Chipwe Musono Muhasa Kuwahilila Ku Mwono
KULUTWE lia matangwa mutukapwa ni mwono upema, mumu kutuchi kayiza, kushinakajiwa chipwe kufwa! Alioze, musono mwono unakaliwa chinji. Yika muyihasa kutukwasa kuwahilila ku mwono musono? Mbimbiliya muyihasa kutukwasa kuwahilila ni kupwa ni mwono upema. Tutalenu yimwe yipikalo ya ku mwono ni chize Mbimbiliya muyihasa kutukwasa.
WAHILILA NI YIZE ULI NAYO
Chiyulo cha mu Mbimbiliya: “Ndako jenu jikapwe kujishi kufwila cha mbongo; pwenu akwa kuyuka ni yuma yize nuli nayo.”—A-Hepreu 13:5.
Musono, atu kakwamba ngwo twatamba kupwa ni yuma yinji mba tuwahilile ku mwono. Alioze Mbimbiliya yinambe ngwo, munuhasa “kuyuka ni yuma yize nuli nayo.” Kuchi mutuhasa kuyuka?
Ehuka “kufwila . . mbongo.” Atu anji kakutokesa usoko, usepa ni lufuma wo hamukunda wa “usolo wa upite.” (1 Timoteu 6:10) Atu jacho, kakulisa mu kapinda munji! Che kwamba, waze akuzanga chinji upite “kechi kuyuka.”—Chilumbununyi 5:10.
Atu kali alemu chinji kuhiana yikumba. Hi chipiko kupwa ni yikumba. Alioze twatamba kunyingika ngwetu, yikumba kuyichi kuhasa kutuzanga, atu wika e mahasa kutuzanga. Kupwa ni “sepa” wamwenemwene muchitukwasa kuwahilila ku mwono.—Yishima 17:17.
NYI MUTUKAULA SHIMBI JA MU MBIMBILIYA, MUTUHASA KUPWA NI MWONO UPEMA
NYONGONONA CHIPWE NGWE UNAYIJI
Chiyulo cha mu Mbimbiliya: “Mbunge ya chiseke yapwa yitumbo yipema.”—Yishima 17:22.
Chizechene ngwe “yitumbo yipema,” chiseke muchihasa kutukwasa kunyongonona chipwe ngwe tunayiji. Alioze kuchi mutuhasa kuwahilila muze tunayiji?
Sakwila. ‘Matangwa jetu eswe’ mapwa api, nyi twanyonga wika ha yipikalo yetu. (Yishima 15:15) Shimbu tulinge chino, Mbimbiliya yinambe ngwo: “Pwenu nikusakwila.” (A-Kolosu 3:15) Lilongese kuwahilila ni yuma yipema ya ku mwono we, chipwe yuma yikehe-yikehe. Mutuhasa kuwahilila ku mwono, ha kumona yuma ngwe, kunjila cha tangwa, ni kusehejela cha mutu yoze twakuzanga.
Kwasa akwenu. Chipwe ngwe twakupinda ni umwe musongo, nihindu “chinawaha kutambula alioze shinaho kuhana.” (Yilinga 20:35) Muze akwetu akuwahilila ha yuma yize twakwalingila, chino chakutwaha uwahililo, nawa chakutepulula yipikalo yetu. Mutuhasa kuwahilila ku mwono wetu ha kukwasa akwetu.
KOLESA ULO WE
Chiyulo cha mu Mbimbiliya: “Nukasele shindakenyo ha yuma yahiana kupema.”—A-Fwilipu 1:10.
Nyi waze alimbata keshi kupalikisa mashimbu anji hamuwika, chino muchihasa kupihisa ulo wo. Pwo ni lunga katamba kulemesa ulo wo, mumu che chuma chilemu chinji ku mwono wo.
Kulinga yuma hamuwika. Munuhasa kulitesa hanga nulinge yuma hamuwika. Mbimbiliya yinambe ngwo, “Shinaho aali, hi umuwika ko.” (Chilumbununyi 4:9) Munuhasa kuteleka hamuwika, kuya kuwande, kuhanjieka ni kuheha.
Solola zango lie. Mbimbiliya yinakolweza lunga ni pwo hanga alizange umwe ni mukwo ni kulisolwela vumbi. (A-Efwesu 5:28, 33) Kuseha, kulikangayika ni kulikwasa, yuma yino muyihasa kukolesa ulo. Nawa lunga hanji pwo katamba kusolola wika zango lia ulo kuli yoze alimbata nenyi.—A-Hepreu 13:4.