Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
7-13 OUTUBRO
YIKUMA YILEMU YA MU LIJI LIA ZAMBI | TIANGU 3-5
“Solola Mana a Zambi”
(Tiangu 3:17) Alioze mana a kwilu hatangu apwa atoma, a sambukila, a umbovu, ashi, a too ni keke ni mihuko yipema, keshi katonde, keshi ulembekese.
cl 221-222 ¶9-10
Shina Unakaula “Mana Akwilu” ku Mwono We?
9 “Hatangu apwa atoma.” Chino chinalumbunuka ngwo, twatamba kupwa atu atoma mu mujimba ni manyonga. Mbimbiliya yinasolola ngwo, mana kakunjila mu mbunge, alioze keshi kunjila mu mbunge yize yinapihi ni manyonga ni usolo upi. (Yishima 2:10; Mateu 15:19, 20) Kashika, nyi mbunge yetu yapwa yitoma, mutuhasa “kuchina yuma yipi” ni kulinga “yuma yipema.” (Samu 37:27; Yishima 3:7) Chili chipema kunyingika ngwo, chitanga chino cha muhuko wa mana a Zambi che anasolola chitangu. Mumu nyi kutwapwile atu atoma ku yitanga ni ku spiritu, tuchi kuhasa kupwa ni yitanga yikwo ya mana a kwilu.
10 “A sambukila.” Mana a kwilu kakutukolweza kupwa ni sambukila, yize neyo muhuko wa spiritu ya Zambi. (A-Ngalashia 5:22) Twakusa tachi jinji hanga tufunge “muya wa sambukila” uze wakununga atu ja Yehova. (A-Efwesu 4:3) Chikwo nawa, muze kwakupwa umwe kapinda mukachi ketu, twakulikolweza hanga tunehe sambukila. Mumu liaka kulinga chino chili chilemu? Mumu Mbimbiliya yinambe ngwo: “Pwenu ni sambukila. Mwe Zambi ya zango ni sambukila kumakapwa hamwe ni yenu.” (2 A-Korindu 13:11) Zambi ya sambukila mapwa hamwe ni yetu nyi mutununga ni kutwama kanawa ni akwetu. Chize twakutwama ni akwetu, chakukwata chinji ha uwayilo wetu ni ha usepa wetu ni Yehova. Kuchi mba mutuhasa kusolola ngwetu, tuli atu a sambukila? Tutalenu chimwe chilweza.
(Tiangu 3:17) Alioze mana a kwilu hatangu apwa atoma, a sambukila, a umbovu, ashi, a too ni keke ni mihuko yipema, keshi katonde, keshi ulembekese.
cl 223-224 ¶12
Shina Unakaula “Mana Akwilu” ku Mwono We?
12 “A umbovu.” Yika chinalumbunuka kupwa chimbovu? Amwe akwa-kuhengwola yisoneko kakwamba ngwo, liji lia Ngregu “umbovu” lize lili ha Tiangu 3:17, hi chashi ko kulilumbununa. Akwo kakulilumbununa ngwo, “upeme” hanji “kupwa mutu mwashi.” Liji liacho mu Ngregu linalumbunuka “mutu mwashi.” Kuchi mutuhasa kusolola ngwetu, twakukaula muhuko uno wa mana akwilu ku mwono wetu?
cl 224-225 ¶14-15
Shina Unakaula “Mana Akwilu” ku Mwono We?
14 “Ashi.” Liji lia Ngregu analumbununa ngwo, “ashi,” tushi kuliwana mu Yisoneko yikwo ya Ngregu ya akwa-Kristu. Umwe mukwa-kuhengwola yisoneko kambile ngwenyi, liji lino “kanji-kanji kakulizachisa ha kufumba maswalale.” Mulihasa kulumbunuka nawa “mutu mwashi,” hanji “mukwa-kulipalumwisa.” Mutu yoze wakutayiza hanga mana akwilu amusongwele, kakufuliela ha yize Yisoneko yakwamba. Mutu wacho chipwe ngwe makwata chiyulo chenyi mwene, nihindu keshi kulituna nyonga lia akwo. Chipwe muze akwo akumwaha chiyulo kulita ni shimbi ja Zambi ni kumusolwela ngwo, chiyulo chize akwata kuchalitele kakutayiza kawashi-washi. Che chize yena anakunyingike kuli akwenu?
“A Too ni Keke ni Mihuko Yipema”
15 “A too ni keke ni mihuko yipema.” Keke yili chihanda cha mana akwilu, waze anasolola ngwo, “atoo ni keke.” Twamona ngwetu, “keke” kanayivuluka hamwika ni “mihuko yipema.” Chino chinalite, mumu mu Mbimbiliya, keke yinalumbunuka kulihulumba hali akwetu, hanji zango lize lia kutukwasa kulingila akwetu yuma yipema. Umwe mukanda unalumbununa Mbimbiliya, unambe ngwo, keke yili “kwivwa chinyengo ha lamba lia mutu mukwo, ni kulinga yimwe hali mutu wacho.” Kwamba pundu, mana akwilu hi akalu ko. Alioze, kapwa apema, ashi nawa azango. Kuchi mutuhasa kusolola ngwetu, tunazale too ni keke?
