LONGESO 14

Mumu Liaka Zambi ali ni Umwe Ululikiso?

1. Mumu liaka Zambi alulikile a Izalele?

1. Atu ja Zambi mu Izalele ya ku shakulu; 2. Akwa-Kristu mu sekulu yitangu kali mu mulimo wa kwambujola

Zambi kanakalulika minyachi ya kalamba Apalahama hanga apwe vungu ni kwaha nawa shimbi. Iye yavuluka vungu liacho ngwo “Izalele” nawa yaha uwayilo wa umwenemwene ni shimbi jenyi hanga ajifunge. (Masamu 147:19, 20) Kashika atu akumavungu eswe te mayuka kuli a Izalele.—Tanga Uputukilo 22:18.

Zambi kanakasakula A-Izalele hanga apwe yela jenyi. Yishima yo yinasolola pundu chize atu apwile ni kuyuka muze te akwononokena Shimbi ja Zambi. (Shimbi Yamuchiali 4:6) Kashika hakutwala hali A-Izalele, atu akwo te mahasa kunyingika Zambi wamwenemwene.—Tanga Izaia 43:10, 12.

2. Mumu liaka Akwa Kristu a umwenemwene ali ni ululikiso?

Kulutwe lia mashimbu, a Izalele yahona vumbi kuli Zambi, kashika Yehova yasalakanyisa chikungulwila cha Akwa Kristu ha vungu lio. (Mateu 21:43; 23:37, 38) Ha matangwa wano, Akwa Kristu a umwenemwene waze anavuluka ngwo Yela ja Yehova e anamulingila, hi vungu lia A-Izalele ko.—Tanga Yilinga 15:14, 17.

Yesu kanakalulika tumbaji twenyi hanga ambujole sango lipema ni kupwisa tumbaji aku mavungu eswe. (Mateu 10:7, 11; 24:14; 28:19, 20) Hapwila mulimo uno kanaulingi hashi heswe ha matangwa wano akusula. Yehova kanakungulula tununu twa atu aku mavungu eswe mu Uwayilo wa umwenemwene, chino chili chikomokeso mu yishima ya atu. (Usolwelo 7:9, 10) Akwa Kristu a umwenemwene kali ni ululikiso, we wakwatakamisa ni kulikwasa umwe ni mukwo. Hashi heswe ayo kakuwahilila ha chilulikiso chimuwika cha malongeso a mu Mbimbiliya mu yikungulwilo yo.—Tanga A-Hepreu 10:24, 25.

3. Kuchi ululikiso wa Yela ja Yehova unakaputuka ha matangwa wano?

Yela ja Yehova kanambujola mu miaka ya mu 1900 ni mu matangwa wano nawa; mikanda ya kulongesa Mbimbiliya ya mu malimi anji.

Mu mwaka wa 1870 chimwe chizavu chikehe cha akwa kulilongesa Mbimbiliya ayo yaputuka kuwana umwenemwene wa Mbimbiliya uze te hiunatoka. Ayo yanyingika ngwo Yesu te hanalulieka chikungulwila cha akwa Kristu hanga ambujole sango jipema, ni ayo nawa yaputuka ni ululikiso wa kwambujola Wanangana wa Zambi hashi heswe. Mu mwaka wa 1931 ayo yaliluka ngwo Yela ja Yehova.—Tanga Yilinga 1:8; 2:1, 4; 5:42.

4. Kuchi Yela ja Yehova analilulieka?

Ku sekulu yitangu yikungulwila ya akwa Kristu mu yifuchi yinji te kakuyisongwela kuli tusongo atangu waze alulikile kuli Yesu, mwe Mwata wa chikungulwila. (Yilinga 16:4, 5) Ni musono nawa, Yela ja Yehova hashi heswe kanaasongwela kuli Chizavu cha Tusongwelo, amwe makulwana amana. Ayo kakusongwela yishina ya Yela ja Yehova mu yifuchi yeswe hanga alumbunune ni kufambwisa ni kuhana mikanda ya kulilongesa nayo Mbimbiliya, ha unji wa 600 a malimi. Chizavu cha Tusongwelo chakuhana malongeso a utakamiso ni usongwelo wa mu Mbimbiliya ha unji wa 100,000 ya yikungulwila hashi heswe. Mu yikungulwila yeswe muli amwe makulwana, malunga akwa kujama waze anayisongwela. Malunga jacho a zango kakufunga mapanga ja Zambi.—Tanga 1 Petulu 5:2, 3

Yela ja Yehova kalilulieka hanga ambujole sango jipema ni kupwisa tumbaji. Chizechene ngwe apostolo, ni yetwe nawa twakwambujola sango jipema ku zuwo ni zuwo. (Yilinga 20:20) Nawa twakuhana malongeso a mu Mbimbiliya kuli atu waze ali ni zango ha umwenemwene. Yela ja Yehova hi ululikiso wika ko. Alioze yetwe eswe tuli asoko ja Tata wa zango. Yetwe eswe tuli mandumbu twakulifunga umwe ni mukwo. (2 A-Tesalonika 1:3) Chize kunyima atu ja Yehova kalilulieka hanga apemene kuli Zambi ni kukwasa akwo, ayo kali asoko waze ali ni uwahililo unji hano hashi.—Tanga Masamu 33:12; Yilinga 20:35.

Nyi unazange kunyingika nawa, tala kaputulu 19 mu mukanda Yika Mbimbiliya Muyihasa Kutulongesa?