Atu anji kanalitwamina kuya ku ma ingeleja mumu kasokuwanamo ukwaso ni ufulielo upema. Mba mumu liaka yena chatamba kuya ku yikungululo ize analulieka kuli yela ja Yehova? Yika mukawanamo?

Chiseke hakupwa mukachi ka atu akulifunga ni zango. Ha sekulu yitangu, Akwa Kristu te kakwete yikungulwila, ayo nawa te kakulikungulula hanga awayile Zambi, ni kulilongesa Yisoneko, ni kulikwasa umwe ni mukwo. (A-Hepreu 10:24, 25) Ayo te kakulitambula ni zango ni kwivwa ngwo tuli mukachi ka masepa a umwenemwene- e mandumbu a mu ufulielo. (2 A-Tesalonika 1:3; 3 Yoano 14) Ni yetwe tunakaula chizechene ngwe ayo te apwile ni kulinga, chiseke chize te apwile ni kwivwa ni yetwe che twakwivwa.

Kuyuka ha kulilongesa ni kukaula shimbi ja mu Mbimbiliya. Ngwe ku mashimbu ashakulu, ni musono atata, ni amama, ni twanuke eswe kakupwa hamuwika. Alongeshi ajama kakulongesa shimbi ja mu Mbimbiliya hanga tuhase kujikaula ku mwono wetu ha tangwa ni tangwa. (Shimbi Yamuchiali 31:12; Nehemia 8:8) Eswe mahasa kukumbulula mu longeso, ni kwimba miaso, hanga tusolole kutalatala chetu cha mwono wa mutolo.​—A-Hepreu 10:23.

Yiwape yakwiza ha kukolesa ufulielo we kuli Zambi. Postolo Paulu yamba ha chimwe chikungulwila cha ha matangwa jenyi, ngwenyi, “Mumu usona ngunevu kunumona, . . . hanga nukajikize; Ngwami, Hanga tukaliwahise hamuwika, mweswe ku ufulielo wa mukwo; ufulielo wa yenu ni wa yami.” (A-Roma 1:11, 12) Kulikata ni mandumbu jetu mu yikungululo ha mashimbu eswe cha kukolesa ufulielo wetu, hanga tupwe ni tachi ja kwenda mu jila ya Kristu.

Yika unachina kutayiza chilakenyo chakwiza ku ukungululo wetu hanga umone yena mwene? Nyi weza mutukutambula kanawa. Kunjila mu ukungululo chili chawana​-tushi kwitamo mbongo.

• Aya tunakaula ha kulikungulula chetu mu chikungulwila?

• Kuchi mutuyuka ni twatayiza kulikungulula ni Yela ja Yehova?

Nichimwe chuma muchihasa kutukwika kuya ni kulikungulula ni mandumbu jetu. Yela ja Yehova chipwe ngwe kali ni yikatashi ya mwono, hanji kuhonga cha milimo ya tangwa ha tangwa, hindu kakusa tachi hanga alikungulule.

Kulikungulula chili chipema ku mwono wetu. Paulu hakuhanjika ni waze te apwile nikulikungulula no, yasoneka ngwenyi: “Tulitalenu umwe ni mukwo ni mukwo”. (A-Hepreu 10:24) Liji lino linalumbunuka ngwo “Hanga tulifunge,” chino che kulinyingika umwe ni mukwo. Maliji wano kanatwehe tachi hanga tupwe ni zango lia kunyonga akwetu. Yetwe mutuhasa kutwama kanawa ha kunyingika chize amwe asoko amu ufulielo anatwama kanawa chipwe mamona yitalingiso, hanji milonga yize ni yetwe tunamono.

Fupa masepa angunu. Mu yikungululo yetu, twakulitambula kanawa ngwe masepa aumwenemwene. Ha mashimbu akwo, twakuchiza amwe ma ola hanga tuhehe ni kusehejela hamuwika. Yika tunayuku hakupwa hamuwika? Tunalilongesa kulichichimieka umwe ni mukwo, chino chinakolesa zango lietu. Muze mandumbu jetu mapinda ni milonga, yetwe twakwakwasa hanga tukolese usepa wetu. (Yishima 17:17) Ha kulikungulula ni mandumbu eswe amu chikungulwila chetu, tunasolola ngwo, ‘tunalifunga umwe ni mukwo.’​—1 A-Korindu 12:25, 26.

