Yehova Kakusongwela Atu Jenyi mu Jila ya Mwono

1, 2. (a) Atu anji hanalamwina ni utowezo uka? (Tala chizulie chili hauputukilo.) (b) Atu ja Zambi kali ni usongwelo uka uze muuhasa kwaalamwina?

“MANA, TALA, PANJIKA.” Hikwapalika miaka 100 nihindu maliji wano kakusoloka ha yilayi yinene yize yakupwa hautangunukino wa jila ya komboiu mu Amerika ya Kusango. Mumu liaka? Hanga mashinyi muze te matangunuka jila yacho, ahone kwapupa kuli komboiu yoze unende fuji jinji. Kukaula kanawa usongwelo uno ha kutala-tala yilayi yino ya utowezo chakulamwina mwono wa atu anji.

² Yehova kakulinga chuma chipema, hi wika ko kutwaha yilayi yize yakutufunga. Iye kakusongwela atu jenyi hanga ahase kutambula mwono wa mutolo ni kwehuka utoji. Yehova kali ngwe umwe kafunga mapanga wa zango yoze wakusongwela ni kutoweza mapanga jenyi hanga ehuke majila api.—Tanga Izaia 30:20, 21.

YEHOVA KAKUSONGWELA ATU JENYI HA MASHIMBU ESWE

3. Kuchi atu anjilile mu ponde ya kufwa?

³ Kukatuka ku uputukilo wa mwono wa atu, Yehova nihindu kakuhana atu usongwelo hanji shimbi jize jalita. Chakutalilaho, mu munda wa Endene, Yehova yahana shimbi jalita ngwo, atu atwame ni mwono wa mutolo ni sambukila. (Uputukilo 2:15-17) Alioze Alama ni Eva yehuka usongwelo wa Tato wa zango. Eva yapanjika chiyulo chize amwene ngwo chineza kuli kapela, nawa Alama yapanjika mukwo-pwo. Yika yilingiwile ko? Ayo eswe aali yamona lamba, ni kutokesa mwono hamwe ni kutalatala cho. Amu o ahonene kukaula shimbi ya Zambi, atu eswe yapwa mu ponde ya kufwa.

4. (a) Mumu liaka hakupalika cha Sanga lia Meya te kunafupiwa usongwelo ukwo? (b) Kuchi yuma yaha yize yasolokele yinasolola kunyonga cha Zambi?

⁴ Zambi kahanyine usongwelo kuli Noa uze walamwinyine mwono wa atu. Hakupalika cha Sanga Linene lia Meya, Yehova yahana shimbi kuli atu hanga achine kulia hanji kunwa manyinga. Mumu liaka? Mumu Yehova te kaneche atu hanga aputuke kulia yifwo. Ha mukunda wa yino yuma yaha, o te kanafupiwa usongwelo waha, ngwo: ‘Chuma chimuwika kunwahashile kulia, kashitu ni manyinga jenyi, mumu mwono uli mu manyinga.’ (Uputukilo 9:1-4) Ha shimbi yino, yetu mutuhasa kunyingika manyonga ja Zambi hakutwala ku mwono, mumu mwono uli ni wenyi. Iye kali Sakatanga nawa iye mwe wakutwaha mwono, kashika kali ni chiteli cha kuyula mwono wetu. Chakutalilaho, iye kahanyine shimbi kuli atu hanga achine kulishiha umwe ni mukwo. Zambi kakumona ngwenyi, mwono ni manyinga yili yisandu, nawa makwonona waze maazachisa chipi.—Uputukilo 9:5, 6.

5. Yika mutulilongesa nawa mumu liaka?

⁵ Hakupalika cha matangwa ja Noa, Zambi yanunga ni kusongwela atu jenyi. Ha mutwe uno, mutuhengwola yimwe yilweza ya chize iye asongwele atu jenyi. Kulilongesa yuma yino muyikolesa chiyulo chetu cha kukaula usongwelo wa Yehova ndo mu chifuchi chaha.

