YIZE MUYIKUKWASA MUZE NDANDO YA YUMA MUYINYINA

Pwako Chihanyi

Nyi unalipikala chinji ha kwoka cha ndando ya yuma, muchihasa kukupwila chikalu kupwa chihanyi. Alioze kupwa chihanyi, muchikukwasa ukumbe kanawa kapinda wa falanga. Nyingika ngwe, muhasa kupwa chihanyi aku nawa unafungu falanga.

TAYIZA NGWE YUMA YALUMUKA

Kulianyina ni akwetu chipwe lume yuma yikehe-yikehe, muchitukwasa kuwahilila ni kulivwa kanawa. Akwa-kuhengwola amwe kakwamba ngwo, kuhana yuma kuli akwetu muchihasa kutukwasa ku mujimba ni ku manyonga. Ngwe chilweza, muchihasa kutepulula kulipikala, kusakalala, yikola ya mbunge ni yikola yikwo nawa. Muchihasa nawa kutukwasa kupomba kanawa.

“Kuhana chakuneha uwahililo unji kuhiana kutambula.”—Yilinga 20:35.

Nyi mutuhana akwetu falanga hanji yuma yikwo, muchihasa kupwa chashi kuli yetu kutayiza ukwaso muze mutuufupa. Howard, yoze watwama mu Inglaterra, yamba ngwenyi: “Muze twakufupa majila akupwilamo yihanyi ni kukwasa akwetu, yami ni mukwetu-pwo kutushi kwivwa sonyi jakutambula ukwaso uze akwetu akutwaha.” Tunanyingika ngwetu, atu waze akuhana ni mbunge yimuwika, keshi kushimbwila hanga akwo aafunyishine yize o akwaha. Alioze, o kakuzuka masepa amwenemwene waze akulihana ene hanga aakwase ha mashimbu waze anafupu ukwaso.

“Pwenu ni kuhana, mba ni yenu makanwaha.”—Luka 6:38.

YIZE MUHASA KULINGA

Lianyine ni akwenu yize uli nayo. Chipwe ngwe kuushi ni yuma yinji, nihindu muhasa kulianyina ni akwenu yize uli nayo, chipwe lume kulia chikehe. Duncan ni usoko wenyi waze atwama mu Uganda, kali kwo yiswale, chipwe chocho, kapwa chinji yihanyi. Duncan yamba ngwenyi: “Liayenga ya poso ni poso, yami ni mukwetu-pwo twakusanyika umwe ku zuwo lietu hanga tulie nenyi hamuwika. Twakuwahilila chinji ha kupalikisa mashimbu hamwe ni akwetu.”

Ewa, muze unahane yuma kuli akwenu, watamba kupwa ni nyonga lialita. Kulinga chino, muchikukwasa uchine kuhana yuma chamuhanyina ni kuhichika asoko je mokomoko.—Yombi 17:5.

Eseka kulinga chino: Muhasa kuhana kuli umwe yuma ya kulia hanji ya kunwa. Nyi uli ni yuma yize kuushi kukalakalisa nawa, muhasa kuyihana kuli masepa, enyembo ni kuli atu akwo waze anayifupu.

Hana mu majila akwo: Yawana yimwe yipema kuyishi kufwika falanga. Ngwe chilweza, mutuhasa kuhana mashimbu jetu ni kulihana hanga tukwase akwetu ha yize anafupu. Mutuhasa nawa kwasonekena amwe maliji apema hanji kwalweza ngwo, twakwazanga ni kwalemesa.

Eseka kulinga chino: Lihane hanga ukwase akwenu ha milimo yize ali nayo ku mazuwo jo. Muhasa kusonekena sepa lie mukanda hanji kumutumina mesage ni kumulweza wika ngwe wamwiuluka.

Nyi wapwa chihanyi, muwahilila chinji ku mwono ni kuzuka yiwape.

“Kanda nuvulama kulinga yuma yipema, ni kulitetela ni akwenu yize nuli nayo.”—A-Hepreu 13:16.