YIZE MUYIKUKWASA MUZE NDANDO YA YUMA MUYINYINA

Funga Falanga je ni Mana

Kwoka cha ndando chakukwata hali atu eswe. Kashika kanda unyonga ngwo, yena wika unapalika mu yuma yacho. Kuli yuma yize muhasa kulinga hanga ululieke kapinda we.

TAYIZA NGWE YUMA YALUMUKA

Nyi kuwanyingikine chize mufunga falanga je, muhasa kujikisa, chino muchihasa kukutwala ulipikale ni kusakalala. Chipwe ngwe kuushi falanga jinji, nihindu kuli yuma yeka ni yeka yize muhasa kulinga hanga ujifunge.

YIZE MUHASA KULINGA

Kanda ulanda yuma chamulanjila. Kulinga chino, muchikukwasa ufunge kanawa falanga je ni kupwa ni uhashi wa kufweta yuma yize muyilingiwa susumuku ku mwono we.

Nyi wasoneka falanga jize wakutambula ni jize wakulanda najo yuma, muchikukwasa kuhona kulanda yuma chamulanjila. Muze unasoneka unji wa falanga jize uli najo, hengwola kanawa yuma yize unafupu. Kulutwe, sako tachi hanga ukaule katalilo yoze walinga ni kwijilila muze ndando ya yuma muyalumuka. Nyi hiunambata, chitangu hanjika ni yoze walimbata nenyi hanga numone yize munulinga.

Eseka kulinga chino: Shimbu ulande yuma ni kartau wa crédito hanji kutambula kongo, nyi uli ni uhashi yifwete ha shimbu lizeliene. Atu amwe kakunyonga ngwo, kulanda yuma mu jila yino, chakwakwasa kufunga falanga ni kwehuka makongo. Muhasa nawa kusa mashimbu hanga utale falanga jize uli najo ni jize watuhwisa mu kakweji. Muze munyingika unji wa falanga jize uli najo, muchikukwasa uhone kusakalala.

Muchihasa kupwa chikalu kuhona kutuhwisa falanga jinji, alioze kupwa ni katalilo mupema muchikukwasa chinji.

‘Alula ndando.’—Luka 14:28.

Sako tachi hanga ufunge mulimo we. Yuma yika watamba kulinga hanga ufunge mulimo we? Muhasa kukaula yikuma yino: Pwako ni kuheta ha shimbu. Pwako ni nyonga lialita hakutwala ku mulimo we. Pwako ni kufupa majila a kulihana ni kukalakala chinji. Pwako ni kusolola vumbi. Kaula kanawa usongwelo wa ku mulimo ni kusa tachi hanga ululieke utotombo we.

Ehuka kukisa falanga. Lihule ngwe, ‘Shina ngukwete chako chakukisa falanga?’ Ngwe chilweza, atu anji kakukisa falanga jize akuwana ku matukuta jo ha kunwa droga, kuta yiheho ya mbongo, kunwa makanya, hanji kunwa walwa unji. Yitanga yino muyihasa kupihisa mujimba wa mutu ni kumutwala atokese mulimo wenyi.

“Kawaha yoze mawana mana . . . Mumu kufumbuka chawo chahiana kufumba cheswe cha prata.”—Yishima 3:13, 14.

Funga falanga jize mujikukwasa kulutwe. Nyi uli ni uhashi, funga jimwe falanga jize mujikukwasa muze mukulingiwa yuma ya susumuku. Falanga jacho, mujihasa kukwasa yena hanji umwe mu usoko we muze mayiza susumuku hanji matokesa mulimo, chipwe lume muze mukulingiwa yuma yize kunushi ni kushimbwila.

“Luyinda kakwiza kuli mutu mweswe susumuku.”—Chilumbununyi 9:11.

Yikuma Yize Muyikukwasa Kufunga Falanga

Teleka kulia chenu ku zuwo.

Kuya chinji ni kulanda kulia ku yihela kuze akulanjishila kulia ni kulanda walwa, muchihasa kufwika mbongo jinji. Chipwe ngwe watamba kusa mashimbu ni tachi mba uteleke kulia chenu, nihindu chino muchikukwasa kufunga falanga. Muchikukwasa nawa kusakula kanawa yuma yize munulia.

Landa yuma ni mana.

Linga katalilo wa yuma yize mulanda ni kumukaula. Kanda ulanda yuma chamulanjila.
Fupa yuma yize yili ni ndando yipema, yinalite ni falanga jize uli najo. Chikwo nawa, nyingika kufunga yuma yize yakupiha ni kawashi hanga uhone kukisa falanga.
Landa yuma yize yili ni ndando yikepe nyi yichili kanawa.
Nyi uli ni uhashi, lanjila yuma ha internet yize yili ni ndando yashi ni kwehuka kulanda yuma yize kuwatesele hanga ufunge kanawa falanga. Nyi ku chihela kuze watwama chakupwa chashi kulanjila yuma ha internet, shina muhasa kuchilinga?
Fupa kulanda yuma yize mahasa kutepulula ndando. Tesa ndando ya yuma, kuchingako falanga jize wakufweta ku kahia ka zembwe ni ku yuma yikwo nawa.

Nyonga kanawa shimbu kanda uchilanda yuma yaha.

Atu waze akulinga telefone ni yuma yikwo, kanji-kanji kakulinga yuma yacho yaha hanga azuke falanga jinji. Kashika, lihule ngwe: ‘Shina chuma chino ngunambe kulanda chinahiane chuma chize nguli nacho? Shina natamba kuchilanda lume? Kutala ngunazange lume kusalakanyisa chuma chize nguli nacho ni chino chaha?’

Funga kanawa yuma yize uli nayo hanga yishimbule chinji.

Funga kanawa yuma yize uli nayo ni kuyilulieka muze muyipihia. Chikwo nawa, muhasa kulanda yuma yikulu yize yichili kanawa.

Lima kulia che.

Shina uli ni chimwe chihela chize muhasa kulima? Nyi wachilinga, kuuchi kutuhwisa falanga jinji ja kulanda kulia, nawa muhasa kulanjisa kulia chacho hanji kulianyinacho ni akwenu.

“Manyonga a yipalakata katwala ku kulumbama wika.”—Yishima 21:5.

“Twakuhengwola kanawa ndando ya yuma yize twakulanda tangwa ha tangwa ni kukalakalisa kanawa kartau wetu wa crédito.”—Miles, Inglaterra.

“Shimbu kanda tuchiya ni kulanda yuma, yami ni usoko wami twakulinga katalilo wa yuma yize mutufupa.”—Jeremy, Estados Unidos.

“Twakununga ni kuhengwola hanga tunyingike nyi mutuhasa kufweta yuma yize tunazange kulanda, nawa twakutulika falanga jize mujitukwasa muze mukulingiwa yuma ya susumuku.”—Yael, Israel.

“Twakulongesa ana jetu kululieka yuma muze muyipihia chakuhona kulanda yaha. Chino chinachingi mashinyi ni yikwata yetu ya mu zuwo. Chikwo nawa, yami ni mukwetu pwo, twakusa tachi hanga tuhone kulanda yuma yaha yize yinatuhuka.—Jeffrey, Estados Unidos.

“Natepulwile yuma yize nakulanda ha kulima mafwo ni kupita tusumbi. Chino chakungukwasa kulianyina ni akwetu yuma yize nakulima.”—Hono, Mianmar.