(Tiangu 3:17) Alioze mana a kwilu hatangu apwa atoma, a sambukila, a umbovu, ashi, a too ni keke ni mihuko yipema, keshi katonde, keshi ulembekese.
cl 226-227 ¶18-19
Shina Unakaula “Mana Akwilu” ku Mwono We?
18 “Keshi katonde.” Mana a Zambi kakutukwasa kwehuka katonde hakachi ketu. Nyi mana jacho matusongwela, mutwehuka katonde mweswe yoze tuli nenyi mu mbunge. (Tiangu 2:9) Chino muchitukwasa tuhone kuzanga wika mandumbu amwe mumu ngwo kali ni mbongo, kalilongesele chinji, hanji ngwo kali ni yiteli mu chikungulwila; kuhiana mandumbu waze yiswale. Amu Yehova akwazanga, ni yetu twatamba kwazanga.
19 “Keshi ulembekese.” Liji lia Ngregu “ulembekese,” mulihasa kulumbunuka “mutu yoze wakulinga yiheho.” Ha mashimbu ja A-Ngregu ni A-Roma, atu te kakuzala mikishi hanga alinge yiheho. Kashika liji lia Ngregu ulembekese aputukile kulivuluka hanga ahanjike hakutwala kuli atu waze akusweka utu wo wamwenemwene. Kunyingika ngwo, mana a Zambi “keshi ulembekese,” chatamba kutukwasa hanga tutwame kanawa ni mandumbu jetu, ni kwazanga.
Kuhengwola Yikuma Yilemu ya mu Mbimbiliya
(Tiangu 4:5) Shina nunashinginyeka ngwenu, Chisoneko cha Zambi chinahanjika chamokomoko, nyi? Ngwo, Spiritu yoze watwama muli yetu kakwivwa usona ndo ku ukwa?
w08 15/11 20 ¶6
Sango Jilemu ja mukanda wa Tiangu ni Petulu
4:5—Chisoneko chika Tiangu atongwele ha versu yino? Iye kakatongwele maliji a versu yimuwika. Maliji wano akuhwima kuli Zambi, kota kaachijile ha yisoneko yino, Uputukilo 6:5; 8:21; Yishima 21:10 ni A-Ngalashia 5:17.
(Tiangu 4:11, 12) Mandumbu, kanda nuhanjika chipi umwe hali mukwo ni mukwo. Yoze mahanjika chipi hali ndumbwenyi, hanji yoze masopesa ndumbwenyi, mahanjika chipi ha Shimbi, mapatwila Shimbi. Alioze nyi yena mupatwila Shimbi, hi uli mukwa kulinga Shimbi ko, alioze wakulipwisa ngwe yena uli sopi. 12 Kwali Sopi umuwika, mukwa kuhana Shimbi, yoze mahasa kulamwina; mahasa kwonona. Alioze yena iya wakupatwila mukwenu?
w97 15/11 20-21 ¶8
Ufulielo Wakutupwisa Yihumikiji ni Kutukwasa Tulembe
8 Kuhanjika upi hali mandumbu jetu chili shili. (Tiangu 4:11, 12) Alioze mandumbu jetu amwe, mumu lia ndako jo jipi kakuhanjika upi hali akwo hanga alinangamise ni kulelesa akwo. (Samu 50:20; Yishima 3:29) Liji lia Ngregu “kanda nuhanjika chipi,” linalumbunuka kuhanjika yuma yipi hanji kulamikiza umwe mutu. Chino muchihasa kulumbunuka kulamikiza umwe ndumbu mulonga uze kalingile. Mu mulali uka ‘yoze mahanjika chipi hali ndumbwenyi mahanjika chipi ha Shimbi’? Alongeshi a shimbi ni A-Fwariseu te ‘kakuhichika shimbi ya Zambi’ hanga apatwile atu kulita ni shimbi jo ene. (Marku 7:1-13) Chizechene nawa, nyi twahanjika upi hali umwe ndumbu yoze Yehova akuzanga, ‘mutupatwila Shimbi ja Zambi’ ni kusolola ngwo kujalitele. Nawa nyi mutuhanjika upi hali ndumbwetu, mutusolola ngwo, kutusolo kukaula shimbi ya zango.—A-Roma 13:8-10.
