1-3. Yihula yika atu akuhula hakutwala ku kufwa, nawa makumbululo aka akuhana amwe mayingeleja?

MBIMBILIYA yinatulakenya ngwo limwe tangwa “kufwa kuchichi kapwako nawa.” (Usolwelo 21:4) Mu Kapitulu 5 twalilongesa ngwo mutuhasa kupwa ni mwono wa mutolo ha mukunda wa ukuule. Alioze nihindu atu machifwa. (Chilumbununyi 9:5) Kashika, chihula chinene mutulihula chino, ‘Yika yakulingiwa kuli mutu nyi hafwa?’

² Kumbululo lia chihula chino likwete ulemu unji, kanji-kanji muze mutufwisa mutu yoze twazanga. Mutuhasa kulihula ngwetu: ‘Kulihi kevwe aya? Shina kanatumono? Kutala mahasa kutukwasa? Mutukeza kamumona kama limwe tangwa?’

³ Mayingeleja anji kakuhana makumbululo eka ni eka ha yihula yino. Amwe kakulongesa ngwo, nyi ena uli mutu mupema, mukaya mu malilu, alioze nyi uli mutu mupi, mukawema mu kahia. Akwo ngwo, mutu nyi hafwa kakwalumuka spiritu hanga alichinge ni tulamba twenyi waze hanafu. Eka nawa ngwo, mutu nyi hafwa kakumusopesa, masemuka cheka, hanji mahinduka ngwe mutu mweka hanji kashitu.

4. Nyonga lika limuwika mayingeleja akulongesa?

⁴ Mayingeleja kakusoloka ngwe kakulongesa yuma yeka ni yeka. Alioze eswe kakulongesa nyonga limuwika. Ayo kakulongesa ngwo mutu kakwete chimwe chuma chize chakusala ni mwono nyi hafwa. Shina nyonga lino lili liamwenemwene?

MUTU NYI HAFWA KULIHI AKUYA?

5, 6. Yika yakulingiwa kuli mutu nyi hafwa?

⁵ Yehova kananyingika yize yakulingiwa kuli mutu nyi hafwa, nawa hanatulweze ngwenyi, nyi mutu hafwa, mwono wenyi wasula. Kufwa chinalumbunuka kuhona mwono. Kashika nyi mutu mafwa, wongo ni manyonga jenyi kuyishi kununga ni mwono ku chimwe chihela.a Nyi twafwa kutuchi kuhasa kutala, kwivwa hanji kunyonga chuma nichimwe.

⁶ Mwanangana Solomone kasonekene ngwenyi: ‘Afu kanyingikine nichimwe. Afu keshi kuzanga hanji kwivwa kole, nawa ngwo ‘muma wa afu kumushi milimo, manyonga, chinyingi, hanji mana.’ (Tanga Chilumbununyi 9:5, 6, 10.) Nawa Mbimbiliya yinatulweza mu Samu 146:4 ngwo, nyi mutu mafwa, ni “manyonga jenyi” kakufwa.

YIZE YESU AMBILE HAKUTWALA KU KUFWA

7. Yika Yesu ambile hakutwala ku kufwa?

⁷ Muze Lazaru sepa lia Yesu afwile, Yesu yalweza tumbaji twenyi ngwenyi: ‘Kasendo ketu Lazaru haya mu tulo.’ Alioze Yesu te keshi ni kwamba ngwenyi, Lazaru kanahwimi. Iye te kanambe ngwenyi: “Lazaru hafwa.” (Yoano 11:11-14) Hano, Yesu te kanatese kufwa ngwe tulo. Iye kakambile ngwenyi, Lazaru kapwile mu malilu hanji hamwe ni tulamba twenyi waze te hanafu. Kakambile nawa ngwenyi, Lazaru te kanamono lamba mu chitende cha kahia hanji ngwenyi, kasemuka cheka chipwe ngwenyi kalumuka kashitu. Ka, Lazaru kapwile ngwe kali mu tulo anji. Yisoneko yikwo yakutesa kufwa ngwe tulo. Mbimbiliya yinambe ngwo, muze Eshetevau afwile “wayile tulo.” (Yilinga 7:60) Postolo Paulu neye kasonekene ngwenyi amwe akwa-Kristu ‘kapombele mu ufwe.’—1 A-Korindu 15:6.

