Chize Mutuhasa Kukwata Yiyulo Yipema

Tulieswe twakukwata yiyulo. Yiyulo yimwe muyihasa kukwata ha mwono wetu ni ha usepa wetu ni Yehova. Chakutalilaho, mutuhasa kukwata chiyulo cha kuze mututwama, chize mutuhasa kuzuka mbongo hanji nyi mutumbata hanji mutuya ku ulo. Nyi mutukwata yiyulo yipema, mutuwahilila ku mwono ni kuvwisa Yehova kuwaha.

1. Kuchi Mbimbiliya muyihasa kukukwasa kukwata yiyulo yipema?

Shimbu kanda ukwata chiyulo, lemba kuli Yehova ni kuhengwola Mbimbiliya hanga umone yize yakwamba hakutwala ku chiyulo chize unazange kukwata. (Tanga Yishima 2:3-6.) Ha mashimbu amwe, Yehova kakuhana usongwelo wa zwalala. Kashika, kwononokena Yehova muze mukwata yiyulo, chili chuma chilemu chize watamba kulinga.

Yika watamba kulinga nyi ngwe usongwelo umwe wa Mbimbiliya kuushi zwalala? Chipwe chocho, Yehova mahasa kukusongwela ‘mu jila yize chakutamba kuya.’ (Izaia 48:17) Kuchi akuchilinga? Yehova kakuchilinga ha kuhana shimbi jize mujihasa kukukwasa. Shimbi ja mu Mbimbiliya jili umwenemwene uze wakusolola manyonga a Zambi ni chize akwivwa. Ha mashimbu amwe, mutuhasa kunyingika chize Zambi akunyonga hakutwala ku chimwe chikuma nyi twatanga umwe lusango mu Mbimbiliya. Nyi mutunyingika chize Yehova akunyonga, mutuhasa kukwata yiyulo yize muyimuvwisa kuwaha.

2. Yuma yika watamba kunyonga shimbu kanda ukwata chiyulo?

Mbimbiliya yakwamba ngwo: “Chikanyame kakutala kanawa ku kwenda chenyi.” (Yishima 14:15) Chino chinalumbunuka ngwo, shimbu kanda tukwata chiyulo, twatamba kusa mashimbu hanga tunyonge ha yize tunazange kulinga. Muze munyonga ha hita chikuma, lihule ngwe: ‘Shimbi jika ja mu Mbimbiliya jize jinatale ha chikuma chino? Chiyulo chika chize muchingunehena sambukila mu mbunge? Kuchi chiyulo chami muchikwata hali akwetu? Chahiana ulemu, shina muchivwisa Yehova kuwaha?’—Shimbi Yamuchiali 32:29.

Yehova kali ni ulite wa kutulweza upeme ni upi. Muze twakunyingika shimbi ja mu Mbimbiliya ni kusa tachi hanga tujikaule, twakufumba shimbi yetu ya mbunge. Shimbi ya mbunge yapwa ngwe liji mu mbunge yetu lize liakututoweza hakutwala ku chipi ni chipema. (A-Roma 2:14, 15) Nyi twapwa ni shimbi ya mbunge yakufumba kanawa, muyitukwasa kukwata yiyulo yipema.

NYINGIKA NAWA

3. Echa hanga Mbimbiliya yikusongwele

CHINEMA: Echa Hanga Shimbi ja Mbimbiliya Jikusongwele (5:54)

• Chawana chika chipema chize Yehova atuhele?

• Mumu liaka Yehova atuhele utuswilo?

• Yuma yika Yehova atuhele hanga yitukwase kukwata yiyulo yipema?

Nyi unazange kunyingika chimwe chilweza cha yimwe shimbi ya mu Mbimbiliya, tanga A-Efwesu 5:15, 16, mba nushimutwine chize muhasa kuzachisa kanawa mashimbu je hanga . . .

• utange Mbimbiliya matangwa eswe.

• upwe lunga, pwo, chisemi hanji mwana mupema.

• upwe ha kukunguluka cha chikungulwila.

