Kupwa Cheka Sepa lia Yehova

HITA mwaka, mapanga anji kakwafunyisa mu chikungulwila. Nyonga ha ‘uwahililo unene uze wakupwa mwilu’ muze hita umwe wa kuli ayo akuhiluka! (Luka 15:7, 10) Nyi kakufunyisa mu chikungulwila, muhasa kupwa ni shindakenyo ngwe, Yesu, angelo ni Yehova mwene, kanawahilila chinji ha chize wahiluka mu umwenemwene. Alioze, muze unayi ni kupwa cheka sepa lia Yehova, mukusoloka yimwe yipikalo. Yipikalo yika? Yika muyihasa kukwasa kuyikumba?

YIPIKALO YIKA?

Hanyima lia kuhiluka mu chikungulwila, mandumbu amwe kakununga ni kupinda ni manyonga api. Hanji muhasa kulivwa ngwe chize Mwanangana Ndawichi alivwile. Chipwe ngwe te hamukonekena shili yenyi, nihindu yamba ngwenyi: “Yuma ya uhenge yangukumba.” (Samu 40:12; 65:3) Muze akuhiluka kuli Yehova, mandumbu amwe kakununga ni kulisuma mulonga hanji kwivwa sonyi ha miaka yinji. Isabelle,a yoze asosolwele mu chikungulwila ha miaka 20, yamba ngwenyi: “Kuli yami chapwile chikalu chinji kutayiza ngwami Yehova kangukonekena.” Nyi muhonga, usepa we ni Yehova muuhasa kukokoloka nawa. (Yishi. 24:10) Kanda wecha hanga chino chilingiwe.

Amwe kakunyonga ngwo, keshi kuhasa kulinga yeswe yize mafupiwa hanga apwe nawa sepa lia Yehova. Hanyima lia kumufunyisa mu chikungulwila, Antoine yamba ngwenyi: “Navulamine yuma yeswe yize nalilongesele muze te kanda achingusosolola.” Mumu lia kupwa ni manyonga wano, amwe chakwakalila kulinga yuma ya ku spiritu.

Tuchinyongenu ngwe, umwe kakundukundu kapihisa limwe zuwo. Muze mwenya-zuwo mamona chize zuwo liapwa, iye mevwa yikola ku mbunge ha kunyonga mashimbu ni mulimo uze mapwa nawo ha kulitungulula. Chino nawa che chakulingiwa nyi mulinga shili yinene yize muyipihisa usepa we ni Yehova. Muhasa kulipikala ha mulimo unene uze mupwa nawo ha kululieka cheka ufulielo we. Alioze kuwafupiwile kulinga yino ukawe.

Yehova kanatulweze ngwenyi: “Tweyenu tulishimwinye hamuwika.” (Iza. 1:18) Yena hiunase tachi jinji hanga ‘ulishimwinye’ ni Yehova, nawa iye kakukuzanga ha yize walinga. Achinyonga ha chino: Yehova mahasa kuzachisa chilweza che hanga ahane kumbululo ha luchoko wa Satana!—Yishi. 27:11.

Amu hiwafuna mu umwenemwene, yena wakundama kuli Yehova, nawa iye kanalakenya ngwenyi, neye makundama kuli yena. (Tia. 4:8) Alioze, kanda uwahilila wika ha chize akwenu amona ngwo wafuna mu chikungulwila. Unafupiwa kununga ni kukolesa zango hali Tatenu kanda Sepa lie, Yehova. Kuchi muhasa kuchilinga?

TESA KULINGA YIMWE KULITA NI UHASHI WE

Tesa yize mulinga kulita ni uhashi we. Iwuluka ngwe, fundamentu ya ufulielo we yichili yikolo, hanji ngwetu, yena unachiwuluka yuma yitangu walilongesele hakutwala kuli Yehova ni yilakenyo yenyi ya kulutwe. Alioze, unafupiwa kululieka cheka mwono we wa Ukristu, mumu wapihile. Kashika, watamba kwambujola mashimbu eswe, kukunguluka ni kupalikisa mashimbu ni mandumbu je a ku ufulielo. Tala yuma yimwe yize muhasa kulinga.

