UTULIKILO WA MIKANDA HA INTERNET wa Watchtower
Watchtower
UTULIKILO WA MIKANDA HA INTERNET
Chokwe
  • MBIMBILIYA
  • MIKANDA
  • KUKUNGULUKA
  • w22 Dezembro ma. 2-7
  • Mutuhasa Kutwama ku Miaka Yeswe

Kukushi nichimwe chinema.

Lisesa, kwasoloka kapalia ha kwazulula chinema.

  • Mutuhasa Kutwama ku Miaka Yeswe
  • Kaposhi wa Kutalila Kanambujola Wanangana (Wakulilongesa)—2022
  • Mitwe ya Yikuma
  • Yikuma Yalifwa
  • YEHOVA WA MUTOLO
  • KATUTANGILE TUTWAME KU MIAKA YESWE
  • UPALE WA YEHOVA KUWALUMUKINE
  • KUTALATALA CHIPEMA CHA KULUTWE LIA MATANGWA
  • Yika Zambi Alingile?
    Kaposhi wa Kutalila Kanambujola Wanangana (Mbunga)—2019
  • Yena Muhasa Kutwama Miaka Yeswe Hano Hashi
    Kaposhi wa Kutalila Kanambujola Wanangana (Mbunga)—2018
  • Lemesa Chihela che mu Usoko wa Yehova
    Kaposhi wa Kutalila Kanambujola Wanangana (Wakulilongesa)—2021
  • Upale wa Yehova Muukamanunuka Pundu!
    Kaposhi wa Kutalila Kanambujola Wanangana (Wakulilongesa)—2017
Tala Nawa Yikwo
Kaposhi wa Kutalila Kanambujola Wanangana (Wakulilongesa)—2022
w22 Dezembro ma. 2-7

MUTWE WAKULILONGESA 49

Mutuhasa Kutwama ku Miaka Yeswe

“Uno we mwono wa mutolo.”—YOA. 17:3.

MWASO 147 Chilakenyo cha Mwono wa Mutolo

CHIKUMA CHILEMUa

1. Kuchi kupukuna ha chilakenyo cha mwono wa mutolo chakutukwata?

YEHOVA kanalakenya ngwenyi, atu waze akumwononokena makapwa ni “mwono wa mutolo.” (Roma 6:23) Muze twakupukuna ha yize Yehova hanatulakenya zango lietu kuli iye liakukola chinji. Yehova kakutuzanga chinji, chikwo nawa kanazange kutwama ni yetu ku miaka yeswe.

2. Kuchi kutalatala cha mwono wa mutolo chakutukwasa?

2 Kutalatala cha mwono wa mutolo uze Zambi anatulakenya chakutukwasa kukumba yipikalo ya ku mwono. Chipwe ngwe, akwa-kole jetu matulakenya kufwa, nihindu kutuchi kulitwamina kuwayila Yehova. Mumu liaka? Mumu tunanyingika ngwetu, nyi twashishika kuli Yehova ndo ku kufwa, Iye makatuhindwisa cheka ni kupwa ni kutalatala cha kutwama ku miaka yeswe. (Yoa. 5:28, 29; 1 Kori. 15:55-58; Hepre. 2:15) Mba yikuma yika yakutwaha shindakenyo ngwetu, mutukatwama ku miaka yeswe? Tutalenu yimwe.

YEHOVA WA MUTOLO

3. Mumu liaka mutuhasa kupwa ni shindakenyo ngwetu, Yehova makatwaha mwono wa mutolo? (Samu 102:12, 24, 27)

3 Tunanyingika ngwetu, Yehova mahasa kutwaha mwono wa mutolo, mumu iye mwe chishina cha mwono, chikwo nawa katwama wa mutolo. (Samu 36:9) Tutalenu yisoneko yimwe ya mu Mbimbiliya yinashindakenya ngwo Yehova katwama wa mutolo chikwo nawa, manunga wa mutolo. Samu 90:2 yinambe ngwo: “Chize ku miaka ya mutolo ndo ku miaka ya mutolo, yena uli Zambi.” Samu 102 ha versu jinji nejo jinahanjika ha chikuma chinochene. (Tanga Samu 102:12, 24, 27.) Hakutwala kuli Yehova Profeta Habakuke yasoneka ngwenyi: ‘Yehova Zambi yami! Mwe Musandu wami! Hi nuli wa mutolo ko? Kashika kunuchi kufwa.’—Haba. 1:12.