8. Kuchi tunanyingika ngwetu, Zambi kakatutangile hanga tupwe ni kufwa?

⁸ Shina Zambi katangile Alama ni Eva hanga afwe? Ka! Yehova kaatangile hanga atwame hashi ku miaka yeswe ni mwono ungunu. Yehova katangile atu ni nyonga lia kutwama ku miaka yeswe. (Chilumbununyi 3:11) Yisemi keshi kuzanga kumona ana jo mashinakajiwa ni kufwa, ni Yehova neye che akwivwa hali yetu. Nyi Zambi katutangile hanga tutwame ku miaka yeswe, mba mumu liaka twakufwa?

MUMU LIAKA TWAKUFWA?

9. Mumu liaka shimbi yize Yehova ahanyine kuli Alama ni Eva te hi yikalu ko?

⁹ Mu munda wa Endene, Yehova kambile kuli Alama ngwenyi: “Ku mitondo yeswe ya mu munda muhasa kulia cheswacho. Alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.” (Uputukilo 2:16, 17) Shimbi yacho te hi yikalu ko kuyikaula, nawa Yehova kapwile ni ulite wa kulweza Alama ni Eva yipi ni yipema. Nyi te mwononokena Yehova, ayo kachi kasolwele ngwo kanavumbika chiyulo chenyi. Nawa te masolola uwahililo wo ha yuma yeswe yize ahele.

10, 11. (a) Kuchi Satana apiangwile Alama ni Eva? (b) Mumu liaka Alama ni Eva kakapwile ni haze maliongela ha yize alingile?

¹⁰ Alioze, Alama ni Eva kasakwile kwehuka Yehova. Satana kambile kuli Eva ngwenyi: “Kuma, Zambi hanambe ngwenyi, Kanda nukalia ku mitondo yeswe ya mu munda nyi?” Eva yakumbulula ngwenyi: “Ku mitondo yeswe ya mu munda tunahase kulia. Alioze ku mihuko ya mutondo uze uli mukachi ka munda, Zambi hanambe ngwenyi, Kanda nuyilia, chipwe kukwatako, kuchina munufwa.”—Uputukilo 3:1-3.

¹¹ Satana yamba ngwenyi: “Kufwa kunuchi kufwa. Mumu Zambi kananyingika ngwenyi, Ha tangwa lize munuliako meso jenu malaula, munupwa ngwe Zambi, nikunyingika chipema ni chipi.” (Uputukilo 3:4-6) Satana kazangile hanga Eva anyonge ngwe aye mahasa kusakula mwene chipema ni chipi. Ha shimbu lizeliene, Satana yalionga hakutwala ku yize te muyilingiwa nyi Eva te mehuka shimbi ya Zambi. Satana yamba ngwenyi, Eva te kechi kufwa, mba Eva yalia muhuko ni kuhanako mukwo-lunga neye yalia. Alama ni Eva kanyingikine ngwo Yehova te hanaalweza ngwenyi, katambile kulia mihuko yacho. Muze o aulile, yehuka shimbi yipema nawa yashi yize Zambi ahele. Yino yasolwele ngwo keshi kuvumbika Tato wa mu malilu. Te keshi ni haze maliongela ha yize alingile!

12. Mumu liaka chili chinyengo muze Alama ni Eva ehukile shimbi ya Yehova?

¹² Yisemi jetu atangu kahonene vumbi kuli Sakatanga wo ni kumuvwisa chinyengo! Kuchi muwivwa nyi wakulela mwana wa lunga ni wa pwo ni zango lieswe, alioze kulutwe lia matangwa makuhona vumbi ni kulimika ne? Chino kota muchikunehena yinyengo yinji mu mbunge ni ngwami?

13. Maliji waze Yehova ambile ngwenyi, “ku fufuta mukahilukila” yika analumbunuka?

¹³ Muze Alama ni Eva ehukile shimbi ya Zambi o yatokesa uhashi wa kutwama ni mwono wa mutolo. Yehova kambile kuli Alama ngwenyi: “Uli fufuta, ndo ku fufuta mukahilukila.” (Tanga Uputukilo 3:19.) Chinalumbunuka ngwo, Alama te mapwa mavu, ngwe chize apwile muze te kanda achimutanga. (Uputukilo 2:7) Muze Alama avulumwine, yafwa hi te kechi kupwako nawa.

