MUHASA KUTEPULULA KUSAKALALA

Kusakalala Yika Chinalumbunuka?

Kusakalala chili kuhonga ku mujimba mumu lia ponde hanji chuma chikwo. Wongo wakutuma sango ku mujimba hanga utusule hormônio jinji. Hormônio jacho yakwalumuna kukalakala cha manyinga ni kuhwima, jakuwezela kulilambila cha mbunge ni kukalisa mijipa ni misunya ya mujimba wa mutu. Shimbu kanda unyingika yize yinalingiwa haze uli, mujimba wene wakulinga yuma yino hanga ukutoweze. Muze ponde yakupalika mujimba wakuhiluka ngwe chize wapwanga ni kukalakala kanawa.

UPEME NI UPI WA KUSAKALALA

Kusakalala hi chipi ko mumu chakutwala mujimba we hanga ulinge yimwe muze unalipikala hanji muze mukusoloka ponde. Kusakalala chakuputukila mu wongo. Upeme wa kusakalala uli ngwo, chakwecha kulinga yuma ni kawashi. Nyi musakalala yimwe ndambu, chino muchikukwasa kulinga yize hiunatese ni kwanda nota jipema ha cheseko ku shikola, muze anakwihujola hakutwala ku mulimo ni muze mulinga yiheho.

Alioze, nyi musakalala mashimbu eswe hanji chinji kuhiana, muchihasa kukunehena misongo. Nyi mashimbu eswe uli mbunge “helu-helu,” muhasa kuyiza, kwivwa-vwa uli hanji chinyengo ni kuyiza yikola ya mutwe. Yitanga ye ni chize wakutwama ni akwenu muyalumuka. Kusakalala cha mutapu au chakutwala atu apwe yizengi, kunwa droga, kunwa yitumbo chamunwina, kulia chinji, kushipa makanya ni yuma yikwo yipi. Muchihasa nawa kutwala mutu kulivutula ni kawashi, kulema ku mbunge (depressão), kulivwa ukawenyi ni kupwa lume ni nyonga lia kulishiha.

Chipwe ngwe kusakalala kuchishi kukwata hali atu eswe mu mutapu umuwika, nihindu muchihasa kuneha misongo yinji. Muchihasa nawa kupihisa mujimba wa mutu.

CHIZE KUSAKALALA CHAKUKWATA KU MU MUJIMBA WE

Wongo.

Wongo we wakutusula hormônio yize avuluka ngwo cortisol ni adrenalina. Hormônio jacho yakuwezela kupupula cha mbunge, kukalakala cha manyinga ni kuwezela hanji kutepulula suka mu manyinga; ni kutwala mujimba wene hanga utume sango ni kawashi muze mupwa mu ponde. Kusakalala chinji muchihasa kutwala mutu

kulivutula ni kawashi, kuyiza yikola ya mutwe, kulipikala, kulema ku mbunge ni kuhona kupomba kanawa

Mijipa, misunya ni yifwaha.

tundendefu je kakukala hanga uhone kulemana. Kusakalala chinji muchihasa kutwala mutu

kupwa ni yikatalo mu mujimba, kuyiza mutwe ni kuyiza mujimba weswe

Yihanda ya mujimba yize yakukwasa kuhwima.

Kuhwima che chakukalakala kawashi-washi hanga utambule mwiku unji. Kusakalala chinji muchihasa kutwala mutu

ahwime kafuji-fuji hanji ahone kuhwima kanawa ni kuputuka kwivwa-vwa woma

Mbunge.

Mbunge ye muyipipa kawashi-washi hanga yitwale manyinga mu mujimba. Mijipa yize yinapalika manyinga muyitohwa hanji kuzala mumu lia manyinga anji waze anapalikamo. Chakutalilaho, ngwe ya tundendefu. Kusakalala chinji muchihasa kutwala mutu

apwe ni musongo wa mbunge, kusasaminya ku mbunge ni yikola ya wongo (AVC)

Yihanda ya mujimba yize yakutuhwisa hormônio.

Yihanda ya mujimba yize yakutuhwisa hormônio, yakutuhwisa hormônio avuluka ngwo adrenalina ni cortisol jize jakukwasa mujimba ulinge yimwe muze unasakalala. Liayi liakuwezela suka mu manyinga hanga upwe ni tachi jinji. Kusakalala chinji muchihasa kutwala mutu

apwe ni musongo wa diabete, kuhwisa mujimba tachi jize jakulimika ni misongo, kwalumuka cha yitanga ni kutohwa cha mujimba

Lufu ni mijingwa.

Yuma ya kulia kuyichi kupalika kanawa mu mujimba we. Kusakalala chinji muchihasa kutwala mutu

apwe ni nyonga lia kusaza, kusaza-saza, kulokoka mu jimo ni kupinda ha kupihisa

Yihanda ya kusemena.

Kusakalala muchihasa kutepulula usolo wa kulisumbakenya. Kusakalala chinji muchihasa kutwala mutu

nyi wa lunga, kuhona tachi jakulisumbakenya hanji kulimona ni pwo, nyi wa pwo kusoloka manyinga ha kakweji muchalumuka