Kutanga Mbimbiliya
(Tiangu 3:1-18) Mandumbu jami, kanda nupwa alongeshi anji, se nunanyingika yetu alongeshi mutukatambula upatwilo ukalu kuhiana atu akwo. 2 Mumu yetu eswe twakutalinga mu yuma yinji, nyi kachi umwe keshi kutalinga ha liji, iye mutu mungunu, kanahase kuhombola mujimba weswe nawa. 3 Talenu, twakusa chikungo mu makanwa ja tuvwalu, hanga akatwononokene, twakuhingulula nacho mijimba yo yeswe. 4 Talenu nawa maulungu waze anene-anene, akuhungumioka ni fuji ya tachi hindu maahingujola ni leme yikepe chikolo kweswako mukwa kwendesa mapala. 5 Chocho limi nawa chihanda chikepe, alioze kuliakulisangala yuma yinene. Talenu, musenge upwa haha muuwema ni kahia kakepekepe! 6 Limi linapu ngwe kahia: uhenge weswe wa hano hashi uliho; chocho hanase limi hakachi ka yihanda yetu, lize liakupihisa mujimba weswe, liakuchocheka kahia ku yuma yeswe ya chisemewa, nelio hilinambula kahia ku Ngehena. 7 Mumu milali yeswe ya tushitu, ni tujila, milali yeswe ya tututu, ni tushitu, a mu kalunga-lwiji mahasa kuahombola, te hanahomboka kuli atu. 8 Alioze mutu niumwe kechi kuhasa kuhombola limi; kulishi kuhwima mu kulinga yipi. Liapwa lia too ni utende wa kufwa. 9 Twakufumanyisa nalio Mwene mwe Tata. Twakushinga nalio atu aze aatangile mu kulifwa cha Zambi. 10 Mu kanwa limuwika munatuhuka uwape ni kushingana. Mandumbu jami, yino yuma kuyalitele kupwa chocho. 11 Te fuji lia meya mulivwelwoka mu kanwa limuwika ni meya ayema ni meya asasu, nyi? 12 Mandumbu jami, mukuyu muuhasa kwima olevwe, hanji vindera muyihasa kwima makuyu, nyi? Chipwe fuji lia meya a mungwa kulishi kuhasa kuvwelwoka ni meya ayema. 13 Iya uliko hakachi kenu mukwa mana ni malinjekela? Akalweze ku kwenda chenyi chipema yitanga yenyi ni kushimbika cha mana. 14 Alioze nyi kachi nuli ni ukwa usasu ni kulimanangana mu mbunge jenu, kanda nulisamba. Kanda nuhanjika mahuza a kulimika ni umwenemwene. 15 Mana ano hi mana a kuhulumuka kwilu ko, alioze a hashi, a musunya, a Ndiapu. 16 Mumu kuze kuli ukwa ni kulimanangana, kuzekwene nawa kuli vunda ni yilinga yeswe yipi. 17 Alioze mana a kwilu hatangu apwa atoma, a sambukila, a umbovu, ashi, a too ni keke ni mihuko yipema, keshi katonde, keshi ulembekese. 18 Alioze mapwa akwa kukuwa mihuko ya ululi mu sambukila kuli waze akulinga sambukila.
14-20 OUTUBRO
YIKUMA YILEMU YA MU LIJI LIA ZAMBI | 1 PETULU 1–2
“Twatamba Kupwa Asandu”
(1 Petulu 1:14, 15) Nuli ana, akwa kwononoka, kanda nulitesa ni usolo wenu wa kunyima mu kwalajala chenu: 15 alioze se yoze wanutambikile iye musandu, ni yenu nawa pwenu asandu ha kwenda chenu cheswe.
Ukuule—‘Chawana Chingunu’ Cha Kuli Tata
5 Kuchi mutuhasa kusolola ngwetu, twakuzanga jina lia Yehova? Mutuchilinga kupalikila mu yitanga yetu. Yehova kanatwite hanga tupwe asandu. (Tanga 1 Petulu 1:15, 16.) Chino chinalumbunuka ngwo, twatamba kuwayila wika iye ni kumwononokena ni mbunge yetu yeswe. Chipwe muze matuhungumiona, tusenu tachi hanga tutwame kulita ni yize Yehova akutulongesa. Nyi twatwama kulita ni shimbi ja Yehova, mutuhalisa jina lienyi. (Mateu 5:14-16) Nyi twalinga chocho, mutusolola ngwetu, shimbi jenyi jili jipema nawa ngwo Satana mukwa-mahuza. Kutushi atu angunu, kashika ha mashimbu amwe mutuhasa kulinga uhenge. Alioze nyi chino muchilingiwa, twatamba kulikonyeka ni kusa tachi hanga twehuke kulinga nawa yuma yacho, yize muyitukinda kuhalisa jina lia Yehova.—Samu 79:9.
(1 Petulu 1:16) Mumu chinasonewa ngwo, Pwenu asandu, mumu yami nguli musandu.
Chize Mutusakula Kanawa Yiheho Yetu
6 Yehova kanatulweze ngwenyi: “Pwenu asandu, mumu yami nguli musandu.” (1 Petulu 1:14-16; 2 Petulu 3:11) Yehova matayiza wika uwayilo wetu nyi uli usandu, hanji walinanga. (Shimbi Yamuchiali 15:21) Uwayilo wetu kuuchi kupwa walinanga nyi twalinga hanji twanunga ni kutala yiheho yize Yehova akuvwila lwaji, ngwe yuma ya utanji, ya upupilo, hanji ya andemoniu. (A-Roma 6:12-14; 8:13) Kashika, nyi twatala yiheho yacho, Yehova matuvwila kupiha. Chino muchihasa kupihisa uwayilo wetu, ni usepa wetu hali iye.