Tunakukolweza hanga usakule masepa waze analinga upale wa Zambi. Yena muhasa kuwana masepa mukachi ka Yela ja Yehova. Nyi vumbi lieswe, kanda wecha nichimwe chikukwike kulikungulula ni yetwe.

• Mumu liaka kulikungulula hamuwika ni yetwe chili chipema?

• Tangwa lika yena muzanga kuya ku chikungulwila chetu?

Akwa Kristu atangu mu yikungululo yo te kakwimba, ni kulemba, ni kutanga Yisoneko—hanga eswe akumbulule, te ye ndako yo. (1-Korindu 14:26) Chizechene yena muhasa kuwana mu ukungululo wetu.

Longeso lipema lineza mu Mbimbiliya. Ha pwoso jeswe, twakulikungulula hanga twive Chiyulo cha mu Mbimbiliya, chakulinga 30 a minutu, Yisoneko yakulumbununa ni kutulongesa ku mwono wetu ha matangwa wano. Yetwe eswe kakutukolweza hanga tukaule mu Mambimbiliya jetu. Ha kuhwa cha chiyulo, hakwiza Longeso lia “Kaposhi wa Kalayi” mandumbu eswe kakukumbulula yihula ya longeso lia Kaposhi wa Kalayi. Longeso liacho liakulinga ola yimuwika. Yikumbululo yacho yakutukwasa kukaula masongwelo a mu Mbimbiliya. Longeso liacho kakulilongesalio kuhianyisa mu unji wa 100.000 a yikungulwila ya hashi heswe.

Kakutukwasa hanga longeso lietu lipeme. Yetwe nawa twakulikungulula mukachi ka pwoso hanga tulilongese yihanda yitatu ya malongeso. Chihanda chitangu cha 25-a minutu lie Longeso lia Mbimbiliya mu Chikungulwila, liakupwa ni yihula ni yikumbululo hanga tukolese malinjiekela jetu a shimbi ni uprofeto wa mu Mbimbiliya. Mba hakusula Shikola ya Milimo ya Zambi yakuputuka ni kutanga cha Mbimbiliya, mba mandumbu mahasa kuhana kumbululo lio mu yisoneko yize aluliekanga. Alongi waze hanalisonekesa ku shikola ya Zambi kakusolola ni kulumbununa yikuma. Mukwa chiyulo kakutalatala hanji kutukwasa hanga tupemese kutanga ni kuhanjika chetu. (1 Timoteu 4:13) Ha kusula, mu unji wa 35 a minutu twakupwa ni Chikungululo cha Milimo, chinalumbunuka kuhanjika, ni kuhula, ni yilweza, ni kukumbulula, hanga tunyingike chize mutulongesa akwetu.

Nyi walikungulula ni yetwe, yena mukomoka ha longeso lipema lia Mbimbiliya lize yena mutambula.​—Izaia 54:13.

• Yika muhasa kwivwa ni walikungulula ni Yela ja Yehova?

• Chikungululo chika ha pwoso unazange kuya hanga ukatale chitangu?

Wamona yizulie mu kamukanda kano chize Yela ja Yehova akuzala kanawa, hakuya ni kulikungulula? Mumu liaka yetwe twakusa ushindakenyo ha kuzala chetu ni kulilulieka?

Hanga tusolole vumbi kuli Zambi yetu. Alioze Zambi kakutala mu mambunge jetu. (1 Samuele 16:7) Muze twakuya ni kumuwayila, nyonga lietu liaumwenemwene liapwa kusolola vumbi kuli iye, ni kuli mandumbu jetu. Nyi ngwe tunayi kuli umwe ngaji mu usopelo, chitangu yetwe twakusa ushindakenyo ku mazalo jetu hanga tumuse vumbi. Nawa ni kuyikungululo yetu chizechene twakuzala hanga tulemese “Chisopa-milonga wa akwa hashi heswe” mwe Yehova Zambi, ni kusela vumbi ku chihela chize twakumuwayila.​—Uputukilo 18:25.

