Longeso lia Mbimbiliya lize wakulinga ni Yela ja Yehova liakukwasa kunyingika umwenemwene. Yuma walilongesa yakukwasa kupwa ni usepa upema ni Zambi ni kukwaha kutalatala cha mwono wa mutolo mu paraisu hano hashi mu Wanangana wenyi. Ufulielo we ha Liji lia Zambi wakola chinji. Chikwo nawa, kukunguluka ni mandumbu mu chikungulwila chakunehena yiwape yinji. Hiwanyingika chize Yehova akusongwela atu jenyi musono.—Zeka. 8:23.

Haliapwila muze unalilulieka hanga akupapachise, muyuka chinji ha kuhitulula yuma yize akwa-Kristu akufuliela hamwe ni makulwana a mu chikungulwila. (Hepre. 6:1-3) Yehova anunge ni kukupala ha tachi jize wakusa hanga umunyingike ni kukwaha yiwape yize analakenya.—Yoa. 17:3.

1. Mumu liaka unazange hanga akupapachise?

2. Yehova iya?

• “Yehova iye Zambi mwilu ni hashi. Wakuhi weka niumwe.”—Shimbi 4:39.

• “Yena wika uli ni jina lia Yehova, uli mwe Chitunda helu lia hashi heswe.”—Samu 83:18.

3. Mumu liaka watamba kuzachisa jina lia Zambi?

• “Kashika lembenu ngwenu, Tata nuli mu malilu, jina lienu lipwe lisandu.”—Mateu 6:9.

• ‘Mweswawo matambika ha jina lia Yehova, kumakamulamwina.’—Roma 10:13.

4. Yisanyiko yika Mbimbiliya yakuzachisa hakutwala kuli Yehova?

• ‘Yehova iye Zambi wa mutolo. Mwe Tangi ya masongo a hashi.’—Iza. 40:28.

• ‘Tata nuli mu malilu.’—Mateu 6:9.

• ‘Zambi iye zango.’—1 Yoa. 4:8.

5. Yika muhasa kuhana kuli Yehova Zambi?

• “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe.”—Marku 12:30.

• “Ukawayile Mwene Zambi ye, iye wika ukamulingile.”—Luka 4:8.

6. Mumu liaka unazange kushishika kuli Yehova?

• “Mwanami, pwako ni mana ukawahise mbunge yami, ngukahase kukumbulula yoze manguchoka.”—Yishi. 27:11.

7. Kuli iya wa kulemba, nawa mu jina liaya?

• ‘Pundu pundu, [yami Yesu] ngunambe kuli yenu ngwami, Cheswacho munwita kuli Tata mu jina liami, kumakanwahacho.’—Yoa. 16:23.

8. Yuma yika muhasa kwita mu yilemba?

• “Kashika lembenu ngwenu, Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu. Twehenu kama musono mbolo yetu yize twakufupafupa. Nutukonekene kama makongo jetu ngwe yetu nawa twakukonekena waze ali ni makongo kuli yetu. Kanda nututwala kama kucheseko, alioze tupululenu kama kuli mwe mupi.”—Mateu 6:9-13.

• “Lino lie hamu tuli nalio kuli iye, nyi kachi mutwita chuma chimwe cha kulita ni upale wenyi, aye matwivwa.”—1 Yoa. 5:14.

9. Mumu liaka Yehova mahasa kwecha kwivwa yilemba ya umwe mutu?

• “Kumakateta kuli Yehova, alioze aye kechi kaakumbulula . . . mumu yitanga yize halinga yipi.”—Mika 3:4.

• “Meso ja Mwene hwali hali akwa ululi. Matwi jenyi kakupanjika ku kuliumba cho; alioze meso ja Mwene kakulimika ni waze akulinga yipi.”—1 Petu. 3:12.

10. Yesu Kristu Iya?

• “Semone Petulu yamukumbulula ngwenyi, Yenu mwe Kristu, mwe Mwana wa Zambi ya mwono”—Mateu 16:16.

11. Mumu liaka Yesu ejile hano hashi?

• “Mwe Mwana Mutu kejileko akamuvumbike, alioze hanga iye akavumbike akwo, nikuhana mwono wenyi ndando ya ukuule hali anji.”—Mateu 20:28.