VUNGU LIAHA NI USONGWELO WAHA

6. Yika yize yafupiwile kuli atu ja Zambi hanga ononokene shimbi ahele kupalikila kuli Mose, nawa yitanga yika A-Izalele te atamba kusolola?

⁶ Ha matangwa ja Mose, Yehova kahanyine usongwelo ungunu kuli atu jenyi wa chize te atamba kwenda ni kumuwayila. Mumu liaka? Mumu yimwe yuma yalumukine. Ha kama jaali ja miaka kuhiana, A-Izalele kapwile tupinji mu Engitu, mu chifuchi chacho atu jamo eswe te kakuwayila afu, tuponya, nawa te kakulinga yuma yinji yize te kuyishi kuhalisa Zambi. Muze Zambi atuswile atu jenyi mu Engitu, o te kanafupiwa usongwelo waha. Ayo te mapwa limwe vungu lize te mulikaula wika Shimbi ja Yehova. Umwe mukanda unambe ngwo, liji lia Hepreu “shimbi” linalite ni limwe liji lize lialumbunuka “kulongesa, kusongwela ni kufumba.” Shimbi yafungile A-Izalele hanga ahone kulinga utanji ni kuwayila tuzambi a mahuza a mavungu akwo. Muze A-Izalele te akupanjika Zambi, o te kakupwa ni yiwape yenyi. Muze apwile ni kulengulula shimbi jenyi, o te kakumona lamba linji.—Tanga Shimbi Yamuchiali 28:1, 2, 15.

7. (a) Lumbununa mumu liaka Yehova ahanyine usongwelo kuli atu jenyi. (b) Kuchi Shimbi yapwile umwe chifumbe kuli A-Izalele?

⁷ Usongwelo waha te unafupiwa ha mukunda wa chiteli chikwo. Shimbi yaluliekele A-Izalele ha chimwe chiteli chilemu mu ululikiso wa Yehova, kwiza cha Mesaya, Yesu Kristu. Shimbi te yakwiwulula A-Izalele ngwo te yihenge. Te yakwaakwasa nawa hanga anyingike ngwo te kanafupiwa ukuule, ukuule wacho te watamba kupwa ungunu uze te muuchiza kanawa shili yo. (A-Ngalishia 3:19; A-Hepreu 10:1-10) Shimbi nawa yafungile chisemuko cha Mesaya ni kukwasa A-Izalele hanga anyingike shimbu lize iye te masoloka. Chochene, Shimbi yapwile ngwe kasongwelo wa shimbu likehe, hanji “chifumbe” yoze te unasongwela kuli Kristu.—A-Ngalishia 3:23, 24.

8. Mumu liaka katamba kutusongwela ku yiyulo yize yili ha Shimbi ja Mose?

⁸ Amu tuli akwa-Kristu, ni yetu mutuhasa kuyuka ku usongwelo uze Yehova ahanyine mu Shimbi jenyi. Kuchi? Mutuhasa kumana, ni ku tala ha usongwelo uze unakatuka ha Shimbi. Chipwe ngwe kutushi mushi lia shimbi, nihindu mutuhasa kufuliela ha shimbi jacho ngwe usongwelo ku mwono wetu ha tangwa ni tangwa ni kuwayila Yehova. Iye kasonekene shimbi jacho mu Mbimbiliya hanga jitulongese hakutwala kuli iye, ha kutusongwela kupalikila mu yiyulo yenyi, ni kusakwilila hali Yesu ha kutulongesa chimwe chuma chinene kuhiana Shimbi. Kupanjika ha yize Yesu ambile ngwenyi: “Hinunevu chize ambile ngwo, Kanda ulinga utanji, Alioze yami ngunambe kuli yenu ngwami, Mweswawo matala pwo mukumuvwila usolo, halinga nenyi utanji kulu mu mbunge yenyi.” Kashika kutwatambile wika kwehuka yitanga ya utanji, alioze twatamba nawa kwehuka manyonga eswe a upangala ni usolo upi.—Mateu 5:27, 28.