Hanga tusolole ndako jize twatwama najo. Mbimbiliya yinakolweza Akwa Kristu hanga azale “ni kuhomboka ku meso ni mana” ngwe waze “akutayiza uwahililo wa Zambi.” (1 Timoteu 2:9, 10) Kuzala “ni kuhomboka” chinalumbunuka ngwo kanda tuzala mazalo asonyi, waze keshi kulita ni shimbi ja Zambi. Nawa kupwa “ni mana” chakutukwasa hanga tweche kusakula mazalo asonyi. Chipwe haliapwila shimbi jino jinatuhandununa ni kuzala cha akwa mavungu. Kuzala chetu chipema muchihasa kuwahisa “longeso lia Zambi Chilamwina chetu” ni “Zambi wa uhenya.” (Titu 2:10; 1 Petulu 2:12) Kuzala chetu chipema mu yikungululo yetu, muchihasa kwalumuna manyonga ja akwetu ha kuwayila Yehova.

Kanda wecha mazalo akulu ulino hanga akukwike kwiza ku Zuwo lia Wanangana. Mazalo jetu hi a ndando yikaluko, hanji alufuma, alioze mazalo apema waze analita ni kusoloka no.

• Ulemu uka kuzala chetu chilinawo ha kuwayila Zambi?

• Shimbi yika tunakaula ha kusakula mazalo jetu?

Nyi yena wakulilongesa Mbimbiliya ni Yela ja Yehova, kota wakulianga kweseka kutala yikuma yize munukalilongesa. Nawa nyi walilulieka chocho ha kuya ku chimwe chikungulwila chetu ni kulikungulula, mu kayuka chinji. Kuyuka chipema chakwiza ni twapwa ni ndako yipema ya kulilulieka.

Fupa chihela ni ola hanga ulilongese. Kuli muhasa kulihumikiza kanawa hanga ulilongese? Ha chimene? Nyi muze kanda uchiya ku milimo? Nyi chingoloshi? Nyi muze ana eswe haya ni kupomba? Chipwe ngwe hanji uchi kuhasa kulilongesa mashimbu anji, nyonga chize muhasa kufupa ola ya kulilongesa, nawa kanda wecha nichimwe chikupinjise. Fupa chimwe chihela cha uhumikizo, nawa chatela kuchiza yuma yeswe ize muyikupinjisa ngwe kuyika chisaji, ni chisaji cha yizulie, ni telefone. Muze kanda uchiputuka kulilongesa, chatela kulemba hanga akukwase kuhuzulula yipikalo ye ya tangwa ha tangwa, hanga uhase kulihumikiza mu Liji lia Zambi.—A-Fwilipu 4:6, 7.

Lulieka malongeso hanga ukakumbulule. Pwako ni unyingikiso wa chikuma cheswe. Nyonga hakutwala ha chishina cha chikuma hanji kapitulu, yoze mukalonga, tala chize yikuma yikehe-yikehe yinalita ni chishina cha chikuma, tala yimwe yizulie, nawa lihulikile ha yikuma yilemu ya yihula. Tanga ha mifunda, mba uwane kumbululo lia yihula ize hanayisoneka kulu. Fupa tupitulu waze ali ha Malongeso hanga watange, nawa nyonga chize analita ni malongeso. (Yilinga 17:11) Nyi yena muhasa kuwana kumbululo lia chihula, funjika ha mifunda hanga uwane kumbululo lia mu mbunge ye. Mba mu ukungululo yena muhasa kuzundula kwoko lie, nyi muzanga kuhana limwe kumbululo mu maliji je.

Ha kuhengula yikuma yeka ni yeka ize twakulilongesa ha pwoso jeswe mu yikungululo yetu, yena mukawezela manyonga aha ku “upite” wa yinyingi ya mu Mbimbiliya.—Mateu 13:51, 52.

• Ndako yika chatamba kupwa nayo muze kanda uchiya ku yikungululo?

• Kuchi yena muhasa kulilulieka hanga ukahane limwe kumbululo ku ukungululo?

Ha matangwa a shakulu, Yehova te kakuzanga ngwo asoko apwe hamuwika hanga alikolese mu ufulielo ni kutatwisa asoko jo. (Shimbi Yamuchiali 6:6, 7) Kashika Yela ja Yehova noo ha pwoso jeswe kakululieka uwayilo wa mu usoko ni sambukila yeswe, hanga alilongese yikuma yilemu, ni kuhanjika ize muyihasa kwakwasa ku ufulielo wo. Nawa nyi watwama ukawe, yili shimbu yipema ya kusakula kulilongesa Mbimbiliya hanga uwayile Zambi.

