Mu chiyulo cha Zambi, yitangiwa yeswe yapwile ni sambukila hamwe ni kulinunga

Mumu liaka Tunafupiwa Wanangana wa Zambi?

Muze atangile atu atangu, Tangi yetu, Yehova, mwe wika te wa kuyula. Yuma yeswe yize anakalingila atu kayilingile mumu lia zango. Iye kalingile munda upema mu Endene ni kuuhana kuli atu hanga atwamemo. Nawa yaaselamo yuma yinji ya kulia. Chikwo nawa, yahana milimo yipema kuli atu hanga alinge. (Uputukilo 1:28, 29; 2:8, 15) Nyi atu kanungine mu chiyulo cha Zambi, kachi kali ni sambukila.

Alama kanakwate muhuko wa kukanjisa uze amwaha kuli Eva. — Atu atangu kalitunyine Zambi kupwa Mwanangana wo

Mbimbiliya yinasolola ngwo umwe mungelo chihulia, yoze avuluka ngwo Satana kanda Ndiapu, yalimika ni ulite wa kuyula cha Zambi. Iye yamba nawa ngwenyi, atu te mawahilila nyi maliyula ene chakuhona usongwelo wa Zambi. Chaluyinda, yisemi jetu atangu, Alama ni Eva, yatayiza mahuza a Satana, chocho yalichinga ku uhulia wa Satana ni kulimika ni chiyulo cha Zambi.—Uputukilo 3:1-6; Usolwelo 12:9.

Amu Alama ni Eva alitunyine chiyulo cha Zambi, chocho yatokesa Paraisu, kutalatala cho cha mwono wa mutolo ni mujimba ungunu. (Uputukilo 3:17-19) Chiyulo cho, chakwachile nawa hali ana waze te masema. Mbimbiliya yinambe ngwo mumu lia uhenge wa Alama, “shili yanjilile hano hashi, ni ku shili kufwa chanjilile.” (A-Roma 5:12) Shili yiyineha nawa lamba likwo hali atu. Mbimbiliya yinambe ngwo: “Mutu mapwa ni chiyulo helu lia mukwo ni kumupinjisa.” (Chilumbununyi 8:9) Mu maliji akwo, muze atu akuliyula-ene nihindu kwakwiza milonga yinji.

KUYULA CHA ATU YICHIPUTUKA

Nimorote kanamane ni kulizata cheswe. Kunyima lienyi kuli atu waze anatungu kaposhi. — Nimorote kalimikine ni Yehova

Nguvulu mutangu hano hashi yoze anatongola mu Mbimbiliya kali Nimorote. Iye kalimikine ni chiyulo cha Yehova. Kukatuka ha mashimbu a Nimorote ndo musono, atu waze akwete wata kakuzachisa chipi wata wo hanga amwese akwo lamba. Hikwapalika miaka 3.000, Mwanangana Solomone kambile ngwenyi: “Masoji ja waze anaapinjisa nihindu keshi ni akwa kualembejeka. Akwa kupinjisa kali ni tachi hamwe no, nihindu kukushi akwa kulembejeka.”—Chilumbununyi 4:1.

Yipikalo yoyene ye tunapinji nayo musono. Ha mwaka 2009, umwe mukanda wa Nações Unidas yiwamba ngwo, kuyula chipi che “chinaneha lamba lieswe lize liakusoloka mukachi ka atu.”

MASHIMBU AKUYULA CHA ZAMBI HAHETA!

Hashi hanafupiwa nguvulu mupema ni kuyula chipema. Yino ye Zambi anatulakenya!

Yizulie: Yize yakwiza ku kuyula cha atu. 1. Umwe pwo wa ku Asia kanatwame ha chihela haze hanapihia ni mwanenyi mu kondo yoze unalila. 2. Umwe kashinakaji yoze unayiza kali ha muhela mu shipitali. 3. Maswalale kanase jita. 4. Atu kanalimika ni nguvulu, hakwata pandela. 5. Umwe pwo ni mwanenyi wa pwo kali haze lia zuwo lio hawana vidro ya chikolo ya kupalula. 6. Yimwe mbonge muze akulingila yuma muli ngoji ja kahia kazembwe. — Chipwe manguvulu waze akwete mbunge yipema, nihindu keshi kuhasa kuhwisa milonga yeswe ya atu

Zambi hanase umwe Wanangana hanji unguvulu hanga ukasalakane manguvulu ja atu, mba “wene muukakola wa mutolo.” (Daniele 2:44) Wanangana wacho we akwita mu yilemba kuli tununu twa atu. (Mateu 6:9, 10) Alioze hi Zambi mwene ko makayula mu Wanangana wacho. Iye hanasakula umwe Mwanangana yoze wapwile hano hashi. Iya mwenawo Zambi asakwile?