Yetwe tushi ni ngana mu ululikiso wetu yoze twakufuta. Muze chikungulwila cha akwa Kristu atangu chaputukile, ayo te kakusakula tulayi ajama “hanga afunge chikungulwila cha Zambi.” (Yilinga 20:28) Makulwana wano a chikungulwila kali malunga akolo mu spiritu waze anasongwela chikungulwila ni kuchifunga, ‘hi akuzangisa ko alioze mumu kakuchizanga: hi mukufumbuka ko ku upite wa sonyi, alioze mumu ha zango.’ (1 Petulu 5:1-3) Milimo yika akulinga hanga atuyukise?

Ayo kakutufunga ni kututalatala. Makulwana kakusongwela, ni kufunga, ni kukwasa chikungulwila hanga chitatuke mu ufulielo. Ayo kananyingika ngwo Zambi hanehe mulimo ulemu, makulwana keshi kuyula atu ja Zambi ni kapinjiso, alioze ayo kakusa tachi hanga mandumbu atwame kanwa ni chiseke mu chikungulwila. (2 A-Korindu 1:24) Chizechene ngwe umwe kafunga mupema wa kutalatala mapanga jenyi, makulwana noo kakufupa hanga anyingike chize mandumbu a mu chikungulwila anatwama ku mwono wo mutu ni mutu.​—Yishima 27:23

Ayo kakutulongesa chize mutulinga upele wa Zambi. Pwoso jeswe, makulwana kakusongwela yikungululo ya chikungulwila, nawa kakutukwasa kukolesa ufulielo wetu. (Yilinga 15:32) Wano malunga alihana kakusongwela mulimo wa sango jipema, ni kukalakala hamuwika ni yetu hanga atulongese chize chatamba kulinga mulimo wacho.

Ayo kakututakamisa mutu ni mutu. Ha mashimbu akwo ayo kakutufunga mutu ni mutu ha ize tunahono mu spiritu, makulwana a chikungulwila chetu mahasa kutumeneka ku mazuwo jetu, nawa mu Zuwo lia Wanangana ayo kakutukwasa ni kutukolesa mu Yisoneko.​—Tiangu 5:14, 15.

Ha milimo yo ya mu chikungulwila, makulwana kali nawa ni milimo yikwo yakulikwasa nayo ku musunya, nawa chaatamba kusa mashimbu hanga afunge asoko jo. Mandumbu wano kakuhondangana chinji, kashika katela vumbi lietu.​—1 A-Tesalonika 5:12, 13.

• Milimo yika makulwana akulinga mu chikungulwila?

• Kuchi makulwana akusolola zango lio hali yetwe?

Mbimbiliya yinasolola yizavu yaali ya malunga Akwa Kristu waze akufunga chikungulwila​—“tulayi ni tuvumbi.” (A-Fwilipu 1:1) Ayo eswe kali mandumbu waze analingila mu chikungulwila. Milimo yika tuvumbi akulinga hanga tuyuke?

Ayo kali yikwashi ja makulwana a chikungulwila. Tuvumbi a milimo kali ni manyonga a spiritu, aumwenemwene, atu a pundu, amwe kali akweze akwo makulwana a miaka yinji. Ayo kakusa ulemu wunji ha ululikiso ni kufunga kanawa milimo yo ize akulinga mu chikungulwila. Yino yakukwasa makulwana a chikungulwila hanga alihulikile ha milimo yo ya kulongeso ni kufunga chikungulwila.

Ayo kakulinga milimo yipema. Amwe tuvumbi kakwaha milimo ya kutambula atu waze aneza mu yikungululo. Akwo mahasa kukalakala ni yisaji ya maliji, akwo ni kuhana mikanda, akwo kakwalula milambu, akwo kakutetela ngiza kuli mandumbu a mu chikungulwila hanga ambujolemo sango jipema. Ayo nawa kakukwasa kululika Zuwo lia Wanangana hanga lipema. Makulwana a chikungulwila mahasa kwita kuli tuvumbi hanga akwase tushinakaji. Tuvumbi kakwaha milimo yeswayo, ayo kakuyilinga ni mbunge yo yeswe, kashika chatela kwachichimieka.—1 Timoteu 3:13.

Ayo kakuhana chilweza chipema cha atu Akwa Kristu. Tuvumbi a milimo kakwasakula ha ndako jo jipema ja mu spiritu. Muze ayo akusolola yihanda ya malongeso mu yikungululo, kakukolesa ufulielo wetu. Kusongwela cho cha milimo ya sango jipema ya kutwaha tachi ku milimo yetu. Kashika kukalakala cho hamuwika mu spiritu, chakuneha chiseke ni unungiso. (A-Efwesu 4:16) Ha kupalika cha mashimbu ayo mahasa kujama hanga apwe makulwana a chikungulwila.