4. Shina twatamba kulipikala nyi chinapu chikalu kunyingika kanawa chize Yehova apwa wa mutolo? Lumbununa.

4 Shina chakupwa chikalu kuli yena kutayiza ngwe, Yehova katwama wa “mutolo”? (Iza. 40:28) Nyingika ngwe hi chipi ko kunyonga chocho. Elihu kambile chino hakutwala kuli Zambi ngwenyi: “Kutwahashile kunyingika kwalula cha miaka yenyi.” (Yombi 36:26) Yuma yimwe yapwa yikalu kunyingika, alioze chino chalumbunukine ngwo, hi yamwenemwene ko. Chakutalilaho, anji a kuli yetu kutwanyingikine chize kahia kazembwe kakukalakala, alioze chino kuchalumbunukine ngwo katwamineko. Chizechene nawa, chakupwa chikalu chinji kuli yetu kunyingika kanawa chize Yehova apwa wa mutolo. Alioze chino kuchalumbunukine ngwo, iye hi wa mutolo ko, kupwa cha Tangi yetu kuchatalile ha yize yakutulumbunuka hanji ka. (Roma 11:33-36) Yehova kaliangile kupwako shimbu te kanda chuma nichimwe hano hashi chipwa kutanga ngwe, mwalwa ni tutongonoshi. Chikwo nawa, kanatwehe shindakenyo ngwetu, Iye mwe “watangile hashi ni tachi jenyi” ni ‘kuzazulula malilu.’ (Jere. 51:15; Yili. 17:24) Shindakenyo yikwo yika tuli nayo ngwetu, mutuhasa kutwama ku miaka ya mutulo?

KATUTANGILE TUTWAME KU MIAKA YESWE

5. Yika Alama ni Eva te mapwa nayo nyi kononokene Yehova?

5 Shina Yehova kalingile yitangiwa yeswe yikapwe ni mwono wa mutolo? Ka. Atu wika e atangile akapwe ni mwono wa mutolo. Chipwe chocho, Yehova katowezele Alama ngwenyi: “Alioze ku mutondo wa chinyingi cha chipema ni chipi, kanda uliako, mumu tangwa muoliako kumukafwa lume.” (Uputu. 2:17) Nyi Alama ni Eva kononokene Yehova kachi te kakafwile. Chinasoloka ngwe, kulutwe Yehova te maatayiza kulia “ku mutondo wa mwono.” Chino te muchisolola ngwo, kali ni uhashi wa kutwama ni “mwono miaka yeswe.”b—Uputu. 3:22.

Yize liji “Mutolo” linalumbunuka mu Mbimbiliya

Liji lia Hepreu ʽoh·lamʹ, kanji-kanji kakulilumbununa ngwo, kutwama ku miaka yeswe. Mu Mbimbiliya, liji liacho mulihasa kutala ha chuma chize chatwamako ha miaka yinji, hanji chize muchinunga ni kutwama ku miaka yinji kulutwe, chize kuchishi uputukilo hanji songo. (Yoshu. 24:2; Samu 24:7, 9) Mulihasa kutala nawa ha chuma chize kuchichi keza kapwa ni songo. Yehova kapwa wa mutolo mu mutapu uno. (Samu 102:12, 24, 27) Mbimbiliya Tradução do novo Mundo yakulumbununa liji liacho lia Hepreu ngwo: “Miaka yeswe,” “mutolo,” hanji “miaka ya mutolo.” Contexto ye yakusolola chize mazachisa liji liacho.

