LONGESO 53

Sakula Yiheho Yize Yakuvwisa Yehova Kuwaha

Mikanda ya ha mafwo

Yehova kali Zambi ya uwahililo. (1 Timoteu 1:11) Iye kanazange hanga tuwahilile ni kulivwisa kuwaha ku mwono. Kakuwahilila muze twakusa amwe mashimbu hanga tuhwime ni kuheha. Ha longeso lino, mutumona chize mutuhasa kuzachisa kanawa mashimbu jetu a kuhwima ni kuvwisa Yehova kuwaha.

1. Yika twatamba kwiwuluka muze mutusakula yiheho?

Yuma yika wakuzanga kulinga ha mashimbu je a kuhwima? Atu amwe kakuzanga kutwama ku zuwo—ni kutanga umwe mukanda, kupanjika miaso, kutala yinema hanji kuzachisa internet. Eka nawa, kakuzanga kuya ni kuheha ni masepa jo, ni kusana hanji kuta videogame. Yiheho yeswayo yize mutusakula, twatamba kupwa ni shindakenyo ngwetu yiheho yacho ‘yakupemena kuli Mwene.’ (A-Efwesu 5:10) Chili chilemu kunyingika chikuma chino, mumu yiheho yinji musono yakusolola yuma yize Yehova keshi kuzanga—yuma ngwe upupilo, utanji hanji yipanda-panda. (Tanga Samu 11:5.) Yika muyihasa kutukwasa kusakula kanawa yiheho yetu?

Nyi twasakula masepa waze azanga Yehova, o mahasa kutukwasa kusakula yiheho yipema. Ngwe chize tunakalilongesa ha limwe longeso kunyima, “nyi muwenda ni akwa mana ni yena nawa muopwa ni mana.” Alioze, nyi mutu malikata ni atu waze keshi kuzanga shimbi ja Zambi, “kumakevwa kusasaminya.”—Yishima 13:20.

2. Mumu liaka chili chilemu kutala ha mashimbu waze twakuzachisa ni kuheha?

Chipwe ngwe mutusakula yiheho yipema, nihindu twatamba kukanyama ha mashimbu waze mutuzachisa. Mumu nyi ka, mututokesa mashimbu anji chakuhona kulinga yuma yilemu. Mbimbilliya yinatukolweza hanga ‘tukuule we mwaka’ hanji ngwetu, kuzachisa kanawa mashimbu jetu.—Tanga A-Efwesu 5:15, 16.

NYINGIKA NAWA

Nyingika chize muhasa kukwata yiyulo yipema hakutwala ku yiheho.

3. Ehuka yiheho yipi

Mumu liaka twatamba kusakula yiheho yetu ni mana? Tala CHINEMA, mba nushimutwine yihula yino.

CHINEMA: Sakula Yiheho ye ni Mana (4:39)

Kuchi yiheho yize apwile ni kulinga A-Roma yinalifu ni yiheho ya musono?
Kulita ni chinema, yuma yika Danny alilongesa hakutwala ku yiheho?

Tanga A-Roma 12:9 mba nushimutwine chihula chino:

Kuchi versu yino yatamba kukukwasa ha yiheho yize musakula?

Yuma yimwe yika yize Yehova keshi kuzanga? Tanga Yishima 6:16, 17 ni A-Ngalashia 5:19-21. Muze munutanga hita chisoneko, shimutwinenu chihula chino:

Yuma yika anatongola ha yisoneko yino yize yakusoloka chinji mu yiheho musono?

Chize muhasa kusakula yiheho ye ni mana

Lihule ngwe:

Shina mu yiheho yino muli yuma yize Yehova keshi kuzanga?
Shina yakungumbata mashimbu waze natamba kulinga yuma yilemu?
Shina yakungulingisa hanga ngulikate ni atu waze keshi kuzanga Yehova?

Chili chipema kuchina ponde. Kashika twatamba kwehuka yiheho yeswe yize mutumona ngwetu hi yipema ko

Mashinyi kanendela ku sesa lia tapalo mba kanambe kuholokela mu chimbongo.

4. Zachisa mashimbu je ni mana

Tala CHINEMA, mba nushimutwine chihula chinahateho.

CHINEMA: Yuma Yika Yakulia Mashimbu je? (2:45)

Ngwe chize twamona ha chinema, ndumbwetu te keshi kutala yuma yipi. Mba mulonga hali uli?

Tanga A-Fwilipu 1:10, mba nushimutwine chihula chino:

Kuchi chisoneko chino muchihasa kukukwasa kumona mashimbu waze watamba kuzachisa ku yiheho?

5. Sakula yiheho yipema

Chipwe ngwe yiheho yimwe Yehova keshi kuyizanga, nihindu kuli yiheho yipema yize mutuhasa kulinga. Tanga Chilumbununyi 8:15 ni A-Fwilipu 4:8, mba nushimutwine chihula chino:

Yiheho yika yipema yize wakuzanga?

Yizulie: Atu a miaka yalisa kanalivwisa kuwaha ni yiheho yipema. 1. Umwe mwana-pwo kanapanjika miaso aku kanafunjeka. 2. Akweze atatu kanase ndundu. 3. Twanuke aali kanendesa kinga. 4. Umwe kanune kanahehe ni mashinyi a mapaya. 5. Umwe lunga kanembi ngoma. 6. Mwana kanate videogame ni tato. 7. Umwe pwo kanakwata máquina ya kukwata nayo foto. — Muhasa kulivwisa kuwaha ni yiheho yipema

ATU AMWE KAKWAMBA NGWO: “Kukushi mulonga niumwe kuta hanji kutala yiheho ya upupilo, ya utanji hanji ya yipanda-panda, mumu chishi kulinga yuma yacho.”