Mumu Liaka Musono Atu Keshi Kuvumbika Akwo?

**MUMU LIAKA CHILI CHILEMU KUVUMBIKA AKWETU?**

Kuvumbika akwetu chakutepulula utenu nawa chakukwasa hanga kapinda achine kwoka.

Chimwe chishima cha mu Mbimbiliya chakwamba ngwo, “Kumbululo lia vumbi kuliakuchinda ufwatulo; alioze liji lisasu kuliakusangumuna utenu.” (Yishima 15:1) Kuhona akwetu vumbi ha yize mutulinga hanji mutwamba, kanji-kanji yakwokesa wika uli ni kuneha kapinda munji.
Yesu kambile ngwenyi, “Kanwa liakuhanjika yize yinalumbama mu mbunge.” (Mateu 12:34) Muze twakuhona akwetu vumbi, twakusolola nyonga lipi hakutwala kuli akwetu waze alisa ni yetu hamukunda wa chikowa, munyachi, chifuchi hanji mumu lia mbongo jize akwete.

Akwa-mana kahulile atu kuhiana 32,000 a mu yifuchi 28. Anji a kuli ayo kambile ngwo, atu anji musono katwamine ni yitanga yipema chipwe ni vumbi ngwe chize apwile ku mashimbu akunyima.

YIZE MUHASA KULINGA

Chipwe muze uli ku shikola hanji ku mulimo, vumbika atu eswe, chipwe ngwe walisa no. Lihulikile ha yuma yize yenweswe nwakutayiza. Chino muchikukwasa kwehuka kupwa mutu mukalu hanji kupatwila akwenu.

“Kanda nupatwila akwenu, hanga ni yenu ahone kunupatwila.”—Mateu 7:1.

Lingila akwenu yuma yize unazange hanga akulingile Nyi walihulumba hali akwenu ni kwalingila yuma yipema, muchipwa chashi kuli ayo kukulingila yuma yipema.

“Chuma chize nunazange hanga akwenu alinge hali yenu, ni yenu chilingenu hali ayo.”—Luka 6:31.

Pwako mukwa-kukonekena. Lihumikize chipwe muze akwenu mahengesa, ni kwecha kulihulikila ha upi uze akulingile.

“Malinjekela kakupwisa mutu makoke kutenuka; chapwa ulemu kuli iye kuzomboka utanguko.”—Yishima 19:11.

Mu Zuwo lia Wanangana lia Yela ja Yehova muze kukunguluka kanda chiputuka. Atu a miaka ni yihela yalisa kanalimeneka umwe ni mukwo ni chiseke.

YUMA YIZE TUNALINGI

Yela ja Yehova kakusolwela vumbi akwo ku yihela kuze atwama ni kuze akukalakalila.

Twakulongesa atu eswe Mbimbiliya chawana alioze kutushi kushinjila atu kutayiza manyonga jetu hanji yuma yize twakufuliela. Shimbu tuchilinge, twakukaula chiyulo cha mu Mbimbiliya cha kulianyina ni akwetu sango jipema “ni kulihumikiza cheswe ni vumbi linji.”—1 Petulu 3:15; 2 Timoteu 2:24.

Twakwehuka kusolola katonde chikwo nawa, twakutambwisa atu a ku minyachi yeswe waze akwiza ha kukunguluka chetu anazange kulilongesa Mbimbiliya. Yetu twakusa tachi hanga tulihumikize ni ‘kulemesa atu a mutapu weswe.’—1 Petulu 2:17.

Twakuvumbika chiyulo cha manguvulu kuze twatwama. (A-Roma 13:1) Twakwononokena shimbi ya mu chifuchi ni kufweta lijimu. Kashika, chipwe ngwe twakwehuka kulinjisa mu yuma ya mafwefwe, nihindu twakuvumbika ulite wa akwetu wa kukwata yiyulo yo hakutwala ku yuma ya mafwefwe.