4. Fumba shimbi ye ya mbunge hanga ukwate yiyulo yipema

CHINEMA: “Pwenu ni Mbunge Yipema” (5:13)

• Kulita ni chinema, yuma yika ndumbwetu alingile mba afumbe kanawa mbunge yenyi ni kukwata yiyulo yipema yize yakuvwisa Yehova kuwaha?

Mumu liaka kutwatambile kwita kuli akwetu hanga atukwachile yiyulo? Tanga A-Hepreu 5:14, mba nushimutwine yihula yino:

• Chipwe ngwe chili chashi kuhula akwetu muze tunazange kukwata chiyulo, yika yetwene twatamba kulinga?

• Chuma chika tukwete chize muchihasa kutukwasa kufumba mbunge yetu ni kukwata yiyulo yipema?

5. Lemesa manyonga ja akwenu

Atu kalisa, kashika ni yiyulo yo yalisa. Kuchi mutuhasa kusolola ngwetu, twakulemesa manyonga ja akwetu? Tutalenu yilweza yaali:

Chilweza 1: Tunyongenu hali umwe pangi yoze wakuzanga kuzala mipano ha yiwanyino hanji ku mulimo wenyi wa hita tangwa, mba malukila mu chikungulwila muze mapangi akwo keshi kulivwa kanawa ha kumumona kanazala mupano.

Tanga A-Roma 15:1 ni 1 A-Korindu 10:23, 24, mba nushimutwine yihula yino:

• Kulita ni yisoneko yino, chiyulo chika pangi wacho mahasa kukwata? Yika ena muhasa kulinga nyi uli ni mutu yoze unatalinga ha chuma chize shimbi ye ya mbunge yakutayiza hanga ulinge?

Chilweza 2: Umwe ndumbu kananyingika ngwenyi, Mbimbiliya kuyishi kukanjisa kunwa walwa. Chipwe chocho, aye keshi kuzanga kunwa walwa. Hachino mamusanyika ha chimwe chiwanyino haze mandumbu akwo ananu walwa.

Tanga Chilumbununyi 7:16 ni A-Roma 14:1, 10, mba nushimutwine yihula yino:

• Kulita ni yisoneko yino, chiyulo chika ndumbu yono mahasa kukwata? Yika muhasa kulinga nyi mumona mukwenu kanalingi chuma chize mbunge ye kuyishi kutayiza?

Yuma yika muyihasa kutukwasa kukwata yiyulo yipema?

1. Eta kuli Yehova hanga akukwase kusakula yize mulinga.—Tiangu 1:5.

2. Hengwola ha mikanda yetu ni mu Mbimbiliya hanga uwane yiyulo yipema. Muhasa nawa kuhanjika ni akwa-Kristu waze ajama.

3. Nyonga ha chize chiyulo che muchikwata hali yena mwene ni hali akwenu.

YIZE WALILONGESA

Nyi twanyingika chize Yehova akunyonga hakutwala ku chimwe chikuma, mutuhasa kukwata yiyulo yipema. Chikwo nawa, twatamba kunyonga ha chize yitanga yetu muyihasa kukwasa hanji kupinjisa akwetu.

Kuhitulula

• Kuchi muhasa kukwata yiyulo yize muyivwisa Yehova kuwaha?

• Kuchi muhasa kufumba shimbi ya mbunge ye?

• Kuchi muhasa kusolola ngwe wakulemesa manyonga ja akwenu?

HENGWOLA NAWA

Kuchi mutuhasa kukwata yiyulo yize muyitukwasa kukolesa usepa wetu ni Yehova?

“Kwata Yiyulo Yize Yakuhalisa Zambi” (Kaposhi wa Kutalila 15 wa Abril, 2011)

Nyingika nawa hakutwala ku chize Yehova akutwaha yiyulo.

Yehova Kakusongwela Atu Jenyi (9:50)

Tala yuma yize yakwashile umwe lunga kukwata chiyulo chikalu.

Yehova Kakulakenya Yuma Yipema (5:46)

Nyingika nawa chize muhasa kuvwisa Yehova kuwaha nyi kuwamwene usongwelo uze watamba kukaula.

“Shina Wakufupiwa Usongwelo wa mu Mbimbiliya Mashimbu Eswe?” (Kaposhi wa Kutalila 1 wa Dezembro, 2003)