Kuhengwola Yikuma Yilemu ya mu Mbimbiliya
(1 Petulu 1:10-12) Ha kutwala ku ulamwino uno aprofeta afupile nikuhengula chikolo, waze aprofetezele ha kutwala ku vumbi lino muliza kuli yenu; 11 nikuhengula hali mwe mutu, hanji we mwaka, Spiritu wa Kristu, Yoze wapwile muli ayo wenyikine, muze ashindakenyene shimbu-kanda ha lamba lia Kristu, ni uhenya uze muukapwa kulutwe. 12 Aalwezele ngwe, hi kuli ayo ko, alioze kuli yetu atuvumbikile ni yino yuma, yize haliapwila hananwambulwilayo ku makanwa ja akwa kwambujola muli Spiritu Musandu kanatumiwa mwilu. Yuma yino chipwe angelo kakwivwa usona kuyihengula.
w08 15/11 21 ¶10
Sango Jilemu ja Mukanda wa Tiangu ni Petulu
1:10-12. Angelo te kakuzanga kunyingika kanawa umwenemwene wa yuma ya ku spiritu yize aprofeta ja Zambi a kunyima asonekene hakutwala ku chikungulwila cha kuwayisa cha akwa-Kristu. Umwenemwene wacho wapwile zwalala muze Zambi aputukile kusongwela chikungulwila chacho. (Efwe. 3:10) Ni yetu twatamba kukaula chilweza cha angelo ha kuhengula “yuma yikalu ya Zambi.”—1 Kori. 2:10.
(1 Petulu 2:25) Mumu yenu nwapwile akwa kupianguka ngwe mapanga, alioze haliapwila hinunahilukila kuli Kafunga kanda Kalayi ka mbunge jenu.
it-3 658 ¶4
Kalayi
Kalayi Munene. Mukanda 1Petulu 2:25 kota wakutongola Izaia 53:6 unahanjika hali waze hanatoko “ngwe mapanga,” kashika Petulu ambile ngwenyi: “Haliapwila hinunahilukila kuli Kafunga kanda Kalayi ka mbunge jenu.” Kota te kanahanjika hali Yehova Zambi, mumu atu waze Petulu anakasonekena te kakukaula Yesu Kristu, yoze wakunjikile atu jacho kuli Yehova Zambi, mwe Kafunga munene wa atu jenyi. (Sam 23:1; 80:1; Jer 23:3; Eze 34:12) Yehova nawa kali kalayi yoze wa kukala milonga. (Sam 17:3) Kukala milonga (Gr., e·pi·sko·peʹ) muchihasa kulumbunuka upatwilo, ngwe chize chalingiwile ku sekulu yitangu M.J, muze A-Yunda ahonene kunyingika kuheta cha upatwilo wa Yerusaleme. [Gr., e·pi·sko·pesʹ].” (Lu 19:44) Upatwilo wacho te muuhasa kuneha yiwape kuli atu waze akufumanyisa Zambi ha tangwa “lia kukala” chenyi [Gr., e·pi·sko·pesʹ]—1Pe 2:12.
Kutanga Mbimbiliya
(1 Petulu 1:1-16) Yami Petulu, Postolo wa Yesu Kristu, Ngunasoneka kuli njize waze anamwangashana mu yifuchi ya Ponto, Ngalashia, Kapatoshia, Azia, ni Mbitiniya; 2 Waze hanatongola nikulita ni chinyingi cha kulutwe cha Zambi Tata, nikulita ni tachi ja Spiritu, ha kutusela ku usandu hanga twononoke, atusapwilile ni manyinga a Yesu Kristu: Vumbi ni sambukila yikalumbame kuli yenu. 3 Zambi kanda Tato ya Mwene wetu Yesu Kristu afumane, yoze hanatuseme chaha nikulita ni keke yenyi yinji, tukapwe ni kutalatala cha mwono mumu ha uhindukilo wa Yesu Kristu hakachi ka afu, 4 tukapwe ni chihinga chingunu, kuchishi luchisa, ni chize kuchishi kujimuka, kananufungilacho mu malilu. 5 Yenu kananufungu ni tachi ja Zambi mumu ha ufulielo, nukamone ulamwino uze himausolola ha mwaka wa kusula. 6 Mu chino nwakulikwiza, chipwe haliapwila ha shimbu likepe, nyi muchitamba, hananuvwisa chinyengo ni yeseko yeka ni yeka, 7 hanga kweseka cha ufulielo wenu, ulemu wahiana chikolo oru yize ya kutoka, chipwe mayeseka ni kahia, akauwane wa uhaliso ni uhenya ni ulemu ha usolwelo wa Yesu Kristu: 8 iye chipwe kunwamumwene, hindu nunamuzange. Chipwe haliapwila kunushi kumumona, hindu nunamufuliela, nwakulikwiza ni uwahililo uze keshi kuhasa kuuhanjika, wa too ni uhenya. 9 Nunatambula songo lia ufulielo wenu, we ulamwino wa mwono wenu. 10 Ha kutwala ku ulamwino uno aprofeta afupile nikuhengula chikolo, waze aprofetezele ha kutwala ku vumbi lino muliza kuli yenu; 11 nikuhengula hali mwe mutu, hanji we mwaka, Spiritu wa Kristu, Yoze wapwile muli ayo wenyikine, muze ashindakenyene shimbu-kanda ha lamba lia Kristu, ni uhenya uze muukapwa kulutwe. 12 Aalwezele ngwe, hi kuli ayo ko, alioze kuli yetu atuvumbikile ni yino yuma, yize haliapwila hananwambulwilayo ku makanwa ja akwa kwambujola muli Spiritu Musandu kanatumiwa mwilu. Yuma yino chipwe angelo kakwivwa usona kuyihengula. 13 Kashika, jichikenu miya mu zalilo ja kunyonga chenu, keyelenu, nukataletale ndo kusongo ha vumbi lize makalineha kuli yenu ha usolwelo wa Yesu Kristu. 14 Nuli ana, akwa kwononoka, kanda nulitesa ni usolo wenu wa kunyima mu kwalajala chenu: 15 alioze se yoze wanutambikile iye musandu, ni yenu nawa pwenu asandu ha kwenda chenu cheswe. 16 Mumu chinasonewa ngwo, Pwenu asandu, mumu yami nguli musandu.
