Mutwe ulemu wa Mbimbiliya unatale ha Wanangana wa Zambi. Yehova makazachisa Wanangana wacho hanga akapwise hashi heswe Paraisu. Wanangana wa Zambi yika? Kuchi tunanyingika ngwetu, Wanangana wacho unayulu musono? Yuma yika yize Wanangana wacho hiwalinga? Yika muukalinga kulutwe lia matangwa? Ha longeso lino ni lize mulihataho, mutumona makumbululo a yihula yino.

1. Wanangana wa Zambi yika nawa Mwanangana wa Wanangana wacho iya?

Wanangana au uli unguvulu wa Yehova Zambi. Yesu Kristu, mwe Mwanangana wa Wanangana wacho yoze unayulu kukatuka mu malilu. (Mateu 4:17; Yoano 18:36) Mbimbiliya yinahanjika hakutwala kuli Yesu ngwo: “Iye kumakayula . . . ndo ku miaka ya mutolo.” (Luka 1:32, 33) Ngwe Mwanangana wa Wanangana wa Zambi, Yesu makayula hashi.

2. Aya waze makayula hamwe ni Yesu?

Yesu kechi kayula ukawenyi. Kashika atu “a ku mavungu eswe, ni ku malimi eswe, ni kuli atu eswe, ni ku minyachi yeswe, . . . kumakayula hashi.” (Usolwelo 5:9, 10) Atu angahi waze makayula ni Yesu? Chize haze Yesu ejile hashi, tununu a tununu twa atu kakupwa tumbaji twenyi. Alioze atu 144,000 e wika makaya mu malilu hanga akayule hamwe ni Yesu. (Tanga Usolwelo 14:1-4.) Akwa-Kristu akwo eswe makatwama hano hashi mushi lia Wanangana wacho.—Samu 37:29.

3. Mumu liaka Wanangana wa Zambi wahiana wa atu?

Chipwe ngwe manguvulu amwe musono kakweseka kulinga yuma yipema, nihindu o keshi ni ndundo ja kulinga yuma yeswe yize akuzanga. Kanji-kanji, manguvulu kakulisalakana chinji. Chipwe chocho, waze akusalakana akwo, keshi kukwasa atu. Alioze, Mwanangana wa mu Wanangana wa Zambi, Yesu, niumwe kechi keza kamusalakana. Zambi “makakolesa umwe wanangana uze kuuchi kanonga.” (Daniele 2:44) Yesu makayula hashi heswe. Kechi kasolola katonde. Yesu kali mukwa-zango, kakwete utu ni ululi. Chikwo nawa, makalongesa atu hanga akalimone ngwe chize iye akwamona—ni zango, utu ni ululi.—Tanga Izaia 11:9.

4. Nguvulu wa ndundo makayula hashi heswe

Yesu kakwete ndundo jinji jize mujihasa kumukwasa kuyula hashi kuhiana nguvulu mweswawo wa atu. Tanga Mateu 28:18, mba nushimutwine chihula chino:

• Kuchi wata wa Yesu walisa ni wa manguvulu akwo a hashi?

Unguvulu wa atu kanji-kanji wakwalumuka. Chikwo nawa, hita nguvulu kakuyula wika mu chifuchi chimuwika. Mba yika mutwamba hakutwala ku Wanangana wa Zambi? Tanga Daniele 7:14, mba nushimutwine yihula yino:

• Mumu liaka chili chipema kunyingika ngwo, Wanangana wa Zambi “kuuchi kanonga”?

• Mumu liaka chili chipema Wanangana wacho kuyula hashi heswe?

5. Wanangana wa atu katamba kuuchizaho ni kusalakanyisaho weka

Mumu liaka Wanangana wa Zambi watamba kusalakana wanangana wa atu? Tala CHINEMA, mba nushimutwine chihula chinahateho.

CHINEMA: Wanangana wa Zambi Yika?—Chihanda Chikehe (1:41)

• Muze atu akuyula yika yakulingiwa?

Tanga Chilumbununyi 8:9, mba nushimutwine chihula chino:

• Ku nyonga lie, shina Wanangana wa Zambi watamba kusalakana wanangana wa atu? Mumu liaka?