• Tuvumbi ayo aya?

• Kuchi tuvumbi akukwasa chikungulwila hanga chende kanawa?

Mu Yisoneko ya akwa Kristu mu limi lia Ngregu yinavuluka chinji Mbarnabe ni postolo Paulu. Malunga jacho te tulayi akwa kumeneka yikungulwila. Mumu liaka? Ayo te kakunyonga ni zango lieswe hali mandumbu ni kutwama cho chipema mu ufulielo. Paulu yamba ngwenyi ngunazange hanga ôtuhi lukenu, tukameneke mandumbuö hanga tukatale chize ali. Iye te kakwenda chinji hanga aye ni kukolesa mandumbu. (Yilinga 15:36) Tulayi akumeneka yikungulwila musono no che akulinga. Ayo kakwiza hanga atutakamise mu ufulielo.

Hita kalayi wa mbonge kakumeneka yikungulwila 20 hanji kuhiana, kakulinga poso yimuwika mu chikungulwila, ha mwaka kaali keswe. Mutuhasa kuyuka ku yitanga ya mandumbu wano, nawa nyi hanambata mutuhasa kuyuka ku yitanga ya amama jo. Ayo kakusa tachi hanga anyingike akweze ni makulwana, nawa kakuzanga chinji kukalakala ni yetu ha kwambujola sango lipema, ni kuya kuli malongi jetu a Mbimbiliya. Tulayi wano hamuwika ni makulwana a mu yikungulwila kakutufunga ni kutakamisa ufulielo wetu, ayo kakutukolesa mu ukungululo ni mu kukunguluka chinene.—Yilinga 15:35.

Ayo kakusolola zango kuli eswe. Tulayi a mbonge, kakunyonga chinji ufulielo wa yikungulwila. Ayo kakulikungulula ni makulwana ni tuvumbi a mu yikungulwila hanga atale kutatuka cha yikungulwila mba aahe yiyulo ize muyaakwasa ku milimo yo. Ayo kakukwasa pionelu chize malinga kanawa milimo yo ya sango lipema, nawa kakwivwa chiseke hakulichinga ni kunyingika mandumbu akwo, ni kwivwa kutatuka cho ku ufulielo. Mandumbu jacho kakulihana ayo ene ngwe “akwa milimo hali yetu.” (2 A-Korindu 8:23) Yetu twatamba kwimbulula ufulielo wo ni kulihana cho kuli Zambi.—A-Hepreu 13:7.

• Mumu liaka tulayi a mbonge akumeneka yikungulwila?

• Kuchi twakuyuka muze ayo akumeneka chikungulwila?

Nyi kwapwa umwe luyinda, Yela ja Yehova kakulilulieka ni kawashi hanga ahane ukwaso kuli mandumbu waze ali mu lamba liacho. Kulikolweza chacho chakusolola zango lietu lia umwenemwene kuli umwe ni mukwo. (Yoano 13:34, 35; 1 Yoano 3:17, 18) Kuchi twakulikwasa?

Twakuhana milambu. Muze kwapwile zala yinji mu Yundeya, Akwa Kristu atangu a mu Andiakia yakunga mbongo hanga akwase najo mandumbu jo a ufulielo. (Yilinga 11:27-30) Chizechene ngwe musono, nyi twevwa ngwo amwe mandumbu a chifuchi chikwo kanapinji ni luyinda, yetwe mu chikungulwila chetu twakukunga milambu hanga tukwase waze ali mu lamba liacho.—2 A-Korindu 8:13-15.

Yetwe twakuhana ukwaso ungunu. Makulwana waze atwama ku chihela kuze mukupwa luyinda, ayo kakufupa mandumbu eswe a mu chikungulwila hanga akwase ni kwafunga. Chizavu cha ukwaso muchihasa kululika uhashi wa kulia, ni meya akunua, ni mazalo, ni mazuwo, ni yitumbo ya kulikwasa nacho. Yela ja Yehova anji kakulihana ku milimo ize ananyingika hanga akwase kululieka mazuwo, ni Mazuwo a Wanangana. Kulinunga chacho chakutwaha chiseke ha ululikiso wacho, nawa twakupwa ni yinyingi yipema ku milimo ize twakulinga hamuwika, yakutwaha uhashi hanga tululieke ukwaso ha mashimbu waze mutuufupa. Kashika yetwe twakukwasa atu eswe ‘alioze kuhiana chikolo kuli akwetu akwa kufuliela’ yetwe nawa twakukwasa atu akwo chipwe ngwe kali akwa mangeleja eka.—A-Ngalashia 6:10.