14. Mumu liaka twakufwa?

¹⁴ Nyi Alama ni Eva kononokene kuli Zambi kachi te ni musono kwali. Alioze muze ayo avulumwine kuli Zambi, yafwa. Shili yacho yili ngwe yimwe yikola yipi yize twahingile kuli yisemi jetu atangu. Yetweswe twakusemuka ni shili, kashika twakufwa. (A-Roma 5:12) Alioze lino te hi nyonga lia Zambi ko. Zambi kakazangile hanga atu afwe, kashika Mbimbiliya yinavuluka kufwa ngwo “mukwa-kole.”—A-Korindu 15:26.

UMWENEMWENE WAKUTUTUSULA

15. Kuchi umwenemwene hakutwala ku kufwa wakututusula?

¹⁵ Umwenemwene hakutwala ku kufwa wakututusula ku manyonga api. Mbimbiliya yakulongesa ngwo afu keshi kwivwa yikola hanji yinyengo. Kutuchi kuhasa kuhanjika no chipwe ayo kuhanjika ni yetu. Yetu kutuchi kuhasa kwaakwasa, nawa ayo kechi kuhasa kutukwasa. Afu kechi kuhasa kutulinga upi, kashika kutwatambile kwevwila woma. Alioze, mayingeleja anji kakwamba ngwo, afu kali ni mwono ku chimwe chihela nawa ngwo mutuhasa kwaakwasa, nyi twafweta mbongo kuli mangana hanji miata a mayingeleja. Alioze nyi twanyingika umwenemwene hakutwala ku kufwa, kechi kutwonga nawa.

16. Malongeso aka a mahuza hakutwala kuli afu waze mayingeja akulongesa?

¹⁶ Satana kakuzachisa uwayilo wa mahuza hanga atulingise tunyonge ngwetu afu kali ni mwono. Chakutalilaho, amwe mangana a mayingeleja kakulongesa ngwo, nyi mutu hafwa chimwe chihanda cha ku mujimba wenyi chakununga ni mwono ku chimwe chihela. Shina yingeleja ye che akulongesa, nyi hanji yakulongesa yize Mbimbiliya yakwamba hakutwala kuli afu? Satana kakuzachisa mahuza hanga apiangule atu kuli Yehova.

17. Mumu liaka longeso lia kwocha atu mu kahia kulishi kulemesa Yehova?

¹⁷ Yuma yinji yize mayingeleja akulongesa yili yipi chinji. Chakutalilaho, amwe kakulongesa ngwo atu api makawema mu kahia ka mutulo. Longeso liacho lia mahuza kulishi kulemesa Yehova. Iye kechi keza kamwesa atu lamba lia mutapu au! (Tanga 1 Yoano 4:8.) Kuchi muwivwa nyi umwe chisemi ha kufumba mwanenyi, mocha moko jenyi ha kahia? Ena munyonga ngwe chisemi wacho kali ni mbunge yipi. Nawa kuchi kuzanga kumunyingika. Yino ye Satana anazange hanga tunyonge hali Yehova!

18. Mumu liaka kutwatambile kwivwila afu woma?

¹⁸ Amwe mayingeleja kakulongesa ngwo muze atu akufwa, kakwalumuka spiritu. Mayingeleja jacho kakulongesa ngwo twatamba kuvumbika ni kwivwila woma ma spiritu jacho mumu ngwo mahasa kupwa masepa apema hanji akwa-kole. Atu anji kakufuliela mahuza jacho. Ayo kakwivwila woma afu, kashika akuwayila afu kuhiana Yehova. Twiwulukenu ngwetu afu kechi kuhasa kwivwa nichimwe, kashika kutwatambile kwevwila woma. Yehova kali Sakatanga wetu. Iye kali Zambi wamwenemwene, kashika twatamba kuwayila wika iye.—Usolwelo 4:11.

19. Kuchi kunyingika umwenemwene hakutwala ku kufwa chakutukwasa?

¹⁹ Nyi twanyingika umwenemwene hakutwala ku kufwa, twakutusuka ku malongeso a mahuza a mayingeleja. Nawa umwenemwene uno wakutukwasa kunyingika yilakenyo yipema yize Yehova hanalakenya hakutwala ku mwono wetu kulutwe lia matangwa.