21-27 OUTUBRO
YIKUMA YILEMU YA MU LIJI LIA ZAMBI | 1 PETULU 3-5
“Songo lia Yuma Yeswe Hilinakundama”
(1 Petulu 4:7) Alioze songo lia yuma yeswe hilinakundama. Kashika pwenu ni mana, keyelenu, nukalitumbikile ku kulemba.
w13 15/11 3 ¶1
“Keyelenu, Nukalitumbikile ku Kulemba”
UMWE lunga yoze te wakukalakala ufuku kambile ngwenyi, “ha mandemba meso kakulemenena ni tulo.” Kota atu akwo waze akukalakala ufuku che akwamba. Musono, akwa-Kristu kanapinji ni yipikalo yinji hano hashi ha Satana hanapu ngwe ha mandemba, mumu yuma yinakaliwa chinji. (Roma 13:12) Kashika, ha mashimbu wano akalu twatamba kulawola! Chili chilemu kupwa “ni mana” ni kukaula utowezo unambe ngwo, “keyelenu, nukalitumbikile ku kulemba.”—1 Petu. 4:7.
(1 Petulu 4:8) Kuhiana yuma yeswe pwenu nikulizanga umwe ni mukwo ni mukwo ni mbunge yeswe; mumu zango kuliakufuka milonga yinji.
w99 15/4 22 ¶3
Chize Muhasa Kunyingika Ulelu we ku Ufulielo ni Kuukumba
Twatamba kunyonga kanawa ha utowezo wa postolo Petulu unambe ngwo: “Songo lia yuma yeswe hilinakundama. Kashika pwenu ni mana, keyelenu, nukalitumbikile ku kulemba. Kuhiana yuma yeswe pwenu nikulizanga umwe ni mukwo ni mukwo ni mbunge yeswe; mumu zango kuliakufuka milonga yinji.” (1 Petulu 4:7, 8) Chili chashi kwecha uhenge wetu hanji wa akwetu utupiangule ni kututalingisa. Satana kananyingika kanawa ulelu wetu. Muheto uze akuta chinji uli kutuhandununa ni mandumbu jetu. Kashika, chili chilemu kusolola zango kuli mandumbu jetu hanga tufuke uhenge wacho, tuhone kuhana “unjililo” kuli Ndiapu.—A-Efwesu 4:25-27.
(1 Petulu 4:9) Lizumbulenu umwe ni mukwo, ni kulinyenyeta ka.
Twatamba Kuzumbula Ngeji Mumu Chikwete Ulemu!
2 Chuma chize Petulu akolwezele mandumbu jenyi hanga alinge chapwile ‘kulizumbula umwe ni mukwo.’ (1 Petulu 4:9) Liji lia Ngregu lize liakuhanjika ha “kuzumbula ngeji” linalumbunuka “kusolola zango hanji keke hali yilambala.” Alioze Petulu kakolwezele mandumbu jenyi hanga alizumbule “umwe ni mukwo,” chipwe waze te hanalinyingika ni kukalakala hamuwika. Mba kuchi te kuzumbula ngeji muchaakwasa?
3 Chino te muchaakwasa kupwa ni usepa upema kuli umwe ni mukwo. Mba yena? Shina unewuluka tangwa lize umwe akusanyikine ku zuwo lienyi? Nawa muze wasanyikine umwe ku zuwo lie, chino chanukwashile kupwa ni usepa upema. Jila yipema yize muyitukwasa kunyingika kanawa mandumbu jetu yili kwaazumbula ku mazuwo jetu. Akwa-Kristu waze apwile ha mashimbu ja Petulu, kafupiwile kupwa ni usepa upema muze te ali mu yipikalo. Ha matangwa wano “a kusula” ni yetu tunafupiwa kulinga chochene.—2 Timoteu 3:1.
