Malongeso a Mukanda Wakuzachisa ha Kukunguluka cha Mwono ni Mulimo Wetu
3-9 MAIO
YIKUMA YILEMU YA MU LIJI LIA ZAMBI | KWALULA 27-29
“Twimbululenu Yehova Yoze Keshi Katonde”
w13-T 15/6 10 ¶14
Lemesa Chinji Yitanga ya Yehova
14 Ana a mapwo atano a Zelofehade yahula Mose ngwo: “Kuchi te jina lia tata malichiza kuli akwa munyachi wenyi mumu kapwile ni mwana wa lunga?” Ayo yamba ngwo: “Atwehe chihinga tukazuke hakachi ka ana-akwo ja tata.” Shina Mose kambile ngwenyi: ‘Chikuma chino kuchishi ni ulemu?’ Ka, iye “yahetesa chikuma cho kumeso ja Yehova.” (Kwa 27:2-5) Chiyulo chika akwachile? Yehova yalweza Mose ngwenyi: “Ana a mapwo a Zelofahade pundu anahanjika. Chamwenemwene ukaahe akazuke chihinga hakachi ka ana-akwo ja tato. Ukaahingise chihinga cha tato.” Yehova yalinga yuma yinji kuhiana yize ayo etele. Yehova yapwisa chikuma chacho shimbi, ha kulweza Mose ngwenyi: “Nyi mafwa umwe lunga keshi mwana wa lunga, mba ukahingise mwanenyi wa pwo chihinga chenyi.” (Kwa 27:6-8; Yos 17:1-6) Kukatuka hazehene, mapwo eswe a mu A-Izalele mapwa ni mulonga wacho te katamba kwafunga ha kukaula shimbi yacho.
w13-T 15/6 11 ¶15
Lemesa Chinji Yitanga ya Yehova
15 Chiyulo chino chapwile cha zango nawa kuchishi katonde! Yehova yalemesa mapwo wano te anapalika mu kapinda mukalu, ngwe chize apwile ni kulinga hali A-Izalele waze te ali ni mwono upema. (Sam 68:5) Lusango yono wa mu Mbimbiliya, kanasolola umwenemwene wa kwamba ngwo: Yehova keshi katonde hali tuvumbi twenyi eswe.—1Sa 16:1-13; Yi 10:30-35, 44-48.
w13-T 15/6 11 ¶16
Lemesa Chinji Yitanga ya Yehova
16 Kuchi mutuhasa kwimbulula Yehova yoze keshi katonde? Nyingika ngwe, kuhona katonde chinatale ha yikuma yaali. Nyi kutushi ni katonde kutuchi kumusolwela akwetu. Kwamba umwenemwene, tulieswe twakuzanga kunyingika ngwetu kutushi katonde. Alioze muhasa kupwa ni shindakenyo ngwe, hichashiko kunyingika yitanga yetu. Hachino, yika mutuhasa kulinga hanga tunyingike ngwetu kutushi katonde? Muze Yesu afupile kunyingika yize te atu akunyonga hali iye, yahula masepa jenyi amwenemwene ngwenyi: “Atu kuchi akunguvuluka yami mwe Mwana Mutu?” (Mat 16:13, 14) Twimbululenu Yesu ha chikuma chino. Yena muhasa kuhula umwe sepa lie yoze unanyingika ngwo makulweza umwenemwene, hanga unyingike nyi kuushi katonde. Nyi makulweza ngwenyi ukwete yimwe yitanga ya katonde hakutwala ku yikowa, chimwe chizavu cha atu hanji hali yiswale ni pichi, yika watamba kulinga? Lemba ni mbunge yeswe kuli Yehova hakutwala ku yitanga ye, ni kumwita hanga akukwase kwalumuna yitanga yacho, mba uhase kusolola yitanga yize kuyishi katonde.—Mat 7:7; Kol 3:10, 11.
it-3-T 123 ¶6
Milambu
Milambu ya kunwa. Milambu ya kunwa, kapwile ni kuyilambula hamwe ni milambu yikwo, A-Izalele kapwile ni kuyilambula chinji muze ahetele mu Chifuchi cha Chilakenyo. (Kwa 15:2, 5, 8-10) Milambu yacho yapwile ya vinyu, (“walwa usasu”) kapwile ni kuyizujila ha chilumbilo.—Kwa 28:7, 14 tesa ni Kut 30:9; Kwa 15:10.