20. Yika mutulilongesa mu kapitulu yoze masulaho?

²⁰ Kushakulu, kavumbi ka Zambi yoze te avuluka ngwo Yombi, kahulile ngwenyi: “Nyi mutu mafwa matwama nawa ni mwono?” (Yombi 14:14) Kutala mutu yoze hanafu mahasa kuhinduka cheka? Kumbululo lize Zambi anatwehe mu Mbimbiliya lili lipema chinji. Mutulilongesa lio mu kapitulu yoze masulaho.

1-3. Yika yatusa eswe mu ufunge, mba kuchi Yehova makatutusula?

A CHINYONGA ngwe hakusa mu zuwo lia ususu ni kukupatwila kufwa, ha mukunda wa chuma chize kuwalingile. Kukushi mutu niumwe makutusula. Nawa kuwanyingikine chize mwono we mupwa kulutwe lia matangwa ni yize muhasa kulinga. Alioze muze mumona ngwe kukushi niumwe makukwasa, mba hi muwivwa ngwo kuli umwe mutu yoze uli ni ndundo ja kukutusula ni kukulakenya kukukwasa! Kuchi muwivwa ku mbunge?

² Yetweswe tuli funge ja kufwa. Kukushi nichimwe chize mutulinga, hanga tuchine ufunge wacho. Alioze Yehova kali ni ndundo ja kututusula ku kufwa. Iye hanalakenya ngwenyi “mukwa kole wa kusula” yoze makakumba kali kufwa.—1 A-Korindu 15:26.

³ Achinyonga uhuzuluko uze muwivwa ha kunyingika ngwe kuchi kulipikala nawa hakutwala ku kufwa! Alioze Yehova kechi kahwisa wika kufwa. Iye nawa makahindwisa atu waze hanafu. Achinyonga chiseke chize mukevwa. Yehova hanalakenya ngwenyi, “afu” makahinduka. (Izaia 26:19) Chino che Mbimbiliya yavuluka ngwo, uhindukilo.

MUZE MUTU YOZE TWAZANGA MAFWA

4. (a) Yika muyihasa kutwaha utakamiso nyi umwe usoko hanji sepa lietu mafwa? (b) Aya waze apwile masepa apema a Yesu?

⁴ Nyi usoko hanji sepa lietu mafwa, twakunenganyana chinji. Kutushi kupwa ni tachi nijimwe. Kukushi nichimwe chize mutuhasa kulinga hanga tumuhindwise. Alioze Mbimbiliya yinatwehe utakamiso. (Tanga 2 A-Korindu 1:3, 4.) Tutalenu chilweza chimuwika chize chinasolola ngwo Yehova ni Yesu kanazange kuhindwisa atu waze twazanga. Muze Yesu apwile hano hashi, kanji-kanji te kakumeneka Lazaru ni mandumbu jenyi, Marta ni Maria. Eswe atatu, te masepa apema a Yesu. Mbimbiliya yinambe ngwo: “Yesu wazangile Marta, ni mwanakwo, ni Lazaru.” Alioze limwe tangwa, Lazaru yafwa.—Yoano 11:3-5.

5, 6. (a) Yika Yesu alingile muze amwene asoko ni masepa ja Lazaru kanalili? (b) Mumu liaka chili utakamiso ha kunyingika chize Yesu evwile hakutwala ku kufwa?

⁵ Yesu kayile ni kutakamisa Marta ni Maria. Muze Marta evwile ngwo Yesu kaneza yaya ni kumupatwiza. Kawahilile chinji ha kumona Yesu, alioze yamwamba ngwenyi: “Mwene, nyi kachi nunakapwa kama kuno, kachi ndumbwami kafwile.” Marta kamwene ngwe Yesu kalalukile chinji. Muze Yesu amwene chize Maria analila, hamwe ni yinyengo yo, aye yevwa yikola yinji ku mbunge. (Yoano 11:21, 33, 35) Yesu kevwile yinyengo yize twakwivwa ni twafwisa mutu yoze twazanga.

⁶ Kunyingika chize Yesu evwile hakutwala ku kufwa cha kututakamisa chinji. Yesu kali ngwe Tato. (Yoano 14:9) Yehova kali ni ndundo ja kuhwisa kufwa ku miaka yeswe, nawa kwasala hakehe hanga achilinge.

“LAZARU TUHUKAMO!”

7, 8. Mumu liaka Marta kakazangile hanga achize liwe ku fuka lia Lazaru, alioze yika Yesu alingile?