Yino ye shimbu ya kukundama kuli Yehova. “Kundamenu kuli Zambi, mba iye kumakundama kuli yenu.” (Tiangu 4:8) Mba tunyingike kanawa Yehova, chatutamba kulilongesa hakutwala ku utu wenyi ni yitanga yenyi ize yili mu Mbimbiliya. Yimwe jila yipema ya kuputuka uwayilo wenu wa mu usoko yili kusa amwe mashimbu akutanga Mbimbiliya hamuwika, hanji kukaula ululikiso wa pwoso jeswe ja Shikola ya Milimo ya Zambi. Nuhasa kuhana yimwe yisoneko kuli mutu ni mutu mu usoko hanga akayitange, mba eswe ahase kukumbulula mu Mbimbiliya.

Yino ye shimbu hanga asoko akundame kuli umwe ni mukwo. Mu usoko atata ni amama ni ana ni asoko akwo, kakukolesa usepa umwe ni mukwo muze ayo malilongesa Mbimbiliya mu usoko. Muyipwa shimbu ya chiseke ni sambukila, nawa ni longeso lilemu lia pwoso. Nikulita ni miaka ya ana jenu, asoko mahasa kufupa yikuma hanga aalongese, hanji ya mu A Sentinela ni mu Despertai! Yenwe munuhasa kuhanjika ni ana jenu ha kutwala ku kapinjiso yoze akupwa nenyi ku shikola, ni chize mahasa kumwehuka. Yenwe munuwahilila ha kululieka miaso yize muyikapwa kwimba mu ukungululo, ha kuhwa cha uwayilo wa mu usoko, munuhasa kulia ni kunwa.

Mashimbu wano apema nwakupalikisa ha pwoso jeswe hanga nuwayila Yehova hamuwika, manukwasa eswe mu usoko hanga nuwane chiseke mu Liji lia Zambi, nawa Yehova makawahisa tachi jenu.—Masamu 1:1-3.

• Mumu liaka yetwe twakusa shimbu hanga tupwe ni uwayilo wa mu usoko?

• Kuchi atata ni amama mahasa kupwisa uwayilo wa mu usoko ni chiseke?

Mumu liaka yetwe twakupwa ni chiseke? Mumu twakuya ku yimwe yikungululo yetu yinene-yinene. Ngwe chizechene tuvumbi ja Zambi ku miaka ya kunyima, te kakwalongesa mu yikungululo yinene katatu keswe ha mwaka, ni yetwe nawa tunashimbwila hamuwika ukungululo wa yizavu yinene. (Shimbi Yamuchiali 16:16) Miaka yeswe, yetwe tuli ni yikungululo yitatu: ukungululo wa tangwa limuwika, ukungululo wa mbonge wa matangwa aali, ni ukungululo wa mambonge wa matangwa atatu. Yikungululo yacho kuchi ya kutuyukisa?

Yino yakukolesa Usoko wetu wa mu Ukristu. Chizechene ngwe A-Izalele te kakuhalisa Yehova ni chiseke, mu kachi ka mbunga “mu chikungulwila,” ni yetwe twakumuwayila ni chiseke hamuwika mu Yikungululo Yinene. (Masamu 26:12, 111:1) Yikungululo yino yakutwaha uhashi wa kulichinga ni Yela amu yikungulwila yikwo hanji mandumbu a yifuchi yeka. Mu yikungululo yacho twakupwa ni amwe ma ola waze twakulichinga ni mandumbu hanga tulie, tunwe hamuwika, ha ma ola jacho hakupwa usepa upema wa mandumbu a mu spiritu. (Yilinga 2:42) Yikungululo Yacho yakutununga mu zango lia ‘kulikata ni mandumbu eswe’ a hashi.—1 Petulu 2:17.

Yakutukwasa hanga tusenye kulutwe mu spiritu. A-Izalele noo te kakuyuka ha kupwa ni “ulumbunwiso wa maliji” a Yisoneko waze te akwalumbunwina. (Nehemia 8:8, 12) Ni yetwe twakuwahilila chinji ha malongeso amu Mbimbiliya waze twakwivwa mu yikungululo yinene. Ululikiso weswe wa yikuma kakuuchiza mu Mbimbiliya. Hakutwala ha yiyulo yipema ni yihanda yikehe-yikehe ni yilweza, ye yakutulongesa chize mutulinga upele wa Zambi ku mwono wetu. Hakwivwa yitanga ya mandumbu akwo amu Ukristu, chize ayo akukumba milonga ha matangwa wano akalu, yino yakutukolesa. Mu ukungululo wa mambonge twakutala yiheho ya yilinga ya atu a mu Mbimbiliya, nawa ni kutulongesa shimbi jingunu. Mu yikungululo yinene, kakupapachisamo waze analihana kuli Zambi hanga amulingile.