Twakuhana ukwaso wa mu spiritu ni wa mu yinyengo. Atu waze akupwa mu luyinda katela kwaalembejeka. Ha mashimbu jacho, yetwe twakupwa ni tachi ja kuli Yehova, “kanda Zambi ya kulembejeka cheswe.” (2 A-Korindu 1:3, 4) Ni zango lieswe, twakuya kuli waze ananyenganyana hanga twalweze yilakenyo ya mu Mbimbiliya, ni kwaha ushindakenyo ngwo kwasala hakehe Wanangana wa Zambi muuneha songo lia luyinda mweswe ni ize yakumwesa lamba ni yinyengo.​—Usolwelo 21:4.

• Kuchi Yela ja Yehova akuhasa kukwasa ni kawashi waze ali mu luyinda?

• Ulembejeko uka wa mu spiritu mutuhasa kuhana kuli waze ali mu luyinda?

Ku songo lia ufwe wenyi, Yesu kanakahanjika ni tumbaji twenyi awanaùPetulu, Tiangu, Yoano ni Andeleu. Yesu yalianga kwalweza chilayi cha kuheta chenyi ku matangwa akusula, iye yahula ngwenyi: ôIya kevwe ndungo wamwenemwene, [wakushishika] wa kukanyama, yoze mwata wenyi hamwaha chiyulo cha akwa zuwo lienyi, mukuhana kulia kuli ayo ha mwaka wacho?ö (Mateu 24:3, 45; Marku 13:3, 4) Yesu yashindakenya kuli a postolo jenyi ngwo, “mwata” wo makasakula waze manunga ni kuhana kulia cha ku spiritu kuli tumbaji twenyi. Ndungo wacho iya?

Ayo kali tumbaji a Kristu akuwahisa ni spiritu yisandu.

“Ndungo” wacho kali chizavu cha mandumbu a ufulielo a Kristu hano hashi waze analinga milimo ya kuhana kulia cha mu spiritu kuli waze akuwayila no Yehova. Yetu twakutalila kuli ndungo wa kukanyama hanga anunge ni “kutwaha kulia ha ola yize yinalite.”—Luka 12:42.

Ayo kakufunga chikungulwila cha Zambi. (1 Timoteu 3:15) Yesu kahanyine kuli ndungo chiteli cha kufunga mulimo mu ululikiso wa Yehova hano hashi—nawa ni kufunga yikumba, ni kusongwela mulimo wa kwambujola sango lipema, ni kutulongesa mu yikungulwila yetu.

Ha chino ayo kakutwaha ize tunaho ku spiritu, ôndungo wamwenemwene wa kukanyamaö kakuhana kulia cha mu spiritu mu mikanda ize twakukalakala nayo mu mulimo wa sango lipema, nawa ni ululikiso uze twakupwa nawo mu yikungululo yetu yikehe-yikehe ni yinene-yinene.

• Iya yoze Yesu ahele chiyulo hanga ahane kulia cha spiritu kuli tumbaji twenyi?

• Ndungo kuchi apwa wamwenemwene nawa wa kukanyama?

Ku sekulu yitangu, chimwe chizavu chikehe cha “apostolo ni makulwana mu Yerusaleme” te kakuvumbika ngwe chizavu cha tusongwelo (corpo governante) hanga ayule yikuma yilemu mu jina lia chikungulwila cha Akwa Kristu a kuwayisa ni spiritu. (Yilinga 15:2) Muze ayo te akulitesa mu yiyulo ni nyonga limuwika ha kukaula ize Yisoneko yinambe, te kakupwa ni yitanga ize yinalite ni spiritu ya Zambi. (Yilinga 15:25) Ni musono chilweza chochene che anakaula.

Ayo kanalingi upale wa Zambi. Mandumbu akuwahisa waze anavumbika mu Chizavu cha Tusongwelo kali ni zango linji ha Liji lia Zambi, nawa kali ni mana ni yinyingi yinji yakusongwela nayo malongeso a mu spiritu. Ayo kakulikungulula ha pwoso jeswe hanga atese ize mahasa kukwasa nayo mandumbu jo hashi heswe. Ngwe chizechene ku sekulu yitangu, ayo kakuhana malongeso a mu Mbimbiliya, nawa mu mikanda ize akutuma, hanji kuli tulayi waze akumeneka yikungulwila. Yino yakununga atu ja Zambi mu manyonga ni mu yitanga yimuwika. (Yilinga 16:4, 5) Chizavu cha makulwana a Tusongwelo cha kululieka kulia cha mu spiritu, nawa chakusa milimo ya kwambujola Wanangana kulutwe, chakutala nawa kuhana cha yiteli kuli mandumbu hanga afunge yikungulwila.