Hanjika ni Yehova mashimbu eswe. Tatenu kananyingika ngwenyi, mumu lia kulilamikiza, muchihasa kupwa chikalu kulemba kuli iye. (Roma 8:26) Alioze, ‘likolweze mu kulemba.’ (Roma 12:12) Andrej, yamba ngwenyi: “Yami te nakulilamikiza chinji ni kwivwa sonyi. Alioze muze te nakulemba, manyonga wano api kapwile ni kutepuluka. Te nakupwa ni sambukila ya ku mbunge.” Nyi kuwanyingikine yize muwita mu yilemba, muhasa kulilongesa Samu kapitulu 51 ni 65, muwanaho yilemba ya Ndawichi muze alikonyekene.

Lilongese Liji lia Zambi mashimbu eswe. Nyi wachilinga, mukolesa ufulielo ni zango lie hali Yehova. (Samu 19:7-11) Felipe, yamba ngwenyi: “Kuchakapwile ni kulilongesa Mbimbiliya matangwa eswe kashika nalingile yuma yize Yehova keshi kuzanga. Yami chakazangile kulinga upi wacho kaali keswe, hachino, yingusa longeso lia wika ha chihela chitangu ku mwono wami.” Ni yena muhasa kuchilinga. Nyi kuwamwene yize mulilongesa mu longeso lie lia wika, eta ukwaso kuli umwe sepa lie wajama ku ufulielo.

Likate cheka ni mandumbu. Atu amwe muze akuhiluka mu chikungulwila, kakwivwa woma ha kunyonga ngwo mandumbu kanaevwila uli. Larissa, yamba ngwenyi: “Te nakwivwa sonyi jinji. Napwile ni kwivwa ngwe nalemekene ku mbunge mandumbu jami mu chikungulwila. Manyonga jacho kanungine ha miaka yinji.” Pwako ni shindakenyo ngwo, makulwana ni mandumbu akwo waze ajama kanazange kukukwasa hanga upwe cheka sepa lia Yehova. (Tala mushete, “Yika Makulwana Mahasa Kulinga?”) Ayo kanawahilila chinji ha chize wahiluka kuli Yehova nawa kanazange hanga ni yena uwahilile!—Yishi. 17:17.

Kuchi muhasa kukundama ku chikungulwila? Pwako ni kukunguluka poso jeswe hamwe ni mandumbu je ni kwambujola mashimbu eswe. Kuchi chino muchihasa kukukwasa? Felix, yamba ngwenyi: “Mandumbu eswe kanakawahilila chinji muze nahilukile mu chikungulwila. Namwene ngwami mandumbu kakunguzanga. Ayo eswe kangukwashile kulivwa ngwe nahiluka cheka mu usoko, ni kulivwa ngwe Yehova kangukonekena ni kuya kulutwe.”—Tala mushete, “Yika Muhasa Kulinga?”

KANDA UHONGA!

Nyingika ngwe muze unase tachi hanga upwe cheka sepa lia Yehova, Satana manunga ni kukusela “yikwiko” mu jila. Iye kanafupu wika kukuzeyesa. (Luka 4:13) Kashika lilulieke nawa kolesa ufulielo we haliapwila.

Yehova kalakenyene hakutwala kuli mapanga jenyi ngwenyi: “Mungukafupa waze anatoko; mungukahilwisa waze hanajimbala; mungukajichika muya yilema; mungukakolesa akwa upekepeke.” (Eze. 34:16) Yehova hanakwase tuvumbi twenyi anji hanga akolese cheka ufulielo wo. Muhasa kupwa ni shindakenyo ngwe, iye kanazange kukukwasa hanga upwe cheka sepa lienyi ni kukolesa usepa wacho.

Yika Makulwana Mahasa Kulinga?

Makulwana kali ni chiteli chilemu chakukwasa mandumbu waze mafuna mu chikungulwila hanga akolese nawa usepa wo ni Yehova. Tala yize makulwana mahasa kulinga hanga aakwase.