10-16 MAIO
YIKUMA YILEMU YA MU LIJI LIA ZAMBI | KWALULA 30-31
“Ukamanunune Chilakenyo Che”
it-3-T 801
Chilakenyo
Mutu Mwene Malakenya, Alioze Katamba Kumanununa. Atu ene e apwile ni kulinga yilakenyo. Alioze nyi mutu malinga chimwe chilakenyo, kulita ni shimbi ja Zambi, te katamba kuchimanununa. Kashika, chilakenyo chapwile ngwe kuhana mwono, chekwamba, mutu kapwile ni kulakenya mwono wenyi ngwenyi mamanununa maliji jenyi. (Kwa 30:2; tesa ni Ro 1:31, 32.) Mbimbiliya yakulongesa ngwo, shimbu mutu kanda achilakenya, katamba kunyonga kanawa, mumu chilakenyo chinalumbunuka mwono wenyi. Shimbi yapwile ni kwamba ngwo: “Ha kulakenya chilakenyo chimwe kuli Yehova, . . . Zambi yenu kumakanufwetesacho, mba muchipwa mulonga kuli yenu. Nyi munuchina kulakenya kuchichi kupwa mulonga kuli yenu.”—Shi 23:21, 22.
it-3-T 801
Chilakenyo
Chinalumbunuka chilakenyo chilemu chize mutu akulakenya Zambi hanga alinge chimwe chuma, ahane chawana, kulihana alinge umwe mulimo hanji kulituna yimwe yuma chipwe ngwe hi yipi ko. Chilakenyo chilemu, chili shingo lize mutu mwene apwile ni kulinga chakuhona kumushinjila. Amu chapwile chilakenyo chilemu, kashika chapwile ngwe shingo, ha mashimbu amwe maliji wano eswe aali kakusoloka hamuwika mu Mbimbiliya. (Kwa 30:2; Mat 5:33) “Chilakenyo” chili kuzanga kulinga yimwe, alioze “shingo” linalumbunuka kwita kuli umwe mwata hanga atayize umwenemwene wa amwe maliji. Kanji-kanji atu kapwile ni kulishinga muze analingi umwe usendo.—Upu 26:28; 31:44, 53.
w04-T 1/8 27 ¶3
Yikuma Yilemu ya Mukanda wa Kwalula
30:6-8—Shina lunga mukwa-Kristu mahasa kujilula chilakenyo cha mukwo-pwo? Yehova musono, kakusongwela hita kavumbi kenyi mujila yalisa hakutwala ku yilakenyo. Chakutalilaho, kulihana kuli Yehova chili chilakenyo chize mutu akulinga ukawenyi. (Nga 6:5) Lunga keshi ni ulite wa kujilula chilakenyo chacho. Pwo neye, katambile kulinga chilakenyo chize muchilimika ni Liji lia Zambi hanji ni yiyulo ya mukwo-lunga.
Kuhengwola Yikuma Yilemu ya mu Mbimbiliya
it-2-T 482 ¶2
Jefeta
Ku mashimbu akunyima chapwile chashi kuhana atu hanga akalakale mu zuwo lisandu lia Yehova. Yisemi kapwile ni ulite wacho. Samuele kali umwe wa kuli atu jacho, muze te kanda achisemuka, naye Hana yalakenya kumuhana hanga akalakale mu tabernakulu. Chilakenyo chacho kachitayijile kuli mukwo-lunga Elekana. Muze asumwine Samuele, Hana yamutwala ku zuwo lisandu.
17-23 MAIO
YIKUMA YILEMU YA MU LIJI LIA ZAMBI | KWALULA 32-33
“Nukahume Kumeso Jenu Atu Eswe Atwama mu Chifuchi”
w10-T 1/8 23
Unachinyingika Nyi?
“Manangamo” waze akuvuluka chinji mu Yisoneko ya Hepreu te yika?
Muze kwasalile hakehe hanga A-Izalele anjile mu Chifuchi cha Chilakenyo, Yehova yaalweza anongese yihela yeswe yize A-Kanana apwile ni kuwayila tuzambi two. Zambi yamba ngwenyi: “Nukonwone mawe jo a kutota, nukonwone tuponya two twa kuzuzulula, nukapuzule manangamo jo eswe.” (Kwa 33:52) Manangamo wano, kota kapwile yihela ya uwayilo wa mahuza, yize yapwile ha milundu, yilumbilo mwishi lia mitondo hanji mu mambonge. (1Mi 14:23; 2Mi 17:29; Eze 6:3) Mu yihela yacho mwapwile yilumbilo, tuponya, yikwachilo ya insensu ni yuma yikwo ya uwayilo.
w08-T 15/2 27 ¶5-6
Yika Mutuhasa Kulilongesa ha Yitanga Yipi ya A-Izalele?
Musono, twakupalika mu yipikalo ngwe yize A-Izalele apalikile. Atu a shamusono no kali ni tuponya anji, ngwe: mbongo, njimba a lufuma, akwa-kuta yiheho, akwa-mafwefwe, mangana ja yingeleja ni asoko. Nyi kutwakeyele, mutuhasa kulihulikila ha yuma ngwe yino ku mwono wetu. Kulinga usepa ukolo ni mutu yoze keshi kuzanga Yehova, muchihasa kupihisa ufulielo wetu.
