Hulda Kawanyine Yize Afupile

NYI ngwe wamenekene tungu lia Sangir Besar mu Indonésia ha yimwe miaka kunyima, kachi wamwene mapangi jetu atatu ku ngenge ya kalunga-lwiji. Ayo kaanyingika kanawa ha tungu liacho, mumu lia mulimo uze akulinga wa kukwasa atu kunyingika Mbimbiliya. Alioze ha shimbu lize twatongola, ayo kapwile ni kulinga mulimo walisa.

Ayo te kakunjila mu meya ni kwanda mawe alemu ni kwasa hatunda. Mawe jacho, amwe kapwile anene-anene ngwe ndundu ya konda. Hanyima, matwama ha mashiki ni kupalula mawe jacho mu yihanda yikehe-yikehe ngwe chize apwa monda a tusumbi. Muze mahwisa, masa mawe jacho mu yimwe yikashi ni kwatwala ku zuwo. Kusongo, masa mawe jacho mu saku jinene-jinene ni kujisa mu mashinyi hanga aye ni kwalingila tapalo.

Hulda kapwile hakachi ka mapangi jacho. Iye kapwile ni mashimbu a kulinga mulimo wacho kuhiana akwo. Mbongo jize apwile ni kuzukako te kakujilanda yuma yize anafupiwa mu usoko. Alioze, ha shimbu liacho yapwa ni nyonga lieka. Yazanga kulanda tablet hanga apwe ni kunjila mu JW Library^®. Hulda kanyingikine ngwenyi, yinema ni yikwata yeswe yize yili mu aplicativo yacho te muyimukwasa chinji mu munda ni ha longeso lia wika.

Hulda yakalakala maola aali ha hita chimene mu kakweji umuwika ni ndambu, hanga apalule mawe anji ni kuzalisa mashinyi akehe. Chocho, yapwa ni mbongo jakumbana jakulanda najo tablet.

Hulda yamba ngwenyi: “Chipwe ngwe napwile ni kuhonga ni kwivwa yikola yinji mumu lia kupalula mawe, nihindu muze naputukile kuzachisa tablet yinguvulama yikola yacho ha shimbu likehe wika. Chikwo nawa, tablet yakungukwasa mu munda ni kululieka kukunguluka mu jila yashi.” Iye yamba nawa ngwenyi, tablet yangukwashile ku uputukilo wa COVID-19, muze yuma yeswe twapwile ni kuyilingila ha internet. Ni yetu tunawahilila chinji ha chize Hulda awana yize afupile.