LONGESO 6

Kulumbununa Kanawa Yisoneko

Yoano 10:33-36

CHIKUMA CHILEMU: Kanda utanga wika hita chisoneko ni kuya ku chikwo. Eswe anakupanjika katamba kunyingika kanawa chize chisoneko mutanga chinalite ni chikuma unalumbununa.

YIZE WATAMBA KULINGA:

Sakula maliji alemu. Muze muhwisa kutanga chisoneko, shindakenya ha maliji amwe waze anakwata ha chikuma chilemu. Muhasa kulinga chino hakufunyina maliji jacho hanji kuhula chihula chize muchikwasa waze anakupanjika amone maliji alemu mu pande je.

Nyi muzachisa maliji eka ha kushindakenya chikuma chili mu chisoneko, watamba kupwa ni ushindakenyo ngwe waze anakupanjika kanamono chize maliji a Mbimbiliya anakwata ha chikuma che chilemu.
Shindakenya yikuma. Nyi walumbununa yize unatangila chisoneko, ndo usolole nawa chize maliji alemu a chisoneko watanga anatale ku chikuma watangila chisoneko chacho.

Kanda ufuka Mbimbiliya ye muze unalumbununa chisoneko. Chino muchikwasa waze anakupanjika amone yize unalumbununa mu chisoneko watanga.
Hana ulumbunwiso washi. Kanda uhanjika ha tuyikuma tukehe tuze kutushi ni ulemu ku pande je. Nyonga hali atu waze anakupanjika, mba usakule yikuma yalita yize muyikwasa mbunga evwe kanawa ulumbunwiso wa yize unahanjika.