• ‘[Yami Yesu] changutamba kwambujola sango lipema lia Wanangana wa Zambi ku membo akwo nawa: mumu angutumine ha chino.’—Luka 4:43.

12. Kuchi muhasa kusolola usakwililo we ha chitapo cha Yesu?

• “Iye wafwilile eswe, hanga waze achili ni mwono kechi kwenda nawa ni kukaula upale woene, alioze kuli yoze waafwilile mba wahindukile.”—2 Kori. 5:15.

13. Wata uka Yesu ali nawo?

• “Hanangwehe yiyulo yeswe mwilu ni hashi.”—Mateu 28:18.

• “Zambi hanamunangamisa chikolo, hanamwehe jina lize lili helu lia majina eswe.”—Fwili. 2:9.

14. Shina wakutayiza ngwe Chizavu cha Tusongo cha Yela ja Yehova kali ‘ndungo wamwenemwene, wakanyama’ yoze Yesu atongwele?

• ‘Iya kevwe ndungo wamwenemwene, wakanyama, yoze mwata wenyi hamwaha chiyulo cha akwa zuwo lienyi, mukuhana kulia kuli ayo ha mwaka wacho?’—Mateu 24:45.

15. Shina spiritu yisandu mutu?

• ‘Mungelo yamukumbulula ngwenyi, Spiritu yisandu muyikeza hali yena; tachi ja mwe Chitunda kumujikuzulamina chizulie; kashika mwe musandu yoze masemuka, kumakamuvuluka ngwo, Mwe Mwana Zambi.’—Luka 1:35.

• ‘Mba, kama yenu api, nunanyingika kuhana yawana yipema kuli ana jenu, kuma Tatenu wa mwilu kechi kuhana spiritu yisandu kuli waze mamwita, nyi?’—Luka 11:13.

16. Kuchi Yehova akuzachisa spiritu yenyi yisandu?

• “Atangile malilu nikulita ni liji lia Yehova; chizavu chamo cheswe wachitangile ni mwiku wa mu kanwa lienyi.”—Samu 33:6.

• ‘Kumunukatambula tachi, muze spiritu yisandu muyiza hali yenu: kumunukapwa yela jami . . . ndo ku masongo a hashi.’—Yili. 1:8.

• ‘Nilimwe liji lia uprofeto wa Chisoneko mulipwa wa ulumbunwiso wa atu. Mumu uprofeto niumwe kuwejile niumwe mwaka ku upale wa atu, alioze atu ahanjikile cha kuli Zambi, nikuhungumuka cha spiritu yisandu.’—2 Petu. 1:20, 21.

17. Wanangana wa Zambi yika?

• “Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.”—Danie. 2:44.

18. Kuchi Wanangana wa Zambi muukakuyukisa?

• ‘Iye makakusumuna masoji eswe ku meso jo. Kufwa kuchichi kapwako nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.’—Uso. 21:4.

19. Kuchi unanyingika ngwe kwasala hakehe hanga yiwape ya Wanangana yize?

• ‘Tumbaji twenyi yeza kuli iye ukawo ngwo, Twambulwile kama, mwiji muka yuma yino muyikapwa? Chilayi cha kuheta che chika, ni cha kumanunuka cha miaka? Yesu yaakumbulula ngwenyi, . . . akwa vungu limwe makakatukila akwa vungu likwo, ni akwa wanangana umwe makakatukila akwa wanangana ukwo; kumukukapwa tupunga ni yilungo ni minyiko kweka ni kweka. Sango lino lipema lia Wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.’—Mateu 24:3, 4, 7, 14.

• “Ha matangwa a kusula kumukukapwa miaka yikalu. Mumu atu kumakapwa akwa kulifwila ene, akwa kufwila mbongo, akwa kulizata, akwa kulizelula, akwa kushililika, keshi kwononoka kuli yisemi jo, akwa kaleleso, akwa luchisa, keshi zango lia atu, keshi kuhutuka, yilamikiji, keshi kusuula, asasu, keshi kufwila yipema, akwa kuhandukulula, akwa kulipupula, akwa kulifuza, kakuzanga kuheha, kazangile Zambi. Uwayilo wa kumeso kali nawo, alioze kakulikala tachi jawo. Kuli wano nawa kondoloka.”—2 Timo. 3:1-5.