Utanji wapwile chihanda chilemu mu uwayilo wa Mbale, we apiangwile nawo A-Izalele anji. Atu ja Zambi kananungu ni kufwa mu miheto yacho musono. Chakutalilaho, umwe mutu muze ali ukawenyi mahasa kupola ha yimwe site chakuhona kunyingika ni kutala yuma yipi yize muyihasa kupinjisa shimbi ya mbunge yenyi. Muchipiha chinji nyi umwe mukwa-Kristu mafwa mu muheto wa kutala pornografia ha internet!
it-1-T 417 ¶2
Kanana
Yoshua “kahichikile chuma nichimwe cha yize Yehova atumine Mose” hakutwala ku unongeso wa A-Kanana. (Yos 11:15) Alioze, A-Izalele yalitwamina kukaula usongwelo uno wa kunongesa yuma yeswe yize yapwile ni kupihisa chifuchi. Hachino, yaapiangula ha kulichinga ni A-Kanana, hakupalika cha mashimbu, chino yichineha kufwa chinji mukachiko, (ni ungalwe, upangala ni kuwayila tuponya) nyi te kanakakaula shimbi ya kunongesa A-Kanana, kachi yuma yino kuyakalingwiwile. (Kwa 33:55, 56; Kuy 2:1-3, 11-23; Sam 106:34-43) Yehova katowezele A-Izalele ngwenyi, ululi ni upatwilo wenyi kuyishi katonde, nawa ngwenyi, nyi malikata ni A-Kanana, ha kulimbata no, kuwayila hamuwika ni kwimbulula mianda ya uwayilo wo ni yitanga yo yipi, chino te muchaanehena kufwa ni ‘kwasaza mu chifuchi.’—Kut 23:32, 33; 34:12-17; Lev 18:26-30; Shi 7:2-5, 25, 26.
Kuhengwola Yikuma Yilemu ya mu Mbimbiliya
it-3-T 695 ¶1
Njiza
Muze chela chapwile ni kusolola chihela kuze te matwala umwe munyachi, te kakutesa utohwe wa chihela chacho kulita ni chikuma chamuchiali: kutohwa cha munyachi. “Nukahinge chifuchi nikulita ni chela, nikulita ni akwa minyachi yenu, kuli atu anji hikuhana chifuchi chinene, kuli akehe hikuhana chifuchi chikehe. Kweswako chela muchimwinyikina mutu, chocho chikapwe nichenyi.” (Kwa 33:54) Chipwe ngwe kapwile ni kuta chela cha kuze hita munyachi muutwama, nihindu kapwile ni kwalumunako yimwe hakutwala ku utohwe wa chihinga. Kashika, muze amwene ngwo chihela cha Yunda chapwile chinene, yachiteta ni kuhana chihanda ku munyachi wa Simeone.—Yos 19:9.
24-30 MAIO
YIKUMA YILEMU YA MU LIJI LIA ZAMBI | KWALULA 34-36
“Chinyina Muli Yehova”
Shina Wakufupa Uchinyino Muli Yehova?
4 Mba yika te yakulingiwa kuli umwe Ka-Izalele nyi mashiha mutu kachihalile (hanji kachinyongene)? Chipwe ngwe mutu wacho kafwa mu ponde, nihindu yoze wa mushiha te kakumusuma mulonga ha kushiha mutu yoze keshi chitela. (Uputukilo 9:5) Hachino, Yehova yamba ngwenyi, mutu wacho mahasa kumusolwela keke. Mutu yoze washiha mukwo kachihalile te kakuchina mukwa-kukala manyinga ni kuya ku chimwe cha yihunda yisambano ya uchinyino. Nyi mamutayiza hanga atwame mu chihunda chize achinyina, acho kamulamwina. Alioze iye te katamba kununga mu chihunda chacho ndo ha kufwa cha sasendote wa lutwe.—Kwalula 35:15, 28.
w17 15/11 9 ¶6
Shina Wakufupa Uchinyino Muli Yehova?
6 Nyi Ka-Izalele mashiha mutu te kachihalile, iye katamba kuya ku chihunda cha uchinyino ni “kulumbununa chikuma chenyi” kuli makulwana aku chikolo cha chihunda chacho. Makulwana jacho te katamba kumutambula kanawa. (Yoshua 20:4) Hanyima, mamufunyisa nawa kuli makulwana a ku chihunda chize iye ashihilile mutu hanga amusopese. (Tanga Kwalula 35:24, 25.) Nyi makulwana jacho mamba ngwo mutu wacho kamushihanga kachihalile, mba hi mamufunyisa nawa ku chihunda cha uchinyino.
Shina Wakufupa Uchinyino Muli Yehova?