Cha kukaula usongwelo wa spiritu yisandu ya Zambi.

Chizavu cha Tusongwelo cha kukaula usongwelo wa Mwene Yehova ni wa Yesu mwe Mwata wa chikungulwila. (1 A-Korindu 11:3; A-Efwesu 5:23) Ayo keshi kunyonga ngwo kali miata ja atu ja Zambi. Ayo ni akwa Kristu eswe akuwahisa, kakukaula “mwe Mwana-panga kweswako maya.” (Usolwelo 14:4) Chizavu cha Tusongwelo cha kuwahilila chinji ha yilemba yetu ize twakulinga hakutwala ku milimo yo.

• Ku sekulu yitangu chizavu cha tusongwelo te aya?

• Kuchi Chizavu cha Tusongwelo musono chinakaula usongwelo wa Zambi?

Jina lia Betele mu Hepreu linalumbunuka ngwo “Zuwo lia Zambi.” (Uputukilo 28:17, 19) Jina lino linalita ni mazuwo waze Yela ja Yehova akutunga mu yifuchi yeswe hanga afunge ni kusongwelamo milimo ya kwambujola sango jipema. Chizavu cha Tusongwelo chinavumbikila ku chishina chinene (sede mundial) mu mbonge ya Nova York, mu chifuchi cha EUA, kwenako ayo anasongwela milimo yeswe ya sango jipema, nawa ayo kakutala milimo ize akulinga ku yishina yikehe-yikehe (filiais) ya mu yifuchi yeswe. Waze anakalakalako kanavuluka ngwo asoko a ku Betele. Chizechene ngwe amwe asoko, ni ayo katwama ni kukalakala hamuwika nawa kakupwa ni chiseke ha kulia ni kulilongesa Mbimbiliya hamwika.—Masamu 133:1.

Betele yili chihela chize mandumbu akulihana ayo ene. Ku betele jeswe kuli mandumbu Akwa Kristu a malunga ni a mapwo waze analihana ku milimo ya Zambi, nawa ni kusa milimo ya Wanangana kulutwe mu mwono wo ha mashimbu eswe. (Mateu 6:33) Nyi umwe wa kuli ayo wakutambula fweto wakwihi, alioze ayo eswe kakwaha yipatulo yipema ya ma zuwo, ni umwe ukwaso ukehe. Ku ma betele jeswe kuli milimo yinji, ngwe ya kusoneka, ya kulinga kulia, hanji ya kukomba ni kukosa mu ma zuwo. Amwe kakukalakala ku ufwambwishilo wa mikanda, akwo ku ukoselo wa mazalo, akwo kakululieka mashinyi ni mitoli yikwo.

Chili chihela chize chinakwasa milimo ya kwambujola Wanangana. Mulimo utangu ku betele jeswe uli kusolola umwenemwene wa mu Mbimbiliya kuli atu eswe. Kamukanda kano uli ngwe chilweza cha milimo yacho. Kanakausoneka ni ukwaso wa Chizavu cha Tusongwelo, yautuma ku kama ja yizavu ya akwa kulumbununa maliji mu malimi akwo hashi heswe, ni kuufambwisa mu makina ja mikanda ja mu ma betele akwo aze akulinga mikanda, ni kuyituma ku unji wa 100,000 a Yikungulwila. Kuli majila anji waze asoko a ku betele akupwa no hanga akwase ni kawashi milimo yeswe ya—kwambujola sango jipema.—Marku 13:10.

• Aya akukalakala ku Betele, nawa ukwaso uka akwaha ko?

• Milimo yika ya kawashi ize anakwasa ku Betele jeswe?

Asoko a ku betele kakukalakala mu yipatulo yeka ni yeka,

hanga akwase milimo ya kwambujola sango lipema mu chifuchi chimuwika hanji yinji. Ayo kakukalakala mu yizavu ya akwa kulumbununa, akwo akwa kufambwisa ni kulinga mikanda, akwo akwa kutetela mikanda, akwo akwa kulinga yizulie, hanji kufunga yuma yikwo mu chifuchi.