Akwasenu anyingike ngwo kaazanga. Postolo Paulu kanyingikine ngwenyi, chivulumunyi yoze walikonyeka yinyengo muyihasa “kumushata.” (2 Kori. 2:7) Muchilita iye kwivwa sonyi ni kunenganyana. Kashika Paulu akolwezele chikungulwila ngwenyi: “Chanutamba kumukonekena ni kumutakamisa.” Mandumbu waze akufunyisa mu chikungulwila, kakufupiwa ukwaso hanga apwe ni shindakenyo ngwo, Yehova ni mandumbu jo a ku ufulielo kakwazanga. Mba ahone kunenganyana chinji, muchilita makulwana kwachichimieka ni kwakwasa ha yize mafupiwa.

Lembenu hamwe no. “Kuliumba cha mukwa ululi chili ni tachi jinji.” (Tia. 5:16) Larissa yoze hitwatongola, yamba ngwenyi: “Yami nahanjikile ni makulwana hakutwala ku kuyambashana chami ni woma uze napwile ni kwivwa. Ayo yalemba hamwe ni yami ni kungulembelako. Chocho yingunyingika ngwami, makulwana a mu chikungulwila te keshi kunguvwila uli. Ayo kazangile kungukwasa kupwa cheka sepa lia Yehova.” Theo, yamba ngwenyi: “Yilemba ya makulwana yangukwashile kupwa ni shindakenyo ngwami, Yehova kakunguzanga nawa kakulihulikila ha yuma yipema yize nakulinga hi ha yuma yipi wika ko.”

Pwenu masepa jo. Atu waze hanafunyisa mu chikungulwila, kanafupiwa kulikata ni mandumbu jo. Justin, umwe mukulwana yamba ngwenyi: “Zachisa uhashi weswawo mupwa nawo hanga waasanyike nwambujole hamuwika, chahiana ulemu, pwako ni kuya ni kwameneka. Kulitaka no chili chilemu chinji!” Mukulwana mukwo, Henry yamba ngwenyi: “Muze mandumbu akwo mamona ngwo, makulwana kanalikate ni ndumbu yoze afunyisa mu chikungulwila, no membulula chilweza cho.”

Akwasenu hanga alilongese. Sepa wajama mahasa kukwasa ndumbu yoze afunyisa mu chikungulwila hanga apwe ni katalilo mupema wa kulilongesa. Darko, umwe mukulwana yamba ngwenyi: “Nakuzanga kulianyina yikuma yilemu yize nawana mu longeso liami lia wika, nawa nakuzanga kusolola uwahililo uze nakwivwa ha kulilongesa Mbimbiliya. Chikwo nawa, nakulitesa ni ndumbu yoze afunyisa mu chikungulwila hanga tulilongese chimwe chikuma.” Clayton, mukulwana mukwo, yamba ngwenyi: “Nakwakolweza kutanga sango ja mu Mbimbiliya ja atu waze apalikile mu kapinda ngwe wa ayo, ni kumona malongeso waze mahasa kuwanaho.”

Pwenu tufunga apema. Atu waze afunyisa mu chikungulwila, hanamono makulwana makalakala ngwe ngaji. Haliapwila muchilita kwamona ngwe tufunga. (Jere. 23:4) Kashika, lipupwisenu kwapanjika ni kwachichimieka. Nungenu ni kuhanjika no. Talenu yize Marcos, umwe mukulwana akulinga muze akuya ni kumeneka mandumbu jacho. Iye yamba ngwenyi: “Twakushimutwina no limwe nyonga lia mu Mbimbiliya ni kwachichimieka. Twakwalweza nawa ngwetu, tunawahilila chinji ha tachi jize asa hanga ahiluke kuli Yehova nawa ngwo, iye kanawahilila chinji hali ayo. Kusongo lia kwameneka, twakwalweza tangwa lize mutukaameneka nawa.”

a Majina amwe ha mutwe uno kapwa kwalumuna.