Chize Ana Akwalumuna Ulo

Kusemuka cha mwana muchihasa kuneha chiseke hanji kapinda mu ulo. Amu nuchili yisemi aha, munuhasa kupinda hakuzachisa shimbu ni tachi jenu hanga nulele mwanenu. Kuhona kupomba ni yipikalo yikwo yize yakwiza ha kulela mwana muyihasa kupinjisa ulo wenu. Yenu eswe aali, nwatamba kulilulieka hanga nulele mwanenu ni kufunga kanawa ulo wenu. Kuchi shimbi ja mu Mbimbiliya mujihasa kunukwasa hanga nukumbe yipikalo yacho?

1 NYINGIKENU CHIZE MWANA MAHASA KWALUMUNA MWONO WENU

YIZE MBIMBILIYA YINAMBE: “Zango uhomboloji lili nawo, utu uli nawo.” Nawa zango “kulishi kufupa yuma yalio-liene, kulishi kutenuka nikawashi.” (1 A-Korindu 13:4, 5) Nyi hiwapwa mwana, muhasa kusa chinji mbunge kuli mwana. Lunga lie mahasa kunyonga ngwenyi unamulengulula, kashika kanda uvulama ngwe neye watela kumusa mbunge. Kulihumikiza che ni umbovu we, muyikwasa lunga lie amone ngwenyi wakumusa mbunge, hanga neye akukwase kufunga mwana.

“Yenu malunga . . . twamenu hamwe no nikulita ni mana.” (1 Petulu 3:7) Nyingika ngwe pwo lie tachi jenyi jeswe jakuya kulela mwana. Iye kali ni milimo yinji yaha, kashika mahasa kuhonga hanji kuzeya ni kulema mu mbunge. Ha mashimbu akwo, iye mahasa kupihilila, alioze lihumikize, mumu “yoze keshi kutenuka kawashi kahiana akwa-ndundo.” (Yishima 16:32) Solola mana, nawa mukwase ha yize yinafupiwa.​—Yishima 14:29.

YIZE MUHASA KULINGA:

• Malunga: Kwasenu mapwo jenu ha kufunga ana, chipwe ha ufuku. Tepululenu mashimbu waze nwakuzachisa ku yuma yikwo, nuhase kupwa hamuwika ni mapwo jenu ni anenu

• Mapwo: Muze malunga jenu manukwasa kufunga ana, tayizenu ukwaso wo. Nyi kahashile kulinga kanawa chimwe chuma, kanda nwaamba, alioze alwezenu ni zango chize mahasa kuchilinga

2 KOLESENU USEPA WENU

YIZE MBIMBILIYA YINAMBE: Ayo “kumapwa musunya umuwika.” (Uputukilo 2:24) Chipwe ngwe hi wapwa ni mwana, nyingika ngwo yena ni yoze walimbata nenyi nihindu nuli “musunya umuwika.” Sako tachi hanga ukolese usepa wenu.

Enu mapwo, nwatamba kusakwilila muze malunga jenu manukwasa. Liji lienu liazango “liakuwuka.” (Yishima 12:18) Ni yenu malunga, nwatamba kulweka mapwo jenu ngwenu nwaazanga ni kwalemesa. Achichimiekenu ha milimo yize akulinga mu usoko.​—Yishima 31:10, 28.

“Niumwe kanda afupa kufumbuka chenyi mwene, alioze mutu mweswe akafupe kufumbuka cha mukwo.” (1 A-Korindu 10:24) Ha mashimbu eswe lingenu yuma yipema hali umwe ni mukwo. Pwenu ni shimbu yakulihanjikisa, yakulichichimieka, ni kulivwashana umwe ni mukwo. Kanda unyonga hali yena mwene wika ha chikuma cha kulimona cha lunga ni pwo. Sako mbunge yize yinafupiwa kuli mukwenu. Mbimbiliya yinambe ngwo: “Kanda nulilaka umwe ni mukwo, shina muchipwa ha kulitesa ha shimbu limwe.” (1 A-Korindu 7:3-5) Kashika hanjika chikuma chacho ni umwenemwene ni yoze walimbata nenyi. Kulihumikiza che ni kupanjika kanawa muchikolesa usepa wenu.

YIZE MUHASA KULINGA:

• Kanda uvulama kuwana shimbu liakupwa hamuwika

• Linga yuma yikehe-yikehe muyisolola kuli yoze walimbata nenyi ngwo wamuzanga, ha kumusonekena ni kumwaha tumwe tuma twawana

3 FUMBENU MWANENU

YIZE MBIMBILIYA YINAMBE: “Chize ku ukemba we hiunanyingika je sona Jisandu ja Zambi jize jinahase kukufumba mana mukuzuka ulamwino.” (2 Timoteu 3:15) Litesenu chize munulongesa mwanenu. Iye kali ni uhashi wa kunyingika yuma, ni muze kanda achisemuka. Mwane yoze uchili mujimo, mahasa kunyingika liji lie ni kukukumbulula. Mutangile mikanda muze uchili kanuke. Chipwe ngwe kechi kunyingika yize unatange, alioze muchikamukwasa akazange kutanga muze makola.

Chipwe mwane uchili kanuke, iye mahasa kwivwa yize unambe hali Zambi. Mweche evwe yize unalembe kuli Yehova. (Shimbi Yamuchiali 11:19) Chipwe hakuheha nenyi, mulweze yuma yize Zambi atangile. (Masamu 78:3, 4) Muze mwanenu makola, mamona zango lienu kuli Yehova nawa neye malilongesa kumuzanga.

YIZE MUHASA KULINGA:

• Lemba wite mana akufumba no mwane

• Funyina maliji ni yikuma yilemu hanga mwane aputuke kulilongesa muze uchili kemba