Chizavu cha ha Mutango che chakusongwela milimo. Chizavu cha Tusongwelo cha kukalakala ni mitango muze muli Yizavu ya Mitango yize yapwa ni makulwana ajama, atatu hanji kuhiana. Yizavu ya mitango yakulweza Chizavu cha Tusongwelo chize milimo yo yinende hanji ni yikwiko ize muyihasa kusoloka mu yifuchi ize ayo anazachila. Sango jacho, ja kukwasa Chizavu cha Tusongwelo hanga ahase kutesa yikuma ize mahasa kutuhwisa mu mikanda, ni ha kukunguluka cha ha chingulwila ni chize chinene. Chizavu cha Tusongwelo chakutuma mandumbu hanga aye ni kumeneka mitango, ni kukwasa Yizavu ya ha Mitango chize mahasa kusongwela milimo yo. (Yishima 11:14) Kwakupwa nawa chimwe chilulikiso chipema cha malongeso akutakamisa no waze atwama mu chihela cha mutango, ha kwiza cha yoze wakumanyinako Chizavu cha Tusongwelo.

Ukwaso akuhana ku yikungulwila. Ku mutango kwe a kutayiza yikungulwila yaha. Mandumbu nawa kakusongwela milimo ya pionelu, mishionaliu, ni tulayi a mbonge waze akulingila mu chifuchi chize muli mutango. Ayo kakululieka kukunguluka chinene, ni kusongwela kutunga cha ma Zuwo a Wanangana, nawa ni kunyingika ngwo mikanda yinaheta mu yikungulwila hanga yaakwase ku ize anafupu. Yuma yeswe akulinga ku mitango yakukwasa kukumbanyisa milimo ya Sango Lipemahanga yende nikulita ni ululikiso.—1 A-Korindu 14:33, 40.—1 A-Korindu 14:33, 40.

• Kuchi Yizavu ya Usongwelo a yishina yikehe yakukwasa Chizavu cha Tusongwelo?

• Yiteli yika yishina yikehe-yikehe yilinayo?

Mba twambujole kanwa “sango jipema” ku “mavungu eswe, ni ku minyachi yeswe, ni ku malimi eswe, ni kuli atu eswe,” twakulinga mikanda mu unji wa 600 a malimi. (Usolwelo 14:6) Kuchi twakuhasa kulinga mulimo uno ukalu? Twakuulinga ni ukwaso wa chizavu cha akwa kusoneka, ni amwe akwa kulumbununa maliji, kali mu unji wa 3,000—eswe kali Yela ja Yehova a mu yifuchi yeswe.

Mukanda utangu kakuululieka mu limi lia inglês. Chizavu cha Tusongwelo, ayo kakusongwela milimo ya Chipatulo cha Akwa kusoneka ku chishina chetu chinene. Chipatulo chacho cha kusongwela ni kusa akwa kusoneka waze makalakala mu chishina chinene ni ku yimwe yishina yikehe-yikehe. Kuli yimwe yizavu yeka ni yeka ya akwa kusoneka, ayo kakwecha hanga tusoneke hakutwala ku malongeso waze mahasa kukwasa atu ku ndako jeka ni jeka, nawa mikanda yetu yakutoweza atu a ku mavungu eswe.

Mukanda wacho kakuutuma kuli akwa kulumbununa. Muze hausoneka nyi mautayiza, kakuutuma kuli yizavu ya akwa kulumbununa mu yifuchi yeswe, waze akulumbununa, ayo kakuuhengula, ni kuutanga. Ayo kakusa tachi hanga asakule “maliji aumwenemwene,” kakupwa ni ushindakenyo weswe wa maliji aze ali mu Inglês, mba ahase kwalumbununa mu limi lio.—Chilumbununyi 12:10.

Chisaji chakusonekena chakutambwisa milimo. Chisaji chakusonekena (Computador) chishi kusalakana akwa kusoneka ni akwa kulumbununa. Alioze, milimo yo muyihasa kutambuka kanawa hakukalakala ni chisaji chakusonekena. Yela ja Yehova kali ni umwe Ululikiso wa Chisaji Wakusoneka nawo mu Malimi Anji, we tunavuluka ngwo (MEPS) mwenamo mwakunjila mikanda ya malimi anji hamuwika ni yizulie, nawa kuyilulieka hanga ayifwambwise.

Mumu liaka yetwe twakusa tachi jeswe hanga tulumbunune maliji mu malimi, chipwe ngwe atu akehe akwaahanjika? Mumu Yehova kanazange ngwo “atu eswe alilamwine, akahete ku chinyingi cha umwenemwene.”​—1 Timoteu 2:3, 4.

