LONGESO 8

Yilweza Yize Yili ni Malongeso Apema

Mateu 13:34, 35

CHIKUMA CHILEMU: Yemesa pande je ni yilweza yashi yize muyikwata atu ku mbunge ni kulongesa yikuma yilemu.

Sakula yilweza yashi. Zachisa yuma yikehe-yikehe ha kulumbununa yuma yinene-yinene, yuma yashi ha kulumbununa yuma yikalu ngwe chize alingile Yesu. Kanda wamba yuma yinji jize muyikalisa chilweza che. Yuma musa mu chilweza che yatamba pundu kukwata ha longeso unahana hanga waze anakupanjika ahone kuyambashana ha chilweza che.

Pwako ni kutala yuma kanawa. Pwako ni kutala ha yitangiwa yize yakujingilika, lilongese mikanda yetu ya Ukristu, ni kupanjika waze akuhanjika pande kanawa. Muze mulinga yino yuma, pwako ni kusonejeka yilweza yize muhasa kuzachisa upemese pande je. Funga yilweza yacho kumwe.
Nyonga ha yize muyikwasa waze anakupanjika. Sakula yilweza yize yinalite ni milimo ni yuma yize azanga chinji waze anakupanjika. Kanda uzachisa yilweza yize muyivwisa atu sonyi hanji kwevwisa kupiha ku mbunge.
Longesa chikuma chilemu. Yilweza muzachisa yatamba kulumbununa yikuma yilemu hi yikuma yikehe-yikehe ko. Kwasa waze anakupanjika akewuluke chilweza chize muhana ni longeso lia chilweza chacho.