Yihula Ya Waze Akutanga Mikanda Yetu

Muze Satana ambile ngwenyi, Eva kechi kufwa nyi malia ku muhuko wa mutondo wa chinyingi cha chipema ni chipi, shina iye kalwezele Eva nyonga lize atu anji ali nalio musono ngwo, alma kuyishi kufwa?

Kota ka. Ndiapu kakambile ngwenyi, nyi Eva malia ku muhuko uze Zambi akanjishile te masoloka ngwe kafwa, alioze chimwe chihanda cha mujimba wenyi chize kuchishi kumoneka (chize musono amwe akuvuluka ngwo alma yize kuyishi kufwa) te muchinunga ni mwono ku chihela chikwo. Kupalikila muli kapela, Satana yalweza Eva ngwenyi nyi nwalia ku muhuko wa mutondo, “kunuchi kufwa.” Ni maliji wano, Satana te kanambe ngwo, nyi Eva malia ku muhuko wa mutondo wacho, iye manunga ni mwono nawa ngwo te mapwa ni mwono upema. Mwono uze te muumutwala hanga ahone kukaula usongwelo wa Zambi.—Uputu. 2:17; 3:3-5.

Nyi longeso lia alma yize kuyishi kufwa, ngwe chize akulilongesa musono kuliakaputukile mu Endene, mba tangwa lika liaputukile? Kutushi ni shindakenyo ha chikuma chino. Alioze yize tunanyingika yili ngwo, uwayilo weswe wa mahuza kaunongesele ha Sanga Linene lia Meya ha matangwa ja Noa. Nilimwe longeso lia uwayilo wa mahuza kuliakasalile ha Sanga lia Meya, mumu Zambi kalamwinyine wika tuvumbi twenyi amwenemwene—Noa ni asoko jenyi.

Kashika, longeso lia alma yize kuyishi kufwa, liaputukile hanyima lia Sanga lia Meya. Kwamba pundu, muze Zambi alumbanganyishine malimi ha Mbapele, chocho atu yalimwanga “hashi heswe,” ayo kota kambachile nyonga lia kwamba ngwo, atu kali ni alma yize kuyishi kufwa. (Uputu. 11:8, 9) Chipwe ngwe longeso liacho liaputukile ha shimbu lieswalio, alioze tuli ni shindakenyo ngwetu, Satana, Ndiapu “tato ya mahuza” mwe wa kusongwela longeso liacho nawa kakuwahilila muze akumona mahuza jacho malimwanga hashi heswe.—Yoa. 8:44.