20. Kuchi musolola ngwe Wanangana wa Zambi uli ulemu kuli yena?

• “Liangenu kufupa wanangana wenyi ni ululi wenyi.”—Mateu 6:33.

• “Yesu yamba kuli tumbaji twenyi ngwenyi, Nyi kachi umwe mazanga kwiza kuli yami, akalitune iye mwene, akazundule mutondo wenyi wa lamba, angukaule.”—Mateu 16:24; NM.

21. Satana ni andemoniu aya?

• “Yenu nuli a kuli tatenu Ndiapu, . . . Iye te chingalwe chize ku uputukilo.”—Yoa. 8:44.

• “Ndragau munene amunyashine hashi, mwe kapela wa shakulu, jina lienyi ngwo, Ndiapu kanda Satana, mwe mukwa kupiangula yifuchi yeswe ya hashi. Amunyashine ndo hashi, ni angelo jenyi hamwe nenyi.”—Uso. 12:9.

22. Yika Satana alamikijile Yehova ni waze akumuwayila?

• “Pwo yamukumbulula ngwenyi, Ku mitondo yeswe ya mu munda tunahase kulia. Alioze ku mihuko ya mutondo uze uli mukachi ka munda, Zambi hanambe ngwenyi, Kanda nuyilia, chipwe kukwatako, kuchina munufwa, Kapela yamba kuli pwo ngwenyi, Kufwa kunuchi kufwa, mumu Zambi kananyingika ngwenyi, Ha tangwa lize munuliako meso jenu malaula, munupwa ngwe Zambi, nikunyingika chipema ni chipi.”—Uputu. 3:2-5.

• “Satana yakumbulula Yehova ngwenyi, E, chikowa ha chikowa. Mutu mecha yeswe ali nayo ha kulamwina mwono wenyi.”—Yombi 2:4.

23. Kuchi muhasa kusolola ngwe yize Satana akwamba yili ya mahuza?

• ‘Ukalingile [Zambi] ni mbunge yingunu.’—1 Sango 28:9.

• “Ndo kufwa chami chichi kwecha ungunu wami!”—Yombi 27:5.

24. Mumu liaka atu akufwa?

• “Kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.”—Roma 5:12.

25. Yika yakulingiwa kuli mutu nyi hafwa?

• “Amwono kanayingika ngwo, Mutukafwa, alioze afu kanyingikine nichimwe.”—Chilu. 9:5.

26. Kutalatala chika tulinacho hali waze hanafu?

• “Kumukukapwa uhindukilo wa akwa ululi ni wa yihenge.”—Yili. 24:15.

27. Atu angahi makaya mu malilu akayule hamwe ni Yesu?

• “Namwene mwe Mwana-panga, kanamana ha mulundu wa Zaione, ni hamwe nenyi kulakaji, ni makumi awana, ni tununu awana (144,000), kali ni jina lienyi, ni jina lia Tato, linasonewa ha mahuma jo.”—Uso. 14:1.

Mu longeso lie lia Mbimbiliya, walilongesa yize Yehova anashimbwila hali yena, ni chize watamba kutwama kulita ni shimbi jenyi. Kota walumuna yitanga ni ndako jimwe ku mwono we hanga ulinge yize walilongesa. Amu hiwaputuka kukaula shimbi ja Yehova, muhasa kulinga mulimo usandu wa kwambujola sango lipema.

Kuhitulula yihula yize muyikaulaho muchikukwasa unyingike kanawa shimbi ja Yehova, ni kwiwuluka yuma yize watamba kulinga hanga upwe kavumbi kenyi yoze iye atayiza. Sango jino mujikukwasa kulinga yuma yeswe ni mbunge yipema ni kuhalisa Yehova.—2 Kori. 1:12; 1 Timo. 1:19; 1 Petu. 3:16, 21.