• Mumu liaka mashimbu a yikungululo yinene akupwa a chiseke?

• Kuchi muyuka nyi waya ku umwe ukungululo unene?

Ha kukundama cha kufwa chenyi, Yesu yamba ngwenyi: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.” (Mateu 24:14) Kuchi mulimo wa kwambujola sango jipema anaukumbanyisa hashi heswe? Kanaukumbanyisa ha kukaula chilweza cha Yesu chize ahichikile muze apwile hano hashi.​—Luka 8:1.

Yetwe twakufupa atu ku mazuwo jo. Yesu kanakalongesa tumbaji twenyi hanga ambujole sango jipema ku zuwo ni zuwo. (Mateu 10:11-13; Yilinga 5:42; 20:20) Akwa kwambujola sango jipema a ku sekulu yitangu, te kakwaha ngiza (cheseko) hanga ambujolemo sango jipema. (Mateu 10:5, 6; 2 A-Korindu 10:13) Chizechene nawa ngwe musono, mulimo wa sango jipema kanaululieka kanawa, Yikungulwila yeswe yakutambula mangiza hanga ambulwilemo sango jipema. Jino jakutukwasa hanga tukaule shimbi ja Yesu “tukambujole kuli atu, nikushindakenya chikolo.”—Yilinga 10:42.

Yetwe twakufupa kuwana atu kweswako kuze ali. Yesu nawa kanakahichika chilweza ha kwambujola sango jipema kuli atu mukachi ka mbunga, ni kumasesa ja kalunga lwiji hanji mu yihunda. (Marku 4:1; Yoano 4:5-15) Ni yetwe nawa, twakusa tachi hanga twambujole sango lipema lia mu Mbimbiliya kuli atu eswe waze ali: mu matapalo, mu yitanda, mu maloja, ni ha maparaje, hanji kwatelefonala. Yetwe nawa tunambujola sango jipema kuli enyembo jetu, ni kuli waze twakalakala no, ni waze twakulilongesa no, nikulita ni uhashi upema uze mutupwa nawo. Tachi jeswe twakusa jinakwase tununu a tununu ja atu a hashi heswe, hanga evwe sango jipema ja “ulamwino.”—Masamu 96:2.

Yena muhasa kwambujola sango jipema ja Zambi kuli mweswao hanga umulweze kuchi sango jino mujilumbunuka ku mwono wenyi wa kulutwe. Kanda usweka maliji wano a kutalatala che. Keshika ambujola sanga jino kuli akwenu!

• Sango jika jipema jatamba kwambujola?

• Kuchi Yela ja Yehova anembulula yilweza ya Yesu ha kwambujola sango jipema?

Jina “pionelu” linalumbunuka ngwe, yoze wakukilikita mu ngiza

ya yihela yaha, ni kutomba jila hanga akwo akaule. Yesu neye te pionelu, kanakamutuma hano hashi hanga akavumbike akwo, nikuhana mwono wenyi hanga azulule jila ya ulamwino. (Mateu 20:28) Chipwe musono, tumbaji twenyi noo kakumwimbulula ha kupalikisa mashimbu anji hanga ‘apwise tumbaji’ aha. (Mateu 28:19, 20) Eswao anahasa kukilikita chocho, e tunavuluka ngwo pionelu.

Pionelu kali yoze wakwambujola sango lipema ha mashimbu eswe. Yela ja Yehova eswe kali akwa kwambujola sango lipema.

Alioze, amwe kakululieka mwono wo hanga apwe pionelu a mashimbu eswe, ha milimo yo ya sango lipema kakuhana 70 a a ola ha kakweji. Kashika akufupa milimo ize yishi kumbata mashimbu anji hanga ahase kulinga mulimo wo wa pionelu. Akwo kakwasakula hanga atume ngwe pionelu alipwila, mu mambonge muze munahono akwa kwambujola sango lipema lia wanangana, ayo kakuhana 130 hanji kuhianisa a ola ha kakweji mu milimo yo. Ma pionelu kakuwahilila chinji ha mwono uze alinawo wa ululi, kakufuliela ngwo Yehova mahasa kwaha yuma yeswe ize ayo anahono ku mwono wo. (Mateu 6:31-33; 1 Timoteu 6:6-8) Waze keshi kuhasa kupwa pionelu a mashimbu eswe, mahasa kupwa pionelu a mashimbu akehe, nyi mahasa kuhana 30 hanji 50 a ola ha kakweji mu milimo ya kwambujola sango lipema.