9. Yuma yaha yika yalumukine yize yahanyine usongwelo waha wa Zambi?

⁹ Muze Yesu ejile ngwe Mesaya, Yehova yahana usongwelo waha ni kusolola yiyulo yinji hakutwala ku upale wenyi. Mumu liaka chino te chinafupiwa? Mumu ha mwaka 33, Yehova yalituna vungu lia A-Izalele ni kusakula chikungulwila cha akwa-Kristu hanga apwe atu jenyi. Kashika yuma ku mwono wa atu ja Zambi yalumukine ni kupwa nawa yaha.

USONGWELO KULI A-IZALELE JA ZAMBI

10. Mumu liaka ahanyine shimbi jaha mu chikungulwila cha akwa-Kristu, nawa kuchi shimbi jino jalisele ni jize ahanyine kuli A-Izalele?

¹⁰ Yehova kahanyine Shimbi ya Mose kuli A-Izalele hanga yaalongese chize te atamba kutwama ni kumuwayila. Kuuputukilo wa sekulu yitangu, atu ja Zambi te keshi nawa aku vungu limuwika, alioze te aku mavungu anji ni ndako jeka ni jeka, nawa te kakwaavuluka ngwo A-Izalele ja Zambi. O yalinga chikungulwila cha akwa-Kristu ni kupwa mu usendo waha. Yehova yaaha usongwelo waha ha chize te matwama nawa ni kumuwayila. Chochene, “Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.” (Yilinga 10:34, 35) Ayo kakukaula “shimbi ya Kristu,” yize te yakukatuka wika ha usongwelo uze asonekene, hi ha mawe ko, alioze mu ma mbunge jo. Shimbi yino te muyisongwela ni kuyukisa akwa-Kristu kweswako te atwama.—A-Ngalishia 6:2.

11. Shimbi jaali jika jize te mujisongwela mwono wa akwa-Kristu kulita ni “shimbi ya Kristu”?

¹¹ A-Izalele ja Zambi kaayukile chinji ku usongwelo wa Yehova kupalikila muli Yesu. Ha shimbu lizeliene asele usendo waha, Yesu yahana shimbi jaali jilemu. Yitangu, mulimo wa kwambujola sango lipema. Yamuchiali chize te akwa-Kristu atamba kutwama ni kulifunga umwe ni mukwo. Shimbi jacho kajihanyine kuli akwa-Kristu eswe, kashika yetu eswe twatamba kujikaula musono, chipwe kutalatala chetu chili kutwama mu malilu hanji hano hashi.

12. Yika yapwile yaha hakutwala ku mulimo wa sango lipema?

¹² Ku mashimbu akunyima, atu aku mavungu eka te kakwiza mu Izalele ni kuwayila Yehova. (1 Mianangana 8:41-43) Mba hi Yesu yahana shimbi yize tunawane mu Mateu 28:19, 20. (Tanga.) Yesu kambile kuli tumbaji twenyi hanga ‘aye’ kuli atu eswe. Ku Pentekoste ha mwaka 33, Yehova kasolwele ngwenyi, iye kazangile hanga sango lipema lipwe kwambujola kuli atu eswe hano hashi. Ha tangwa liacho, atu 120 amu chikungulwila chaha yazala too ni spiritu yisandu ni kuputuka kuhanjika malimi A-Yunda ni akwa-kufuliela aku mavungu akwo. (Yilinga 2:4-11) Kulutwe lia matangwa, sango lipema yililitanda ndo ku Samaria. Mba hi ha mwaka 36, sango lipema yililitanda ku yihela yikwo hamwe ni kuli yilima akwa-mavungu. Chino chinalumbunuka ngwo akwa-Kristu kambujolwele sango lipema kuli atu eswe hano hashi!