⁷ Muze Yesu ahetele ku fuka lia Lazaru, ku unjililo wa fuka kwapwile liwe linene. Yesu yamba ngwenyi: ‘Chizenuko liwe.’ Alioze Marta kakazangile hanga achizeko liwe. Mumu mujimba wa Lazaru te hiwalinga “matangwa awana” mu fuka. (Yoano 11:39) Marta te keshi kunyingika ngwenyi Yesu mahindwisa ndumbwenyi ha shimbu lizeliene.

⁸ Yesu yamba ngwenyi: “Lazaru tuhukamo!” Yize Marta ni Maria amwene yakomwesene chinji. “Mufu yatuhuka, wa kukasa molu ni moko ni miya.” (Yoano 11:43, 44) Lazaru yamuhindwisa! Yapwa nawa hamwe ni asoko ni masepa jenyi. Mala chapwile chikomokeso chinene! Yesu kahindwishile Lazaru.

“MWANA-PWO, NGUNAMBE KULI YENA NGWAMI, HINDUKA”

9, 10. (a) Iya wahanyine ndundo kuli Yesu ja kuhindwisa atu? (b) Mumu liaka sango ja uhindukilo jili jilemu?

⁹ Shina Yesu kahindwishile atu ku ndundo jenyi mwene? Ka. Muze te kanda achihindwisa Lazaru, Yesu yalemba kuli Yehova, nawa Yehova yamwaha ndundo hanga ahindwise najo Lazaru. (Tanga Yoano 11:41, 42.) Iye kakahindwishile wika Lazaru. Mbimbiliya yinatulweza hakutwala kuli umwe mwana-pwo wa miaka 12 yoze te unayiza chinji. Tato, Yaru, kalipikalile chinji, nawa yaliumba kuli Yesu hanga amuuke kama. Te mwanenyi wa wika. Muze te anahanjika ni Yesu, umwe lunga yeza, yamulweza ngwenyi: “Mwane hafwa. Kuchi te mukatalisa Longeshi nawa?” Alioze Yesu yamba kuli Yaru ngwenyi: “Kanda wivwa woma; fuliela lume, mwana kumapwa mungunu.” Mba hi yaya hamwe ni Yaru ku zuwo lienyi. Muze te anakundama ku zuwo, Yesu kamwene ni kwivwa zungo lia atu waze te analili. Yesu yaalweza ngwenyi: “Kanda nulila; mumu kafwileko, mu tulo ali.” Tato ni naye kota kalihulile ngwo, yika Yesu anambe kwamba. Yesu yeta atu eswe hanga atuhuke haze, mba yaya hamwe ni yisemi ja mwana mu chipatulo muze te ali. Yesu ni zango lieswe yakwata ku kwoko lia mwana ni kwamba ngwenyi: “Mwana-pwo, ngunambe kuli yena ngwami, hinduka!” Achinyonga chiseke chize yisemi jenyi evwile muze amwene mwana makatuka ni kuputuka kwenda! Yesu yahindwisa mwano. (Marku 5:22-24, 35-42; Luka 8:49-56) Kashika hita tangwa muze te akumona mwano ayo te kakwiwuluka yuma yize Yehova alingilile kupalikila muli Yesu.a

¹⁰ Atu waze Yesu ahindwishile kafwile nawa. Alioze yuma yize twakutanga hakutwala kuli atu jacho yili yilemu chinji, mumu yakutwaha kutalatala chingunu. Yehova kanazange chinji kuhindwisa atu, kashika makachilinga.

YIZE MUTULILONGESA HA SANGO JA UHINDUKILO

11. Yika Chilumbununyi 9:5 unatulongesa hakutwala kuli Lazaru?

¹¹ Mbimbiliya yinambe pundu ngwo “afu kanyingikine nichimwe.” Chino che chalingiwile kuli Lazaru. (Chilumbununyi 9:5) Ngwe chize Yesu ambile, Lazaru kapwile ngwe te mutulo ali. (Yoano 11:11) Muze iye apwile mu fuka, Lazaru kakanyingikine “nichimwe.”

12. Kuchi tunanyingika ngwetu uhindukilo wa Lazaru walingiwile?

¹² Muze Yesu ahindwishile Lazaru, atu anji achimwene. Chipwe akwa-kole ja Yesu no kanyingikine ngwo kalingile chikomokeso chacho, mumu Lazaru kapwile nawa ni mwono. Chino chasolwele ngwo pundu lume uhindukilo walingiwile. (Yoano 11:47) Atu anji nawa ayile ni kumeneka Lazaru, mba, yaputuka kufuliela ngwo Yesu kamutumine kuli Zambi. Akwa-kole ja Yesu kakapwile chocho, kashika ayo atwamine punga hanga ashihe Yesu ni Lazaru.—Yoano 11:53; 12:9-11.