Amu hiwalilongesa yuma yino, kwamba pundu, yena unazange kuzeyela ku chiyulo cha Yehova ni kulinga chihanda mu ululikiso wenyi. Yihula ni Yisoneko ya Mbimbiliya muyikukwasa kuhengwola chinyingi che hakutwala ku kuzeyela wata wa Yehova, chipwe mu chikungulwila, mu usoko hanji kuli manguvulu waze anayulu hano hashi. Kwamba pundu, yena mwokesa zango lie hakutwala ku yuma yize Yehova akulinga hanga afumbe ni kukolweza atu jenyi ku ufulielo. Yuma yacho yimwe yili kukunguluka, kashika muwahilila ha kuya ku kukunguluka ni kuhana makumbululo kulita ni uhashi we.

Chikwo nawa, chihanda chino muchilumbununa ulemu wa kwambujola sango lipema hita shimbu, kukwasa atu hanga anyingike Yehova ni kulilongesa yuma yize iye analingila atu musono. (Mateu 24:14; 28:19, 20) Muchikukwasa nawa hanga unyingike ulemu wa kulihana kuli Yehova ni kukupapachisa. Pwako ni shindakenyo ngwe, Yehova kakuwahilila chinji ha chize yena wakusolola ngwe wakusakwilila ha chawana chenyi cha vumbi chize hanakusolwela.

1. Kuchi ulo wa akwa-Kristu watamba kupwa? Shimbi yika ya Mbimbiliya yize yinasolola ngwo waze alimbata mahasa kulilakula?

• “Te kunwatangile ngwo, yoze waatangile chize ku uputukilo waatangile lunga ni pwo, ngwenyi, Ha chikuma chino mutu akahichike tato ni naye, akalinunge ni mukwo-pwo; e aali kumakapwa musunya umuwika? Chocho hi aali nawa ko, alioze musunya umuwika. Kashika chize Zambi hananungu, niumwe mutu kanda achihandununa. . . . Mweswawo malakula mukwo-pwo shina ha upangala, mba mambata mukwo, malinga utanji: ni yoze mambata yoze hanamulakula, malinga utanji.”—Mateu 19:4-6, 9.

2. Mumu liaka lunga ni pwo waze atwama hamuwika atamba kulimbata kulita ni shimbi? Nyi hiunambata, shina uli ni shindakenyo ngwe ulo we uli wakusonekesa ku nguvulu?

• “Ukaewulwise kuzeyela kuli mianangana, ni akwa kuyula, akononoke, akapwe ni mbunge ya kulinga yitanga yeswe yipema.”—Titu 3:1.

• “Umbachiso akaulemese kuli eswe, ni muhela kanda akausela ku luchisa: mumu mapangala ni yitanji Zambi kumakaapatwila.”—Hepre. 13:4.

3. Chiteli chika ukwete mu usoko?

• ‘Mwanami, panjika ku kufumba cha tatenu; kanda ulituna longeso lia noko.’—Yishi. 1:8.

• ‘Lunga iye mutwe wa mukwo-pwo, chizechene ngwe Kristu nawa iye mutwe wa Chikungulwila, . . . Yenu malunga, zangenu akwenu-mapwo, chizechene ngwe Kristu nawa wazangile Chikungulwila.’—Efwe. 5:23, 25.

• ‘Yenu atata, kanda nukehia ana jenu ku utenu: alioze nualele ni kufumba ni kukanyamisa cha Yehova.’—Efwe. 6:4.

• ‘Yenu ana, ononokenu kuli yisemi jenu ha yuma yeswe, mumu chino chinapemena chikolo kuli Mwene.’—Kolo. 3:20.

• ‘Yenu mapwo zeyelenu kuli akwenu-malunga.’—1 Petu. 3:1.

4. Mumu liaka twatamba kulemesa mwono?

• ‘[Zambi] kakuhana kuli eswe mwono, ni mwiku, ni yuma yeswe. . . . Muli iye tuli ni mwono, muli iye twakwenda.’—Yili. 17:25, 28.

5. Mumu liaka kutwatambile kushiha mutu, chipwe kuchiza ufumba?

• “Nyi kachi atu amwe mazwela, mba malemeka kafumbakaji, . . . ulema umwe muusoloka, kachi akahane mwono ha mwono.”—Kutuhu. 21:22, 23.

• “Meso je amwene mujimba wami shimbu kanda uliwumba. Mu mukanda we yihanda yami yeswe muyili te ya kusoneka, yize machiyiwumba ha tangwa ha tangwa shimbu te kanda yichipwa.”—Samu 139:16.

