Delfina kawanyine utakamiso mu Mbimbiliya ha mashimbu jenyi akalu. Yize iye awanyine mu Mbimbiliya yamukwashile chinji. Ngwe chize mutumona ha mitwe yitatu muyisulaho, atu anji kakumona chize Mbimbiliya yakwakwasa ha kukaula usongwelo wamo hanga akumbe yipikalo yo. Ayo kakumona nawa ngwo, pundu Mbimbiliya yili ngwe chikwata chize twatongwola ku uuputukilo. Yinalise chinji ni mikanda yikwo yize yakupwa yikulu ni kupihia. Mumu liaka Mbimbiliya yalisa ni mikanda yikwo? Shina mumu yili ni manyonga ja Zambi, hi ja atu ko?—1 A-Tesalonika 2:13.

Kota ni yena wakumona ngwe, mwono uli wa mashimbu akehe nawa unazala too ni milonga. Nyi unapinda ni yipikalo, kulihi muhasa kuwana utakamiso ni ukwaso upema?

Tushimutwinenu yikuma yitatu yize muyihasa kusolola ngwo, Mbimbiliya yili ni ulemu unji ku mwono we. Ni chize muyihasa kukukwasa.

1. kwehuka milonga nyi muchilita.

2. kusopa yipikalo nyi yasoloka.

3. kunyongonona ha yipikalo yize kuushi kuhasa kuhwisa

Mitwe yize muyisulaho muyishimutwina yikuma yino yitatu.

UUKISO

MBIMBILIYA HI MUKANDA WA UUKISO KO, ALIOZE MULI SHIMBI JILEMU JIZE JINAHANJIKA HAKUTWALA KU KUTWAMA KANAWA.

Shimbi ja Mose te jakwamba ngwo, mutu yoze uli ni yikola ya mbumba katamba kumuhandununa ni atu akwo. Shimbi yino ha mashimbu akunyima te keshi kuyikawula kuli mandotolo, alioze haliapwila kanalilongesayo, yichili ni ulemu nawa kakuyikaula.—Ulevi, kapitulu 13 ni 14.

Ku songo lia sekulu 19, mandotolo kanji-kanji te kakukwata afu, nawa ni kukwata atu waze ali ni mwono—chakuhona kusana ku moko. Ndako yino yashihile atu anji. Alioze, Shimbi ja Mose te jakwamba ngwo, ni mutu makwata mufu mapwa wa luchisa. Chipwe meya waze te akusa ha ufwe hanga atu asane ku moko no te kapwa a luchisa. Shimbi jino ja mu Mbimbiliya te jakukwasa atu kutwama kanawa.—Kwalula 19:11, 19.

Ha miaka yeswe, tununu a twanuke kakufwa ni yikola ya kulokoka mu jimo, anji akuli ayo kakufwa ha mukunda wa kukwata yipi ya atu yize akumbila cha mumbilila. Shimbi ja Mose te jakwamba ngwo, yipi ya atu katamba kuyishikila kusuku ni mazuwo.—Shimbi Yamuchiali 23:13.

Shimbi ja Zambi te jakwamba ngwo, mwana wa lunga katamba kumupwisa ngalami ha tangwa liamuchinake. (Ulevi 12:3) Ana kemba, chilonda cho chili ni uhashi wa kuma kawashi, chipi-chipi waze achili ni poso jaali. Ku mashimbu akunyima, muze yinyingi ya uukiso te kanda yichoka, kushimbwila poso jaali mba apwise mwana ngalami te chakumufunga.

Akwa-kuhengula yikuma ya uukiso ni akwa-ciencia kanambe ngwo, kupwa ni chiseke, kutalatala, kusakwilila, ni kukonekena chakuneha yiwape ku mujimba. Mbimbiliya yinambe ngwo: “Mbunge ya chiseke yapwa yitumbo yipema; alioze spiritu yize yamakuka kuyakuumisa yifwaha.”—Yishima 17:22.