6. Wanangana wa Zambi muukapwa ni akwa-kuyula waze anatunyingika kanawa

Amu Mwanangana wetu Yesu apwile hano hashi ngwe mutu wa musunya, makahasa “kwivwa keke ha kukokoloka chetu.” (A-Hepreu 4:15) Malunga ni mapwo 144,000 waze makayula hamwe ni Yesu, Yehova kakwasakula “ku mavungu eswe, ni ku malimi eswe, ni kuli atu eswe, ni ku minyachi yeswe.”—Usolwelo 5:9.

• Ku nyonga lie, shina chili chipema kunyingika ngwe, Yesu ni atu waze makayula hamwe nenyi, no kapwile hano hashi ngwe atu a musunya? Mumu liaka?

7. Wanangana wa Zambi ukwete shimbi jipema chinji

Manguvulu musono kakusa shimbi jize jakufunga atu jo. Wanangana wa Zambi newo ukwete shimbi jize atu jawo atamba kukaula. Tanga 1 A-Korindu 6:9-11, mba nushimutwine yihula yino:

• Ku nyonga lie, kuchi hashi muhakapwa muze atu eswe makakaula shimbi ja Zambi?a

• Ku nyonga lie, shina chinalite lume Yehova kushimbwila hanga atu akononokene shimbi jacho? Mumu liaka?

• Yika yinasolola ngwo, atu waze keshi kwononokena shimbi jacho mahasa kwalumuka?—Tala versu 11.

YIZE WALILONGESA

Wanangana wa Zambi uli umwe unguvulu wamwenemwene mu malilu uze muukayula hashi heswe.

Kuhitulula

• Aya makayula mu Wanangana wa Zambi?

• Kuchi Wanangana wa Zambi wahiana wa atu?

• Yuma yika yize Yehova akushimbwila hanga atu waze ali mushi lia chiyulo cha Wanangana wenyi alinge?

HENGWOLA NAWA

Nyingika yize Yesu alongesele hakutwala ku kuze Wanangana wa Zambi watwama.

“Shina Wanangana wa Zambi Uli Chuma Chize Chatwama mu Mbunge ya Mutu?” (Lusango wa ha internet)

Mumu liaka Yela ja Yehova akusakula kushishika ku Wanangana wa Zambi ni kwehuka mawanangana a hano hashi?

Kushishika ku Wanangana wa Zambi (1:43)

Hengwola hanga unyingike yize Mbimbiliya yakwamba hakutwala kuli atu 144,000 waze Yehova akusakula hanga akayule ni Yesu.

“Iya Makaya mu Malilu?” (Lusango wa ha internet)

Yika yakwashile umwe pwo mu zuwo lia ususu kupwa ni shindakenyo ngwenyi, Zambi wika mwe makaneha chifuchi cha ululi?

“Nazangile Chinji Chifuchi Chize Chikwete Ululi” (Despertai!, wa Novembro 2011)

Wanangana wa Zambi waputukile kuyula mu malilu ha mwaka 1914. Matangwa a kusula no kaputukile ha mwaka wacho. Kuchi tunachinyingika? Tutalenu yize Mbimbiliya yaliangile kwamba, ni yuma yize yinalingiwa hashi ni yitanga yize atu akusolola chize ha mwaka 1914.

1. Yika uprofeto wa mu Mbimbiliya unasolola?

Mukanda wa Daniele wasolwele ngwo, Wanangana wa Zambi te muuputuka kuyula ha mashimbu waze akuvuluka ngwo, “tungonde shimbiali.” (Daniele 4:16, 17) Ha kupalika cha mashimbu, Yesu yavuluka mashimbu jacho ngwenyi, “miaka ya akwa mavungu” ni kulongesa nawa ngwenyi, mashimbu jacho te kanda achihwa. (Luka 21:24) Kashika, ngwe chize mutumona, tungonde shimbiali kahwile ha mwaka 1914.

2. Yuma yika hanji yitanga yika twakumona chize ha mwaka 1914?

Tumbaji twa Yesu kamuhulile ngwo: “Chilayi cha kuheta che chika, ni cha kumanunuka cha miaka?” (Mateu 24:3) Yesu yaaha chilayi cha yuma yize te muyilingiwa muze maputuka kuyula mu Wanangana wa Zambi mu malilu. Yuma yimwe yize ambile yili: Jita, zala ni minyiko yinene. (Tanga Mateu 24:7.) Mbimbiliya yaprofetezele nawa ngwo, ha “matangwa a kusula” yitanga ya atu te muyipwisa “miaka yikalu” chinji. (2 Timoteu 3:1-5) Yuma ni yitanga yacho, yakusoloka zwalala kukatuka ha mwaka 1914.