• ‘Yehova [keshi kuzanga] . . . moko a kushiha mutu chitela chakuhi.’—Yishi. 6:16, 17.

6. Shimbi ya Zambi yika hakutwala ku manyinga?

• “Kanda nukwata . . . ku manyinga, ni kuli tushitu a kuhonda.”—Yili. 15:29.

7. Mumu liaka twatamba kuzanga mandumbu jetu a mu ufulielo?

• ‘Shimbi yaha ngunanwehe ngwami, Nukalizange umwe ni mukwo; chizechene ngwe yami hingunanuzange, ni yenu nawa nukalizange umwe ni mukwo. Ku chino eswe makanyingika yenu nuli tumbaji twami, nyi munupwa ni zango umwe kuli mukwo.’—Yoa. 13:34, 35.

8. Kuchina atu akwo atambule musongo upi uze muhasa kwatwala ku kufwa: (a) Mumu liaka mutu yoze uli ni musongo wacho katambile kulikangayika ni akwo hanji kulimbejala? (b) Mumu liaka iye katambile kwivwa kupiha nyi akwo keshi kumusanyika ku mazuwo jo? (c) Mumu liaka mutu yoze uli ni musongo upi atamba kuya akamupime muze kanda achiputuka usendo wa kulimbata ni umwe? (d) Mumu liaka mutu yoze uli ni musongo upi atamba kuhanjika ni kasongo wa chizavu cha makulwana muze kanda achimupapachisa?

• ‘Kanda nukapwa ni kongo kuli niumwe, shina kulizanga umwe ni mukwo. . . . Zanga mwenyembo we chizechene ngwe wakulizanga yena mwene. Zango kulishi kulinga chipi kuli mwenyembo.’—Roma 13:8-10.

• “Kanda nutala mweswe wa kuli yenu ku yuma yenyi mwene, alioze mweswe wa kuli yenu akatale ku yuma ya akwo nawa.”—Fwili. 2:4.

9. Mumu liaka Yehova anazange hanga tukonekene akwetu?

• “Lihumikizenu umwe ni mukwo, nikulikonekena umwe ni mukwo, nyi umwe kali ni chitela kuli mukwo. Chizechene ngwe Yehova hananukonekena, ni yenu nawa likonekenenu.”—Kolo. 3:13; NM.

10. Yika watamba kulinga nyi umwe ndumbu makuliongela yuma?

• “Nyi kachi ndumbwe makuvulumuna, yako umukumike hakachi kenu ukawenu; nyi makwivwa, hiwazuka ndumbwe. Alioze nyi kakuvwile, twala hamwe ni yena umwe hanji aali akwo, hanga mu kanwa lia yela aali hanji atatu maliji eswe akakole. Nyi kachi maapangula, chambulule ku chikungulwila: nyi mapangula chikungulwila nawa, akapwe kuli yena ngwe mukwa mavungu ni mukwa kufwetesa lijimu.”—Mateu 18:15-17.

11. Kuchi Yehova akumona shili yino?

▪ Upangala

▪ Kuwayila tuponya

▪ Utumwa

▪ Wiji

▪ Yiheho ya mbongo

▪ Uzengi

• ‘Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa, chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga Wanangana wa Zambi.’—1 Kori. 6:9, 10.

12. Amu utanji unalumbunuka yitanga yinji ya kulisumbakenya ni mutu yoze kuwalimbachile nenyi kulita ni shimbi, yika watamba kulinga?

• “Chinenu utanji.”—1 Kori. 6:18.

13. Mumu liaka akwa-Kristu katambile kuzachisa yimwe yitumbo hanji yuma yisasu nyi kaaheleyo ku shipitali?

• “Nutumbikile mijimba yenu mulambu wa mwono, usandu, wa kupemena chikolo kuli Zambi. Chenacho we uvumbiko wenu wakulita ni kunyonga cha mana. Kanda nulitesa ni ndako ja mwakono, alioze alumukenu ku kupwisa chaha cha kunyonga chenu, hanga nukase chinyingi chize wapwa upale upema ni ungunu wa Zambi ni uze wamupemena.”—Roma 12:1, 2.

