Kulihi Mutuhasa Kuwana Yilakenyo ya Sakatanga Wetu?

Kukatuka haze atangile atu, Sakatanga wetu te kakuhanjika no kupalikila muli angelo ni muli aprofeta. Chikwo nawa, iye yazanga hanga sango ni yilakenyo yacho ayisoneke mu umwe mukanda. Zambi kanalakenya ngwo, mutuhasa kupwa ni uwahililo kulutwe lia matangwa. Mba kulihi mutuhasa kuwana yilakenyo ya Zambi musono?

Sango ja Zambi jili mu Mbimbiliya. (2 Timoteu 3:16) Kuchi Zambi azachishile aprofeta hanga asoneke sango jenyi? (2 Petulu 1:21) Zambi kasele sango jenyi mu manyonga ja akwa-kusoneka, mba ayo yajisoneka. Chizechene nawa ni musono, nyi umwe mutu meta mukwo hanga amusonekene mukanda mu jina lienyi, nihindu mukanda wacho muupwa wa mutu yoze wetanga hanga amusonekenewo. Chizechene nawa, chipwe ngwe Zambi kazachishile atu hanga asoneke sango jenyi, nihindu iye mwe Mwenya Sango jize ayo asonekene.

LIJI LIA ZAMBI LILI KWESWE

Liji lia Zambi lili ni ulemu unji, kashika iye kanazange hanga atu eswe alitange ni kulinyingika. Musono, “sango lipema lia mutolo” kanaliambujola “ku mavungu eswe, ni ku minyachi yeswe, ni ku malimi eswe.” (Usolwelo 14:6) Ni ukwaso wa Yehova, Mbimbiliya ya muwundu hanji ya chihanda, yili mu unji wa malimi 3,000, yinahiane mikanda yeswe hano hashi.