3. Mumu liaka yuma ya hano hashi yaputukile kupiha chinji muze Wanangana wa Zambi waputukile kuyula?

Muze Yesu amupwishile Mwanangana mu Wanangana wa Zambi, yasa jita ni Satana ni andemoniu jenyi mu malilu. Chocho, Yesu yakumba Satana. Mbimbiliya yinambe ngwo, “amunyashine ndo hashi, ni angelo jenyi hamwe nenyi.” (Usolwelo 12:9, 10, 12) Satana kali ni ufwatulo unji mumu kananyingika ngwenyi, kwasala hakehe amunongese. Kashika anamwesa lamba linji atu eswe hano hashi. Kanda ukomoka ha kumona yuma yipi yize yinalingiwa hano hashi! Wanangana wa Zambi muukahwisa lamba lieswe.

NYINGIKA NAWA

4. Mbimbiliya yinasolola ngwo Wanangana wa Zambi waputukile kuyula ha mwaka 1914

CHINEMA: Wanangana wa Zambi Waputukile Kuyula ha Mwaka 1914 (5:02)

Zambi kalotesele Mwanangana wa Babilonia Nabukanezore. Chilota chacho ni ulumbunwiso uze Daniele ahanyine, te yinatale hali Nabukanezore ni ha Wanangana wa Zambi.—Tanga Daniele 4:17.a

Tanga Daniele 4:20-26, hanyima zachisa kamushete kali mushi mba ukumbulule yihula yino:

• (A) Yika Nabukanezore amwene mu chilota chenyi?—Tala versu 20 ni 21.

• (B) Yika te muyilingiwa ku mutondo?—Tala versu 23.

• (C) Yika te muyilingiwa ha kuhwa cha “tungonde shimbiali”?—Tala versu 26.

Chize Chilota Cha Mutondo Chinakwate ha Wanangana wa Zambi

UPROFETO (Daniele 4:20-36)

Kuyula

(A) Mutondo unene

Kuyula yachikanjisa

(B) “Pakulenu mutondo” ni kwecha hanga kupalike “tungonde shimbiali”

Kuyula yachifunyisa

(C) “Wanangana wenu muukola”

Kumanunuka chitangu cha uprofeto uno . . .

• (D) Mutondo yika te unalumbunuka?—Tala versu 22.

• (E) Kuchi kuyula chenyi achikanjishile?—Tanga Daniele 4:29-33.

• (F) Yika yalingiwile kuli Nabukanezore ha kuhwa cha “tungonde shimbiali”?—Tanga Daniele 4:34-36.

UMANUNUKO UTANGU

Kuyula

(D) Nabukanezore, Mwanangana wa Babilonia

Kuyula yachikanjisa

(E) Kulutwe lia mwaka 606 K.M.J., Nabukanezore yazaluka, chocho yecha kuyula ha miaka shimbiali

Kuyula yachifunyisa

(F) Nabukanezore yapwa cheka ni uhashi wenyi wa kuyula

Kumanunuka chamuchiali cha uprofeto uno . . .

• (G) Mutondo yika te unalumbunuka?—Tanga 1 Sango ja Mianangana 29:23.

• (H) Ha shimbu lika o echele kuyula? Kuchi tunanyingika ngwetu, kuyula cho chapwile mu ukanjiso muze Yesu apwile hano hashi?—Tanga Luka 21:24.

• (I) Ha shimbu lika, nawa kuliko Wanangana wenyi aufunyishine?

UMANUNUKO WAMUCHIALI

Kuyula

(G) Mianangana A-Izalele waze anamanyinako unguvulu wa Zambi

Kuyula yachikanjisa

(H) Yerusaleme kayinongesene, chino yichikanjisa kuyula cha mianangana A-Izalele ha miaka 2.520

Kuyula yachifunyisa

(I) Yesu yaputuka kuyula mu malilu ngwe Mwanangana mu Wanangana wa Zambi

5. Hashi halumuka chinji chize ha mwaka 1914

Tala CHINEMA.

CHINEMA: Chize ha Mwaka 1914 Hashi Halumuka Chinji (1:10)

Yesu kasolwele yuma yize te muyilingiwa muze mapwa Mwanangana. Tanga Luka 21:9-11, mba nushimutwine chihula chino:

• Yuma yika yize wakumona hanji wakwivwa musono?

Postolo Paulu kasolwele chize atu te mapwa ha matangwa a kusula a kuyula cha atu. Tanga 2 Timoteu 3:1-5, mba nushimutwine chihula chino:

• Yitanga yika yize wakumona kuli atu musono?