14. Yitanga yika ya andemoniu yize Zambi akukanjisa?

• “Kanda awana kuli yenu niumwe . . . tahi, chipwe mukwa munanyi, chipwe mukwa kupanda, chipwe nganga, chipwe mukwa kujilika, chipwe mukwa mahamba, chipwe mukwa tufutafuta, chipwe mukwa kuhula afu.”—Shimbi 18:10, 11.

15. Nyi umwe malinga shili yinene, mba kanazange kupwa ni utayizo wa Yehova, yika atamba kulinga kawashi-washi?

• “Natayile shili yami kuli yena, uhenge wami chauswekele. Nambile ngwami: Mungushikisa uvulumunyi wami kuli Yehova.”—Samu 32:5.

• “Nyi kachi umwe mayiza hakachi kenu, atambike makulwana a Chikungulwila; alembe hali iye, akamuwayise ni maji mu jina lia Mwene. Kulemba cha ufulielo kumuchilamwina mukwa kuyiza, ni Mwene kumamuhindwisa. Nyi kachi hanavulumuna milonga, mamukonekenayo.”—Tia. 5:14, 15.

16. Nyi wanyingika ngwe umwe ndumbu kalinga shili yinene, yika watamba kulinga?

• “Muze umwe mutu mavulumuna ha kwivwa liji lia kushililika, mapwa chela ha kuchimona, hanji ha kuchinyingika, mba nyi kachambulwile, mambata uhenge wenyi.”—Levi 5:1.

17. Nyi ndumbu umwe mamusosolola mu chikungulwila, kuchi twatamba kutwama nenyi?

• “Kanda nuliendela ni umwe yoze anavuluka ngwo, Ndumbu, nyi mapwa chitanji, hanji mukwa kwivwa kuzo, hanji mukwa kukombelela mahamba, hanji mukwa kutukana, hanji mukwa kuzengewa, hanji mukwa lufutu; hamwe ni umwe ngwe yono kanda nulia” nenyi.—1 Kori. 5:11.

• “Nyi kachi umwe meza kuli yena, kanehene longeso lino, kanda umutambula mu zuwo lie, kanda umumeneka.”—2 Yoa. 10.

18. Mumu liaka masepa jetu atamba kuzanga Yehova?

• “Nyi muwenda ni akwa mana ni yena nawa muopwa ni mana; alioze mweswe malikata ni yihepuke kumakevwa kusasaminya.”—Yishi. 13:20.

• “Kanda nulionga, usepa upi kuwakupihisa ndako jipema.”—1 Kori. 15:33.

19. Mumu liaka Yela ja Yehova keshi kulinjisa mu yuma ya mafwefwe?

• ‘O hi akwa hashi ko, chizechene ngwe yami [Yesu] hi nguli mukwa hashi ko.’—Yoa. 17:16.

20. Mumu liaka watamba kwononokena manguvulu?

• “Mutu mweswe akazeye kuli waze ali ni poko ya kuyula. Mumu mukwa kuyula wakuhi niumwe shina wa kuli Zambi. Akwa kuyula aze aliko hanaaselacho kuli Zambi.”—Roma 13:1.

21. Nyi shimbi ja atu mujilimika ni shimbi ja Zambi, yika watamba kulinga?

• “Chatutamba kwononoka kuli Zambi, hi kuli atu ko.”—Yili. 5:29.

22. Yisoneko yika muyikukwasa kulihandununa ni akwa-mavungu ha kusakula mulimo?

• “Vungu kulichi kakwata katana likalimike ni vungu likwo. Kechi kalilongesa jita nawa nilimwe tangwa.”—Mika 4:3.

• ‘Atu jami, tuhukenumo [mu Babilonia Yinene] hanga kunuchi kalifutula ni milonga yenyi, hanga kunuchi katambula ya ku lamba lienyi.’—Uso. 18:4.

23. Yiheho yika watamba kutala ni yize watamba kwehuka?

• “Yehova . . . kakuvwila kole yingulungulu ni waze akuzanga upupilo.”—Samu 11:5.

• “Ivwenu lwaji ha ungulungulu weswe; lalaminyenu ku yipema.”—Roma 12:9.