13. Mumu liaka mutuhasa kupwa ni shindakenyo ngwetu Yehova makahindwisa afu?

¹³ Yesu kambile ngwenyi, “eswe ali mu mafuka” makahinduka. (Yoano 5:28) Chino chinalumbunuka ngwo atu eswe waze ali mu manyonga ja Yehova makaahindwisa. Alioze Yehova katamba kwiwuluka yitanga ya mutu mba ahase kumuhindwisa. Shina iye mahasa kuchilinga nyi? Kuli tununu a tununu a tutongonoshi mu malilu. Mbimbiliya yinambe ngwo Yehova kananyingika majina a tutongonoshi eswe. (Tanga Izaia 40:26.) Kashika, chili chashi kuli iye kwiwuluka atu eswe waze makahindwisa mumu kali ni ndundo jakunyingika jina lia katongonoshi ni katongonoshi. Chikuma chilemu chili ngwo, Yehova mwe watangile yuma yeswe, kashika kali ni ndundo ja kuhindwisa atu.

14, 15. Yika maliji a Yombi anatulongesa hakutwala ku uhindukilo?

¹⁴ Kavumbi washishika Yombi kafulielele ngwenyi uhindukilo kuuli. Iye kahulile ngwenyi: “Nyi mutu mafwa matwama nawa ni mwono?” Mba yamba kuli Yehova ngwenyi: “Musanyika mba mungukumbulula; muwivwa usona ha chitanga cha moko je.” Chochene, Yombi te kananyingika ngwenyi, Yehova kali ni usona wa kuhindwisa afu.—Yombi 14:13-15.

¹⁵ Kuchi wakwivwa hakutwala ku uhindukilo? Kota muhasa kulihula ngwe, ‘Shina asoko ni masepa jami waze hanafu makaahindwisa?’ Chili utakamiso kunyingika ngwo Yehova kanazange chinji kuhindwisa afu. Tutalenu yize Mbimbiliya yinambe hakutwala kuli waze makahindwisa ni ku yihela kuze makatwama.

AYO “MAKEVWA LIJI LIENYI MAKATUHUKA”

16. Mwono wamutapu uka atu waze makahindwisa makapwa nawo hano hashi?

¹⁶ Atu waze ahindwishile ku mashimbu akunyima katwamine nawa ni asoko hamwe ni masepa jo hano hashi. Uhindukilo wa kulutwe lia matangwa newo che muukapwa, alioze uno muukahiana chinji. Mumu liaka? Mumu atu waze makahindwisa hano hashi makatwama ku miaka yeswe, kechi kafwa nawa. Makatwama hashi hapema chinji kuhiana haze tuli musono. Hashi hacho kuhechi kapwa jita, ungulungulu ni misongo.

17. Aya makahindwisa?

¹⁷ Aya makahindwisa? Yesu kambile ngwenyi, “waze eswe ali mu mafuka makevwa liji lienyi, makatuhuka.” (Yoano 5:28, 29) Usolwelo 20:13 unambe ngwo: “Kalunga-lwiji wechele afu aze apwilemo; ni kufwa ni Heteze yechele afu aze apwilemo.” Ewa, tununu ni tununu twa atu makaahindwisa. Postolo Paulu yamba ngwenyi kumukukapwa uhindukilo wa yizavu yaali ya “akwa ululi ni yihenge.” (Tanga Yilinga 24:15.) Yika maliji wano analumbunuka?

18. “Akwa ululi” waze makahindwisa aya?

¹⁸ “Akwa ululi” kali tuvumbi a Yehova ashishika waze apwile hano hashi muze Yesu te kanda achiza. Atu ngwe Noa, Apalahama, Sara, Mose, Rute ni Estere makaahindwisa hanga akatwame hano hashi. Muhasa kutanga sango ja amwe a kuli atu jacho mu mukanda wa A-Hepreu Kapitulu 11. Mba kuchi mutwamba hakutwala kuli tuvumbi twa Yehova ashishika waze akufwa ha matangwa jetu? No kali “akwa ululi” waze makahindwisa.