6. Kuyula cha Wanangana wa Zambi chatamba kututakamisa

Tanga Mateu 24:3, 14, mba nushimutwine yihula yino:

• Mulimo uka ulemu uze unasolola musono ngwo, Wanangana wa Zambi unayulu?

• Kuchi muhasa kukwasa mulimo wacho?

Wanangana wa Zambi hiunaputuka kuyula, kashika kwasala hakehe hanga uputuke kuyula hashi heswe. Tanga A-Hepreu 10:24, 25, mba nushimutwine chihula chino:

• Yika mutu ni mutu atamba kulinga amu “lie tangwa linakundama”?

YIZE WALILONGESA

Uprofeto wa mu Mbimbiliya, mashimbu ni yuma yize yinalingiwa musono, yinasolola ngwo, Wanangana wa Zambi hiwaputuka kuyula. Twakusolola ngwetu tunafuliela ha umwenemwene wacho, muze twakwambujola ni kupwa ha kukunguluka cha chikungulwila.

Kuhitulula

• Yika yalingiwile ha kuhwa cha tungonde shimbiali ngwe chize mukanda wa Daniele waprofetezele?

• Yika yinakwehe shindakenyo ngwe, Wanangana wa Zambi waputukile kuyula ha mwaka 1914?

• Kuchi mutuhasa kusolola ngwetu, twakufuliela ngwo Wanangana wa Zambi unayulu musono?

HENGWOLA NAWA

Nyingika yize akwa-kuhengwola ni atu akwo akwamba hakutwala ku kwalumuka chize chakulingiwa hashi putu ha mwaka 1914.

“Mashimbu Waze Manyonga ja Atu Apihile Chinji” (Laulenu!, Abril 2007)

Tala chize uprofeto uli ha Mateu 24:14 walumwine mwono wa umwe lunga.

“Yami Te Nakuzanga Chinji Beisebol Kuhiana Yuma Yeswe!” (Kaposhi wa Kutalila No. 3 2017)

Kuchi tunanyingika ngwetu, uprofeto uli ha mukanda wa Daniele kapitulu 4, unahanjika ha Wanangana wa Zambi?

“Shimbu Lika Wanangana wa Zambi Waputukile Kuyula? (Chihanda 1)” (Kaposhi wa Kutalila 1 wa Outubro, 2014)

Yika yinasolola ngwo, “tungonde shimbiali” anatongola ha mukanda wa Daniele kapitulu 4, kahwile ha mwaka 1914?

“Shimbu Lika Wanangana wa Zambi Waputukile Kuyula? (Chihanda 2)” (Kaposhi wa Kutalila 1 wa Novembro, 2014)

Wanangana wa Zambi unayulu. Kwasala hakehe Wanangana wacho muwalumuna yuma hano hashi. Tushimutwinenu yuma yimwe yipema yize muyikalingiwa mu Wanangana wa Zambi.

1. Kuchi Wanangana wa Zambi muukaneha sambukila ni ululi hashi?

Yesu, Mwanangana wa mu Wanangana wa Zambi makanongesa atu eswe api ni manguvulu a hashi mu jita ya Armagedone. (Usolwelo 16:14, 16) Muze yino muyikalingiwa, chilakenyo chakwamba ngwo: “Kwasala hakehe mba yingulungulu hi akuhi” muchikamanunuka. (Samu 37:10) Kupalikila mu Wanangana, Yesu makalingisa hanga hashi akazale too ni sambukila ni ululi.—Tanga Izaia 11:4.

2. Kuchi mwono muukapwa muze upale wa Zambi muukalingiwa hano hashi?

Kupalikila mu chiyulo cha Wanangana wa Zambi, “akwa ululi kumakazuka chifuchi; kumakatwamamo ku miaka ya mutolo.” (Samu 37:29) Achinyonga kutwama mu chifuchi muze atu eswe ali akwa-ululi, akuzanga Zambi ni kulizanga umwe ni mukwo! Niumwe kechi kayiza, eswe makapwa ni mwono wa mutolo.

