CHIHANDA 9
Kuwayila Yehova mu Usoko
““Wayilenu yoze watangile lilu ni hashi.”—Usolwelo 14:7
Ngwe chize nwalilongesa mu kamukanda kano, Mbimbiliya yili ni shimbi jinji jize mujinukwasa ni asoko jenu. Yehova kanazange nuwahilile. Iye hanalakenya ngwenyi nyi nwasa uwayilo wenyi kulutwe, “kumanuwezela yino yuma yeswe.” (Mateu 6:33) Kanazange nupwe sepa lienyi. Fupenu jila ja kukoleselamo usepa wenu ni Zambi. Usepa wacho uli ulemu chinji kuli mutu.—Mateu 22:37, 38.
1 KOLESENU USEPA WENU NI YEHOVA
YIZE MBIMBLIYA YINAMBE: “Mungupwa kuli yenu Tatenu, yenu munupwa kuli yami, anami a malunga ni anami a mapwo, chocho anambe Mwene Mukwa-Ndundo-Jeswe.” (2 A-Korindu 6:18) Zambi kanazange nupwe sepa lienyi. Kulemba muchinukwasa ulinge chocho. Yehova ngwenyi, “lembenu, kanda nulitwamina nichimwe.” (1 A-Tesalonika 5:17) Iye kakuzanga kwivwa manyonga ni yipikalo yenu. (A-Fwilipu 4:6) Muze munulemba hamwe ni asoko jenu, mevwa ngwo nwakumona Zambi ngwenu kali wamwenemwene.
Muze munuhanjika ni Zambi, ni yenu nwatamba kumupanjika. Munuhasa kulinga chocho ha kulilongesa Liji lienyi ni mikanda yize yakulumbununa Mbimbiliya. (Masamu 1:1, 2) Nyongenu ha yize nunalilongesa. (Masamu 77:11, 12) Kupanjika Zambi chinalumbunuka nawa kuya mashimbu eswe ku kukunguluka cha akwa-Kristu.—Masamu 122:1-4.
Kuhanjika ni akwenu hakutwala kuli Yehova yili jila yikwo yilemu yakukolelamo usepa wenu ni iye. Nyi nwanunga ni kulinga chocho, munukundama kuli iye.—Mateu 28:19, 20.
YIZE MUHASA KULINGA:
Pwako ni shimbu lia kulemba ni kutanga Mbimbiliya matangwa eswe
Amu nuli usoko, senu milimo ya ku spiritu kulutwe kuhiana yiheho ni kupwa shimbu lia kuhwima
2 LIVWISENU KUWAHA UWAYILO WENU WA MU USOKO
YIZE MBIMBLIYA YINAMBE: “Kundamenu kuli Zambi, mba iye kumakakundama kuli yenu.” (Tiangu 4:8) Nwatamba kulinga katalilo wa uwayilo wa mu usoko ni kumukaula mashimbu eswe. (Uputukilo 18:19) Alioze kuli nawa yuma yikwo nwatamba kulinga. Nwatamba kusa Zambi kulutwe mu mwono wenu. Kwasenu asoko jenu azange chinji Zambi ha kuhanjika no hakutwala kuli iye “hakutwama mu mazuwo jenu, ha kwenda mu jila, ha kupomba chenu, ha kuhinduka chenu.” (Shimbi Yamuchiali 6:6, 7) Pwako ni nyonga ngwe lia Yoshua, yoze wambile ngwenyi: “Alioze hakutwala kuli yami ni akwa zuwo liami etu mutulingila Yehova.”—Yoshua 24:15.
YIZE MUHASA KULINGA:
Pwako ni katalilo yoze makwasa mutu ni mutu mu usoko we