• “Yeswayo yamwenemwene, yeswayo kuyishi lwelia, yeswayo ya ululi, yeswayo yitoma, yeswayo yatela kufwila, yeswayo ya lufuma mupema; nyi kuhiana chimwe chiliko, nyi uhaliso umwe uliko, nyongenu ha yino yuma.”—Fwili. 4:8.

24. Mumu liaka Yela ja Yehova keshi kulichinga ni mayingeleja akwo?

• “Kunwahashile kuliangana ni Mesa ya Mwene ni mesa ya andemoniu.”—1 Kori. 10:21.

• “Lihandununenu no, chocho anambe Mwene. Kanda nukwata ku chuma cha luchisa; mba mungukanutambula.”—2 Kori. 6:17.

25. Shimbi jika ja Mbimbiliya jize mujikukwasa kunyingika nyi watamba kulinga chimwe chiwanyino nyi ka?

• “Alichingile ni mavungu nikulilongesa yitanga yo. Avumbikile tuponya two, necho chalumukine kambwila kuli ayo.”—Samu 106:35, 36.

• “Afu kanyingikine nichimwe.”—Chilu. 9:5.

• “O hi akwa hashi ko, chizechene ngwe yami hi nguli mukwa hashi ko.”—Yoa. 17:16.

• “Kunahu hali yenu miaka yize yapalika kulinga upale wa akwa mavungu, nikwenda mu ujila, ni usolo, ni kunwa vinyu, ni chimbangwinya, ni kunwanwa walwa, ni kukombelela cha kuzelwokesa.”—1 Petu. 4:3.

26. Kuchi yilweza ya mu Mbimbiliya muyikukwasa kunyingika nyi watamba kulinga yiwanyino yakusemuka nyi ka?

• “Chapwile ha tangwa liamuchitatu, lienalio lia kwiwuluka kusemuka cha Falau, iye walingile chiteleka hali ngamba jenyi eswe. Yahetula mutwe wa kapatashi ka akwa kuhana misenge . . . Alioze yasukika kapatashi ka akwa kulinga mbolo.”—Uputu. 40:20-22.

• “Muze tangwa liakusemuka cha Heronde hiliaheta, mwana Herondeya wa pwo, wahanganyine mukachi ko, wapemenene kuli Heronde. Hohene yalakenya ni shingo kumwaha cheswacho meta. Se hamulongesa kuli naye, yamba ngwenyi, Ngwehe kuno ha panda mutwe wa Yoano Chipapachisa. Kashika yatuma akatape Yoano mu zuwo lia ususu.”—Mateu 14:6-8, 10.

27. Mumu liaka unazange kukaula usongwelo wa makulwana a mu chikungulwila?

• “Ononokenu kuli waze apwa tusongo twenu, nukazeye kuli ayo: mumu kakulawoka ha mbunge jenu, chizechene ngwe waze makalumbununa kuli Zambi, hanga akalinge chino ni uwahililo, hi ni kutwa mikuma ko, mumu chino kuchichi kanufumbula.”—Hepre. 13:17.

28. Mumu liaka chili chilemu kuli yena ni kuli asoko je kutanga ni kulilongesa Mbimbiliya mashimbu eswe?

• “Kuwahilila chenyi chili mu shimbi ja Yehova. Kakupukuna mu Shimbi jenyi mwalwa ni ufuku. Iye kumapwa ngwe mutondo wa kutumba ku tupila twa meya, wakwima mihuko yawo ha tungonde twayo. Lifwo liawo kulishi kuma. Cheswacho malinga muchiwaha.”—Samu 1:2, 3.

29. Mumu liaka wa kuzanga kuya ku kukunguluka ni kuhana makumbululo?

• “Mungwambujola jina lie kuli mandumbu jami. Hakachi ka chikungulwila mungukuhalisa.”—Samu 22:22.

• ‘Tulitalenu umwe ni mukwo ni kulikasumuna ku zango ni yitanga yipema. Kanda twehuka kulikungulula hamuwika, ngwe ndako ya amwe, alioze nukalishinjile, ni kuhiana chikolo shimbu munumona lie tangwa linakundama.’—Hepre. 10:24, 25.

