Mumu Liaka Yela ja Yehova Akwiwuluka Chiwanyino cha Mwene cha Ufuku mu Jila Yalisa?

Twakukaula shimbi ja mu Mbimbiliya ha kulinga Chiwanyino cha Mwene cha Ufuku hanji ngwetu, Chiwanyino cha Kwiwuluka Kufwa cha Yesu. Kakuchivuluka nawa ngwo, “Seya Yakasula” hanji “Santa Seya.” (1 A-Korindu 11:20) Alioze yuma yize mayingeleja anji akulinga ha mashimbu jacho kuyishi kulita ni yize Mbimbiliya yakulongesa.

Mumu liaka twakwiwuluka chiwanyino chacho?

Twakwiwuluka chiwanyino chacho hanga twiwuluke Yesu ni kusakwilila ha chitapo cha ukuule hali yetu. (Mateu 20:28; 1 A-Korindu 11:24) Chiwanyino chacho kuchalumbunukine (sacramento) upapachiso hanji ngwetu yitanga yize akwa-mayingeleja akulinga hanga ngwo apwe ni utayizo wa Zambi hanji kwakonekena shili yo.a Mbimbiliya yakulongesa ngwo, shili yetu mahasa kuyikonekena wika kupalikila mu ufulielo wetu kuli Yetu, hi mumu lia chimwe chiwanyino ko chize mahasa kulinga mu yingeleja.—A-Roma 3:25; 1 Yoano 2:1, 2.

Ha yisuho yingahi twatamba kulinga chiwanyino chacho?

Yesu kambile ngwenyi tumbaji twenyi katamba kwiwuluka Chiwanyino cha Mwene cha Ufuku, alioze kakalwezele yisuho yize atamba kuchilinga. (Luka 22:19) Atu anji kakunyonga ngwe katamba kulinga Chiwanyino chacho ha hita kakweji; eka kakunyonga ngwe katamba kuchilinga kamuwika ha poso, tangwa ha tangwa hanji ngwo ha yisuho yinji ha tangwa. Akwo nawa kakwamba ngwo, hita mutu mahasa kusakula mwene yisuho yize malinga Chiwanyino cha Mwene cha Ufuku.b Alioze kuli yuma yimwe yize twatamba kunyingika.

Yesu kalingile Chiwanyino cha Mwene cha Ufuku ha tangwa lizeliene A-Yunda alingile Chizomboka, ha tangwa liacho nawa lie afwile. (Mateu 26:1, 2) Chino kuchakalingiwile chamulingiwila. Mbimbiliya yakutesa chitapo cha Yesu ni chitapo cha mwana-panga. (1 A-Korindu 5:7, 8) Chizomboka kapwile ni kuchilinga kamuwika ha mwaka. (Kutuhuka 12:1-6; Ulevi 23:5) Chizechene nawa, akwa-Kristu ku sekulu yitangu kapwile ni kulinga Chiwanyino cha Kwiwuluka Kufwa cha Yesu kamuwika ha mwaka.c Ni musono nawa, Yela ja Yehova kakukaula chilweza chacho chakatuka mu Mbimbiliya.

Ha tangwa lika ni ola yize chiwanyino chacho chakulingiwa?

Kushimutwina yuma yize Yesu alingile ha Chiwanyino, kuchichi kutukwasa wika kunyingika yisuho yize chakulingiwa alioze mutunyingika nawa tangwa ni ola yize chiwanyino chacho chatamba kulingiwa. Iye kalingile Chiwanyino cha Mwene cha Ufuku ha kunjila cha tangwa, ha tangwa 14 ya Nisane wa mwaka 33 M.J. kulita ni calendário lunar wa mu Mbimbiliya. (Mateu 26:18-20, 26) Yetu twakwimbulula akwa-Kristu atangu ha kwiwuluka kufwa cha Yesu kamuwika ha mwaka ni tangwa lizeliene.d

Tangwa 14 lia Nisane wa mwaka 33 liapwile liamatano, alioze kulita ni calendário wetu musono, tangwa lino hita mwaka mulihasa kupwa ha tangwa lialisa ha poso. Twakukaula mutapu uze apwile ni kulinga ha matangwa ja Yesu mba tuhase kunyingika tangwa lize mulipwa 14 ya Nisane. Kutushi kukaula calendário wa A-Yunda musono.e

Mbolo ni vinyu

Chiwanyino chize Yesu alingile, iye kazachishile mbolo kuyishi futunwiso ni vinyu tinto yize yasalile ha Chizomboka. (Mateu 26:26-28) Ni yetu twakukaula chilweza chenyi. Twakuzachisa mbolo kuyishi futunwiso kutushi kuwezako milungo niyimwe. Hakutwala ku vinyu, twakuzachisa tinto yipema, hi sumu ya uvwa ko ya kusa suka hanji walwa ukwo weka.