• Kuchi mikanda yetu akuyisoneka?

• Mumu liaka twakulumbununa mikanda yetu mu malimi anji?

Ululikiso wetu wa kufambwisa ni kuhana kama ja tununu a Mbimbiliya, ni mikanda yikwo yaha ha miaka yeswe. Twakutunga ni kufunga Mazuwo a Wanangana ni yishina yikehe-yikehe. Twakukwasa tununu ja Betelita, ni Mamishionaliu, nawa twakuhana ukwaso ha matangwa a luyinda. Hanji yena mukomoka ngwe ‘Kulihi mbongo jineza mba alinge yuma yeswe ai?’

Yetwe tushi kwita mbongo, hanji kutesa ndando. Chipwe ngwe milimo yetu ya Sango Jipema yakuhwisa upite unji, alioze yetwe tushi kwita mbongo. Chize ku sekulu ya kunyima mukanda wa A Sentinela unakamba ngwo yetu twakufuliela kuli Yehova ngwe chikwashi chetu, nawa yetwe “tuchikeza kwita ukwaso kuli mutu niumwe”—tuchi keza kachilinga!—Mateu 10:8.

Milimo yetu kakuyikwasa ni milambu. Atu anji kakuzanga milimo yetu ya longeso lia Mbimbiliya, kashika ayo akuhana milambu hanga milimo yacho yisenye kulutwe. Yela ja Yehova ayo ene kakuwahilila chinji ha kusa mashimbu, ni tachi, ni upite wo, ni yuma yikwo hanga alinge upale wa Zambi hano hashi. (1 Sango ja Mianangana 29:9) Mu Zuwo lia Wanangana muli mishete ize akusa milambu kuli eswe waze anazange kulambula. Chihanda cha mbongo jikwo Jakwiza kuli atu a mbunge yipema, ngwe umwe twamishi chiswale yoze Yesu anakamba ngwo, walambwile tumbongo tukepe twaali mu mushete wa mu tembele. (Luka 21:1-4) Kashika mweswao mahasa “kutumbika chimwe chihanda chinalita” hanga alambule “nikulita ni chize hanapale mu mbunge yenyi.”—1 A-Korindu 16:2; 2 A-Korindu 9:7.

Yetwe tunatayiza ngwo Yehova manunga ni kuwahisa mbunge ja waze anazange ‘kumulemesa ni yikumba yo yilemu’ hanga akwase milimo ya sango jipema ja Wanangana, mba upale wenyi umanunuke.—Yishima 3:9.

• Mumu liaka ululikiso wetu unalituchika ni mangeleja?

• Milambu ya mbunge yipema yika akulinga nayo?

Zuwo lia Wanangana linalumbunuka chihela chize akulongesela shimbi ja mu Mbimbiliya hakutwala ku Wanangana wa Zambi​—te che chikuma cha milimo ya Yesu.—Luka 8:1.

Lili chihela cha Uwayilo wa umwenemwene mu yihunda. Mwenamo akululiekela milimo ya kwambujola sango jipema ja Wanangana. (Mateu 24:14) Mazuwo a Wanangana kali ni utohwe weka ni weka, nawa keshi kulifwa ni mangeleja, alioze yili yihela yipema muze mandumbu a yikungulwila mahasa kulikungulula. Ha miaka yino, yetwe twatunga kumi lia tununu a Mazuwo a Wanangana aha (chinalumubunuka ngwo ha tangwa mazuwo atano) ni kulita ni kwoka cha yikungulwila. Kuchi chino chinapu chashi?—Mateu 19:26.

Kakwatunga ni milambu ize mandumbu a yifuchi yeswe akuhana. Mazuwo a Wanangana eswe, muli mushete ukwo wa milambu ya Kutungila nacho Mazuwo a Wanangana Hashi Heswe. Milambu yacho kakuyituma ku chishina chikehe, nawa mbongo jacho kakukwasa najo yikungulwila ize yinahono Mazuwo a Wanangana hanji kwatungulula.