6-7. (a) Yika yinasolola ngwo katutangile hanga tutwame ku miaka yeswe? (b) Yuma yika yize unazange kulinga mu chifuchi chaha? (Tala yizulie)

6 Kanji-kanji atu kakutwama ni mwono miaka 70 hanji 80. Akwa mana amwe kambile ngwo, wongo muhasa kutulika sango ha miaka yinji. Ha mwaka 2010 umwe mukanda wa ciência yiwamba ngwo, wongo muhasa kutulika yuma yinji. (kuhiana 2.5 gigabytes) Chino mutuhasa kuchitesa ni 3 milhões a maola (unji wa miaka 300) waze atu mahasa kupalikisa ha kutala yinema. Alioze chinasoloka ngwe, wongo muhasa kutulika sango jinji kuhiana. Uhashi wa wongo kutulika sango jinji unasolola ngwo, Yehova katutangile hanga tutwame miaka yinji kuhiana 70 hanji 80 a miaka.—Samu 90:10.

7 Yehova katutangile nawa ni nyonga lia kutwama ku miaka yeswe. Mbimbiliya yinambe ngwo, Zambi hanase “ye miaka yeswe mu mbunge.” (Chilu. 3:11) Kashika twakumona kufwa ngwe mukwa kole yetu. (1 Kori. 15:26) Chakutalilaho, nyi twanyingika ngwetu mutu umwe kanayiji, shina twakumwecha chizechene? Ka. Kanji-kanji twakufupa mbuki hanga amuuke. Kwamba umwenemwene, yetu eswe twakulifunga hanga tuchine kufwa. Muze twakufwisa mutu yoze twazanga, chipwe ngwe kali kanuke hanji mukulwana, nihindu twakunenganyana ni kwivwa yikola ku mbunge. (Yoa. 11:32, 33) Kwamba pundu, nyi Yehova kazangile tutwame ha miaka yikehe, kachi katutangile ni nyonga lia kutwama ku miaka yeswe. Kuli nawa yikuma yikwo yakutwaha shindakenyo ngwetu mutuhasa kutwama ku miaka yeswe. Tutalenu yuma yimwe yize Yehova alingile kunyima ni yize analingi musono yinasolola ngwo, nyonga lienyi lia atu kutwama ku miaka ya mutolo kulialumukine.

Yizulie: Ndumbu yoze hakola kanatwama ku mesa, helu hali yitumbo, kanatange Mbimbiliya ni kunyonga ha yuma yize makapwa ni uhashi wa kulinga ni tachi jeswe mu chifuchi chaha. 1. Iye kanende ni wato. 2. Kanafunjika yizulie ha quadro. 3. Kanende kusesa lia chipupa.

Muchipema chinji nyi twamana hanga tunyonge ha yuma yize mutukalinga kulutwe lia matangwa muze mutukapwa ni mwono wa mutolo (Tala paragrafu 7)c

UPALE WA YEHOVA KUWALUMUKINE

8. Yika mukanda wa Izaia 55:11 unatulongesa hakutwala ku upale wa Yehova?

8 Alama ni Eva kalingile shili kashika etu eswe twakufwa. Chipwe chocho, Yehova kalumwine chilakenyo chenyi. (Tanga Izaia 55:11.) Nihindu kanazange hanga atu waze ashishika akatwame ku miaka yeswe. Yino yinasoloka zwalala ha yuma yize hanambe ni yize akulinga hanga amanunune upale wenyi.

9. Yika Yehova alakenyene? (Daniele 12:2, 13)

9 Yehova kanalakenya ngwenyi, mahindwisa atu waze hanafu ni kwaha kutalatala cha mwono wa mutolo. (Yili. 24:15; Titu 1:1, 2) Yombi, kavumbi washishika wa Yehova kapwile ni shindakenyo ngwenyi, Yehova kakwivwa usona wa waze hanafu, chikwo nawa kanazange kwahindwisa cheka. (Yombi 14:14, 15) Profeta Daniele kanyingikine ngwenyi, atu te mahindwisa ni uhashi wa kutwama ku miaka yeswe. (Samu 37:29; tanga Daniele 12:2, 13.) Ha mashimbu ja Yesu, A-Yunda kanyingikine ngwo tuvumbi twa Zambi ashishika te mapwa ni “mwono wa mutolo.” (Luka 10:25; 18:18) Yesu neye ha yisuho yinji kahanjikile hakutwala ku kutalatala chacho, mumu mwene neye kamuhindwishile kuli Yehova.—Mateu 19:29; 22:31, 32; Luka 18:30; Yoa. 11:25.

Tuliwa wa ku Zarafata kanawahilila ha kutambula mwanenyi yoze ahindwisa kuli profeta Eliya.