Kuhengwola Yikuma Yilemu ya mu Mbimbiliya
(1 Petulu 3:19, 20) Muli Spiritu nawa, wayile nikwambujola sango kuli maspiritu waze haliapwila mu zuwo lia ususu ali; 20 waze ha shakulu kononokeneko, muze uhomboloji wa Zambi washimbwile ha matangwa ja Noa, shimbu machilulika ulungu, amuze akepe, te atu nake, aalamwinyine ku meya.
w13 15/6 23
Yihula ya Waze Akutanga Mikanda Yetu
Mbimbiliya yinambe ngwo, Yesu kambulwile “sango kuli maspiritu . . . mu zuwo lia ususu.” (1 Petu. 3:19) Yika yino yinalumbunuka?
▪ Kulita ni maliji ja Postolo Petulu, maspiritu jacho kali “waze ha shakulu kononokeneko, muze uhomboloji wa Zambi washimbwile ha matangwa ja Noa.” (1 Petu. 3:20) Chino chinasolola ngwo, postolo Petulu te kanahanjika hali angelo waze alichingile ha uhulia wa Satana. Yundase kambile hakutwala kuli angelo jacho ngwenyi, “kafungile chiyulo cho chitangu, alioze ehukile chihela choene.” Yamba nawa ngwenyi, Zambi “hanaafungu mu makana ja mutolo kushi lia milima pwi ndo ku upatwilo wa lie tangwa linene.”—Yunda. 6.
Mu mulali uka angelo alipwishile yihulia ku matangwa ja Noa? Shimbu Sanga lia Meya te kanda lichiza, angelo yahichika yihela yo mwilu yeza hano hashi yambata mapwo, chuma chino, te kuchalitele ni upale wa Zambi hali ayo. (Uputu. 6:2, 4) Chikwo nawa, angelo wano alisumbakenyene ni mapwo, kalingile chuma chipi. Zambi kakatangile angelo hanga apwe ni kulisumbakenya ni mapwo. (Uputu. 5:2) Angelo wano api, makaanongesa ha tangwa lize Zambi hanatesa. Ha mashimbu wano, kulita ni yize Yundase ambile, ayo kali “kushi lia milima pwi,” kwamba pundu, ayo kali mu zuwo lia ususu ku spiritu.
Ha mashimbu aka, nawa kuchi Yesu ambulwile “sango kuli maspiritu . . . mu zuwo lia ususu”? Petulu kasonekene ngwenyi, chino chalingiwile muze Yesu “amupwishile ni mwono muli Spiritu.” (1 Petu. 3:18, 19.) Petulu kambile nawa ngwenyi, Yesu ‘kambulwile sango.’ Amu Petulu azachishile liji, ‘kambulwile sango,’ kasolwele ngwo, yuma yino yalingiwile muze te kanda achisoneka mukanda wenyi utangu. Chino chinasoloka ngwe, Yesu kambulwile kuli maspiritu api hakutwala ku unongeso wo muze ahindukile. Sango jacho te kujishi kwaha kutalatala, mumu japwile ja upatwilo. (Yona 1:1, 2) Muze Yesu asolwele ufulielo wenyi ni ushishiko ndo kukufwa, ni muze amuhindwishile, chasolwele pundu ngwo, Ndiapu te keshi ni ndundo hali iye, Yesu te kali ni ulite wa kwambujola sango jino ja upatwilo.—Yoa. 14:30; 16:8-11.
Kwasala hakehe hanga Yesu akase Satana ni andemoniu jenyi ni kwaanyasa mu jondo. (Luka 8:30, 31; Uso. 20:1-3) Shimbu tangwa lino kanda liheta, angelo wano api manunga mu milima pwi ku spiritu, ni kushimbwila unongeso wo.—Uso. 20:7-10.
(1 Petulu 4:6) Mumu ha chino ambujolele Sango Lipema chipwe kuli waze hanafu, hanga chamwenemwene akaapatwile nikulita ni atu mu musunya, alioze akapwe ni mwono nikulita ni Zambi mu Spiritu.
w08 15/11 21 ¶8
Sango Jilemu ja Mukanda wa Tiangu ni Petulu
4:6—Aya “waze hanafu” evwile “sango lipema”? Kali waze te ‘hanafu mu shili yo,’ hanji ku ufulielo shimbu te kanda achivwa sango lipema. (Efwe. 2:1) Muze aputukile kufuliela ha sango lipema, yaaputuka ‘kupwa ni mwono’ ku spiritu.
