Shina Yela ja Yehova Kakutayiza Mapwo Alongese?

Ewa, Yela ja Yehova hashi heswe kakutayiza mapwo alongese. Mapwo kali chizavu chinene cha akwa-kwambujola sango lipema lia Wanangana wa Zambi. Mbimbiliya hiyinambe kulu ha Samu 68:11 hakutwala kuli mapwo ngwo: “Mwanangana kakuhana liji, alioze mapwo waze mambulula sango, chihuji chinene.”

Chipwe chocho, kutwatambile kutesa mulimo uze Yela ja Yehova a mapwo akulinga ni mulimo wa mapwo a mu mayingeleja. Hatwama kalisa munene ha milimo yo. Kalisa muka watwamaho?

Kalisa watwamaho kali yono: mapwo waze akwete yiteli mu Mayingeleja, kakulongesa wika mapanga jo mukachi ka Yingeleja. Wano e wika ayo akulongesa. Alioze, Yela ja Yehova a mapwo kakulongesa atu waze ali haze lia chikungulwila, kali waze akuwana mu mulimo wa kwambujola ku zuwo ni zuwo ni ku yihela yikwo nawa.

Kalisa mukwo yoze watwama hali mapwo Akwa-Mayingeleja kali yono, ayo kakusongwela ni kulongesa mu chikungulwila. Alioze mapwo Yela ja Yehova keshi kusongwela ni kulongesa mu chikungulwila muze muli malunga akupapachisa. Mumu mulimo uno wa kulongesa hanauhane kuli malunga waze wakwete yiteli mu chikungulwila.—1 Timoteu 3:2; Tiangu 3:1.

Mbimbiliya muze yakuhanjika hakutwala kuli waze atamba kupwa ni yiteli mu chikungulwila, yakuhanjika wika ali malunga. Tutalenu chilweza chize postolo Paulu ahichikile. Muze asonekenene Titu yoze wapwile kalayi, iye yamba ngwenyi: “Ha chikuma chino nakuhichikile mu Kreta, . . .hanga ukasele makulwana mu membo eswe.” Paulu yamba nawa ngwenyi, lunga mweswe katamba kupwa “lunga wa pwo umuwika, waze keshi kusumiwa ha kuhungumuka ni yipi, hanji kukolema.” (Titu 1:5, 6) Paulu kahanyine nawa usongwelo kuli Timoteu unalifu ni uno ha kwamba ngwenyi: “Nyi umwe mafupa milimo ya kalayi, kachi mazanga milimo yipema. Kashika chatamba kalayi akapwe keshi kapalia, lunga wa pwo umuwika, . . . mukwa kujama ha kulongesa.”—1 Timoteu 3:1, 2.

Mumu liaka milimo ya kusongwela mu chikungulwila atamba kuyilinga wika kuli malunga? Paulu kambile ngwenyi: “Chatayijile pwo kulongesa, chipwe kuyula mwe lunga, alioze akahole. Mumu aliangile kutanga Alama, mba kulutwe atangile Eva.” (1 Timoteu 2:12, 13) Hachino, chize atangile atu, chinasolola iya Zambi ehele mulimo wa kulongesa ni kusongwela.

Tuvumbi twa Yehova kakukaula chilweza cha Kasongo wo, Yesu Kristu. Kambaji Luka kasonekene hakutwala ku mulimo wa kwambujola uze Yesu alingile ngwenyi: “Yapalika ndusu limbo ni limbo, chihunda ni chihunda, nikwambujola sango lipema lia wanangana wa Zambi.” Kulutwe, Yesu yatuma tumbaji twenyi hanga alinge mulimo wowene: “Yapalika ndusu mu yihunda, nikwambujola sango lipema.”—Luka 8:1; 9:2-6.

Musono, tuvumbi twa Yehova, malunga ni mapwo, kakwambujola ni zango hanga amanunune yize Yesu ambile ngwenyi: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.”—Mateu 24:14.