13 Mutu yoze te wakushiha mukwo kachihalile, muze maya mu chihunda cha uchinyino te kakumufunga kanawa. Yehova kambile hakutwala ku yihunda yacho ngwenyi: “Muyikapwa kuli yenu uchinyino.” (Yoshua 20:2, 3) Yehova kakambile ngwenyi mutu wacho katambile kumusopesa nawa ha chitela chochene. Chikwo nawa, te keshi kutayiza mukwa-kukala manyinga hanga anjilemo ni kumushiha. Muze mutu wacho ali mu chihunda cha uchinyino, iye kali mushi lia mapulwa ja Yehova. Iye kakapwile mu kamenga. Mumu te kakukalakala, kukwasa akwo, ni kuwayila Yehova ni ukulungunga. Chochene, iye te mahasa kuwahilila ku mwono ni sambukila!
Kuhengwola Yikuma Yilemu ya mu Mbimbiliya
w91-T 15/2 13 ¶13
Ukuule Uze Unakwate Hali Eswe
13 Alama ni Eva kechi kayuka ha chitapo cha ukuule wa Yesu. Shimbi ya Mose yambile ngwo: “Kanda nutambula ndando ya kulamwina mwono wa chingalwe yoze unahi ni mulonga wa kufwa.” (Kwa. 35:31) Alama kakamwongele, kashika, iye kalingile shili kutachi chakuhona kumushinjila. (1 Timo. 2:14) Chino chili ngwe kashihile munyachi wenyi, mumu atu eswe te mahinga shili yenyi ni kufwa. Alama te katamba kufwa lume, mumu muze ehukile shimbi ja Zambi te uchili mungunu. Nyi Yehova makonekena Alama mumu lia chitapo cha ukuule, chino chichi kulita ni ululi wenyi. Kufweta chawana ha shili ya Alama, chakuhana uhashi wa kuchiza upatwilo wa kufwa hali ana jenyi!—Roma 5:16.
31 MAIO–6 JUNHO
YIKUMA YILEMU YA MU LIJI LIA ZAMBI | SHIMBI YAMUCHIALI 1-2
‘Upatwilo Uli Wambala wa Zambi’
w96-T 15/3 23 ¶1
Yehova—Kakuzanga Ululi ni Mana
Makulwana a mu chikungulwila, kali ni chiteli cha kusopa milonga yinatale ha shili yinene. (1 Kori. 5:12, 13) Muze anasopesa mutu, katamba kwiwuluka ngwo, ululi wa Zambi wakufupa kusolola keke nyi muchilita. Nyi mamona ngwo, kuchalitele kusolola keke, ngwe hali chivulumunyi yoze kalikonyekene, katambile kumusolwela keke. Alioze, makulwana a mu chikungulwila katambile kusosolola mutu yoze walinga shili hanga amufunyishine upi ha upi. Ayo katamba kunyingika ngwo kusosolola yili jila yakumukwashilamo hanga alikonyeke. (Tesa ni Eze 18:23) Kupalikila mu chiyulo cha Kristu, makulwana a mu chikungulwila kakukalila ululi ni kupwa “ngwe chiswamo ha fuji.” (Iza. 32:1, 2) Kashika katamba kupwa atu ashi nawa keshi katonde.—Shi 1:16, 17.
w02-T 1/8 9 ¶4
Zeyela ni Ushishiko Weswe Wata wa Zambi
4 Atu waze apwile ni kukalakala ngwe ngaji, te katambile wika kunyingika Shimbi. Amu apwile yihenge, makulwana wano te katamba kukeya hanga ehuke yitanga yipi, ngwe, chipululu, katonde ni kuzo. Mumu yitanga yino te muyihasa kuhengesa upatwilo. Mose yaalweza ngwenyi: “Kanda nupwa ni katonde ha kupatula. Nupanjike kuli akepe ni anene chizechene. Kanda nupwa ni woma wa meso ja mutu, mumu upatwilo wa mbala wa Zambi.” Kwamba umwenemwene, ngaji a mu Izalele kapwile ni kumanyinako Zambi ha kusopesa atu. Chiteli chino chapwile chilemu chinji!—Shi 1:16, 17.
Kuhengwola Yikuma Yilemu ya mu Mbimbiliya
w13-T 15/9 9 ¶9
Shimbi ja Yehova Jili Jingunu
9 Muze A-Izalele aputukile wenyi wo uze walingile miaka 40 mu “puya yeswe yinene yakola woma,” Yehova kakaliangile kwalweza mu yimako-yimako chize te maasongwela ni kwafunga. Chipwe chocho, yaaha shindakenyo yize te muyakwasa kumujikijila ni kukaula usongwelo wenyi. Ha kuzachisa lelwa ha mwalwa ni lelwa lia kahia ha ufuku, Yehova kapwile ni kwiwulula A-Izalele ngwo, kanaakwase muze te anaasongwela mu puya. (Shi 1:19; Kut 40:36-38) Iye nawa kapwile ni kwaha yize te akufupiwa. ‘Mazalo jo kakafwile; ni molu jo kakajimbile.’ Kwamba pundu, ayo ‘kakahonene nichimwe.’—Neh 9:19-21.
