LONGESO 52
Mumu Liaka Mazalo Jetu ni Chize Twakusoloka Yili Yilemu?
Tulieswe tukwete ulite wakusakula chize mutuzala ni kulilulieka. Alioze nyi mutukaula shimbi ja mu Mbimbiliya, mutuhasa kusakula yuma yize mutuzanga ni kuvwisa Yehova kuwaha. Tuhengwolenu jimwe ja ku shimbi jacho.
1. Shimbi jika jatamba kutusongwela muze mutusakula mazalo ni kulilulieka?
Twatamba kusakula “mazalo aze analite, ni kuhomboka” ni kulilulieka kanawa mu jila yize yinalita ni “uwayilo wa Zambi.” (1 Timoteu 2:9, 10) Tala yiyulo yino yiwana: (1) Mazalo jetu katamba kupwa ‘alita.’ Ngwe chize wakumona ha kukunguluka, atu ja Yehova kakuzanga yuma yalisa. Alioze mazalo ni kuyinda cho cha kambu yakusolola vumbi kuli Zambi yoze akuwayila. (2) Kuzala mazalo ‘ahomboka’, chinalumbunuka kwehuka mazalo waze mahasa kunyongesa akwetu yuma ya utanji hanji kuzala hanga alisolole. (3) Twakusolola “mana” ha kuhona kulanda chuma cheswe muchituhuka hanji kwimbulula kuzala cheswe chize atu akuzala. (4) Kulilulieka chetu chatamba kuvwisa ‘Zambi kuwaha’ hanga tusolole kuli akwetu ngwetu twakuwayila Zambi wamwenemwene.—1 A-Korindu 10:31.
2. Mumu liaka twatamba kunyonga hali mandumbu jetu muze tunasakula mazalo jetu?
Tunanyingika ngwetu tuli ni ulite wakusakula mazalo jetu. Alioze twatamba nawa kwiwuluka ngwetu, kulilulieka chetu muchihasa kupinjisa akwetu. Twakusa tachi hanga tuchine kupinjisa akwetu. Chikwo nawa, tunazange hanga ‘tuvwise enyembo [jetu] kuwaha ni kwalingila yipema mukwakolesa.’—Tanga A-Roma 15:1, 2.
3. Kuchi mulali wetu wa kuzala muuhasa kukwasa atu hanga atayize umwenemwene?
Twakusa tachi hanga tuzale kanawa muze tunayi ni kukunguluka hanji ni kwambujola. Twatamba kupwa ni shindakenyo ngwetu mazalo jetu kechi kupiangula atu ahone kutayiza sango lipema. Mumu kulilulieka chetu muchihasa ‘kuwahisa longeso lia Zambi Chilamwina chetu.’—Titu 2:10.
NYINGIKA NAWA
Tala chize mutuhasa kupwa ni shindakenyo nyi mazalo jetu ni chize twakulilulieka yakutusolola ngwe akwa-Kristu.
Mazalo jetu mahasa kusolola nyi twakuvumbika manguvulu nyi ka. Chipwe ngwe Yehova kakulihulikila ha chize twapwa mu mbunge, nihindu mazalo jetu mahasa kusolola vumbi hali iye
4. Kulilulieka kanawa chakusolola vumbi kuli Yehova
Chuma chika chahiana ulemu chize twatamba kuliluliekela kanawa? Tanga Samu 47:2, mba nushimutwine yihula yino:
Nyi twanyingika ngwetu mazalo jetu ni chize twakulilulieka yakukwata ha chize Yehova akutumona, yiyulo yika mutukwata?
Ku nyonga lie, shina chili chilemu kulianga kunyonga ha yize mutuzala muze tunayi ni kukunguluka hanji mu munda? Mumu liaka wakumbulula chocho?
5. Chize mutuhasa kulilulieka kanawa ni kusakula mazalo jetu
Mazalo jetu mahasa kufwika ndando yinji hanji ka, chipwe chocho katamba kupwa alinanga kulita ni homa haze tuli hanji yuma yize tunalingi. Tanga 1 A-Korindu 10:24 ni 1 Timoteu 2:9, 10, mba nushimutwine mumu liaka twatamba kwehuka mazalo waze . . .
kalitele ni kuze tuli.
alipola, akusolola yihanda yimwe ya mujimba, hanji waze akulingisa atu akwo hanga apwe ni manyonga a utanji.
Akwa-Kristu keshi nawa mushi lia shimbi ya Mose, alioze mahasa kulilongesa yuma yinji hakutwala ku chize Yehova akunyonga. Tanga Shimbi Yamuchiali 22:5, mba nushimutwine chihula chino:
Mumu liaka twatamba kwehuka kuzala mazalo waze akusolola malunga ngwe mapwo, mapwo ngwe malunga?
Tanga 1 A-Korindu 10:32, 33 ni 1 Yoano 2:15, 16, mba nushimutwine yihula yino:
Mumu liaka chili chilemu kunyingika nyi kuzala chetu chakupinjisa akwetu ha mukala haze twatwama hanji mu chikungulwila?
Mulali uka wa kuzala ni kulilulieka uze wakusoloka chinji kuze watwama?
Ku nyonga lie, shina mianda yimwe yakuzala muyihasa kupwa yipi kuli mukwa-Kristu? Mumu liaka wamba chocho?
Mutuhasa kuzala mazalo alisa kulita ni kuze twatwama aku nawa tunavwisa Yehova kuwaha
ATU AMWE KAKWAMBA NGWO: “Ami nguli ni ulite wa kuzala cheswacho munguzanga.”
Shina nyonga lino linalite? Mumu liaka wamba chocho?
YIZE WALILONGESA
Muze twakusakula kanawa mazalo jetu ni kulilulieka kanawa, twakusolola vumbi kuli Yehova ni kuli akwetu.
Kuhitulula
Mumu liaka mazalo jetu ni chize twakulilulieka yili yilemu kuli Yehova?
Shimbi jika ja mu Mbimbiliya jize mujihasa kutusongwela hakutwala ku mazalo jetu?
Kuchi kulilulieka chetu muchihasa kukwata ha chize akwetu mamona umwenemwene wa mu Mbimbiliya?
HENGWOLA NAWA
Nyonga nyi mazalo je kakupinjisa akwenu nyi ka.
“Yika Mazalo je Akusolola Hali Yena?” (Lusango wa ha internet)
Nyingika mumu liaka chili chipema kunyonga shimbu kanda uchilisoneka ha mujimba.
“Yika Mbimbiliya Yakwamba Ha Kulichata Hanji Kulisoneka ha Mujimba?” (Lusango wa ha internet)
Nyingika shimbi jikwo jize mujihasa kukusongwela.
“Shina Mazalo Je Kakuhana Uhenya Kuli Zambi?” (Kaposhi wa Kutalila wa Setembro, 2016)
Kuchi umwe pwo wa mbunge yipema ahashile kupwa ni nyonga lialita hakutwala ku mazalo ni kulilulieka?
“Mazalo ni Kulilulieka Chami Yapwile ni Kuhukanyisa Akwetu” (Laulenu!, 22 wa Dezembro, 2003)