Shina Hiwalilulieka hanga “Uzuke Chifuchi Chaha”?

Tunashimbwila tangwa lize maliji ali ha Mateu 5:5 makamanunuka akwamba ngwo: “Kawaha akwa kushimbika, mumu kumakahinga he hashi.” Akwa-Kristu akuwayisa makazuka hano hashi muze makapwa Mianangana mu malilu ni Yesu. (Uso. 5:10; 20:6) Alioze Akwa-Kristu akwo, makatwama hano hashi ku miaka ya mutolo ni ungunu ni sambukila ni uwahililo. Ayo makapwa ni milimo yinji ya kulinga mba yino yilingiwe. Tuhengwolenu yilweza yitatu: Kupwisa hashi Paraisu, kufunga atu waze makahindwisa ni kulongesa waze makahindwisa. Tala chize muhasa kusolola haliapwila ngwe, unazange kulinga milimo yacho mu Paraisu.

SHINA HIWALILULIEKA HANGA UKAPWISE HASHI PARAISU?

Muze Yehova alwezele atu ngwenyi: “Semenu nukaliokese, nukazalise hashi, ni kuyulaho,” iye te kanazange hanga hakehe-hakehe hashi heswe hapwe Paraisu. (Uputu. 1:28) Waze makazuka hano hashi, makafupiwa kukaula shimbi jacho. Chipwe ngwe munda wa Endene kuwatwamineko nawa, chino kuchalumbunuka ngwo, mutukaputuka yuma yeswe cheka. Hanyima lia Armagedone, mutukapwa ni milimo yinji hanga tukapemese hashi haze atu anapihisa. Kashika, mutukapwa ni milimo yinji ya kulinga!

Yino yinatwiwulula nawa milimo yize A-Izalele apwile nayo muze akatukile ku Babilonia ni kuya ku Yerusaleme. Kwapalikile miaka 70 chakuhona kutwamamo kuli mutu nyiumwe. Alioze Izaia kambile ngwenyi, ni ukwaso wa Yehova ayo te mafuna mu chifuchi chocho hanga atwamemo ni kuchipemesa cheka. Uprofeto wambile ngwo: “Kumakapwisa puya yenyi ngwe Endene. Kango yenyi muyipwa ngwe munda wa Yehova.” (Iza. 51:3) Yino yalingiwile lume. Chizechene nawa, ni ukwaso wa Yehova atu waze makazuka chifuchi makapwisa hashi Paraisu. Kuli yuma yize muhasa kulinga haliapwila hanga usolole ngwo, unazenge kulinga mulimo wacho.

Chuma chimwe chize muhasa kulinga chili, kupemesa zuwo lie hanji ngwetu, kukosa-kosa yuma ya mu zuwo ni kuyisa ha chihela chayo. Muhasa nawa kukwasa kukomba ni kululieka Zuwo lia Wanangana ni ku chihela kuze twakulingila kukunguluka cha mbonge ni cha mambonge. Nyi uli ni uhashi muhasa nawa kulihana hanga ukwase kuze kwasoloka luyinda. Nyi walinga chino musolola ngwo, unazange kukwasa mandumbu je. Kashika lihule ngwe: ‘Utotombo uka munguhasa kulilongesa haliapwila uze mungukazachisa mu chifuchi chaha?’

Chimwe chizavu cha mandumbu kanakombo ni kululieka Zuwo lia Wanangana.

SHINA HIWALILULIEKA HANGA UKAKWASE WAZE MAKAHINDWISA?

Muze ahindwishile mwana wa Yaru, Yesu kambile ngwenyi, mwehenu chimwe cha kulia. (Marku 5:42, 43) Kota chakapwile chikalu kukwasa mwana wa miaka 12. Haliapwila, tunyongenu ha milimo yeswe yize mutukapwa nayo muze Yesu makamanununa chilakenyo chenyi chakwamba ngwo: “Waze eswe ali mu mafuka makevwa liji lienyi, makatuhuka.” (Yoa. 5:28, 29) Chipwe ngwe Mbimbiliya kuyishi kulumbununa mu yimako-yimako yize ayo makafupiwa, nihindu mutuhasa kushimbwila ngwetu, kota ayo makafupiwa kulia, mazalo ni haze makatwama. Mba kuchi mutuhasa kusolola chipwe haliapwila ngwetu, tunazange kukwasa? Tuhengwolenu yimwe yihula.