19. “Yihenge” aya? Nawa uhashi uka Yehova makaaha?

¹⁹ “Yihenge” kali tununu a tununu twa atu waze keshi ni uhashi wa kunyingika Yehova. Chipwe ngwe hanafu, nihindu Yehova kavulamine. Yehova makaahindwisa ni kwaha uhashi wa kulilongesa hakutwala kuli iye ni kumulingila.

20. Shina atu eswe makahindwisa?

²⁰ Shina chino chinalumbunuka ngwo atu eswe waze hanafu makaahindwisa? Ka. Yesu kambile ngwenyi atu amwe kechi kaahindwisa. (Luka 12:5) Iya makasakula atu waze makahindwisa ni waze kechi kahindwisa? Yehova mwe Sopi wakasula, alioze hanahane kuli Yesu chiyulo cha ‘kusopesa akwa mwono ni afu.’ (Yilinga 10:42) Eswe akulinga yuma yipi nawa keshi kuzanga kwalumuna yitanga yo, kechi kaahindwisa.—Tala Maliji Akusongo 19.

UHINDUKILO WA KUYA MU MALILU

21, 22. (a) Uhindukilo wa kuya mu malilu yika unalumbunuka? (b) Mutu mutangu yoze ahindwishile hanga aye mu malilu iya?

²¹ Mbimbiliya yinatulweze nawa hakutwala kuli amwe atu waze makatwama mu malilu. Muze akwaahindwisa hanga aye mu malilu, keshi akwaahindwisa ni mijimba ya musunya. Alioze kakwaahindwisa ni mijimba ya spiritu.

²² Yesu, kapwile mutu mutangu yoze ahindwishile ni mujimba wa wacho. (Yoano 3:13) Muze kwapalikile matangwa atatu ha kufwa cha Yesu, Yehova yamuhindwisa. (Samu 16:10; Yilinga 13:34, 35) Yesu kakamuhindwishile ni mujimba wa musunya. Postolo Petulu kanalumbununa ngwenyi, Yesu “se amushihile mu musunya, alioze amupwishile ni mwono muli spiritu.” (1 Petulu 3:18) Yesu kamuhindwishile ngwe chitangiwa cha ndundo cha spiritu! (1 A-Korindu 15:3-6) Alioze Mbimbiliya yinambe ngwo te hi yiye wika ko mutu wakasula kuhindwisa ni mujimba wa spritu.

23, 24. Aya “mbunga yikepe ya mapanga” waze Yesu ambile, nawa kali angahi?

²³ Muze Yesu te kanda achifwa, kambile kuli tumbaji twenyi ashishika ngwenyi: ‘Ngunayi ngukanululiekele chihela.’ (Yoano 14:2) Chino chinalumbunuka ngwo amwe tumbaji twenyi te maahindwisa hanga aye ni kutwama mu malilu. Angahi e no? Yesu kambile ngwo te mapwa akehe, waze avuluka ngwo “mbunga yikepe ya mapanga.” (Luka 12:32) Postolo Yoano kanasolola unji wa atu jacho muze amwene Yesu “kanamana ha Mulundu wa Zaione [malilu], ni hamwe nenyi 144,000.”—Usolwelo 14:1.

²⁴ Ha shimbu lika akwa-Kristu 144,000 te maputuka kwahindwisa? Mbimbiliya yinambe ngwo, chino te muchilingiwa muze Kristu maputuka kuyula mu malilu. (1 A-Korindu 15:23) Etu tuli ha shimbu liacho, nawa akwa-Kristu anji a kuli 144,000 hanayi kulu mu malilu. Waze achili hano hashi ha matangwa jetu nyi hafwa, kakwaahindwisa hazehene ni kuya mu malilu. Alioze, kulutwe lia matangwa atu anji makaahindwisa hanga akatwame mu Paraisu hano hashi.

25. Yika mutulilongesa mu kapitulu yoze masulaho?

²⁵ Kwasala hakehe, Yehova matusula atu eswe ku kufwa, mba kufwa kuchichi kapwako! (Tanga Izaia 25:8.) Mba waze akuya mu malilu, yika akuya ni kulingamo? Mbimbiliya yinalumbununa ngwo ayo makayula hamwe ni Yesu mu Wanangana wa Zambi. Mutulilongesa chinji hakutwala ku Wanangana wacho mu kapitulu yoze masulaho.