30. Mulimo uka ulemu uze Yesu atuhele?

• “Yeenu nukatayise tumbaji a ku mavungu eswe, nikuapapachisa . . . , nikualongesa kufunga yuma yize yeswe nanuhele shimbi.”—Mateu 28:19, 20.

31. Yika Yehova akuzanga muze mutuhana milambu hanji mutukwasa mandumbu jetu?

• “Lemesa Yehova ni yikumba ye.”—Yishi. 3:9.

• “Mutu mweswe akahane nikulita ni chize hanapale mu mbunge yenyi: hi ni wuli ko, hanji ngwe hamukapwola: mumu Zambi kakuzanga chihanyi wa kusehejela.”—2 Kori. 9:7.

32. Yipikalo yika akwa-Kristu mapalika ku mwono wo?

• ‘Kawaha waze anaahungumiona mumu ha ululi, mumu Wanangana wa malilu niwo. Kunwawaha muze manuchoka, ni muze manuhungumiona, ni muze manulamikiza ungulungulu, mumu hali yami. Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangile.’—Mateu 5:10-12.

33. Mumu liaka chili kuyuka chinene kukupapachisa ngwe Chela cha Yehova?

• “Maliji jenu alumukine kuli yami uwahililo ni chiseke cha mbunge yami, mumu hananguluku jina lia yenu, Yehova Zambi.”—Jere. 15:16.

Kanji-kanji upapachiso wakulingiwa ha kukunguluka cha mbonge ni cha mambonge cha Yela ja Yehova. Ha kuhwa cha pande ja upapachiso, mukwa-kuhanjika pande kakwita waze mapapachisa hanga amane ni kukumbulula yihula yino yaali ni liji linene:

1. Nwalikonyeka ku shili yenu ni kulihana kuli Yehova ni kutayiza ngwenu, makanulamwina kupalikila muli Yesu Kristu, nyi?

2. Shina nunanyingika ngwenu, upapachiso wenu muunupwisa Yela ja Yehova mu ululikiso wenyi?

Ha kukumbulula yihula yino, muchisolola ngwo waze mapapachisa ‘kanatayiza kumeso ja mbunga’ ufulielo wo ha ukuule ni kusolola ngwo kalihana kuli Yehova. (Roma 10:9, 10) Kashika waze mapapachisa katamba kunyonga ni kulemba hakutwala ku yihula yino mba ahase kukumbulula kulita ni ufulielo wo.

Shina hiwalihana kuli Yehova ha kulemba kuli iye ni kumulakenya ngwe, muwayila wika iye ni kusa upale wenyi kulutwe lia yuma yeswe ku mwono we?

Shina uli ni shindakenyo ngwe hiwalilulieka hanga akupapachise?

Kuchi mutu atamba kuzala muze anamupapachisa? (1 Timo. 2:9, 10; Yoa. 15:19; Fwili. 1:10)

Waze mapapachisa katamba kuzala “mazalo waze analite,” hanga asolole ‘uwayilo wo kuli Zambi.’ Kashika, waze mapapachisa katambile kuzala mazalo a kusana no waze keshi kusolola vumbi kuli atu. Katamba kuzala mazalo waze analite ni shimbu lia upapachiso.

Yitanga yika mutu atamba kusolola muze anamupapachisa? (Luka 3:21, 22)

Upapachiso wa Yesu uli chilweza ha upapachiso wa akwa-Kristu musono. Iye kanyingikine ngwenyi, upapachiso uli chuma chilemu nawa kachisolwele ku manyonga ni ku yitanga yenyi. Kashika, ha chihela cha upapachiso katambile kusanyinaho, ni kuhehelaho hanji kulingilaho yuma yikwo yize muyipihisa ulemu wa shimbu liacho. Kuchishi kupema mutu muze hamupapachisa, alisambesambe ngwe yoze wakumba yimwe. Chipwe ngwe upapachiso uli shimbu lia chiseke, nihindu chiseke chacho katamba kuchisolola mu mulali walita.

Kuchi kulikungulula ni mandumbu mu chikungulwila muchikukwasa kutwama kulita ni chilakenyo che kuli Yehova?

Chipwe muze hakupapachisa, mumu liaka chili chilemu kununga ni katalilo mupema wa longeso lie lia wika ni kwambujola mashimbu eswe?