Uhindukilo uze Eliya alingile shindakenyo yika unatwehe? (Tala paragrafu 10)

10. Uhindukilo uze walingiwile kunyima yika unasolola? (Tala chizulie.)

10 Yehova mwe chishina cha mwono, kakwete ndundo ja kuhindwisa waze hanafu. Iye kahanyine ndundo kuli profeta Eliya hanga ahindwise mwana wa tuliwa ku Zarafata. (1 Mia. 17:21-23) Kulutwe, Yehova yakwasa nawa profeta Elisha hanga ahindwise mwana wa umwe pwo Ka-Shuneme. (2 Mia. 4:18-20, 34-37) Uhindukilo uno ni ukwo nawa unasolola ngwo, Yehova kali ni ndundo ja kuhindwisa waze hanafu. Yesu muze apwile hano hashi kasolwele ngwenyi, Tato kamuhele ndundo jacho. (Yoa. 11:23-25, 43, 44) Haliapwila Yesu kali mu malilu, hanamwehe yiyulo “yeswe mwilu ni hashi.” Kashika kali ni ndundo ja kumanuna chilakenyo cha kwamba ngwo: “Waze eswe ali mu mafuka” makevwa liji lienyi ni kutuhuka hanga akapwe ni kutalatala cha kutwama ku miaka yeswe.—Mateu 28:18; Yoa. 5:25-29.

11. Uhashi uka ukule wakutwaha?

11 Mumu liaka Yehova echele mwanenyi hanga afwe? Yesu mwene kambile ngwenyi: “Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.” (Yoa. 3:16) Chitapo cha ukuule wa Yesu chakutwaha uhashi hanga Zambi akonekene shili yetu ni kutwaha uhashi wa kuzuka mwono wa mutolo. (Mateu 20:28) Postolo Paulu kalumbunwine chikuma chino chilemu cha upale wa Yehova muze asonekene ngwenyi: “Mumu se kuli mutu kufwa chejilile, kuli mutu nawa uhindukilo wa afu wejilile. Mumu chizechene ngwe muli Alama eswe kakufwa, chocho nawa muli Kristu maapwisa eswe ni mwono.”—1 Kori. 15:21, 22.

12. Kuchi Yehova makazachisa Wanangana hanga akamanune upale wenyi?

12 Yesu kalongesele tumbaji twenyi alembe hanga Wanangana wa Zambi wize ni upale wenyi ulingiwe hano hashi. (Mateu 6:9, 10) Hakachi ka upale wa Zambi ukwo uli ngwo, atu atwame hano hashi. Yehova hanase Yesu ngwe Mwanangana mu Wanangana wa Mesaya mba amanune upale wacho. Kashika, Yehova kanakunga Akwa-Kristu akuwayisa 144.000 waze makakalakala hamuwika ni Yesu hanga akamanune upele wenyi.—Uso. 5:9, 10.

13. Yika Yehova analingi hanga amanune upale wenyi, mba yika yetu twatamba kulinga?

13 Yehova kanakunga “mbunga yinene” ya atu ni kwafumba hanga akahase kutwama mu Wanangana wenyi. (Uso. 7:9, 10; Tia. 2:8) Chipwe ngwe twatwama mu chifuchi chalihandununa mumu lia kole ni jita, nihindu waze akulinga chihanda ku mbunga yinene kakusa tachi hanga akumbe kole hanji katonde mweswawo wakusoloka hamukunda wa munyachi hanji chikowa, chakupwa ngwe, kanalumuna “tutana two mu yikungo ya sharua.” (Mika 4:3) Shimbu alinjise mu jita ayo kakukwasa atu hanga apwe ni mwono wamwenemwene, ha kwalongesa hakutwala kuli Zambi wamwenemwene ni upale wenyi. (1 Timo. 6:19) Mumu lia kukwasa Wanangana wa Zambi, mahasa kwahungumiona kuli asoko hanji kuhona yakulikwasa nayo ku mwono, alioze Yehova kakwaha yeswe yize akufupiwa. (Mateu 6:25, 30-33; Luka 18:29, 30) Yino yeswe yinasolola ngwo Wanangana wa Zambi unayulu, muununga ni kumanuna upale wa Yehova.