Mayingeleja amwe kakuzachisa mbolo yakusa futunwiso, alioze kulita ni Mbimbiliya, futunwiso muyihasa kulumbunuka shili. (Luka 12:1; 1 A-Korindu 5:6-8; A-Ngalashia 5:7-9) Kashika, mbolo yize kuyishi futunwiso hanji milungo yikwo, muyihasa kulumbunuka mujimba ungunu wa Kristu uze kuushi shili. (1 Petulu 2:22) Chuma chikwo chize Mbimbiliya kuyishi kutayiza, chili kusalakanyisa sumu ya uvwa yize kuyishi futunwiso mu chihela cha vinyu. Mayingeleja amwe kakulinga chino mumu kakukanjisa atu kunwa walwa. Alioze Mbimbiliya kuyishi kukanjisa kunwa walwa.—1 Timoteu 5:23.

Mbolo ni vinyu yili wika yilayi

Mbolo kuyishi futunwiso ni vinyu yize twakuzachisa ha Chiwanyino cha Kwiwuluka Kufwa cha Yesu, yapwa wika yilayi ya mujimba ni manyinga a Yesu. Kukushi kulingiwa nichimwe chikomokeso chize chakwalumuna yilayi yacho hanga yipwe lume mujimba hanji manyinga a Yesu, ngwe chize atu amwe akunyonga. Tala yize Mbimbiliya yakulongesa ha chikuma chino.

• Yesu kakatumine hanga tumbaji twenyi anwe manyinga jenyi. Mumu iye kananyingika kanawa shimbi ya Zambi yize yakukanjisa kulia manyinga. Mumu manyinga kapwa asandu. (Uputukilo 9:4; Yilinga 15:28, 29) Kwamba pundu, Yesu kechi keza kakolweza mutu hanga ehuke shimbi ya Zambi.—Yoano 8:28, 29.

• Apostolo a Yesu te kechi kuhasa kunwa manyinga a Yesu mumu iye te uchili ni mwono. Manyinga jenyi te kanda achimwangana.—Mateu 26:28.

• Chitapo cha ukuule wa Yesu kachihanyine “kamuwika ha kumanunuka cha miaka.” (A-Hepreu 9:25, 26) Nyi ngwe mbolo ni vinyu yize twakuzachisa ha Chiwanyino cha Mwene cha Ufuku yapwa lume mujimba ni manyinga a Yesu, chekwamba ngwo atu waze akupwa ha chiwanyinyo chacho kakufunyena chitapo chenyi, hanji ngwetu kakumwanga cheka manyinga jenyi.

• Yesu kambile ngwenyi: “Lingenu chino nikungwiwuluka.” Alioze, kakambile ngwenyi: “Lingenu chino hanga nukafunyene chitapo chami, ka.”—1 A-Korindu 11:24.

Atu amwe kakutayiza nyonga lia kwamba ngwo, mbolo ni vinyu yakwalumuka mujimba ni manyinga a Yesu. O kakulikwachilila ha chize versu jimwe ja mu Mbimbiliya japwile kulumbununa. Chakutalilaho, Mbimbiliya jinji jakulumbununa maliji a Yesu waze ali ha Mateu 26:28, ngwo: “Wano kali manyinga jami,” alioze maliji wano mahasa kwalumbununa nawa ngwo: “Musenge unu unalumbunuka manyinga jami.”f Hano Yesu kazachishile chishima, hanji ngwetu katesele yuma yacho ngwe chize apwile ni kulinga ha malongeso jenyi.—Mateu 13:34, 35.

Iya wakulia mbolo ni kunwa vinyu?

Muze Yela ja Yehova akulinga Chiwanyino cha Mwene cha Ufuku, atu akehe akulia yilayi hanji ngwetu akulia mbolo ni kunwa vinyu. Mumu liaka?

Manyinga a Yesu waze amwangine kalingile no “usendo waha” uze wasalakanyine ha usendo uze Yehova Zambi alingile ni vungu lia A-Izalele. (A-Hepreu 8:10-13) Atu waze ali mukachi ka usendo wacho waha, e akulia mbolo ni kunwa vinyu ha Chiwanyino cha Mwene cha Ufuku. Chizavu chacho hi akwa-Kristu eswe ko, alioze waze wika “hanaatambika” kuli Zambi mu jila yalipwila. (A-Hepreu 9:15; Luka 22:20) Atu jacho maakayula hamwe ni Kristu mu malilu. Mbimbiliya yakwamba ngwo atu jacho kali 144,000.—Luka 22:28-30; Usolwelo 5:9, 10; 14:1, 3.