3. Yika Wanangana wa Zambi muukalinga muze atu api makaanongesa?

Muze atu api makaanongesa, Yesu makayula ngwe Mwanangana ha 1,000 ka miaka. Ha shimbu liacho, iye ni atu 144,000 waze makayula hamwe nenyi, makakwasa atu hano hashi hanga akapwe angunu. Ku songo lia 1,000 ka miaka, hashi muhakapwa paraisu ni atu eswe no makawahilila ha kwononokena shimbi ja Yehova. Hachino, Yesu makahilwisa Wanangana kuli Tato, Yehova. Muze chino muchikalingiwa, jina lia Yehova ‘mulikapwa lisandu.’ (Mateu 6:9, 10) Kashika, muchikasoloka zwalala ngwo, kumana Yehova kali Mwanangana mupema yoze wakulihulumba hali atu jenyi. Yesu makanongesa Satana, andemoniu ni mutu mweswawo makazanga kulimika ni wata Wenyi. (Usolwelo 20:7-10) Yuma yeswe yipema yize Wanangana wa Zambi muukaneha muyikanunga ya mutolo.

NYINGIKA NAWA

4. Wanangana wa Zambi muukenyeka mawanangana eswe a hashi

“Mutu mapwa ni chiyulo helu lia mukwo ni kumupinjisa.” (Chilumbununyi 8:9) Kupalikila mu Wanangana wenyi, Yehova makahwisa upi weswe au wakulingiwa hano hashi.

Tanga Daniele 2:44 ni 2 A-Tesalonika 1:6-8, mba nushimutwine yihula yino:

• Yika Yehova ni Mwanenyi Yesu makalinga kuli mianangana a hano hashi ni kuli atu waze akukwasa mianangana jacho?

• Kuchi yuma yize walilongesa hakutwala kuli Yehova ni Yesu, yinakwehe shindakenyo ngwe, yitanga yo muyikapwa ya ululi?

5. Yesu kali Mwanangana mupema

Ngwe Mwanangana wa Wanangana wa Zambi, Yesu makalinga yuma yinji yipema hali atu jenyi. Tala CHINEMA hanga umone chize Yesu asolwele ngwenyi kakuzanga atu. Chikwo nawa, mumona ngwe Yehova kamuhele ndundo ja kuchilinga.

CHINEMA: Yesu Kasolwele Yize Wanangana wa Zambi Muukalinga (1:13)

Yuma yize Yesu alingile muze apwile hano hashi, yinasolola yize Wanangana wa Zambi muukalinga. Yiwape yika yinasonewa hano yize wakushimbwila chinji kulutwe lia matangwa? Tanga yisoneko yize muyikukwasa kunyingika yiwape yacho.

6. Wanangana wa Zambi muukaneha yiwape yinji

CHINEMA: Muze Chijimbi Chinakundama, Hulikilenu Meso Jenu Hali Yesu!—Yiwape ya Wanangana (4:38)

Tanga Samu 145:16, mba nushimutwine chihula chino:

• Kuchi wakwivwa ha kunyingika ngwe, Yehova makahwisa “usona wa waze eswe atwama ni mwono”?

YIZE WALILONGESA

Wanangana wa Zambi muukamanununa upale wenyi weswe. Muukalumuna hashi heswe paraisu haze muhakazala too ni atu apema waze makawayila Yehova ku miaka ya mutolo.

Kuhitulula

• Kuchi Wanangana wa Zambi muukapwisa jina lia Zambi lisandu?

• Mumu liaka twatamba kupwa ni shindakenyo ngwetu, Wanangana wa Zambi muukamanununa yilakenyo yeswe twakutanga mu Mbimbiliya?

• Ha yuma yeswe yipema yize Wanangana wa Zambi muukaneha, chuma chika chize wakushimbwila chinji?

HENGWOLA NAWA

Nyingika yize Armagedone yinalumbunuka.

“Jita ya Armagedone Yika?” (Lusango wa ha internet)

Tanga hakutwala ku yuma yize muyikalingiwa ha mashimbu waze Yesu avulukile ngwenyi “luyinda munene.”—Mateu 24:21.

“Yika Luyinda Munene Analumbunuka?” (Lusango wa ha internet)

Tala chize asoko mahasa kupukuna hakutwala ku yiwape yize Wanangana wa Zambi muukaneha.

Nyonga Ngwe Uli mu Paraisu (1:50)

Ha lusango wakwamba ngwo, “Napwile ni Yihula Yinji Yize te Yakungupinjisa,” nyingika chize umwe lunga mukwa-mafwefwe awanyine yuma yize te akufupa.

“Mbimbiliya Yakwalumuna Mwono wa Atu” (Kaposhi wa Kutalila 1 wa Janeiro, 2012)