Pionelu zango lize alinalio kuli Zambi ni kuli atulie liakumwaha tachi. Chizechene ngwe Yesu, ni yetu tunakanyamisa yiswale mu spiritu hanga anyingike Zambi ni upale wenyi. (Marku 6:34) Kashika yetu tuli ni yinyingi ize muyihasa kwakwasa, nawa ni kwaha chimwe kutalatala cha mwono wo wa miaka yeswe. Zango lia pionelu kuli enyembo lie liakumukolweza hanga ahane ni mbunge yenyi yeswe, tachi ni mashimbu jenyi, hanga akwase akwo anyingike sango lipema. (Mateu 22:39; 1 A-Tesalonika 2:8) Yino ye yakukolesa ufulielo wa pionelu, mba akundame kuli Zambi, ni kuwana uwahililo unji.—Yilinga 20:35.

• Pionelu iya?

• Yika yakuhana tachi kuli pionelu wa mashimbu eswe?

Chize ku miaka ya kunyima, Yela ja Yehova kakwete ma shikola akufumba atu mu jila ya Zambi. Ma shikola jacho kakuhana fumbo lipema kuli waze ali mu mulimo wa shimbu lieswe wa kwambujola Wanangana hanga æamanunune kanawa milimo yo.—2 Timoteu 4:5.

Shikola ya Mulimo wa Pionelu. Muze ma pionelu hakumbanyisa mwaka utangu wa mulimo wa pionelu, kakwasanyika hanga alilongese ku shikola ya matangwa asambano yize akulingila mu Zuwo lia Wanangana. Shikola yacho yakukwasa ma pionelu hanga akundame kuli Yehova, ajame kanawa mu mulimo, ni kununga mu mulimo ni ushishiko weswe.

Shikola ya Akwa-Kwambujola Wanangana. Shikola yino ya tukweji aali yakukwasa ma pionelu waze ajama ali ni hamu lia kuhichika yihunda yo, hanga aye ni kwambujola kuze kunafupiwa. Ayo kakwamba ngwo, “Yami uno; ngutumenu kama yami.” Ayo kakwimbulula mukwa-Kwambujola munene yoze wapwile hano hashi, Yesu Kristu. (Izaia 6:8; Yoano 7:29) Kuya kusuku ni yihunda yo kakwijilila kupwa ni mwono weka. Kutwama cha atu, ndako ni kulia chize akuwanako chalisa chinji ni chize anyingika. Hanji nawa kakulilongesa limi liaha. Shikola yino yakukwasa mandumbu a twamishi ni waze hanalimbata, ali ni miaka 23 ndo 65, hanga apwe ni yitanga yipema mba ahase kukalakala kana-wa kuze Yehova ni ululikiso wenyi anatumu.

Shikola ya Mbimbiliya ya Ngiliate. Mu Hepeleu “Ngiliate” yinalumbunuka “Mulundu wa Chela.” Chize haze aputukile shikola ya Ngiliate ha mwaka wa 1943, hiyalongesa unji wa a alongi 8,000 waze apwile ni kutuma ngwe mishionaliu hanga ambujole kanawa “ndo ku kusula songo lia hashi.” (Yilinga 13:47) Muze mishionaliu jacho ahetele mu Peru, te ku mushi chikungulwila nichimwe mu chifuchi chacho. Haliapwila muli yikungulwila kuhiana 1,000. Muze ma mishionaliu jetu aputukile kwambujola mu Japao, mwapwile wika Yela kumi mu chifuchi chacho. Halipwila muli unji wa Yela 200,000. Tukweji atano waze akulinga ku shikola ya Ngiliate kakulilongesa Liji lia Zambi. Ma pionelu ali-pwila, mishionaliu, ma Betelita ni tulayi akwa-kumeneka yiku-ngulwila, kakwasanyika hanga aye ku shikola yacho akalongese chize atamba kutatwisa mulimo wa hashi heswe.

• Yika Shikola ya Mulimo wa Pionelu yakulinga?

• Aya akuya ku Shikola ya Akwa-Kwambujola Wanangana?