Yika muhasa kulinga musono hanga usolole ngwo, hiwalilulieka hanga ukazuke chifuchi chaha?

Mandumbu ni mapangi kanawahilila ha kutambwisa mandumbu waze anakatuka ku yifuchi yikwo hanga atale kukunguluka cha yifuchi yeswe mu mbonge ya Paris.

Muze wakwivwa ngwo, manumeneka kuli kalayi wa mbonge, shina wakulihana hanga umuzumbule ku zuwo lie? Shina muhasa kukwasa mandumbu waze apwanga ku Mbetele mba yaatuma mu munda ni Kalayi wa mbonge yoze wecha mulimo wenyi, hanga awane chihela chize matwama? Shina wakulihana hanga ukwase shimbu kanda kukunguluka cha mbonge ni cha mambonge chiputuka ni muze chakuhwa? Nyi hanji wakulihana hanga utambule ku zuwo lie mandumbu waze akukatuka kusuku?

SHINA HIWALILULIEKA HANGA UKALONGESE WAZE MAKAHINDWISA?

Kulita ni mukanda wa Yilinga 24:15, chinasoloka ngwe makahindwisa tununu a tununu twa atu. Anji a kuli atu jacho kali waze kakapwile ni uhashi wa kunyingika Yehova muze te kanda achifwa. Ayo makapwa ni uhashi wa kunyingika Yehova muze makaahindwisa.a Zambi makazachisa tuvumbi twenyi ashishika hanga akalongese waze eswe makahindwisa. (Iza. 11:9) Pangi avuluka ngwo, Charlotte yoze hanambujola mu Europa, América do Sul ni mu África, kanazange kulinga chinji mulimo uno. Iye yamba ngwenyi: “Ngunazange chinji kulongesa atu waze makahindwisa. Muze nakutanga sango ja umwe mutu watwamine ku mashimbu anji kunyima, nakunyonga ngwami, nyi ngwe mutu yono kanyingikine Yehova, kachi mwono wenyi wapwile weka. Ngunashimbwila tangwa lize makahindwisa afu hanga ngukaalongese.”

Chipwe tuvumbi twa Yehova ashishika waze atwamine hano hashi shimbu Yesu te kanda achiza, makapwa ni yuma yinji ya kulilongesa. Achinyonga ha chiseke chize mutukevwa muze mutukalumbunwina Daniele, umanunuko wa uprofeto uze asonekene uze te kuushi kumulumbunuka kanawa. (Danie. 12:8) Hanji, achinyonga chize muchikapwa chipema kulumbunwina Rute ni Noemi ngwo, Mesaya kejilile ku munyachi wo! Kwamba pundu, muchikapema chinji kulinga mulimo wa kwambujola wa hashi heswe chakuhona kupalika mu yeseko ni mu yihungumiona ya chifuchi chino chipi twatwama!

Umwe pangi kanahana kamukanda kuli mwenya zuwo.

Yika muhasa kulinga haliapwila hanga usolole ngwo, hiwalilulieka ukalongese waze makahindwisa? Chuma chimwe chize muhasa kulinga chili kusa tachi hanga ululieke mulali we wa kulongeselamo ni kulihana chinji mu mulimo wa kwambujola. (Mateu 24:14) Chipwe ngwe haliapwila kuushi kuhasa kwambujola ngwe chize wakuzanga mumu lia ushinakaji hanji yuma yikwo, nihindu muhasa kusolola ngwo, unazange chinji kwambulwila waze makahindwisa ha kulihana chinji ni kwambujola haliapwila.

Shina unazange lume kuzuka chifuchi chaha? Shina unatwaminyina tangwa lize makahindwisa afu hanga ukaakwase ni kwalongesa? Muhasa kusolola ngwo hiwalilulieka, ha kuzachiza uhashi uze uli nawo haliapwila hanga ulinge yuma yize mukalinga nawa muze mukazuka chifuchi chaha.

a Tala chikuma ‘Makatewulwila Anji ku Ululi’ ha Kaposhi wa kutalila wa Setembro 2022.