Kakwatunga kuli akwa kulihana, keshi kwafuta, kali akwa milimo yeka ni yeka. Mu yifuchi yinji muli ululikiso wa Yizavu ya Akwa Kutunga Mazuwo a Wanangana. Yizavu ya akwa kutunga ni akwa kulihana kakuya ndusu mu yikungulwila yeka ni yeka ya mu chifuchi, ni ku mayihunda ize yili kusuku, ayo nawa kakusongwela ni kulongesa milimo kuli mandumbu. Mu yifuchi yikwo Chizavu cha Akwa Kutunga a mu Chifuchi kakuchisa hanga asongwele kutunga ni kululieka Mazuwo a Wanangana mu chifuchi. Makulwana waze ali ni yinyingi ya kutunga, kakusongwela yikungulwila ha mashimbu eswe a milimo, ni kukalakala chipema cha akwa kulihana. Mu yihela ya utungilo, mandumbu anji a chikungulwila kakulihana ayo ene hanga ahondangane. Spiritu ya Yehova ni tachi jeswe jize mandumbu akusa, kashika chakupwa chashi kulinga mulimo wacho.—Masamu 127:1; A-Kolosu 3:23.

• Mumu liaka yihela yetu ya uwayilo akuyivuluka ngwo Mazuwo a Wanangana?

• Kuchi chakupwa chashi kutunga Mazuwo a Wanangana hashi heswe?

Mazuwo a Wanangana a Yela ja Yehova kakufumanyisa jina lisandu lia Zambi. Kashika chatamba kupwa ni manyonga akwafunga ni kwalulieka kanawa hanga apwe apema, chili chiwape, mumu chili chihanda chilemu ha uwayilo wetu usandu. Mandumbu eswe mahasa kukalakala.

Ha kuhwa cha ukungululo akwa kulihana kakukomba. Muze ukungululo hiwahwa, mandumbu eswe kakukomba ni kululieka Zuwo lia Wanangana ni chiseke cheswe. Nawa kakulikosa ni kulilulieka kamuwika ha pwoso. Makulwana ni tuvumbi a milimo kakusongwela milimo yacho, hakukaula kanawa ululikiso wa yuma ize chatamba kulinga. Nikulita ni chize chinatela Muzuwo lia Wanangana, akwa kulihana kakukomba, ni kukosa, ni kukukumuna fufuta, ni kululika yitwamo, ni kukosa kumba, ni kukosa tupenda, ni kuchiza yiswaswa yeswe muchima ni haze lia chipanga. Nawa ha miaka yeswe, kakuchiza tangwa limuwika hanga alulieke Zuwo lia Wanangana ni yuma yeswe. Ha kukalakala hamuwika ni ana jetu, yetwe twakwalongesa chize chatamba kusa vumbi ku chihela chetu cha uwayilo.—Chilumbununyi 5:1.

Kwasa ha kululieka Zuwo lia Wanangana. Ha miaka yeswe Zuwo lia Wanangana kakulihengwola, haze ni muchima. Kuhengwola chacho chakukwasa hanga alinge mulimo upema wa kululieka hanji kutungulula zuwo, chino chakukwasa kufunga yikumba. (2 Sango ja Mianangana 24:13; 34:10) Zuwo lia Wanangana liatela kulipemesa ni kulilulieka kanawa mumu mwenamo twakuwayila Zambi yetu. Ha kulihana ku milimo yacho, tunasolola zango kuli Yehova ni kulemesa chihela chetu cha uwayilo. (Masamu 122:1) Milimo yacho yakukomokesa atu.—2 A-Korindu 6:3.

• Mumu liaka chatambile kulengulula chihela chetu cha uwayilo?

• Ululikiso uka twakulinga hanga tufunge upeme wa Zuwo lia Wanangana?

Yena wakuzanga kuhengwola hanga wokese yinyingi ye ya mu Mbimbiliya nyi? Yena unazange kunyingika hakutwala ku chimwe chisoneko, hanji umwe mutu, hanji chihela, hanji chimwe chikuma cha mu Mbimbiliya? Yena hiunalihula kama kuchi Liji lia Zambi mulihasa kukukwasa ku mwono we hakutwala ha ize uli nayo? Nyi ka, yako uhengwole mu Utulikilo wa Mikanda (Biblioteca) mu Zuwo lia Wanangana.

Muli mikanda yinji yipema ya kuhengwola. Yena hanji uchi kuwana mikanda yeswe ize yinalumbununa Mbimbiliya Yela ja Yehova alinayo mu limi lie. Mba alioze utulikilo wa mikanda ya mu Zuwo lia Wanangana muli mikanda yinji ya matangwa ano. Muli nawa Mbimbiliya jinji ja ulumbunwiso ukwo, ni ulumbunwino upema wa maliji (Dicionário), nawa ni yilumbunwino yikwo ya maliji (obra de referências). Yena muhasa kuya ku utulikilo wa mikanda hanga uhengwole muze ukungululo kanda uchiputuka hanji hiwahwa. Nyi chisaji che cha kusonekena (computador) hiunasemo Watchtower Library muhasa kuhengwolamo. Uli umwe ululikiso wa mu chisaji cha kusonekena, uze uli ni mikanda yinji, nawa uli washi ni kuhengwola yeswayo ize yena muhasa kufupa, ngwe yikuma hanji maliji hanji yisoneko.