7-13 JUNHO
YIKUMA YILEMU YA MU LIJI LIA ZAMBI | SHIMBI YAMUCHIALI 3-4
“Shimbi ja Yehova Jikwete Mana ni Ululi”
it-1-T 817 ¶3
Malinjiekela
Mutu yoze wakusa tachi hanga alilongese Liji lia Zambi ni kukaula yize akulilongesa, mahasa kupwa ni malinjiekela kuhiana alongeshi jenyi, ni yinyingi yinji kuhiana makulwana. (Sam 119:99, 100, 130; tesa ni Lu 2:46, 47.) Chino chakulingiwa mumu mana ni malinjiekela kakwiza ha kukaula usongwelo ungunu wa mu Liji lia Zambi; yino ye A-Izalele te atamba kulinga hanga akwa-mavungu ambe hali ayo ngwo, “munyachi uno kuwapwa atu a mana ni yinyingi.” (Shi 4:5-8; Sam 111:7, 8, 10; tesa ni 1Mi 2:3.) Mutu yoze ukwete malinjiekela kananyingika ngwenyi chili chipi kwehuka Liji lia Zambi, kakusa tachi hanga akaule shimbi ja Zambi ni kumwita hanga amukwase kuchilinga. (Sam 119:169) Kakufunga Liji lia Zambi mu mbunge yenyi (Mat 13:19-23), kakulisoneka mu mbunge yenyi (Yis 3:3-6; 7:1-4) nawa kakuvwila lwaji “jila yeswe yamahuza” (Sam 119:104). Muze Mwana wa Zambi apwile hano hashi, kasolwele malinjiekela jacho, kakesekele kwehuka kufwa, alioze yatayiza kukaula Yisoneko yambile ngwo katamba kufwa ha mutondo wa lamba.—Mat 26:51-54.
w99-T 1/11 20 ¶6-7
Muze Mutupwa Yihanyi
Ha kukomoka ha yize evwile ni yize amwene, ni kulikehesa cheswe, mwazovu wa Shipa yamba ngwenyi: “Kawaha malunga je, kawaha wano tuvumbi twe akumana kumeso je matangwa eswe nikwivwa mana je.” (1Mi 10:4-8) Iye kakambile ngwenyi, tuvumbi twa Solomone kawaha mumu lia upite unji, chipwe ngwe Solomone kapwile nawo. Alioze, iye yamba ngwenyi tuvumbi twa Solomone kawaha ha kwivwa matangwa eswe mana a Solomone waze amuhele kuli Zambi. Mwazovu wa Shipa kali chilweza chipema kuli yetu tuvumbi twa Yehova musono, waze twakukaula mana a Sakatanga ni a Mwanenyi, Yesu Kristu!
Maliji akwo waze mwazovu yono ambile kuli Solomone, kali ni ulemu, iye kambile ngwenyi: “Yehova Zambi ye akafumane.” (1Mi 10:9) Iye kamwene ngwenyi, Yehova mwe wakwashile Solomone kupwa ni mana ni yuma yeswe yize apwile nayo. Yino yinalite ni yize Yehova aliangile kulakenya kuli A-Izalele. Zambi yamba ngwenyi, ‘nufunge shimbi jami’ yamba nawa ngwenyi, “yino kuyapwa mana jenu ni yinyingi yenu kumeso ja mavungu waze makevwa yiyulo yino. O mamba ngwo, Chamwenemwene munyachi uno kuwapwa atu a mana ni yinyingi.”—Shi 4:5-7.
w07-T 1/8 29 ¶13
Shina Yena Uli ni “Upite Kuli Zambi”?
13 Muze Yehova akuwahisa atu jenyi, kakwaha yawana yipema. (Tia 1:17) Chakutalilaho, Yehova kahanyine kuli A-Izalele “chifuchi kuze kunokela yamwa ni wuchi” hanga atwamemo. Chipwe ngwe chifuchi cha Engitu necho chapwile chipema, nihindu chifuchi chize Yehova ahanyine kuli A-Izalele chalisele ha chimwe chikuma chilemu. Mose kaalweze ngwenyi: “Chifuchi kanachifungu kuli Yehova Zambi yenu.” Mu maliji akwo, mutuhasa kwamba ngwetu, ayo te mapwa ni yuma yinji, mumu Yehova te maafunga. Muze A-Izalele apwile ni kushishika kuli Yehova, iye kapwile ni kwawahisa chinji, nawa kapwile ni mwono upema kuhiana akwa-mavungu waze apwile ni kusulangana no. Kwamba umwenemwene, chiwape cha Yehova “kuchakupichisa.”—Kwa 16:13; Shi 4:5-8; 11:8-15.
