LONGESO 4
Kutongola Kanawa Yisoneko
Mateu 22:41-45
CHIKUMA CHILEMU: Shimbu kanda utanga chisoneko, amba ko maliji amwe waze makwasa waze anakupanjika ashimbwile chisoneko chize mutanga.
YIZE WATAMBA KULINGA:
Nyingika kanawa yize mutangila chisoneko. Hakutanga hita chisoneko, amba yize muyikolweza mbunga anyonge ha chikuma chilemu chize unatangila chisoneko chacho.
Zachisa Mbimbiliya. Nyi unahanjika kuli waze afuliela muli Zambi, solola ngwe Mbimbiliya yili pundu Liji lia Zambi, hanga amone ngwo unalongesa manyonga ja Zambi.
Amba yize muyikolweza atu atange chisoneko. Hula chihula chize makumbulula mu chisoneko, ni kusolola kapinda yoze munuwana ukwaso mu chisoneko, hanji yimwe shimbi malumbununa mu Chisoneko chize mutanga.