KUTALATALA CHIPEMA CHA KULUTWE LIA MATANGWA

14-15. Kuchi Yehova makamanuna chilakenyo chenyi cha kuhwisa kufwa ku miaka yeswe?

14 Haliapwila, Yesu kali Mwanangana mu malilu, halilulieka hanga amanune yilakenyo yeswe ya Yehova. (2 Kori. 1:20) Kukatuka ha mwaka 1914 Yesu kanayulu hakachi ka akwa kole jenyi. (Samu 110:1, 2) Kwasala hakehe iye ni Akwa-Kristu akuwayisa manongesa atu api hashi heswe.—Uso. 6:2.

15 Ha kanunu ka miaka ya kuyula cha Yesu iye makahindwisa afu ni kukwasa atu waze akwononokena Zambi akapwe angunu. Hanyima lia cheseko cha kasula waze eswe makapatwila ngwo, akwa ululi “makatwama hano hashi ku miaka yeswe.” (Samu 37:10, 11, 29) Kusulaho, makakumba “mukwa kole wa kasula kufwa.”—1 Kori. 15:26.

16. Chikuma chika chilemu chize chakutukwasa kulingila Yehova?

16 Ngwe chize twamona ha mutwe uno, kutalatala chetu cha kupwa ni mwono wa mutolo chinakatuka ha Mbimbiliya. Kutalatala chacho, muchihasa kutukwasa kununga ni kushishika kuli Yehova ha mashimbu wano akalu. Alioze, kutwatambile wika kumulingila mumu ngwo, mutukazuka mwono wa mutolo. Chikuma chilemu chize twakushishikila kuli Yehova ni Yesu chili ngwo, mumu twakwazanga. (2 Kori. 5:14, 15) Zango liacho mulitukwasa kwimbulula Yehova ni Yesu ni kulihana chinji mu mulimo wa kwambujola. (Roma 10:13-15) Nyi twehuka kunyonga hali yetu ene wika ni kupwa yihanyi, Yehova mazanga kupwa sepa lietu ku miaka yeswe.—Hepre. 13:16.

17. Yika hita umwe wa kuli yetu atamba kusakula? (Mateu 7:13, 14)

17 Shina yetu tuli mukachi ka waze makatwama ku miaka yeswe? Yehova kanatwehe uhashi wacho. Kashika chinatale hali hita umwe wa kuli yetu nyi mutununga ni kusakula kwenda mu jila ya mwono. (Tanga Mateu 7:13, 14.) Kuchi mwono muukapwa muze mutukatwama ku miaka yeswe? Mutukamona kumbululo lia chihula chino ha mutwe muuhataho.

KUCHI MUNUHASA KUKUMBULULA?

  • Shindakenyo yika tuli nayo ngwetu, atu kaatangile hanga atwame ku miaka yeswe?

  • Kuchi tunanyingika ngwetu, Yehova kalumwine nyonga lienyi lia atu kuzuka mwono wa mutolo?

  • Nyonga lika lilemu twatamba kupwa nalio hakutwala ku mwono wa mutolo?

MWASO 141 Chikomokeso cha Mwono

a Pundu lume, kota unashimbwila tangwa lize mutukatwama ku miaka yeswe. Yehova che anatulakenya kutwama chakuhona kulihulumba ni kufwa. Ha mutwe uno, mutuhengwolaho yikuma yimwe yize yakutwaha shindakenyo ngwetu, Yehova makamanuna yilakenyo yacho.

b Tala mushete unambe ngwo, “Yize liji ‘mutolo’ linalumbunuka mu Mbimbiliya.”

c ULUMBUNWISO WA CHIZULIE: Ndumbu yoze hashinakajiwa kananyongo ha yize makalinga muze makapwa ni mwono wa mutolo.

    Mikanda ya Chokwe (2008-2025)
    Fwambuka
    Njila
    • Chokwe
    • Tuma
    • Kululieka
    • Copyright © 2025 Watch Tower Bible and Tract Society of Pennsylvania
    • Shimbi Yakuyizachisa
    • Shimbi ja Kufunga Sango ja Mutu
    • Configurações de Privacidade
    • JW.ORG
    • Njila
    Tuma