Kuhengwola Yikuma Yilemu ya mu Mbimbiliya
w04-T 15/9 25 ¶3
Yikuma Yilemu ya Mukanda wa Shimbi Yamuchiali
4:15-20, 23, 24—Amu Zambi akanjishile kuwayila tuponya, shina chinalumbunuka ngwo kutwatambile kupwa ni yizulie yipema yakululieka nayo mu zuwo? Ka. Chuma akanjishile chili wika kulinga tuponya hanga aawayile ni ‘kwavumbika.’ Yisoneko kuyishi kukanjisa kupwa ni yizulie yipema (pinturas artísticas) yakululieka nayo mu zuwo.—1Mi 7:18, 25.
14-20 JUNHO
YIKUMA YILEMU YA MU LIJI LIA ZAMBI | SHIMBI YAMUCHIALI 5-6
“Longesa Ana je Azange Yehova”
w05-T 15/6 20 ¶11
Yisemi, Kwasenu Usoko Wenu ha Yize Unafupiwa
11 Mukanda wa Shimbi Yamuchiali 6:5-7, we wakushindakenya chinji ha chikuma chino. Lisesa azulula Mbimbiliya ye hanga utange versu jino. Hano, yisemi kanaakolweza hanga akolese chitangu ufulielo wo ni zango hali Yehova, ni kupachika maliji jenyi mu mbunge jo. Kashika, yisemi katamba kupwa alongi apema a Liji lia Zambi, kulitanga matangwa eswe ni kupukuna ha yize matanga. Nyi malinga chino, mapwa ni malinjiekela a kunyingika majila a Yehova, shimbi jenyi ni kumuzanga. Yenu munupwa ni yuma yinji yipema yakuhana kuli ana jenu.—Luka 6:45.
w07-T 15/5 15-16
Kuchi Muhasa Kufumba Ana je mu Jila Yipema?
Yuma yize unazange kulinga kulutwe lia matangwa, manyonga je, yitanga ni yize wakuzanga, kuyishi kusoloka wika ha yize wakwamba, alioze ni ha yize wakulinga. (Roma 2:21, 22) Chize ku wanuke, ana kakutala kanawa yize yisemi jo akulinga. Ayo kakumona yuma yize yisemi jo akulemesa chinji, kanji-kanji ni no kakulemesa yuma yacho muze akukola. Nyi wakuzanga chinji Yehova, ana je machimona. Chakutalilaho, nyi wakutanga Mbimbiliya ni kulilongesayo matangwa eswe, ayo mamona ngwo wakuyilemesa. Mamona nawa ngwo, yena wakusa chitangu Wanangana wa Zambi ku mwono we. (Mat 6:33) Kuya ku kukunguluka mashimbu eswe ni kwambujola Wanangana wa Zambi, muchisolola kuli ana je ngwo wakulemesa chinji milimo ya Yehova.—Mat 28:19, 20; Hep 10:24, 25.
w05-T 15/6 21 ¶14
Yisemi, Kwasenu Usoko Wenu ha Yize Unafupiwa
14 Ngwe chize mukanda wa Shimbi Yamuchiali 6:7 unasolola, kuli majila anji waze yisemi mahasa kulongeselamo ana yuma ya ku ufulielo. Muze anayi mu wenyi, analingi milimo ya ku zuwo hamuwika hanji muze anahehe hamuwika, yisemi mahasa kufupa majila akulongeselamo ana jo ku ufulielo. Chino kuchalumbunukine ngwo watamba kutela ana “sango” ja Mbimbiliya mashimbu eswe. Alioze, watamba kusa tachi hanga uhanjike yuma yipema yize muyitakamisa ana ku ufulielo. Chakutalilaho, Despertai! yakuneha yikuma yinji yipema. Yikuma yacho muyihasa kukwasa yisemi hanga ahanjike ni ana hakutwala ku tushitu waze Yehova atangile, yihela yipema ni mianda ni ndako jize atu akwete. Yuma yize mulweza akweze muyihasa kwakwasa hanga apwe ni kutanga mikanda yize ndungo wamwenemwene, wakanyama akutuhwisa.—Matthew 24:45-47.
Kuhengwola Yikuma Yilemu ya mu Mbimbiliya
Chize Apwile ni Kusolola Zango ni Ululi mu Izalele
11 Malongeso: Yehova keshi kutala wika chifwa cha mutu. Iye kakutala chize twapwa muchima, chekwamba mu mbunge yetu. (1 Samue. 16:7) Kukushi manyonga, hanji yitanga yize Yehova keshi kumona. Iye kakumona yuma yacho nawa kakutukolweza tulinge yuma yipema. Alioze kanazange hanga tunyingike ni kwehuka manyonga jetu api, shimbu manyonga jacho kanda achitutwala ku yitanga yipi.—2 Sango 16:9; Mateu 5:27-30.