Kutanga Mbimbiliya
(1 Petulu 3:8-22) Ha kusula, pwenu eswe ni kunyonga chimuwika, nikulivwila vumbi umwe ni mukwo ni mukwo, akwa kulizanga ngwe mandumbu, akwa mbunge ja vumbi, akwa mbunge ja kulikehesa. 9 Kanda nufwetesa yipi ni yipi, hanji kutukana ni kutukana, alioze shinaho ni uwape; mumu ha chino hanangutambika, hanga nukahinge uwape. 10 Mumu, Yoze mazanga mwono, mazanga kumona matangwa apema, akafunge limi lienyi ku yipi. Mivumbo yenyi kanda yihanjika kalimbalimba. 11 Akachine yipi, akalinge yipema; akafupe sambukila, akayikaule. 12 Mumu meso ja Mwene hwali hali akwa ululi. Matwi jenyi kakupanjika ku kuliumba cho; alioze meso ja Mwene kakulimika ni waze akulinga yipi. 13 Iya manupinjisa nyi munulisela ni mbunge yeswe ku yuma yipema? 14 Alioze chipwe kachi munukevwa lamba mumu ha ululi, kunwawaha. Kanda nukevwa woma ku woma wo, chipwe kanda nulipikala; 15 alioze selenu Kristu ngwe mwe Mwene mu mbunge jenu. Nukalulike matangwa eswe mukuhana kumbululo kuli mweswe manwita chikuma cha kutalatala chize chili muli yenu, hindu ni kushimbika ni woma. 16 Pwenu ni mbunge yipema: hanga ha chize manwambila chipi ngwe akwa kulinga yipi, waze akusaula kwenda chenu chipema muli Kristu nukaakolese sonyi. 17 Mumu chipema, nyi muchipwa ni upale wa Zambi, nukamone lamba ha kulinga yipema, hi ha kulinga yipi ko. 18 Mumu Kristu nawa wafwile kamuwika ha milonga, mukwa ululi hali yihenge, hanga akatunehe kuli Zambi; se amushihile mu musunya, alioze amupwishile ni mwono muli Spiritu. 19 Muli Spiritu nawa, wayile nikwambujola sango kuli maspiritu waze haliapwila mu zuwo lia ususu ali; 20 Waze ha shakulu kononokeneko, muze uhomboloji wa Zambi washimbwile ha matangwa ja Noa, shimbu machilulika ulungu, amuze akepe, te atu nake, aalamwinyine ku meya. 21 Chenacho nawa ni chizulie cha kulita haliapwila chinanulamwina, te upapachiso, hi kusana ko majilo a musunya akatuke, alioze kutaa cha mbunge yipema kuli Zambi, ku uhindukilo wa Yesu Kristu; 22 yoze kwali ku kwoko lia chindume lia Zambi, se hanayi mwilu; angelo ni akwa kuyula ni tachi nikuzeyela kuli iye.
28 OUTUBRO–3 NOVEMBRO
YIKUMA YILEMU YA MU LIJI LIA ZAMBI | 2 PETULU 1-3
“Nyonga ha Kuheta cha Tangwa lia Zambi”
(2 Petulu 3:9, 10) Mwene keshi kuvumiwa ni chilakenyo chenyi, ngwe amwe akunyonga kupwa kuvuma; alioze iye kapwa ni uhomboloji kuli yenu, se kazangile niumwe kutoka, alioze eswe alikonyeke. 10 Alioze tangwa lia Mwene kumulikeza ngwe mwiji ha ufuku, muze malilu makahwa ni lundunjila, ni yuma ya mwilu muyikasangunuka ni chivukuminya cha kahia, ni hashi ni yitanga yize yiliho muyikawema wupu.
w06 15/12 27 ¶11
Yehova “Makapatwila ni Ululi”
11 Shindakenyo yika mutuhasa kupwa nayo ha maliji a Yesu muze ambile ngwenyi, Yehova makapatwila ni ululi “susumuku”? Liji lia Zambi linasolola ngwo, chipwe ngwe Yehova “kanashimbula,” nihindu makapatwila ni ululi muze tangwa lienyi muliheta. (Luka 18:7, 8; 2 Petulu 3:9, 10) Muze Sanga lia Meya liahetele ha matangwa ja Noa, lianongesele atu api. Chipwe ha matangwa ja Lote, muze kahia kaholokele mwilu, kaanongesele atu api. Yesu kambile ngwenyi: “Chizechene muchikapwa ha tangwa lize lia kusoloka cha mwe Mwana Mutu.” (Luka 17:27-30) Che kwamba, “kwenyeka muchitulumuka” hali atu api. (1 A-Tesalonika 5:2, 3) Kwamba pundu, mutuhasa kupwa ni shindakenyo ngwetu, Yehova makanongesa hashi ha Satana kulita ni upatwilo wenyi.
(2 Petulu 3:11, 12) Se yino yuma yeswe chocho muyikajindwoka, chanutamba kupwa ni kwenda chisandu ni uwayilo. 12 Ni kutalatala, nikupupwisa kuheta cha tangwa lia Zambi, ha mukunda walio malilu makawema, makajindwoka, ni yuma ya mwilu muyikasangunuka ni chivukuminya cha kahia.
w06 15/12 19 ¶18
“Tangwa Linene lia Yehova Linakundama”
18 Postolo Petulu kanatutoweza hanga tunyonge ha “kuheta cha tangwa lia Zambi.” Kuchi mutuhasa kuchilinga? Mutuhasa kuchilinga ha “kwenda chisandu ni uwayilo.” (2 Petulu 3:11, 12) Kwenda chino chisandu, muchitukwasa kulilulieka hanga tunyonge ha “kuheta cha tangwa lia Zambi.” Liji lia Ngregu analumbununa ngwo, “kutalatala” linalumbunuka ‘kupupwisa.’ Tuchi kuhasa kupupwisa kuheta cha tangwa lia Yehova. Alioze, nyi twalihulikila ha mulimo wa Zambi muze tunashimbwila tangwa lienyi, mashimbu mapalika kawashi.—1 A-Korindu 15:58.
