase kupwa ni sambukila kuli asoko jenu, ha kununga ni kukolesa usoko wenu waha.
1 PWENU NI MBUNGE YIPEMA HALI ASOKO JENU
YIZE MBIMBILIYA YINAMBE: “Lemesa tatenu ni noko.” (A-Efwesu 6:2) Chipwe ngwe nuli ni miaka yinji, nihindu nwatamba kulemesa yisemi jenu. Nyingika ngwe ni yoze walimbata nenyi neye katamba kufunga yisemi jenyi. “Zango kulishi kupwa ni lufwachinda,” kashika, kanda wivwa kupiha ha zango lize yoze walimbata nenyi masolola kuli yisemi jenyi.—1 A-Korindu 13:4; A-Ngalishia 5:26.
YIZE MUHASA KULINGA:
Ehuka kwamba maliji ngwe wano, “Ena yisemi je kakungulelesa chinji” hanji ngwo “Noko keshi kuzanga yize nakulinga”
Nyingika nyonga lia yoze walimbata nenyi
2 PWAKO NI HAMU NI MUCHILITA
YIZE MBIMBLIYA YINAMBE: “Lunga mahichika tato ni naye akalalaminye kuli mukwo-pwo, mba kumapwa musunya umuwika.” (Uputukilo 2:24) Nyi hinwalimbata, yisemi jenu mahasa kunyonga ngwo ayo nihindu e atamba kunufunga. Ha chino, mafupa hanji anjile mu ulo wenu.
Kashika, chili kuli yena ni yoze walimbata nenyi kwalweza ni zango yize ayo mahasa kulinga ni yize katambile kulinga. Pwenu ni hamu liakuhanjika no alioze ni vumbi. (Yishima 15:1) Kulikehesa, umbovu, ni uhomboloji muyinukwasa kukolesa zango kuli yisemi jenu ni kulinunga “umwe kuli mukwo mu zango.”—A-Efwesu 4:2.
YIZE MUHASA KULINGA:
Nyi unamono ngwe asoko kananjila chinji mu ulo wenu, shimutwina kanawa chikuma chacho ni yoze walimbata nenyi
Nwatamba kulivwashana ha chize munuhasa kutesa kanawa yikuma yacho