21-27 JUNHO
YIKUMA YILEMU YA MU LIJI LIA ZAMBI | SHIMBI YAMUCHIALI 7-8
“Kanda Nulimbata No”
w12-T 1/7 29 ¶2
Mumu Liaka Zambi Afupile Hanga Tuvumbi Twenyi Alimbate Wika ni Waze Akumuwayila?
Yehova kanyingikine ngwenyi, Satana kanazange kupiangula atu jenyi hanga awayile tuponya. Kashika, Zambi yatoweza tuvumbi twenyi ngwenyi akwa-mavungu “makahambulwisa ana jenu a malunga kungukaula yami, hanga akavumbike tuzambi tweka.” Yuma yinji te muyihasa kulingiwa ko. Nyi A-Izalele mawayila tuzambi tweka, te kechi kupwa ni ufunge wa Zambi ni utayizo wenyi, hachino, akwa-kole jo te makumba. Nyi che alingile, kuchi te vungu lino mulihasa kusema Mesaya? Kwamba pundu, Satana kazangile kupiangula A-Izalele hanga alimbate ni atu waze te keshi kuwayila Yehova.
w15-T 15/3 30-31
Shina Kumbata Muli “Mwene Wika” Nihindu Chili ni Ulemu?
Yehova kambile ngwenyi, tuvumbi twenyi katamba kumbata muli Mwene wika. Mumu liaka? Mumu iye kananyingika yize yapwa yipema kuli tuvumbi twenyi. Iye kanazange kufunga tuvumbi twenyi hanga ahone kumona lamba mumu lia kukwata chiyulo chipi, nawa kanazange hanga awahilile. Ha matangwa ja Nehemia, muze A-Yunda apwile ni kulimbata ni atu waze te keshi kuwayila Yehova, Nehemia yaakumika ni chilweza chipi cha Solomone. Chipwe ngwe Solomone “Zambi yenyi wamuzangile,” nihindu “mapwo yilambala amuvulumwishine.” (Neh 13:23-26) Kashika Zambi akulweza tuvumbi twenyi hanga alimbate wika ni atu waze akumuwayila mu umwenemwene. (Sam 19:7-10; Iza 48:17, 18) Akwa-Kristu amwenemwene kakusakwilila chinji Zambi ha kwafunga, nawa kakufuliela ha usongwelo wenyi. Amu akuzeyela chiyulo chenyi, ayo kananyingika ngwo iye kali Chitunda wa Mwilu ni Hashi.—Yis 1:5.
w15-T 15/8 26 ¶12
Sakula Kanawa Masepa je ha Matangwa Wano Akusula
12 Kusakula kanawa masepa chili chilemu chinji, chipi-chipi kuli akwa-Kristu twamishi waze anazange kumbata. Usongwelo wa mu Liji lia Zambi uli zwalala ngwo: “Kanda nulilema kanga yimuwika ni waze kafulielele, mumu kutaa chika chiliko hakachi ka ululi ni ungulungulu? Kulifutula chika chiliko hakachi ka pangu ni milima?” (2 Kori. 6:14) Mbimbiliya yinambe hali tuvumbi twa Zambi waze anazange kumbata ngwo, katamba kumbata “muli mwe Mwene wika,” chino chinalumbunuka ngwo, katamba kulimbata ni mutu yoze wakuwayila Yehova, yoze hanalihane ni kumupapachisa, nawa yoze wakutwama kulita ni shimbi ja mu Mbimbiliya. (1 Kori. 7:39) Muze mukwa-Kristu akulimbata ni mutu yoze wakuzanga Yehova, iye kakupwa ni sepa yoze mamukwasa hanga anunge ni kushishika kuli Yehova.
Kuhengwola Yikuma Yilemu ya mu Mbimbiliya
w04-T 1/2 13 ¶4
Yehova Kakutwaha Yize Tunafupiwa Hita Tangwa
4 Mulali uze Yehova apwile ni kuhanyinamo manaa kuli A-Izalele, wapwile ni kusolola ngwo, iye kaso kwaha wika kulia cha ku musunya, alioze kanaalongesa nawa yuma ya ku spiritu. Atu te kakutuhuka hanga akunge “kulia cha tangwa ha tangwa.” Muze atu apwile ni kwanda kulia chinji, chize chapwile ni kusalaho te chakunuka ni kutuhuka mavuno. (Kut 16:4, 20) Alioze chino te chishi kulingiwa ha tangwa liamuchitano muze apwile ni kwanda kulia cha matangwa aali chize te muchinunga ndo ha tangwa lia Sambata. (Kut 16:5, 23, 24) Kashika, kwanda manaa chakwashile A-Izalele hanga amone ulemu wa kwononokena Yehova ni kunyingika ngwo, keshi kutwama ni mwono mumu lia kulia wika, alioze “ku yeswe yinatuhuka mu kanwa lia Yehova.”