Uli upema kuli alongi a Shikola ya Milimo ya Zambi. Nyi hiunalisonekesa ku shikola, yena muhasa kuhengwola kanawa mu utulikilo wa mikanda mu Zuwo lia Wanangana muze mululieka malongeso je. Kalayi wa shikola mwe wa kufunga utulikilo wa mikanda. Iye kali ni chiteli cha kunyingika ngwo mikanda yeswe muyili, nawa ya kululieka kanawa. Iye hanji longeshi we wa Mbimbiliya mahasa kukulweza chize yena mufupa yikuma ize yena unazanga. Chipwe chize, chatambile kumbata nyiumwe mukanda wa mu Zuwo lia Wanangana. Kashika yetwe twakuyikwata ni kuyifunga kanawa, nawa tushi kuyisonieka hanji kufunjieka.

Mbimbiliya yinalumbununa ngwo, mba tuwane “chinyingi cha Zambi,” yetwe ndo tuhengwole “ngwe upite wakuhengeka.” (Yishima 2:​1-5) Utulikilo wa mikanda mu Zuwo lia Wanangana muuhasa kukukwasa ha kuhengwola che.

• Mikanda yika ya kuhengwola nayo ize yili mu utulikilo wa mikanda mu Zuwo lia Wanangana?

• Iya mahasa kukukwasa hanga uhengwole kanawa mu utulikilo wa mikanda?

Yesu Kristu yamba kuli tumbaji twenyi ngwenyi: “pangu lienu likatemuke kumeso ja atu, hanga akamone yitanga yenu yipema, akachichimieke Tatenu yoze uli mu malilu.” (Mateu 5:16) Ha matangwa wano akusula, yetwe tunakalakala kanawa ni yinyingi yaha, nawa ni Internet. Lifwo Lietu lia mu internet, www.pr2711.com, yili jila yetu ize mutuwana maliji hakutwala ku ufulielo ni ku milimo ya Yela ja Yehova. Kuchi yapwa?

Mbimbiliya yakukumbulula yihula yinji. Yena muhasa kuwana ukumbululo wa yimwe yihula yilemu ize atu akulihula. Yimwe yihula yikwo yisambano kanayikumbulula mu kalifwo Unazange Kuningika nawa Umwenemwene? uli mu internet mu unji wa 400 a malimi. Yena muhasa kuwana nawa Mbimbiliya Tradução do Novo Mundo mu malimi anji ni ukwaso unji wa malongeso a Mbimbiliya, hamuwika ni mukanda O Que a Bíblia Realmente Ensina? nawa ni A Sentinela ni Despertai! Mikanda yinji yena muhasa kutanga hanji kuyivwa mu lifwo lia internet, hanji kuyichiza hanga uyipanjike mu chisaji che hanji kutala yizulie yakululieka mu PDF, hanji EPUB. Muhasa nawa kufwambwisa yimwe mikanda mulimi lie hanga uyilweze kuli umwe yoze mazanga ku yitanga! Muli nawa mikanda yinji ya yizulie mu malimi a tunaye. Nawa yena muhasa kuchiza utangilo wa maliji a mu Mbimbiliya ni yiheho ya mu Mbimbiliya, nawa ni miaso yipema ize muyikwaha chiseke.

Maliji aumwenemwene hakutwala kuli Yela ja Yehova. Yeswe yili mu lifwo lietu lia internet yili yaha, ni yiheho ya yizulie hakutwala ku milimo yetu ya hashi heswe, ni yuma ize yinapinjisa Yela ja Yehova, nawa ni ukwaso uze twakuhana. Yena muhasa kuwana nawa sango ja yikungululo yinene-yinene ha kuhula ku yishina yetu yikehe-yikehe.

Ha yino yuma, yetwe twakutemuna pangu lia umwenemwene mu membo eswe akusuku a hashi heswe. Atu a mu yifuchi yeswe, chimuwika ni akwa Antártida, kanayuku chinji. Tunalembe “hanga liji lia Yehova likatambuke” hashi heswe hanga uhenya wa Zambi ufumane.​— 2 A-Tesalonika 3:⁠1 NM.

• Kuchi lifwo lietu lia internet www.pr2711.com linakwase atu hanga anyingike umwenemwene wa Mbimbiliya?

• Yika yena wakuzanga kufupa mu lifwo lietu mu internet?