Kuhengwola Yikuma Yilemu ya mu Mbimbiliya
(2 Petulu 1:19) Mba liji lia uprofeto tuli nalio, hanalikolesa kuhiana chikolo; chanutamba nuliononokene ngwe ku ndeya ya kupanguka mu milima, ndo tangwa mulicha, ni mukwa pangu mavumbuka mu mbunge jenu.
w08 15/11 22 ¶2
Sango Jilemu ja Mukanda wa Tiangu ni Petulu
1:19—“Mukwa pangu” iya, ha mashimbu aka avumbukile, nawa kuchi tunachinyingika? “Mukwa pangu” kali Yesu Kristu, mu Wanangana wa Zambi. (Uso. 22:16) Ha mwaka 1914, Yesu kavumbukile kulutwe lia yitangiwa yeswe ngwe Mwanangana mu Wanangana wa Mesaya, ni kwambujola kucha cha tangwa. Usolwelo wa kwalumuka cha Yesu wasolwele uhenya ni ndundo ja Wanangana wenyi, ni kushindakenya nawa ngwo uprofeto wa Zambi wakumanunuka pundu. Kujikijila ha maliji wano chakutwaha chiseke ku mbunge, ni kunyingika pundu ngwo, Mukwa pangu hanavumbuka.
(2 Petulu 2:4) Mumu kachi Zambi kavwilile keke angelo muze avulumwine, alioze waanyashine mu wina wa milima, waakunjikile ku malenge ja milima mukuafunga ndo ku upatwilo.
w08 15/11 22 ¶3
Sango Jilemu ja mukanda wa Tiangu ni Petulu
2:4—“Wina wa milima” yika, nawa mashimbu aka anyashilemo angelo waze avulumwine? Wina wa milima wapwa ngwe zuwo lia ususu muze akusa wika yitangiwa ya spiritu. Wina wacho unalumbunuka kupwa mu milima ya ku spiritu, kuhona kunyingika nichimwe hakutwala ku upale wa Zambi. Waze ali mu wina wa milima keshi ni kutalatala cha kulutwe lia matangwa. Ha matangwa ja Noa, Zambi kanyashine angelo api mu wina wa milima, nawa manunga mu wina wacho ndo muze makaanongesa.
Kutanga Mbimbiliya
(2 Petulu 1:1-15) Yami Semone Petulu, ndungo kanda postolo wa Yesu Kristu, Kuli waze hanazuku ufulielo ulemu umuwika ni uno wa yetu, ku ululi wa Zambi yetu kanda Chilamwina Yesu Kristu: 2 Vumbi ni sambukila yikalumbame kuli yenu, mu yinyingi ya Zambi ni ya Yesu Mwene wetu. 3 Se ku tachi ja uzambi wenyi Zambi hanatwehe chawana yuma yeswe ya kutwala ku mwono ni uwayilo, ku chinyingi cha yoze watutambikile ni uhenya wenyi mwene ni kuhiana chenyi mwene. 4 Ku yino hanatwehe yilakenyo yenyi yilemu ni yinene yahiana; hanga ku yino, nukapwe akwa kulianyina ha chisemiwa cha Zambi, se hinunapuluka ku kupola chize chili hano hashi mumu ha usolo. 5 Ewa, mumu ha mukunda unowene, wezenu yenwene kulipupwisa cheswe, ha ufulielo wenu, wezenu tachi; ha tachi jenu wezenu yinyingi. 6 Ha yinyingi yenu, wezenu kusuula; ha kusuula chenu wezenu kunyongonona; ha kunyongonona chenu wezenu uwayilo; 7 ha uwayilo uenu wezenu vumbi lia undumbu; ha vumbi lia undumbu wezenu zango. 8 Mumu nyi kachi yino yuma yili muli yenu ya kulumbama, kuyakunupwisa hanga kunuchi kulelumioka chipwe kunuchi kuseka ha kutwala ku yinyingi ya Mwene wetu Yesu Kristu. 9 Mumu yoze unahono yino yuma iye kapuputa, mukwa chitalawili, se hanavulama chize amupemesene ku milonga yenyi yikulu. 10 Kashika, mandumbu, lipupwisenu kukolesa chinyingi cha kwamba ngwenu, Hanatutambika, hanatutongola; mumu nyi kachi munulinga yino yuma kachi kunuchi kalimbuka nilimwe tangwa. 11 Mumu chocho, kumakanwaha unjililo wahiana mu wanangana wa mutolo wa Mwene wetu kanda chilamwina Yesu Kristu. 12 Kashika ni mbunge yami yeswe, matangwa eswe mungweseka kunwiwulula yino yuma, chipwe nunayinyingika, nunajikiza mu umwenemwene uze nuli nawo. 13 Ngunachinyongo chipema, shimbu lieswe mungupwa mu mbalaka yino, kunukasumuna ha kunwiwulula; 14 se ngunanyingika kuzula cha mbalaka yami chili hakamwihi, chizechene ngwe Mwene wetu Yesu Kristu angulwezele. 15 Ewa, munguchisa mbunge yeswe, hanga ha shimbu lieswe muze yami hinaya nukahase kwiwuluka yino yuma.