28 JUNHO–4 JULHO
YIKUMA YILEMU YA MU LIJI LIA ZAMBI | SHIMBI YAMUCHIALI 9-10
‘Yehova Zambi Yenu Yika Anafupu Kuli Yenu?’
w09-T 1/10 10 ¶3-4
Yika Yehova Anafupu Kuli Yetu?
Yika muyihasa kutukwasa hanga twononokene Zambi ni mbunge yeswe? Mose yatongola chimwe chuma chize muchitukwasa ha kwamba ngwenyi: “Nuvwile woma Yehova Zambi yenu.” (Versu 12) Yino kuyatalile ha woma wa kumona lamba nyi mutwehuka kumwononokena, alioze yinatale ha vumbi hali Zambi ni ha yize akulinga. Nyi mutuvumbika chinji Zambi ni kumulemesa, mutwehuka kulinga yuma yize keshi kuzanga.
Chikuma chika chilemu chize chatamba kututwala twononokene Zambi? Mose yamba ngwenyi: “[Zangenu] nikuvumbika Yehova Zambi yenu ni mbunge jenu jeswe ni alma jenu jeswe.” (Versu 12) Kuzanga Zambi chinalumbunuka yuma yinji, hi wikako chize twakwivwa. Umwe mukanda, unalumbununa chikuma chino ngwo: “Maliji a Hepreu anatale ha chize twakwivwa, mashimbu amwe kakutala ha yitanga yize twakusolola.” Mukanda unowene unambe nawa ngwo, kuzanga Zambi chinalumbunuka “kusolola mu yitanga ngwo twakumuzanga.” Che kwamba, nyi chamwenemwene twakuzanga Zambi, mutulinga yuma yize muyimuvwisa kuwaha.—Yis 27:11.
w09-T 1/10 10 ¶6
Yika Yehova Anafupu Kuli Yetu?
Nyi mutwononokena Zambi ni mbunge yeswe mutuzuka yiwape yinji. Mose kasonekene ngwenyi: Nufunge “maliji a shimbi a Yehova, ni yiyulo yenyi ngunanwambeyo musono, hanga nuwahe.” (Versu 13) Kwamba pundu, shimbi jeswe ja Yehova ni yuma yeswe yize akwita hanga tulinge, yili jila yize akutukwashilamo hanga tuwahilile ku mwono wetu. Chino chinalite, mumu Mbimbiliya yinambe ngwo, “Zambi iye zango.” (1Yo 4:8) Kashika, iye katuhele shimbi hanga jitukwase kuwahilila ku mwono. (Iza 48:17) Kulinga yuma yeswe yize Yehova akutwita muchitukwasa kwehuka yikola yinji haliapwila, nawa muchikatukwasa kuzuka yiwape ya mutolo mu Wanangana wenyi.
cl-T 16 ¶2
Shina Muhasa ‘Kukundama Kuli Zambi’?
2 Kalamba Apalahama, kali umwe wa kuli waze ayukile yiwape ya kukundama kuli Zambi. Yehova kavulukile kalamba yono ngwenyi, “kasendo kami.” (Iza 41:8) Kwamba pundu, Zambi kapwile ni kumumona ngwe sepa lienyi mukolo. Apalahama kapwile ni usepa uno mumu ‘kafulielele Zambi.’ (Tia 2:23) Musono nawa, Yehova kakufupa jila ya ‘kuwahilila’ ni waze akumulingila ni zango. (Shi 10:15) Liji lienyi linatutoweza ngwo: “Kundamenu kuli Zambi, mba iye kumakakundama kuli yenu.” (Tia 4:8) Kwamba pundu, hano Yehova kanatulakenya ni kutusanyika.
Kuhengwola Yikuma Yilemu ya mu Mbimbiliya
it-1-T 127
A-Anake
A-Anake kapwile umwe munyachi wa atu atolomoka waze te atunga ku milundu ya Kanana, ni ku yihela yikwo nawa, chipi-chipi ku Sule. Ha mashimbu amwe kunyima, majina ja malunga alemu atatu a ku munyachi wa A-Anake, te A-Ahimane, A-Sheshai ni A-Talama waze apwile ni kutwama ku Heprone. (Kwa 13:22) Kwenako ngendeshi A-Hepreu 12 amwene A-Anake ha chisuho chitangu, mba ngendeshi kumi yatwala lusango mupi hakutwala ku yize amwene, ni kwamba ngwo, malunga jacho kali “ana ja yindululu” waze atwamine shimbu sanga lia meya te kanda lichiza, nawa ha kulitesa no, A-Hepreu yapwa ngwe “mapasu” kumeso jo.—Kwa 13:28-33; Shi 1:28.